ភ្ជាប់​ទៅ​គេហទំព័រ​ទាក់ទង

អាវយឺត​អាមេរិកាំង​ដែល​ឈប់​ប្រើ​ មាន​ពោរពេញ​ក្នុង​ទីផ្សារ​អាហ្វ្រិក ​កំពុង​ចាប់ផ្តើម​ត្រឡប់​មក​សរអា​វិញ


ប្រសិនបើស្ត្រីអាមេរិកាំងម្នាក់កើតនៅក្នុងឆ្នាំ១៩៨៧ អង្គការ​មិនរក​​កម្រៃ​ Project​ Repatគិតថា​ នាង​អាច​ទិញ​អាវយឺត​នេះ​ពីប្រទេសអាហ្វ្រិកមកវិញ។

អាវយឺត​អាមេរិកាំង​ដែល​ឈប់​ប្រើ​ ហើយ​មាន​ពោរពេញ​ក្នុង​ទីផ្សារ​អាហ្វ្រិក​ជា​ច្រើន​ឆ្នាំ​មកនេះ​ កំពុង​ចាប់ផ្តើម​ត្រឡប់​មក​សរអា​វិញ​ដែល​ជា​ចំណែក​នៃ​ការផ្តួចផ្តើម​គំនិត​មិនរកកម្រៃ​មួយ​ដែល​ត្រូវបាន​ដឹកនាំ​ដោយសហគ្រិនសង្គម​អាមេរិកាំង​ក្មេងៗ​ពីរ​នាក់។

Sean Hewens​ដែល​ជា​ជនជាតិ​អាមេរិកាំង​និយាយ​ថា​ ថ្មីៗ​នេះ​គាត់​បាន​ជាប់​ក្នុង​ការ​ស្ទះ​ចរាចរ​ណ៍​មួយ​ នៅក្នុង​ទីក្រុង​ណៃរ៉ូប៊ី​ (Nairobi)​ ប្រទេស​កេនយ៉ា​ (Kenya)​ នៅ​ពេល​នោះ​គាត់​បាន​ឃើញ​អាវយឺត​មួយ​ដែល​ពាក់​ដោយ​អ្នករុញរទេះ​ម្នាក់​ដឹក​មនុស្ស​ដើម្បី​ផ្សាយ​អំពី​ពិធី​ឆ្លងវ័យ​ឆ្នាំ​២០០៦​ របស់​ក្មេង​ជំទង់​ដែល​ត្រូវ​បាន​ហៅថា​Josh​ នៅរដ្ឋ​California។

Hewens​ ចង់ដឹង​ថាតើ​អាវយឺត​នោះ​បាន​មកដល់​ទីនេះ​យ៉ាង​ដូចម្តេច​ ហើយ​បាន​រក​ឃើញ​ថា​អាវយឺត​ជាច្រើន​ដែល​គេ​ឈប់ប្រើ​នៅ​សរអា​ កំពុង​ត្រូវបាន​ដាក់​លក់​នៅ​ពាសពេញ​ទីផ្សារ​នៃ​ប្រទេស​កំពុង​អភិវឌ្ឍន៍។ Hewens​និយាយថា៖

«អ្នក​ដឹងទេ​ថា​អាវយឺត​មួយ​ដែល​ត្រូវបាន​ផលិត​ឡើង​សម្រាប់​ពិធី​ជាក់លាក់​ណា​មួយ​ ដូចជា​ពិធី​ឆ្លងវ័យ​របស់​ក្មេង​ជំទង់​Josh​នៅក្នុង​កន្លែង​មួយ​ ក្រោយ​មក​អាវយឺត​ទាំងនេះ​ បាន​ទៅដល់​អង្គការ​សប្បុរសធម៌​ Goodwill​ ហើយ​អាវ​ទាំង​នោះ​ត្រូវបាន​ដាក់​លក់​នៅ​ឯនាយ​សមុទ្រ​និង​លក់​បន្តៗ​ទៅទៀត។​ តាម​ទស្សនវិស័យ​វប្បធម៌​ ឃើញ​ថា​អ្វីៗ​ក្លាយជា​ច្រឡូក​ច្រឡំ​គ្នា​និង​វិល​ចុះ​ឡើង​ពី​ចាស់​ទៅ​ថ្មី។»

Hewens​បាន​សម្រេចចិត្ត​ធ្វើ​អាវយឺត​ខ្លះៗ​ នៃអាវ​ទាំងនេះ​ឲ្យ​វិល​មក​សម័យ​មួយ​ទៀត​នៅក្នុង​អ្វី​ដែល​គាត់​ហៅថា​Project​ Repat​ គឺជា​គម្រោង​បន្ទាប់​បន្សំ​មួយ​ដើម្បី​ផ្តល់​ទុន​ដល់​អង្គការ​បច្ចេកវិទ្យា​និង​វប្បធម៌​មិនរក​កម្រៃ​របស់​គាត់​ដែល​កំពុង​ពង្រីក​ មានឈ្មោះ​ថា​ Smallbean។

អាវ​ដែល​មាន​រូប​ពីសម័យ​មុន​ រូបកំប្លែង​ រូបចំអក​ឡកឡឺយ​ រូបកីឡា​ រូបទីកន្លែង​និង​រូបព្រឹត្តិការណ៍​សំខាន់ៗ​មានលក់​នៅក្នុង​ផ្សារ​នៃ​ប្រទេស​អាហ្វ្រិក​ ដែល​ត្រូវ​បាន​បោក​យ៉ាង​ស្អាត​ មាន​បោះត្រា​ថ្ងៃខែ​និង​ទីកន្លែង​ និង​ស្លាកសញ្ញា​ Project​ Repat​ ហើយ​បាន​លក់​ទៅ​ឲ្យ​អ្នកប្រើប្រាស់​នៅ​សរអា​វិញ​ក្នុង​តម្លៃ​២៥ដុល្លារ​ ដែល​២០ដុល្លារ​នៃ​តម្លៃអាវ​២៥ដុល្លារ​នោះ​ នឹងចូល​ទៅក្នុង​អង្គការ​មិនរកកម្រៃ។

Hewens​និយាយ​ថា​ គាត់​ស្ញប់ស្ញែង​ដោយ​ការឆ្លើយតប​ជាវិជ្ជមាន​ដែល​ត្រូវ​បាន​ជំរុញ​ដោយ​បណ្តាញ​សង្គម​ដែល​មិនគ្រាន់​តែ​ពី​ក្រុម​អ្នកទិញ​ទេ​ ប៉ុន្តែ​ពី​ក្រុម​អ្នក​ស្ម័គ្រចិត្ត​ផង​ដែរ​ ដែល​ទិញ​អាវយឺត​ នៅក្នុង​ប្រទេស​អាហ្វ្រិក​ហើយ​ធ្វើ​អំណោយ​អាវ​ទាំង​នោះ​ទៅ​អង្គការ​មិនរកកម្រៃ​ Project​ Repat ។ Hewens​ និយាយថា៖

«ការឆ្លើយតប​ដែល​យើង​បាន​ទទួល​ពី​ Project​ Repat​នោះ​ ខ្ញុំ​គិតថា​វាមាន​អ្វី​ដែល​ទាក់ទង​នឹង​អាវយឺត។​ ខ្ញុំ​គិតថា​មាន​បង្កប់​រឿងរ៉ាវ​ពិត​នៅក្នុង​នោះ។​ ប៉ុន្តែ​ខ្ញុំ​នឹង​ឆ្លើយ​ដោយ​ឥត​លាក់លៀម​ថា​ យើងពិត​ជា​ភ្ញាក់ផ្អើល​យ៉ាង​ខ្លាំង​ចំពោះ​ការ​ ឆ្លើយ​តប​នៅ​ក្នុង​ផ្លូវ​ល្អមួយ»។

Hewens​និយាយថា​ ពួក​ដែល​គេហៅថា​ភ្នាក់ងារ​អាវយឺត​ ឬពួក​ “repatriots” ​ ជាពួក​ដែល​មិនយក​អាវ​ដែល​គេពាក់​ហើយ​នោះទេ​ ប៉ុន្តែ​ទិញអាវ​ទាំងនោះ​ នៅ​ក្នុង​ផ្សារ។

អ្នកផ្តួចផ្តើម​គម្រោង​ម្នាក់ទៀត​គឺ​ Ross Lohr។​ គាត់​ជា​អ្នកដឹកនាំ​ក្រុម​ Newton​ Tanzania​ Collective​ ដែល​ជួយ​សិស្សសាលា​នៅក្នុង​ប្រទេស​តង់ស្ហានី​ ហើយ​ជួយ​ភ្ជាប់​ទំនាក់ទំនង​សិស្ស​ទាំងនោះ​ទៅនឹង​សិស្ស​នៅក្នុង​សរអា។​ Lohr​និយាយ​ថា​ “Project​ Repat”​ ក៏ពង្រឹង​អត្ថន័យ​នៃអាវយឺត​និមួយៗ​ឡើងវិញ​ដែរ។​ Lohr​និយាយ​ថា៖

« អាវយឺត​និមួយៗ​មាន​លក្ខណៈ​ពិសេស​គ្មានពីរ​ដ៏អស្ចារ្យ។​ ក្នុង​អាវមួយ​មាន​ប្រវត្តិ​របស់វា​ ហើយមាន​តួនាទី​សំខាន់​ពីរ​ ព្រោះ​វាជួយ​ទ្រទ្រង់​ទីផ្សារ​ក្នុងស្រុក​ដូចជា​នៅ​ប្រទេស​កិនយ៉ា​និង​ប្រទេស​តង់ស្ហានី​នេះផង​ និង​ជួយ​ទ្រទ្រង់​អង្គការ​មិនរក​កម្រៃ​ផង»។

លោក​ Lohr​ និយាយថា​ ដំណើរការនិវត្តរ៍​របស់​អាវយឺត​ត្រឡប់​មកវិញ​បាន​បង្ហាញ​ថា​វា​ជា​វិធី​ដ៏មាន​ប្រសិទ្ធភាព​មួយ​ដើម្បី​រៃប្រាក់។

«វាពិបាក​ណាស់​នឹងត្រឡប់​ទៅរក​មូលដ្ឋាន​នៃ​អ្នកធ្វើបរិច្ចាគ​គ្រប់ពេល​នោះ​ ក្រុម​អ្នកធ្វើបរិច្ចាគ​ដដែលនោះ​ព្យាយាម​ធានា​ថាមាន​មូលនិធិ។​ សម្រាប់​យើង​កិច្ចការ​នេះ​ជា​វិធីមួយ​ដើម្បី​លើក​កម្ពស់​ការសិក្សា​នៃ​ប្រជាសាស្ត្រ​ថ្មីមួយ​ ការស្រឡាញ់​មនុស្សជាតិ​ និងការរៃប្រាក់។​ លោកអ្នក​ត្រូវការ​ស្វែងរក​គំរូ​រកប្រាក់​ចំណូល​ លោកអ្នក​ត្រូវការ​ស្វែងរក​វិធីមួយ​ ដើម្បី​ទាក់ទាញ​មនុស្សថ្មី»។

អ្នករស់នៅ​ នៅទីក្រុង​ Boston​ ទាំងពីរ​នាក់នេះ​ ក៏បាន​ប្រើ​កម្មវិធី​រៃប្រាក់​តាម​អិនធឺណែត​ផងដែរ​ ដើម្បី​ផលិត​ភាពយន្ត​ឯកសារ​មួយ។​ ការថត​ភាពយន្ត​នោះ​មាន​កំណត់ពេល​ចាប់ផ្តើម​នៅ​ចុងខែ​នេះ​នៅក្នុង​ទីក្រុង​ ណៃរ៉ូប៊ី​ កន្លែង​ដែល​អ្នក​ទាំងពីរ​មាន​បំណង​ពិនិត្យ​ឲ្យបាន​ស៊ីជម្រៅ​ ទៅក្នុង​រឿងរ៉ាវ​ទាំងឡាយ​ដែល​ទាក់ទង​នឹង​ប្រវត្តិ​អាវយឺត​ និង​មនុស្ស​ដែលពាក់​ ដែលលក់​ ដែលទិញ​ និង​ដែលរកឃើញ​អាវ​ទាំងនោះ។

ប្រែសម្រួល​ដោយ​ នុច សារីតា

XS
SM
MD
LG