ភ្ជាប់​ទៅ​គេហទំព័រ​ទាក់ទង

សំណួរ​ចម្លើយ​ជាមួយ​អ្នក​ជំនាញ​កិច្ច​ការ​មជ្ឈឹម​បូព៌ា​អំពី​ស្ថានភាព​នៅ​អេហ្ស៊ីប

  • Paul Westpheling

សកម្មជន​ប្រឆាំង​នឹង​រដ្ឋាភិបាល​អេហ្ស៊ីប​​ម្នាក់ចាប់​ដៃ​ជាមួយ​​មន្ត្រី​ប៉ូលីស​ប្រឆាំង​កុប្បកម្ម​នៅ​ក្រោយ​ពេល​មន្ត្រី​ប៉ូលីស​បាន​ដក​ថយ​វិញក្រោយ​ពី​មាន​ការ​ប៉ះ​ទង្គិច​គ្នា​ជាមួយ​ក្រុម​បាតុករ​នៅ​ក្រុង​ឡឺ​គែរ (Cairo) ប្រទេស​អេហ្ស៊ីប​កាល​ពី​ថ្ងៃ​ទី​២៨​ខែ​មករា​ឆ

កំណត់​និពន្ធ​នាយក៖ លោកស្តេហ្វិន ឃុក​ (Stephen Cook)​ គឺជា​អ្នក​ជំនាញ​ខាង​កិច្ចការ​មជ្ឈឹមបូព៌ា​ ​ធ្វើ​ការ​នៅ​ក្រុមប្រឹក្សា​ទំនាក់​ទំនង​អន្តរជាតិ ដែល​មាន​មូលដ្ឋាន​នៅ​រដ្ឋធានី​វ៉ាស៊ីនតោន។ នៅយប់​ថ្ងៃ​ព្រហស្បតិ៍​ ​លោក​បាន​ត្រឡប់​ពី​ទី​ក្រុង​ឡឺគែរ​ ​មក​រដ្ឋធានី​វ៉ាស៊ីនតោន​វិញ​ ​ហើយ​លោក​បាន​ពិភាក្សា​ជាមួយ​នឹង​លោក​ផល​ ​វែសត៍ហ្វ៊ែលីង​ (Paul Westpheling)​ នៃ​វីអូអេ​សំឡេង​សហរដ្ឋ​អាមេរិក​ ​អំពី​មូលហេតុ​ដែល​នាំ​ឲ្យ​កើត​មាន​បាតុកម្ម​នៅ​ទី​ក្រុង​ឡឺគែរ​ និង​ទី​ក្រុង​ដទៃ​ទៀត​ ​ដែល​មាន​ខ្លឹមសារ​ដូច​តទៅ៖

លោក​ឃុក៖ ​នេះ​គឺ​ជា​លទ្ធផល​នៃ​កំហឹង​ និង​ភាពតានតឹង​ក្នុង​ចិត្ត​ដែល​មាន​រាប់​ឆ្នាំ​មក​ហើយ។ ​បាតុកម្មមាន​ជា​បន្ត​បន្ទាប់​ជា​ទៀង​ទាត់​នៅ​ប្រទេស​អេហ៊្សីប​ ​រវាង​ប្រាំ​ ​ឬ​ប្រាំមួយ​ឆ្នាំ​កន្លង​មក​នេះ។ ​ស្ថានភាព​ត្រូវបាន​បញ្ឆេះ​ដោយ​បាតុកម្ម​ដែល​ត្រូវបាន​រៀបចំ​តាម​ផែនការ​ នៅ​ថ្ងៃ​ទី​២៥​ ខែមករា​ សម្រាប់​ទិវាប៉ូលិស​ ​ហើយ​ស្ថានភាពនៅ​ប្រទេស​ទុយណេស៊ី​ផ្តល់សន្ទុះ​ដល់​បាតុកម្ម​ ​ហើយ​ធ្វើ​ឲ្យ​បាតុករយល់​ថា​ ​អំណាច​ប្រជា​ពលរដ្ឋ​អាច​បណ្តេញ​មេដឹកនាំ​អារ៉ាប់​ឲ្យ​ចេញពី​អំណាច​បាន។

សំណួរ៖​ ហេតុអ្វី​បាន​ជា​បាតុកម្ម​ទាំង​នេះ​ហាក់​ដូចជា​មានកម្លាំង​ទាក់​ទាញ​ ​ខណៈ​ដែល​បាតុកម្ម​ដទៃ​ទៀត​ត្រូវបាន​បង្ក្រាប​ដោយ​រដ្ឋាភិបាល​ងាយ​ស្រួល និង​ឆាប់​រហ័សម្ល៉េះ?

ឃុក៖ ខ្ញុំគិត​ថា​ រដ្ឋាភិបាល​អេហ្ស៊ីប​រំពឹង​ថា​ ​គេ​ធ្វើ​បាតុកម្ម​តវ៉ា​តែ​មួយ​ថ្ងៃ​ ​ហើយ​អ្វីៗ​នឹង​ត្រឡប់​ទៅ​រក​ភាព​ដើម​វិញ​ ​ដូច​ដែល​ធ្លាប់​មាន​ពី​មុន​មក។ ​វា​ច្បាស់​ណាស់​ថា​ ស្ថានភាព​ទុយណេស៊ី​ដែល​កើត​ឡើង​ពេញ​មួយ​ខែនោះ​ ជា​គំរូ​សម្រាប់​ប្រជា​ពលរដ្ឋ​អេហ្ស៊ីប ​ដែល​មាន​គោល​ដៅ​ដូច​គ្នា​នេះ។

សំណួរ៖ ​មាន​បាតុកម្ម​ស្រដៀង​គ្នា​នេះ​ប្រឆាំង​នឹង​ភាព​ក្រីក្រ​ ​អត្រាអត់​ការងារ​ធ្វើ​ខ្ពស់ និង​ទំនិញ​ឡើង​ថ្លៃ​នៅ​ប្រទេស​ហ្សកដានី​ ប្រទេស​យែមែន​ ហើយ​យើង​ក៏​ឃើញ​មាន​បាតុកម្ម​នៅ​ប្រទេស​លីបង់​ផង​ដែរ។ ​តើ​អ្វី​ដែល​នាំ​ឲ្យ​មាន​បាតុកម្ម​តវ៉ា​យ៉ាង​ច្រើន​កើត​ឡើង​ភ្លាមៗ​បែប​នេះ?

ឃុក៖ ​សូម​ទុក​ប្រទេស​លីបង់​ដោយ​ឡែក​ ​ពី​ព្រោះ​ខ្ញុំគិត​ថា​ ​ស្ថានភាព​នៅ​លី​បង់​ គឺ​កើត​មាន​តែនៅ​ក្នុង​ប្រ​ទេស​លីបង់ទេ​។ នៅ​ពាស​ពេញ​តំបន់​ដូចជា​ នៅ​ប្រទេស​យែមែន​ប្រជា​ពលរដ្ឋ​ធុញ​ទ្រាន់​នឹង​របប​ផ្តាច់ការ​ ​ហើយ​មិន​ពេញចិត្ត​នឹង​មេដឹក​នាំ​របស់​ខ្លួន។​ នៅ​ប្រទេស​អេហ្ស៊ីប​មិន​សូវ​មាន​បញ្ហា​សេដ្ឋកិច្ច​ធំដុំ​ទេ​ ​មាន​តិចតួច​ប៉ុណ្ណោះ​ ​ប៉ុន្តែទោះ​បី​ជា​មាន​វិបត្តិ​សេដ្ឋកិច្ច​ក្តី​ ​ក៏​ប្រជា​ពលរដ្ឋ​ចង់​រស់​នៅ​ក្នុង​សង្គមមួយ​ដែល​មាន​សេរីភាព​ដែរ។

សំណួរ៖ ​នៅ​ប្រទេស​អេហ្ស៊ីប​ ​អ្នក​រិះគន់​ដ៏​ឥត​សំចៃ​ចំពោះរដ្ឋាភិបាល​មួយ​រូបគឺ​លោក​ ម៉ូហាម៉េដ​ អ៊ែល ​បារ៉ាដី​ (Mohammed El Baradei)​ បាន​ត្រឡប់​មក​វិញ។ ​តើ​វត្តមាន​របស់​លោក​បញ្ឆេះ​ឲ្យ​មាន​បាតុកម្ម​ប្រឆាំង​រដ្ឋាភិបាល​នេះ​ទេ?

ឃុក៖ ​ការ​វិល​ត្រឡប់​របស់​លោក​អ៊ែល បារ៉ាដី​ពិត​ជា​សំខាន់​ណាស់។ ​ប្រសិន​បើ​លោក​អាច​ដឹក​នាំ​ក្រុម​សកម្ម​ជន​ទាំង​នេះ​ដែល​បាន​អំពាវនាវ​ឲ្យ​ប្រជា​ពលរដ្ឋ​អេហ្ស៊ីប​ចេញ​មក​តាម​ផ្លូវ​នោះ​ ​លោក​អាចផ្តល់​ឲ្យ​ចលនានេះ​នូវ​ការ​បង្រួប​បង្រួម​នយោបាយ​មួយ​ចំនួន​ និង​ចំណុច​ផ្តោត​ការ​យក​ចិត្តទុក​ដាក់ដ៏​សំខាន់​សម្រាប់​ប្រឆាំង​នឹង​របប​កាន់​អំណាច​ ហើយជាចំណុចផ្តោត​ដ៏សំខាន់​សម្រាប់​កំណែ​ទម្រង់​ និង​ការ​ផ្លាស់ប្តូរ​ ​ដែល​ជាផល​លំបាក​ដ៏​ចំបង​មួយ​សម្រាប់​រដ្ឋាភិបាល​ ​ដែល​បាន​ផ្តល់​ទស្សនៈ​ថា​ ​ស្ថានភាព​នេះ​ត្រូវ​បាន​ជំរុញ​ឲ្យកើត​មាន​ដោយ​គណបក្ស​ ​ភាព​ជា​បង​ប្អូន​អ៊ីស្លាម​ ឬ​ហៅ​ថា​ ​Muslim Brotherhood ​ដែល​ជា​ក្រុម​ប្រឆាំង​ធំបំផុត​នៅ​ក្នុង​ប្រទេស​អេហ្ស៊ីប​ ​ហើយ​វា​ជា​ការ​ពិបាក​ក្នុង​ការ​ទទួល​បាន​ការ​គាំទ្រ​ពីសំណាក់សហ​រដ្ឋ​អាមេរិក​ ​នៅ​ពេល​ដែល​រដ្ឋាភិបាល​បង្ក្រាប​ចលនា​ដែល​ដឹក​នាំ​ដោយ​មេធាវី​និកាយ​សាសនា​ម្នាក់​ ​ដែល​អំពាវនាវ​ឲ្យ​មាន​កំណែ​ទម្រង់។​ វា​ជា​ការ​អភិវឌ្ឍ​ដ៏​សំខាន់​ដែល​លោក​បាន​ត្រឡប់​ចូល​ក្នុង​ប្រទេស​អេហ្ស៊ីប។

សំណួរ៖ ​តើ​វា​ត្រឹម​ត្រូវ​ទេ ​ការ​ដែល​និយាយថា​ ​រដ្ឋាភិបាល​សហ​រដ្ឋ​អាមេរិក​ផុង​ខ្លួន​ជាប់​ក្នុង​ស្ថានភាព​មួយ​ដែល​ខ្លួន​គាំទ្រ​រដ្ឋា​ភិបាល​អេហ្ស៊ីប​ ​ដែល​ដឹក​នាំដោយលោក​ប្រធានាធិបតីហូស្នី ​មូបារ៉ាក​ (Hosni Mubarak)​ផង​ និង​គាំទ្រ​ក្រុម​អ្នក​ប្រឆាំ​តវ៉ា​ផង​នោះ?

ឃុក៖ ​ខ្ញុំគិត​ថា​ ​សម្រាប់​រដ្ឋបាល​លោក​អូបាម៉ា​ស្ថានភាព​នេះលំបាក​ជាង​ស្ថានភាព​នៅ​ក្នុង​ប្រទេស​ទុយណេស៊ី​ឆ្ងាយណាស់​ ​ប៉ុន្តែ​ទីបំផុត​គោល​ការណ៍​មាន​តួនាទី​សំខាន់​ណាស់នៅ​ទី​នេះ​ ​ជា​ពិសេស​វិធានការដែល​ក្រសួង​ការ​បរទេស​ ​បាន​ចាត់​លើ​បញ្ហា​នេះ​ពី​ដំបូង​គឺ​មិន​សូវ​មាន​ភាព​ស្មុគ​ស្មាញ​ទេ។ ​ការ​ជំរុញ​ឲ្យ​មាន​ការ​ប្រើបា្រស់រិត​ត្បិត​ដោយ​គ្រប់​គណបក្ស​ទាំង​អស់​ ​នៅ​ពេល​ដែល​មាន​គណបក្សមួយ​មិន​ប្រើ​ប្រាស់​ការ​រិតត្បិត​ ហើយ​នៅ​តែ​អំពាវនាវ​ឲ្យ​មាន​កំណែ​ទម្រង់​ទៀត​នោះ​ ​វា​ហាក់​មិនសូវ​ត្រូវ​ប៉ុន្មាន​ទេ​នៅ​ពេល​នេះ៕

ប្រែ​សម្រួល​ដោយ​ ​អ៊ឹម សុធារិទ្ធ

XS
SM
MD
LG