ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សន្និសីទ​អាំស្ទែដាំ​បង្ហាញ​បច្ចេកវិទ្យា​អំពី​ក្រុមហ៊ុន​បង្កើត​ថ្មី


នេះ​ជា​ទិដ្ឋភាព​ខាង​ក្រៅ​នៃ​សន្និសីទ ​Next ​Web​ Conference​ នៅ​ទីក្រុង​អាំស្ទែដាំ។
នេះ​ជា​ទិដ្ឋភាព​ខាង​ក្រៅ​នៃ​សន្និសីទ ​Next ​Web​ Conference​ នៅ​ទីក្រុង​អាំស្ទែដាំ។

ក្រុម​អ្នក​ចាប់​អារម្មណ៍​ទៅ​លើ​បច្ចេកវិទ្យា​ សហគ្រិន​និង​អ្នក​ដែល​ស្រឡាញ់​​បច្ចេកវិទ្យា​ឌីជីថល​​ជាង​ពីរ​ម៉ឺន​នាក់​បាន​ប្រមូល​ផ្តុំ​គ្នា​នៅ​ឯ​ទីក្រុង​អាំស្ទែដាំ​នា​ពេល​ថ្មីៗ​នេះ​ ដើម្បី​ពិភាក្សា​អំ​ពី​ការ​វិវត្ត​នៃ​បច្ចេកវិទ្យា​ឌីជីថល​ចុង​ក្រោយ​បំផុត​ ដើម្បី​ក្រឡេក​មើល​ទៅ​អនាគត​ និង​ដើម្បី​ត​ភ្ជាប់។​ នៅ​ប៉ុន្មាន​ឆ្នាំ​ចុង​ក្រោយ​នេះ​ មាន​ការ​ផ្ទុះ​ឡើង​នូវ​ពាណិជ្ជកម្ម​បង្កើត​ថ្មី​ ដែល​បាន​បង្កើត​​ឧបករណ៍​និង​កម្មវិធី​ដែល​អាច​ផ្លាស់​ប្តូរ​របៀប​នៃ​ការ​រស់​នៅ​របស់​មនុស្ស​គ្រប់​រូប​ ប៉ុន្តែ​ពាណិជ្ជកម្ម​បង្កើត​ថ្មី​ទាំង​អស់​នោះ​ក៏​មាន​បញ្ហា​ផង​ដែរ។​​

សន្និសីទ ​Next ​Web​ Conference​ នៅ​ទីក្រុង​អាំស្ទែដាំ​ គឺ​ជា​សន្និសីទ​ដែល​ប្រមូល​ផ្តុំ​ក្រុមហ៊ុន​បច្ចេកវិទ្យា​នានា​ដ៏​ធំ។​ នេះ​គឺ​ជាឆ្នាំ​ទី​១១​ហើយ​នៃ​ការ​ជួបជុំ​ រយៈ​ពេល​២ថ្ងៃ​ ដែល​មាន​ព្រឹត្តិការណ៍​ជា​ច្រើន​ដើម្បី​ពិភាក្សា​ទៅ​លើ​បច្ចុប្បន្ន​កាល​ ហើយ​អ្វី​ដែល​សំខាន់​ជាង​នេះ​ទៅ​ទៀត​នោះ​គឺ​អនាគត​នៃ​បច្ចេក​វិទ្យា​ឌីជីថល។​

លោក​ Boris​ Veldhuijzen van Zanten ​នាយក​សន្និសីទ​នេះ​បាន​ថ្លែង​ថា​ យើង​មិន​អាច​ព្រងើយ​កន្តើយ​ចំពោះ​ឥទ្ធិពល​នៃ​បច្ចេក​វិទ្យា​ឌីជីថល​ទៅ​លើ​ការ​រស់​នៅ​ប្រចាំ​ថ្ងៃ​របស់​មនុស្ស​បាន​ទៀត​នោះ​ទេ។​

លោក​ថ្លែង​ថា៖​

«ខ្ញុំ​គិត​ថា​ បច្ចេកវិទ្យា​ឌីជីថល​កំពុង​មាន​ឥទ្ធិពល​នៅ​គ្រប់​ទិសទី​ ដែលយើង​ត្រូវ​ ពិចារណា​ធ្វើ​ការ​ផ្លាស់​ប្តូរ​តាម​ដែល​អាច​ធ្វើ​ទៅ​បាន​ ហើយ​វា​ក៏ពិបាក​នឹង​ធ្វើ​ការ​ទស្សន៍ទាយ​ទុក​ជា​មុន​ផង​ដែរ។​ ដូច្នេះ​ដោយសារ​តែ​យើង​មាន​បច្ចេកវិទ្យា​និង​ឧបករណ៍​ថ្មីៗ​ យើង​ឃើញ​មាន​ការ​លេច​ឡើង​នូវ​លទ្ធភាព​នៃ​ការ​បង្កើត​អ្វី​ដែល​ថ្មី​ច្រើន​ជាង​មុន»។​

អ្វី​ដែល​នាំឲ្យ​មាន​ការ​ផ្លាស់​ប្តូរ​នៅ​ទសវត្សរ៍​កន្លង​ទៅ​នេះ​ មាន​ដូច​ជា​ក្រុមហ៊ុន​បង្កើត​ថ្មី ​ក្រុមហ៊ុន​ខ្នាតតូច​ ដែល​ជា​ញឹក​ញាប់​ចាប់​ផ្តើម​នៅ​ក្នុង​បន្ទប់​គេង​របស់​សិស្ស ​និង​និស្សិត​ដែល​ទើប​តែ​រៀនចប់ ​ដែល​គំនិត​របស់​ពួក​គេ​បាន​ធ្វើ​ឲ្យ​មាន​ការ​ផ្លាស់ប្តូរ​យ៉ាង​ខ្លាំង​នៅ​ក្នុង​ពិភពលោក។​ គំនិត​ថ្មី​ទាំង​នេះ​មាន​ចាប់​តាំង​ពី​ការ​ចែក​រំលែក​រូបភាព ​រហូត​ដល់​ការ​ណាត់​ជួប​ និង​ការ​កក់​កន្លែង​ស្នាក់នៅ​សម្រាប់​ការ​ធ្វើ​លំហែ​កម្សាន្ត។

ដូច្នេះ​ក្រុមហ៊ុន​ខា្នត​តូចទាំង​នេះ​មាន​ឱកាស​ក្នុង​ការ​តាំង​បង្ហាញ​ផលិតផល​និង​គំនិត​របស់​ពួក​គេ​នៅ​ក្នុង​សន្និសីទ​នេះ ​ដូច​ជា​ក្រុមហ៊ុន​ Mixdown​ របស់​អាល្លឺម៉ង់​ ដែល​បាន​បង្កើត​កម្មវិធី​ដែល​អ្នក​អាច​បង្កើត​បទភ្លេង​ដោយ​ខ្លួន​ឯង​បាន។​

លោក Boris ​ថ្លែង​ថា៖​

«វា​មាន​ភាព​ងាយ​ស្រួល​ខ្លាំង​ណាស់។​ អ្នក​ចាប់​ផ្តើម​ឡើង​ដោយ​ការ​គូរ​រូប​នៅ​លើ​អេក្រង់។​ ហើយ​បន្ទាប់​មក​ ដើម្បី​បង្កើត​បទ​ភ្លេង​ អ្នក​គ្រាន់​តែ​ទាញ​សញ្ញា​ទាំង​នោះ​មក​ដាក់​លើ​បន្ទាត់​ បន្ទាប់​មកអ្នកនឹង​អាច​បង្កើត​បទភ្លេង​ដែល​ពិរោះ​អស្ចារ្យ​បាន»។​

ផ្ទុយ​ទៅ​វិញ​ បរិយាកាស​នៃ​ការ​ធ្វើ​ពាណិជ្ជកម្ម​បង្កើត​ថ្មី​មិន​មែន​សុទ្ធតែជោគជ័យនោះ​ទេ ​ពិសេស​នៅ​អឺរ៉ុប។​

លោក​ថ្លែង​ថា៖​

«ពី​ព្រោះ​ថា​ ប្រសិន​បើ​អ្នក​មាន​តែ​គំនិត​ ហើយ​គំនិត​របស់​អ្នក​ត្រូវ​ការ​ដើម​ទុន​នោះ​ អ្នក​នឹង​មាន​ការ​លំបាក​នៅ​ក្នុង​អឺរ៉ុប​ ពីព្រោះ​ថា ​យើងត្រូវ​តែ​ទាក់​ទាញ​ចំណាប់​អារម្មណ៍​ជា​មុន​សិន​ គឺ​ថា ​យើង​ត្រូវ​ដឹង​ពី​លទ្ធភាព​ដែល​អាច​នាំ​យើង​ឈាន​ទៅ​រក​ភាព​ជោគជ័យ​ ឬ KPI​ របស់​យើង​ជាមុន​សិន​ ហើយ​បន្ទាប់​មក​គឺ​យើង​ត្រូវ​ទាក់​ទាញ​រក​ប្រាក់។​ ប្រសិន​បើអ្នក​ត្រូវ​ការ​ប្រាក់​ពី​អ្នកវិនិយោគ​ អ្នក​នឹង​ត្រូវ​បង្ហាញ​ថា​ អ្នក​នឹង​ទទួល​បាន​ជោគជ័យ​ ហើយ​ការ​បង្ហាញ​ថា​ អ្នក​នឹង​ជោគជ័យ​គឺ​ជា​ការ​លំបាក​មួយ»។​

ក្រុមហ៊ុន​បង្កើត​ថ្មី​ជា​ច្រើន​បរាជ័យ ​មិនមែន​ដោយសារ​បញ្ហា​ហិរញ្ញវត្ថុ​នោះ​ទេ។​ លោក ​Jedi Weller​ បាន​ចាប់​ផ្តើម​ពាណិជ្ជកម្ម​របស់​លោក​កាល​ពី​២ឆ្នាំមុន​ ដោយ​បង្កើត​កម្មវិធី​ និង​គេហ​ទំព័រ​សម្រាប់​ពាណិជ្ជកម្ម​បង្កើតថ្មី​របស់​លោក។​ លោក​ដឹង​ពី​បញ្ហា​ដែល​សហ​គ្រិន​វ័យក្មេង​ជា​ច្រើន​ជួប​ប្រទះ។​

លោក​ថ្លែង​ថា៖​

«មាន​មនុស្ស​ជា​ច្រើន​មក​រក​យើង ​ហើយ​និយាយ​ថា​ គេ​នឹង​បង្កើត​កម្មវិធី​របស់​គេ​១០០​ភាគរយ​ ហើយ​បន្ទាប់​មក​គេ​នឹង​ដាក់​វា​ចូល​ទៅ​ក្នុង​ទីផ្សារ។​ គំនិត​នេះ​ពិត​ជា​មិន​មាន​ភាព​ប្រាកដ​ប្រជា​នោះ​ទេ។​ កម្មវិធី​របស់​អ្នក​គួរ​តែ​ទំនើប​និង​មាន​ភាព​ឈ្លាស​វៃ។​ អ្នក​ត្រូវ​បង្កើត​មុខងារ​មួយ​ចំនួន​ ហើយ​អ្នក​ត្រូវ​សាកល្បង​ប្រើ​ប្រាស់​វា​សិន។​ បន្ទាប់​មក​ទើប​អ្នក​បង្កើត​មុខងារ​ឲ្យ​បាន​ច្រើន​បន្ថែម​ទៀត​ ហើយ​សាក​ល្បង​ប្រើ​ប្រាស់​វា​ទៀត។​ អ្នក​មិន​ត្រូវ​បង្កើត​មុខងារ​របស់​វា​ម្តង​១០០​នោះ​ទេ​ ព្រោះ​ថា​ អ្នក​ប្រើ​ប្រាស់​ប្រហែល​ជា​មិន​ចូល​ចិត្ត​នោះ​ទេ»។​

បើ​ទោះ​បី​ជា​វា​មាន​ភាព​ច្បាស់​លាស់​ថា​ បច្ចេក​វិទ្យា​ឌីជីថល​នឹង​បន្ត​មាន​តួនាទី​ច្រើន​ជាង​មុន​នៅក្នុង​ជីវិត​មនុស្ស​ក៏​ដោយ​ ក៏មិន​មាន​មនុស្ស​ច្រើន​ហ៊ាន​ទស្សន៍​ទាយ​ពីវា​ឲ្យ​បាន​ជាក់លាក់នោះ​ទេ។​ ប្រហែល​ជា​មាន​កម្មវិធីមួយ​ដែល​នឹង​ដោះ​ស្រាយ​បញ្ហា​នេះ​នៅ​ពេល​អនាគត៕

ប្រែ​សម្រួល​ដោយ​ ស្រេង​ លក្ខិណា

XS
SM
MD
LG