ការប្រគុំតន្រ្តីទេសចរណ៍ «Eras Tour» របស់នាង Taylor Swift បានបញ្ចប់ហើយ។
ការប្រគុំតន្រ្តីចុងក្រោយបំផុតបានធ្វើឡើងនៅទីក្រុង Vancouver ដែលវាជាការប្រគុំតន្រ្តីចុងក្រោយបំផុតនៃការប្រគុំតន្រ្តីចំនួន ១៤៩ លើកក្នុងរយៈពេលជិត ២ ឆ្នាំ។ ការប្រគុំតន្រ្តីទាំងនោះ ត្រូវបានគេប៉ាន់ស្មានថា រកប្រាក់បានប្រហែលពីរពាន់លានដុល្លារ ចាប់តាំងពីការប្រគុំតន្ត្រីលើកដំបូងដែលបានធ្វើឡើងនៅក្នុងខែមីនា ឆ្នាំ២០២៣។
ការប្រគុំតន្ត្រីនីមួយៗមានរយៈពេលប្រហែល ៣ ម៉ោងកន្លះ និងមានបទចម្រៀងយ៉ាងតិចណាស់ ៤៤ បទ ចែកចេញជា ១០ ផ្នែក ឬ «យុគសម័យ» នៃអាជីពថតបទចម្រៀងរបស់នាង។ ការប្រគំតន្ត្រីនេះបានធ្វើឡើងនៅក្នុងទីក្រុងចំនួន ៥៣ នៃទ្វីបចំនួន ៥។
សម្រាប់អ្នករស់នៅទីក្រុង Vancouver ការប្រគុំតន្រ្តីរបស់នាងTaylor Swift បានធ្វើឱ្យទីក្រុងរបស់ពួកគេពោរពេញទៅដោយមនុស្សដែលឈ្លក់វង្វេងនឹងនាង Taylor Swift ហើយបាននាំឱ្យមានការប្រៀបធៀបទៅនឹងពេលដែលតំបន់នោះបានធ្វើជាម្ចាស់ផ្ទះកីឡាអូឡាំពិករដូវរងា និងប៉ារ៉ាឡាំពិកកាលពីឆ្នាំ២០១០។
លោក Chris May គឺជាអ្នកគ្រប់គ្រងទូទៅនៃកីឡដ្ឋាន BC Place Stadium ដែលជាកន្លែងរៀបចំការប្រគុំតន្ត្រីរបស់នាង Taylor Swift ចុងក្រោយចំនួនបីលើក។
លោកនិយាយថា ការរៀបចំ និងការរៀបគម្រោងសម្រាប់ការប្រគុំតន្ត្រីទាំងនេះគឺស្រដៀងគ្នាទៅនឹងការរៀបចំពិធីសម្រាប់កីឡាអូឡាំពិក ប៉ារ៉ាឡាំពិក និងការប្រកួតកីឡាបាល់ទាត់ពិភពលោកនារីឆ្នាំ ២០១៥ ដែលបានធ្វើឡើងនៅក្នុងកីឡដ្ឋាននេះ។
លោកនិយាយថា ៧០% នៃអ្នកចូលរួមទស្សនាការប្រគុំតន្ត្រីចុងក្រោយ គឺមកពីខាងក្រៅតំបន់ Vancouver។ លោក May ថ្លែងថា៖
«ការណ៍នោះមានន័យថា យើងមានចំនួនទេសចរដ៏ច្រើនដែលមិនធ្លាប់មកទីនេះពីមុនមក។ ដូច្នេះ អ្នកដឹងទេ យើងត្រូវធ្វើការសម្របទៅតាមនោះ ដើម្បីធានាថា យើងមានបុគ្គលិកគ្រប់គ្រាន់ ស្លាកសញ្ញាគ្រប់គ្រាន់ និងការស្វែងរកផ្លូវ និងរកមនុស្សដើម្បីជួយទេសចរឱ្យទៅដល់កន្លែងដែលពួកគេចង់ទៅ»។
លោក May និយាយថា ការប្រគុំតន្ត្រីនៅខែមេសា ឆ្នាំ ២០២៤ របស់លោក Diljit Dosanjh ដែលជាការប្រគុំតន្ត្រីជាភាសា Punjabi ដ៏ធំបំផុតនៅក្រៅប្រទេសឥណ្ឌាបានទាក់ទាញអ្នកគាំទ្រជាង ៥០.០០០ នាក់។ ចំណែកការប្រគុំតន្ត្រីនៅទីក្រុង Vancouver ទាំងបីលើករបស់នាង Taylor Swift ត្រូវបានគេរាយការណ៍ថា បានទាក់ទាញមនុស្សប្រហែល ១៦០.០០០ នាក់។
លោក Jarrett Vaughan សាស្ត្រាចារ្យរងនៅមហាវិទ្យាល័យ Sauder School of Business នៃសាកលវិទ្យាល័យ British Columbia បានថ្លែងថា ការប្រើប្រាស់ប្រព័ន្ធផ្សព្វផ្សាយសង្គមយ៉ាងប៉ិនប្រសប់របស់នាង Taylor Swift បានដើរតួនាទីយ៉ាងសំខាន់ក្នុងការទទួលបានជោគជ័យនៃការប្រគុំតន្ត្រីទេសចរណ៍នេះ។
លោកក៏និយាយផងដែរថា ជំងឺរាតត្បាតកូវីដ១៩ មានចំណែកជួយឱ្យនាងទទួលបានអ្នកគាំទ្រវ័យក្មេងមួយចំនួននៅក្នុងចំណោមទស្សនិកជនរបស់នាង។
«ខ្ញុំគិតថា ពេលយើងមើលទស្សនិកជនបច្ចុប្បន្នរបស់នាង អ្នកដឹងទេថា ពួកគេដូចជាមានវ័យនៅក្មេងនៅពេលនោះ។ ពួកគេមិនមានឱកាសបានចូលរួមការប្រគុំតន្ត្រី ឆ្លងកាត់ការទៅសាលាមធ្យមសិក្សា ឬបឋមសិក្សាទេ ដូច្នេះហើយសម្រាប់ពួកគេពេលនេះ ការបានចូលរួមទស្សនាការប្រគំតន្ត្រីបែបនេះគឺជារឿងគួរឱ្យកត់សម្គាល់សម្រាប់ពួកគេ»។
លោក Vaughan និយាយថា កេរដំណែលនៃការប្រគុំតន្ត្រីទេសចរណ៍ Eras Tour នេះ នឹងមិនត្រឹមតែជាការប្រើប្រាស់ប្រព័ន្ធផ្សព្វផ្សាយសង្គមរបស់នាង Taylor Swift ប៉ុណ្ណោះទេ ក៏ប៉ុន្តែវាថែមទាំងជាភាពវិជ្ជមានដែលនាងបានបង្កើតឡើងសម្រាប់អ្នកគាំទ្ររបស់នាងផងដែរ។
អ្នកស្រី Stephanie Burt គឺជាសាស្ត្រាចារ្យភាសាអង់គ្លេសនៅមហាវិទ្យាល័យ Harvard ហើយកាលពីពេលថ្មីៗនេះបានបង្រៀនថ្នាក់ពេញនិយមយ៉ាងខ្លាំងមួយអំពី នាង Taylor Swift។
សម្រាប់អ្នកស្រី អាថ៌កំបាំងនៃភាពជោគជ័យរបស់ការប្រគុំតន្ត្រីទេសចរណ៍ Eras Tour និងអាជីពរបស់នាង Taylor Swift គឺសាមញ្ញ នោះគឺដោយសារនាងពិតជាពូកែក្នុងការនិពន្ធបទចម្រៀងដែលមានលក្ខណៈជំរុញលើកទឹកចិត្ត និងអត្ថន័យក្នុងបទចម្រៀងត្រូវនឹងសាច់រឿងរបស់ទស្សនិកជនរបស់នាង។
អ្នកស្រី Stephanie Burt ថ្លែងថា៖ «យើងស្តាប់បទចម្រៀង ហើយយើងឮអំពីអ្នកដែលដូចយើងរួចស្រេចទៅហើយ និងនរណាម្នាក់ដែលយើងចង់កាន់តែដូចគេ និងចង់ជិតស្និទ្ធ និងចង់ធ្វើឱ្យដូចគេ។ នោះជាអំណោយទានដ៏កម្រមួយដែលនាង Taylorរក្សាបានយូរដូចនេះ ហើយការប្រគុំតន្ត្រីទេសចរណ៍នេះ ជាសក្ខីកម្មចំពោះទេពកោសល្យជាបន្តរបស់នាង និងភាពប៉ិនប្រសប់របស់នាង និងសមត្ថភាពរបស់នាងក្នុងការសហការ រៀបចំ និងចាត់ផែនការ»។
ការិយាល័យទេសចរណ៍របស់ទីក្រុង Vancouver ប៉ាន់ប្រមាណថា រហូតដល់ថ្ងៃចុងក្រោយ ការប្រគុំតន្ត្រីទេសចរណ៍របស់នាង Taylor Swift បានលើកស្ទួយដល់សេដ្ឋកិច្ចទីក្រុងចំនួន ១១២ លានដុល្លារ៕
ប្រែសម្រួលដោយអ្នកស្រី លី ម៉ូរីវ៉ាន់
