ភ្ជាប់​ទៅ​គេហទំព័រ​ទាក់ទង

អតីតអ្នក​ទោស​មក​លក់​សៀវភៅ​នៅ​កន្លែង​ខ្លួន​រង​ទារុណ​កម្ម​ពី​មុន


​លោក​​ជុំ ម៉ី (ស្តាំ) និង​លោក​ប៊ូ ម៉េង​​អតីត​អ្នក​ទោស​គុក​ទួលស្លែង​ និយាយ​ទៅ​កាន់​អ្នក​យក​ព័ត៌មាន។

ដើម្បី​ផ្គត់​ផ្គង់​ជីវភាព​គ្រួសារ ​អតីត​អ្នក​ទោស​គុក​ទួលស្លែង ​ដែល​នៅ​រស់​រាន​មាន​ជីវិត​មក​ប្រកប​របរ​ជា​អ្នក​លក់​សៀវភៅ​នៅ​ក្នុង​អតីត​គុក​ដ៏​សែន​ប្រល័យ​របស់​ខ្មែរ​ក្រហម​ដែល​ពួក​គេ​ធ្លាប់​រង​ទារុណកម្ម​យ៉ាង​ធ្ងន់​ធ្ងរ។

សព្វ​ថ្ងៃ​ លោក​ប៊ូ ម៉េង​មិន​ទៅ​ចូល​រួម​តាម​ដាន​សវនាការ​កាត់​ទោស​អតីត​មេដឹកនាំ​ខ្មែរ​ក្រហម​ទេ។​ លោក​សុខចិត្ត​នៅ​លក់​សៀវភៅ​របស់​លោក​ នៅ​ក្នុង​អតីត​មន្ទីរ​ធ្វើ​ទារុណកម្ម​របស់​ខ្មែរ​ក្រហម​នេះ​វិញ។

លោក​រក​ប្រាក់​បាន​៧០​ទៅ៨០​ដុល្លារ​ក្នុង​មួយ​ថ្ងៃ។​ បើ​ចំ​ថ្ងៃ​ហេង​ លោក​អាច​រក​បាន​រហូតដល់​២០០​ឬ​៣០០ដុល្លារ​ពី​ការ​លក់​សៀវភៅ​នេះ។

«ឧបមាថា ​ខ្ញុំ​លក់​តម្លៃ​១០ដុល្លារ​អញ្ចឹង​ ហើយ​គេ​ឲ្យ​ខ្ញុំ​២០​ដុល្លារ​ គេ​ថា​មិន​បាច់​អាប់​ទេ។ ខ្ញុំ​ក៏​អរគុណ​គេ សំពះ​គេ ហើយ​ក៏​ចាប់​ដៃ​គេ​ថើប​ បាន​ន័យ​ថា ដៃ​ហ្នឹង​ហើយ​ដែល​ធ្វើការ​រក​លុយ​ ដើម្បី​ជួយ​ទិញ​សៀវភៅ​ខ្ញុំ​ ដើម្បី​ជួយ​ចិញ្ចឹម​ខ្ញុំ ​ឲ្យ​បាន​រស់​រាន​មាន​ជីវិត»។

លោក​ប៊ូ ម៉េង​ធ្លាប់​រង​ទារុណ​កម្ម​យ៉ាង​ធ្ងន់ធ្ងរ​នៅ​ក្នុង​អតីត​គុក​ទួលស្លែង​ដ៏​សែន​ប្រល័យ​របស់​ក្រុម​ខ្មែរ​ក្រហម​មួយ​នេះ។

ដូច្នេះ ​វា​មិន​មែន​ងាយ​ស្រួល​ប៉ុន្មាន​ទេ​ ដែល​លោក​ត្រូវ​វិល​ត្រឡប់​មក​ទី​នេះ​វិញ​ជា​រៀង​រាល់​ថ្ងៃ ​ដើម្បី​លក់​សៀវភៅ​របស់​លោក​នោះ។

«ខ្ញុំ​ឲ្យ​តែ​ចូល​មក​កន្លែង​ហ្នឹង ​ខ្ញុំ​អួល​ណែន​ហើយ។​ ប៉ុន្តែ​មិន​ដឹង​ធ្វើ់​ម៉េច​ ការ​រក​ស៊ី​ ការ​លក់​ដូរ ​ដើម្បី​បាន​ថវិកា​ចិញ្ចឹម​កូន​ខ្លះ​ ពី​ព្រោះ​ថវិកា​រដ្ឋ​ដែល​ជួយ​ខ្ញុំ​ បាន​តិចតួច​ វា​ចាយ​មិន​គ្រាន់​ ស៊ី​មិន​គ្រាន់។​ អញ្ចឹង​ខ្ញុំ​ឆ្លៀត​ពេល​ហ្នឹង​មក​លក់សៀវភៅ​ដើម្បី​យក​កម្រៃ​ហ្នឹង​ចិញ្ចឹម​ជីវិត»។

លោក​ហ៊ុយ វណ្ណៈ​គឺ​ជា​អ្នក​និពន្ធ​សៀវភៅ​ដែល​រៀបរាប់​ពី​ជីវិត​របស់​លោក​ប៊ូ ម៉េង​នេះ ​និង​បច្ចុប្បន្ន​លោក​ជា​មន្ត្រី​កិច្ចការ​សាធារណៈ​របស់​សាលាក្តី​ខ្មែរ​ក្រហម។

«អ្វី​ដែល​ខ្ញុំ​បាន​ធ្វើ​ជា​មួយ​លោក​ប៊ូម៉េង​គឺ​ខ្ញុំ​គិត​យ៉ាង​ដូច្នេះ​ គឺ​ប្រឹងប្រែង​ធ្វើ​ឲ្យ​សៀវ​ភៅ​នេះ​មាន​ន័យ​សម្រាប់​ជីវិត​របស់​គាត់ ​ហើយ​ក៏​ជា​វិធី​មួយ​ដើម្បី​ជួយ​គាត់​ក្នុង​ផ្លូវ​ផ្សេងៗ​ ក្នុង​បញ្ហា​ហិរញ្ញវត្ថុ​ និង​ផ្នែក​ផ្លូវ​ចិត្ត​របស់​គាត់»។

លោក​ក្លូត ប្រេលី ​(Claude Brale)​ គឺ​ជា​អ្នក​ទេសចរណ៍​មក​ពី​ប្រទេស​កាណាដា​ ដែល​បាន​ទិញ​សៀវភៅ​របស់​លោក​ប៊ូ ម៉េង។

«ខ្ញុំ​មើល​ឃើញ​ពី​ភាព​ស៊ី​ជម្រៅ​យ៉ាង​ច្រើន​នៅ​ក្នុង​មុខ​ និង​ភ្នែក​របស់​គាត់ ហើយ​តាម​រយៈ​នោះ​ ខ្ញុំ​ចង់​អាន​បន្ថែម​ទៀត​អំពី​រឿង​របស់​គាត់»។

ដូច​លោក​ប៊ូ ម៉េង​ដែរ ​លោក​ជុំ ម៉ី ​អតីត​អ្នក​ទោស​គុក​ទួលស្លែង​ម្នាក់ទៀត ​ក៏​មក​លក់​សៀវភៅ​នៅ​ទី​នេះ​ជា​រៀង​រាល់​ថ្ងៃ​ដែរ ​ជា​ជាង​ទៅ​ចូលរួម​សវនាការ​កាត់​ទោស​អតីត​មេដឹកនាំ​ខ្មែរ​ក្រហម។

លោក​និយាយ​ថា ​មាន​តែ​មក​ទី​នេះ​ទេ​ ទើប​លោក​អាច​រក​ប្រាក់​បាន​ខ្លះ​ដើម្បី​ទ្រទ្រង់​ជីវិត​និង​គ្រួសារ​របស់​លោក​បាន។

«ព្រោះ​ក្មួយ​ដឹង​ស្រាប់​ហើយ​ថា​ តុលាការ​ចាប់​តាំង​ពីរ​ចាប់​ផ្តើម​ថ្ងៃ​ណា​ម៉ោ​ មិន​ដែល​បាន​ផ្តល់​អី​ដល់​ជន​រងគ្រោះ​ទេ។ ​នៅ​សល់​តែ​បី​គ្រាប់​ហ្នឹង ​ហើយ​ឥឡូវ​វ៉ាន់ ​ណាត​ស្លាប់​ទៀត ​នៅ​សល់​តែ​ពីរ​ទេ។​ មិន​ទាន់​ឃើញ​លទ្ធ​ផល​អី​ដល់​ជន​រង​គ្រោះ​បន្តិច​ណា​ទេ»។

លោកប៊ូ ម៉េងបន្ទរ៖

«បាន​ជា​បាត់​ភាគី​ខ្ញុំ​មិន​ទៅ​ចូលរួម​ ភាគី​ដែល​នៅ​រស់​ហ្នឹង​ ពីរ​នាក់​ហ្នឹង​ នៅ​ជ្រងោ​ហ្នឹង ​នៅ​អង្គុយ​លក់​សៀវ​ភៅ​យក​លុយ​ ដើម្បី​ក្រពះ​ហ្នឹង​ ម្តេច​មិន​អាណិត​គ្នា​ផង​ អាណិត​តែ​អា​ចុង​ចោទ​ហ្នឹង​ខ្លាំង​ម្ល៉េះ?​ តុលាការ​ហ្នឹង​ តុលាការ​ស្អី?​ ខ្ញុំ​តូច​ចិត្ត​ណាស់​ ខក​ចិត្ត​យ៉ាង​ខ្លាំង»។

លោក​ហ៊ុយ វណ្ណៈ​ឆ្លើយតប៖

«តុលាការ​មិន​បាន​ប្រើ​គំនិត​មួយ​ដើម្បី​បែង​ចែក​ថា​ ជន​រងគ្រោះ​ទួល​ស្លែង​សំខាន់​ ឬ​នៅ​គុក​ណា​ផ្សេង​សំខាន់​ជាង​នោះ​ទេ។ ​តុលាការ​ស្វាគមន៍​ការ​ចូល​រួម​រាល់​ពេល​វេលា​របស់​សាធារណជន ​តែ​យើង​មិន​បាន​គិត​ថា​ ត្រូវ​តែ​គាំពារ​ជា​ពិសេស​ទៅ​ដល់​ភាគី​ណា​មួយ​ទេ»។

យ៉ាង​ណា​ក៏​ដោយ ​ក្រុម​អ្នក​ទស្សនា​សារ​មន្ទីរ​ទួលស្លែង​នេះ​ជឿ​ថា​ ការ​ទិញ​សៀវភៅ​របស់​អ្នក​រស់រាន​មាន​ជីវិត​ពី​អតីត​គុក​នេះ​ អាច​ជួយ​រួម​ចំណែក​ធ្វើ​ឲ្យ​ជីវិត​របស់​ពួកគេ​ប្រសើរ​ជាង​មុន។

លោក​អាដាម ម៉ារីស​(Adam Marris) ​មក​ពី​ប្រទេស​អូស្ត្រាលី៖

«ខ្ញុំ​សង្ឃឹម​ថា ​វា​ជួយ​ផ្តល់​ភាព​សុខ​ស្រួល​ខ្លះ​ដល់​ជីវិត​របស់​គាត់ ​និង​អាច​ឲ្យ​គាត់​មាន​ជីវិត​ដែល​ប្រកប​ដោយ​គុណភាព​ល្អ​ជាង​នេះ។​ ហើយ​ខ្ញុំ​ក៏​សង្ឃឹម​ថា​ គាត់​ទទួល​បាន​ការ​ពេញ​ចិត្ត​ខ្លះៗ​ពី​ការ​និយាយ​ចេញ​នូវ​រឿង​រ៉ាវ​របស់​គាត់​និង​ប្រហែល​ជា​អាច​ធ្វើ​ឲ្យ​ពិភពលោក​នេះ​ប្រសើរ​ជាង​មុន»។

គេ​មិន​ដឹង​ថា​ តើ​អតីត​អ្នក​ទោស​គុក​ទួលស្លែង​នេះ​នៅ​អាច​និយាយ​រឿង​រ៉ាវ​របស់​ខ្លួន​ប្រាប់​ពិភពលោក​រហូត​ដល់​ពេល​ណា​ទេ​ នៅ​ពេល​ដែល​វ័យ​របស់​គាត់​កាន់​តែ​ជ្រេ​ទៅ​ហើយ​នោះ។​ ប៉ុន្តែ​សម្រាប់​ពេល​នេះ​ ពួកគាត់​នៅ​តែ​អង្គុយ​លក់​សៀវភៅ​របស់​គាត់​ ដើម្បី​បន្ត​ជីវិត​របស់​ខ្លួន​តទៅ​ទៀត៕

XS
SM
MD
LG