ប្រជាពលរដ្ឋស៊ីរី នៅប៉ែកខាងជើងនៃទីក្រុងជីសរ៍ អាល់ សាក់គួរ (Jisr al-Shughour) អាចនឹងទទួលរងការសងសឹកដោយសារតែរដ្ឋាភិបាលថ្លែងថា មានការសម្លាប់រង្គាលទាហាន និង ប៉ូលីសចំនួន១២០នាក់នៅទីនោះ។
ប្រជាពលរដ្ឋមួយចំនួននៅទីក្រុងជីសរ៍ អាល់ សាក់គួរ បានភៀសខ្លួនពីទីក្រុងនេះ ដើម្បីទៅជ្រកកោននៅភូមិនានា ដែលមានសុវត្ថិភាពជិតៗទីក្រុងនោះ ខណៈ ដែលមានប្រជាពលរដ្ឋមួយចំនួនទៀតបានឆ្លងដែនទៅប្រទេសទួរគីដែលនៅជិតខាង។
អ្នកដែលនៅក្នុងទីក្រុងនោះបានចេញផ្សាយតាមសារបណ្តាញសង្គម បញ្ជាក់ថា ពួកគេភ័យខ្លាចនឹងការវាយបង្រ្កាបប្រកបដោយហិង្សា បន្ទាប់ពីរដ្ឋាភិបាលប្រកាសថានឹងប្រើកម្លាំងបង្រ្កាបប្រឆាំងនឹងអ្វីដែលរដ្ឋាភិបាលហៅថា ជនអន្ធពាលប្រដាប់អាវុធ។
ផ្នែកជាច្រើននៃទីក្រុងនេះត្រូវបានគេកាត់ផ្តាច់ ហើយអ្នកកាសែតបរទេសមិនត្រូវអនុញ្ញាតឲ្យចូលក្នុងប្រទេសស៊ីរីទេ ដូច្នេះ រឿងរ៉ាវទាំងនេះពិបាកនឹងធ្វើការផ្ទៀងផ្ទាត់ណាស់។ រដ្ឋាភិបាលបានឲ្យដឹងថា ខ្មាន់កាំភ្លើងបានវាយប្រហារកម្លាំងសន្តិសុខជាច្រើននៅក្រៅទីក្រុង និងសម្លាប់មនុស្សអស់រាប់សិបនាក់នៅក្នុងការវាយប្រហារផ្សេងៗគ្នាកាលពីថ្ងៃច័ន្ទ។
លោក អាដណាន់ ម៉ាមូដ(Adnan Mahmoud) រដ្ឋមន្រ្តីក្រសួងព័ត៌មានចោទប្រកាន់ «ជនអន្ធពាលប្រដាប់អាវុធ» ពីបទយកជនស៊ីវិលជាខែលក្នុងការប្រយុទ្ធនោះ។
លោកមានប្រសាសន៍ថា កងទ័ពនឹង«ស្តារសន្តិសុខនិងការស្ងប់ចិត្ត » ទៅឲ្យប្រជាពលរដ្ឋ។ បាតុករមួយចំនួននៅក្នុងតំបន់នោះ បដិសេធថា គ្មាននរណាម្នាក់មានអាវុធក្នុងដៃទេក្នុងចលនាតស៊ូរបស់ពួកគេ។ អ្នកដទៃទៀតទទួលស្គាល់ថា អ្នកមួយចំនួនមានអាវុធដែរ តែពួកគេប្រើអាវុធទាំងនោះដើម្បីការពារខ្លួនប៉ុណ្ណោះ។ នៅខណៈពេលដែលអ្នកខ្លះទៀតលើកឡើងថា ការប្រឆាំងដោយអហិង្សាគួរតែបោះបង់ចោល នៅពេលដែលពួកគេមិនអាចទប់ទល់នឹងការបង្រ្កាបរបស់រដ្ឋាភិបាលបានទេ។
រដ្ឋាភិបាលស៊ីរី បានប្រមូលកម្លាំងខណៈពេលដែលទទួលរងការរិះគន់ពីប្រទេសដទៃ រួមទាំងសហរដ្ឋអាមេរិកនិងសហភាពអឺរ៉ុប៕
ប្រែសម្រួលដោយ ហ៊ុយ សម្ភស្ស
