ភ្ជាប់​ទៅ​គេហទំព័រ​ទាក់ទង

កម្ពុជា​និង​ថៃ​គ្រោង​បង្កើន​ពេល​វេលា​ឆ្លងកាត់​ព្រំដែន


អ្នក​ទេសចរណ៍​បំពេញ​បែប​បទ​នៅ​​ច្រក​ព្រំដែន​ចាំ​យាម​ក្នុង​ខេត្ត​កោះ​កុង។

ច្រក​ឆ្លង​កាត់​ព្រំដែន​ទាំងពីរ​រវាង​ប្រទេស​កម្ពុជា ​និង​ប្រទេស​ថៃ​ដែល​បច្ចុប្បន្ននេះ ​កំពុង​បើក​ប្រតិបត្តិការ​តែ ៧ម៉ោង​ក្នុង​មួយថ្ងៃ​និង​៤ថ្ងៃ​ក្នុង​មួយសប្តាហ៍នឹង​ត្រូវ​បង្កើន​ថ្ងៃ​និង​ម៉ោង​បន្ថែមទៀត​ដើម្បី​ជំរុញ​សកម្មភាព​ពាណិជ្ជកម្ម​និង​កំណើន​ទេសចរណ៍​បន្ទាប់ពី​មាន​ការអនុញ្ញាត​ឱ្យ​ប្រជាពលរដ្ឋ​នៃ​ប្រទេស​ទាំងពីរ​មក​ទស្សនា​ប្រទេស​ផង​គ្នា​ដោយ​មិន​ចាំបាច់​សុំ​ទិដ្ឋាការ​នៅ​ស្ថានទូត​ឬ ​នៅ​កន្លែង​ច្រក​ឆ្លងកាត់​ព្រំដែន​ទេ។

ប្រទេស​កម្ពុជា​ និង​ប្រទេស​ថៃ​បាន​ចុះហត្ថលេខា​លើ​កិច្ចព្រមព្រៀង​លើកលែង​ទិដ្ឋាការ​នៅក្នុង​កិច្ចប្រជុំ​ កំពូល​យុទ្ធសាស្ត្រ​កិច្ច​សហប្រតិបត្តិការ​សេដ្ឋកិច្ច ​Ayeyawady-Chao Phraya-Mekong​ លើកទីបួន​នៅក្នុង​ ទីក្រុង​ភ្នំពេញ​នៅ​ថ្ងៃទី១៦ ខែវិច្ឆិកា។

ច្រក​ឆ្លងកាត់​ព្រំដែន​ពីរ​គឺ​ច្រក​ភ្នំដី​នៅក្នុង​ស្រុក​សំពៅលូន​នៃ​ខេត្ត​បាត់ដំបង​និង​ច្រក​បឹងត្រកួន​នៅក្នុង​ស្រុក​ម៉ាឡៃ​នៃ​ខេត្ត​បន្ទាយមានជ័យ។ ច្រក​ឆ្លងកាត់​ព្រំដែន​ទាំងពីរ​នេះ​មាន​ព្រំដែន​ជាប់​ជាមួយ​ខេត្ត​ស្រះកែវ​របស់​ប្រទេស​ថៃ។ រួច​ឆ្លងកាត់​ព្រំដែន​ទាំងពីរ​នេះ​បច្ចុប្បន្ន​កំពុង​បើក​ប្រតិបត្តិការ​ចាប់ពី​ម៉ោង៩​ព្រឹក​ដល់ ម៉ោង​៤រសៀល​និង​ចាប់​ពី​ថ្ងៃ​អង្គារ៍​ដល់​ថ្ងៃសុក្រ​ក្នុង​មួយ​សប្តាហ៍​។ នេះ​បើយោងតាមការ​ឱ្យ​ដឹង​ពីមន្ត្រី​ខេត្ត។

លោក​គឹម ណន​ អភិបាលរង​ខេត្ត​បាត់ដំបង​បាន​ថ្លែង​ប្រាប់​វីអូអេ សំឡេង​សហរដ្ឋ​អាមេរិក​ផ្នែក​ខេមរ​ភាសា​ថា​ការបន្ថែម​ការបើកច្រក​ឆ្លងកាត់​ ព្រំដែន​ជា​រៀងរាល់​ថ្ងៃនេះ​សំដៅ​ជំរុញ​សកម្មភាព​ផ្លាស់ប្តូរ​ពាណិជ្ជកម្ម​រវាង​ប្រជាពលរដ្ឋ​នៃ​ប្រទេស​ទាំងពីរ​ ក្នុងការ​ដឹក​ជញ្ជូន​ទំនិញ​និង​ផលិតផល​កសិកម្ម​ឆ្លងកាត់​ព្រំដែន​និង​កំណើន​ភ្ញៀវ​ទេសចរណ៍។

«ការបន្ថែម​ការបើកច្រក​ព្រំដែន​នេះ​មាន​គោលបំណង​ចង់​ជំរុញ​វិស័យ​ពាណិជ្ជកម្ម​ ការដោះដូរ​ទំនិញ​គ្នា​ទៅ​វិញ​ទៅ​មក​និង​ជំរុញ​កំណើន​ភ្ញៀវ​ទេសចរណ៍​ចូល​មក​ប្រទេស​កម្ពុជា​ឱ្យ​បាន​ច្រើន។ ទីមួយ​ចង់​បន្ថែម​ថ្ងៃ​ចេញ-ចូល ​និង​ទីពីរ​បង្កើន​ម៉ោង​ចេញចូល​ឱ្យបាន​ច្រើន​ជាងមុន​តាម​ច្រក​ព្រំដែន​នេះ»។

លោក​គឹម ណន ​បាន​បញ្ជាក់​ថា​ចំនួន​ភ្ញៀវទេសចរណ៍​ថៃ​ជិត​៣០០​នាក់​ដែល​បាន​ឆ្លងកាត់​ច្រក​ភ្នំដី​ចូល មក​ក្នុង​ប្រទេស​កម្ពុជា​ក្នុង​មួយ​ថ្ងៃ​បាន​កើន​ជាង​៥០​ភាគរយ​ចាប់តាំង​ពី​ការឆ្លងកាត់​ព្រំដែន​ដោយ​គ្មាន ទិដ្ឋាការ​បាន​ចូល​ជាធរមាន​នៅ​ថ្ងៃទី១៦​ខែ​ធ្នូ។

លោក​អ៊ុង អឿន ​អភិបាល​ខេត្ត​បន្ទាយ​មានជ័យ​ បាន​បញ្ជាក់​ថា​ភ្ញៀវទេសចរណ៍​ជន​ជាតិ​ថៃ​ រវាង​ពី​២០០ នាក់​ទៅ​៣០០​នាក់​បាន​ឆ្លងកាត់​ព្រំដែន​ចូល​មក​ក្នុង​ប្រទេស​កម្ពុជា​តាម​ច្រក​បឹង​ត្រកួន​ក្នុង​មួយ​ថ្ងៃ​ដែល បាន​កើនឡើង​ប្រាំមួយ​ដង។​ មុនពេល​មាន​ការលើកលែង​ទិដ្ឋាការនេះ ​ភ្ញៀវ​ទេសចរណ៍​ជនជាតិ​ថៃ​ជាង ៥០នាក់​បាន​ចូល​មកទស្សនា​ប្រទេស​កម្ពុជា​ក្នុង​មួយ​ថ្ងៃ។

លោក​គឹម ណន ​បាន​ថ្លែងថា​ភាគី​ថៃ​បាន​ចុះហត្ថលេខា​លើ​កិច្ចព្រមព្រៀង​ជា​ឯកតោភាគី​ចំពោះ​ការបន្ថែម​ថ្ងៃ​និង​ម៉ោង​សម្រាប់​ប្រតិបត្តិការ​បើក​ច្រក​ឆ្លងកាត់​ព្រំដែន​ទាំងពីរ​នេះ​ជារៀងរាល់​ថ្ងៃ​ចាប់ពី​ថ្ងៃទី១​ ខែ ​មករា​ ឆ្នាំ ២០១១។ ភាគី​កម្ពុជា​បាន​យល់ព្រម​ជាមួយ​នឹង​សំណើ​របស់​ភាគីថៃ​ប៉ុន្តែ​ត្រូវ​រង់ចាំ​ការសម្រេច​ពី​ក្រសួង មហាផ្ទៃ​សិន៕

XS
SM
MD
LG