ភ្ជាប់​ទៅ​គេហទំព័រ​ទាក់ទង

គណៈកម្មការ​បោះឆ្នោត​ថៃ​ផ្អាក​ការ​បញ្ជាក់​យក​ជ័យជម្នះ​របស់​នាយករដ្ឋមន្រ្តី​ថ្មី​


ស្រី​ម្នាក់​​ប្រើ​ទូរស័ព្ទ​ដៃ​ដើម្បី​​ថត​រូប​លោក​ស្រី Yingluck Shinawatra បេក្ខជន​នាយករដ្ឋមន្ត្រី​ជាប់​ឆ្នោត​ថ្មី​របស់​គណបក្ស​ភឿថៃ​ ខណៈពេល​ដែល​លោក​​ស្រី​ថ្លែង​ទៅ​កាន់​អ្នក​យក​ព័ត៌មាន​នៅ​ឯ​ទី​ស្នាក់ការ​គណបក្ស​ក្នុង​​ទី​ក្រុង​បាងកក​កាល​ពី​ថ្ងៃ​ទី​១៣​ខែ​កក្ក

គណៈកម្មការ​រៀបចំ​ការ​បោះ​ឆ្នោត​ប្រទេស​ថៃ​បាន​ពន្យារ​ពេល​ការ​បញ្ជាក់​ជា​ត្រឹម​ត្រូវ​នូវ​ជ័យ​ជម្នះ​ ទាំង​របស់​នាយក​រដ្ឋមន្រ្តី​ជាប់​ឆ្នោត​ យីងឡាក់​ ស៊ីណាវ៉ាត្រ​ (Yingluck Shinawatra)​ ទាំង​របស់​អតិត​មេ​ដឹក​នាំ​ អាភីស៊ិត​ វិចាជីវ៉ា​ (Abhisit Vejjajiva)​ ដោយ​បាន​និយាយ​ថា ​គណៈកម្មការ​កំពុង​តែ​ពិនិត្យ​មើល​ការ​តវ៉ា​អំពី​ភាព​មិន​ប្រក្រតី​នៅ​ក្នុង​ការ​បោះ​ឆ្នោត។​ លោក​ស្រី​ យីងឡាក់​ មិន​ចាត់​ទុក​សេចក្តី​សម្រេច​នេះ​ថា​ជា​រឿង​សំខាន់​ទេ​ តែ​នេះ​គឺ​គ្រាន់​តែ​បញ្ហា​មួយ​ក្នុង​ចំណោម​បញ្ហា​ជា​ច្រើន​ដែល​លោក​ស្រី​កំពុង​ជួប​ប្រទះ​មុន​និង​អាច​បង្កើត​រដ្ឋាភិបាល​ថ្មី​មួយ​បាន។

គណៈកម្មការ​រៀបចំ​ការ​បោះ​ឆ្នោត​ប្រទេស​ថៃ​កំពុង​ធ្វើ​ការ​ស៊ើប​អង្កេត​ពាក្យ​តវ៉ា​អំពី​ភាព​មិន​ប្រក្រតី​និង​ការ​លួច​បន្លំ​នៅ​ក្នុង​ការ​បោះ​ឆ្នោត​នៅ​ថ្ងៃ​ទី​៣​កក្កដា​ ហើយ​បាន​ផ្អាក​ការ​ប្រគល់​ជ័យ​ជម្នះ​ជូន​មេ​ដឹក​នាំ​គណបក្ស​ភឿថៃ​វ័យ​៤៤​ឆ្នាំ​ លោក​ស្រី​ យីងឡាក់​ ស៊ីណាវ៉ាត្រ។

លោក​ស្រី​ យីងឡាក់​ និង​អ្នក​កាន់​តំណែង​បច្ចុប្បន្ន​ដែល​ទទួល​បរាជ័យ​ គឺ​លោក​ អាភីស៊ិត​ វិចាជីវ៉ា​ ជា​បេក្ខជន​ពីរ​នាក់​ក្នុង​ចំណោម​បេក្ខជន​ជាង​ ១៤០​នាក់​ ដែល​មិន​ទាន់​បាន​ទទួល​ការ​បញ្ជាក់​អំពី​ជ័យ​ជម្នះ​របស់​ខ្លួន​នៅ​ឡើយ​ សម្រាប់​តំណែង​នៅ​ក្នុង​សភា​តំណាងរាស្រ្ត​ដែល​មាន​អសនៈ​ចំនួន​៥០០។

លទ្ធផល​ក្រៅ​ផ្លូវ​ការ​បង្ហាញ​ថា​គណបក្ស​លោក​ស្រី​ យីងឡាក់​ បាន​ឈ្នះ​អសនៈ២៦៥​ នៅ​ក្នុង​ការ​បោះឆ្នោត។​ លោក​ស្រី​បាន​និយាយ​កាល​ពី​ថ្ងៃ​ពុធ​ថា​ លោក​ស្រី​នៅ​មាន​សេចក្តី​ទុក​ចិត្ត​ថា​គណៈកម្មការ​នឹង​យល់​ព្រម​ទទួល​យក​ជ័យជម្នះ​របស់​លោក​ស្រី។​ លោក​ស្រី​និយាយ​ថា​ ការ​ពន្យារ​ពេល​បែប​នេះ​ជា​ការ​ធម្មតា។

ជ័យ​ជម្នះ​របស់​គណបក្ស​ ភឿថៃ​ ស្ថិត​នៅ​លើ​គោល​នយោបាយ​ប្រជាប្រិយនិយម​ រួម​មាន​ការ​សន្យា​ថា​នឹង​តម្លើង​ប្រាក់​ឈ្នួល​អប្បបរមា​ពី​៥ ​ដុល្លារ​ ទៅ​ ១០​ដុល្លារ​ តម្លើង​តម្លៃ​អង្ករ​ តម្លើង​ថវិកា​សម្រាប់​កម្មវិធី​អភិវឌ្ឍ​ជនបទ​ ផ្តល់​កម្មវិធី​ថែទាំ​សុខភាព​តម្លៃ​ថោក​ និង​ផ្តល់​កុំព្យូទ័រ​តូចៗ​ (Tablet Computer)​ ទៅ​ឲ្យ​កូនសិស្ស។

ក្រុម​អ្នក​វិភាគ​នយោបាយ​និយាយ​ថា​ ការ​ពន្យារ​ពេល​ការ​ប្រគល់​ជ័យ​ជម្នះ​នេះ​គឺ​គ្រាន់តែ​បញ្ហា​មួយ​ក្នុង​ចំណោម​បញ្ហា​មួយ​ចំនួន​ដែល​លោក​ស្រី​ពាណិជ្ជករ​ ដែល​មិន​ដែល​បាន​ចូល​កាន់​តំណែង​ក្នុង​ការិយាល័យ​នយោបាយ​ពី​មុន​មក​ កំពុង​ប្រឈម​ជា​មួយ។

លោក​ ស៊ូរ៉ាត់​ ហោរាឆៃគល់​ (Surat Horachaikul)​ ព្រឹទ្ធបុរស​រង​នៃ​សាលា​វិទ្យាសាស្រ្ត​នយោបាយ​នៅ​សាកលវិទ្យាល័យ​ ជូឡាឡុងកន​ (Chulalongkorn University)​ និយាយ​ថា​ បញ្ហា​នៅ​មាន​ចោទ​អំពី​សមត្ថភាព​របស់​លោក​ស្រី​ យីងឡាក់ ក្នុង​ការ​ដឹក​នាំ​រដ្ឋាភិបាល​ និង​អំពី​មុខ​នាទី​របស់​បង​ប្រុស​របស់​លោក​ស្រី​ គឺ​លោក​អតិត​នាយក​រដ្ឋមន្រ្តី​ ថាក់ស៊ិន​ ឈិនណាវ៉ាត់។

«តើ​លោក​ស្រី​ យីងឡាក់​ នឹង​ដឹកនាំ​ប្រទេស​តាម​របៀប​ណា?​ តើ​លោក​ស្រី​នឹង​កាន់​អំណាច​ដោយ​មាន​ឬ​ដោយ​មិន​មាន​បង​ប្រុស​របស់​លោក​ស្រី?​ រួច​នៅ​មាន​សំនួរ​ដ៏​ធំ​មហិមា​មួយ​ គឺ​ថា​ តើ​លោក​ស្រី​នឹង​ធ្វើ​យ៉ាង​ណា?​ តើ​លោក​ស្រី​ធ្វើ​ដូច​ម្តេច​ដើម្បី​ដោះ​ស្រាយ​ការ​ទាមទារ​របស់​បក្ស​ពួក​ផ្សេងៗ​នៅ​ក្នុង​ក្រុម​អាវ​ក្រហម​ ដែល​គាំទ្រ​លោក​ស្រី?​ ឥឡូវ​នេះ​ យើង​ក៏​អាច​ឃើញ​ហើយ​ថា​ ក្រុម​ការងារ​ចង់​បាន​ទទួល​ប្រាក់​ ៣០០​បាត​ក្នុង​មួយ​ថ្ងៃ​សម្រាប់​ប្រាក់​ឈ្នួល​អប្បបរមា។​ នេះ​គឺ​ពិត​ជា​បញ្ហា​ដ៏​ធំ​មួយ​ តើ​លោក​ស្រី​ យីងឡាក់​នឹង​គាំទ្រ​តាម​របៀប​ណា?»

បង​ប្រុស​លោក​ស្រី​ត្រូវ​ទម្លាក់​ចេញ​ពី​តំណែង​ក្នុង​រដ្ឋប្រហារ​ឆ្នាំ​ ២០០៦​ ហើយ​កំពុង​រស់​នៅ​និរទេស​នៅ​ទីក្រុង​ ឌូបាយ​ (Dubai)​ ដើម្បី​ជៀស​វាង​ទោស​ជាប់​ពន្ធនាគារ​អំពី​បទ​ពុក​រលួយ​ ក៏​ប៉ុន្តែ​លោក​នៅ​តែ​ជា​កម្លាំង​ដ៏​ខ្លាំង​មួយ​នៅ​ក្នុង​នយោបាយ​ប្រទេស​ថៃ។

នៅ​ក្រោយ​រដ្ឋ​ប្រហារ​ លោក​ ថាក់ស៊ីន​ បាន​ជួយ​បង្កើត​រណសិរ្ស​ប្រជាធិតេយ្យ​រួម​ប្រឆាំង​អំណាច​ផ្តាច់​ការ​ ឬ​ចលនា​អាវ​ក្រហម​ ដើម្បី​គាំទ្រ​កិច្ច​ប្រឹង​ប្រែង​របស់​លោក​ឲ្យ​បាន​ត្រឡប់​មក​កាន់​អំណាច​វិញ។

ក្រុម​អាវ​ក្រហម​ដែល​ទទួល​ការ​គាំទ្រ​ខ្លាំង​ពី​ពួក​កម្មករ​បៀវត្សរ៍​ទាប​នៅតាម​ជនបទ​នៅ​ក្នុង​ប្រទេស​ថៃ​ភាគ​ឦសាន​ បាន​ធ្វើ​មហា​បាតុកម្ម​ប្រឆាំង​រដ្ឋាភិបាល​មួយ​ចំនួន​ក្នុង​ឆ្នាំ​២០១០​ដែល​បាន​ធ្វើ​ឲ្យ​គាំង​ក្រុង​បាងកក​ទាំង​ស្រុង។

លោក​ ធិទីណាន់​ ពង់ស៊ូឌៀរ៉ាក់​ (Thitinan Pongsudhirak)​ អ្នក​វិទ្យាសាស្រ្ត​នយោបាយ​នៃ​សាកលវិទ្យាល័យ​ ជូឡាឡុងគន​ និយាយ​ថា​ រដ្ឋាភិបាល​លោក​ស្រី​ យីងឡាក់​ គួរ​ជៀស​វាង​កុំ​ផ្តាច់​ពួក​អាវ​ក្រហម​ឲ្យ​នៅ​ដាច់​តែ​ឯក​ឯង។

«បើ​សិន​ជា​គណបក្សភឿថៃ​ មិន​ឈោង​ដៃ​ឲ្យ​បាន​គ្រប់​គ្រាន់​ ឬ​មិន​ដោះស្រាយ​សេចក្តី​ប៉ង​ប្រាថ្នា​និង​ទុក្ខ​វេទនា​របស់​ពួក​គេ​ឲ្យ​បាន​គ្រប់​គ្រាន់​ទេ​ យើង​អាច​មើល​ឃើញ​ពួក​អាវ​ក្រហម​បែក​ខ្ញែក​គ្នា​ទៅ​គ្រប់​ទិស។​ បើ​គេ​មិន​បង្កើត​គណបក្ស​មួយ​ទេ​ នោះ​ពួក​គេ​នឹង​បន្ត​ប្រមូល​គ្នា​ពី​ថ្នាក់​មូលដ្ឋាន​ ពី​ថ្នាក់​ក្រោម​បំផុត​ ដោយ​ការ​អស់​សង្ឃឹម​ ហើយ​អាច​ក្លាយ​ទៅ​ជា​អង្គការ​ប្រឆាំង​មួយ​ អង្គការ​ប្រឆាំង​ពេញ​លក្ខណៈ​មួយ​ ដែល​ក្នុង​រយៈ​ពេល​យូរ​មិន​ជា​ការ​ល្អ​ទេ»។

ក៏​ប៉ុន្តែ​ក្រុម​កម្មន្តសាល​ថៃ​បាន​ព្រមាន​ជា​ស្រេច​ហើយ​ថា​ ផែនការ​តម្លើង​ប្រាក់​ឈ្នួល​ទ្វេ​ជា​ពីរ​ អាច​ធ្វើ​ឲ្យ​អតិផរណា​ឡើង​ខ្ពស់​ ធ្វើ​ឲ្យ​តម្លៃ​វត្ថុ​ប្រើ​ប្រាស់​ក្នុង​ស្រុក​និង​ទំនិញ​នាំ​ចេញ​ឡើង​ខ្ពស់។

ក្នុង​ពេល​ឥឡូវ​នេះ​ ក្រុម​អ្នក​នយោបាយ​ កំពុង​នៅ​រង់​ចាំ​សេចក្តី​បញ្ជាក់​របស់​គណៈកម្មការ​រៀប​ចំ​ការ​បោះ​ឆ្នោត។

គណៈកម្មការ​ត្រូវ​គាំទ្រ​សមាជិក​យ៉ាង​តិច​ ចំនួន​ ៤៧៥​ក្នុង​ចំណោម​បេក្ខជន​ ៥០០​នាក់​ ដើម្បី​ឲ្យ​រដ្ឋសភា​ថ្មី​អាច​ចាប់​ធ្វើ​ការ​បាន​នៅ​ដើម​ខែ​សីហា។

បើ​សិន​ជា​គណៈកម្មការ​មិន​បញ្ជាក់​ទទួល​ជ័យជម្នះ​របស់​បេក្ខជន​មួយ​ទេ​ នៅ​ពេល​នោះ​តុលាការ​រដ្ឋធម្មនុញ្ញ​និង​សម្រេច​ថា​តើ​គួរ​ដក​សិទ្ធ​បេក្ខជន​នោះ​ឬ​ដូចម្តេច។​ ក៏​ប៉ុន្តែ​ ក្នុង​អតីតកាល​គណៈកម្មការ​មិន​ដែល​បដិសេធ​មិន​ព្រម​បញ្ជាក់​បេក្ខជន​កំពូល​ណា​ម្នាក់​ទេ៕

ប្រែ​សម្រួល​ដោយ​ ពិន ស៊ីសុវណ្ណ

XS
SM
MD
LG