ភ្ជាប់​ទៅ​គេហទំព័រ​ទាក់ទង

គ្រោះអាសន្ន​នៅ​ជប៉ុន​មិន​បង្អាក់​ផែនការ​សង់​រោងចក្រ​ថាមពល​នុយកេ្លអ៊ែរ​នៃ​អាស៊ី​អាគ្នេយ៍


ការរញ្ជួយ​ផែនដី​និង​មហា​រលក​សមុទ្រ​ស៊ូណាមី​បានធ្វើឲ្យ​ខូច​រោងចក្រ​​នុយក្លេអ៊ែរ ហ្វ៊ុគុស្ស៊ីម៉ា ដេអៃជី (Fukushima​ Daiichi) ដែលថិតនៅជិតទីក្រុង អូគូមា (Okuma) ប្រទេសជប៉ុន នៅថ្ងៃទី១៤ខែមិនា ឆ្នាំ២០១១។

អាស៊ី​អាគ្នេយ៍​គ្មាន​រោងចក្រ​ថាមពល​នុយក្លេអ៊ែរ​ដំណើរការ​ទេ​ ប៉ុន្តែ​ប្រទេស​ភាគ​ច្រើន​ក្នុង​តំបន់​នេះ​ គ្រោង​នឹង​អភិវឌ្ឍ​ថាមពល​នុយក្លអ៊ែរ​ ទោះបី​ជាមាន​គ្រោះ​អាសន្ន​នុយក្លេអ៊ែរ​នៅ​ប្រទេស​ជប៉ុន​ក៏ដោយ។

ប្រទេស​ឥណ្ឌូនេស៊ី​ ម៉ាឡេស៊ី​ ថៃ​ និង​វៀតណាម​ គ្រោង​នឹង​សង់​រោងចក្រ​ថាមពល​នុយក្លេអ៊ែរ​នៅ​ក្នុង​ទសវត្ស៍​ក្រោយ​ ហើយ​ប្រទេស​ដទៃៗ​ទៀត​នៅ​ក្នុង​តំបន់​អាស៊ីអាគ្នេយ៍​រំពឹង​ថា​នឹង​ធ្វើតាម​ប្រទេស​ទាំងនោះ។​ ប៉ុន្តែ​គ្រោះអាសន្ន​នុយក្លេអ៊ែរ​ដែល​បណ្តាល​មកពី​ការរញ្ជួយ​ផែនដី​ និង​មហា​រលក​សមុទ្រ​ស៊ូណាមី​ នៅក្នុង​ប្រទេស​ជប៉ុន​នោះ​ បាន​បង្កើន​ការព្រួយបារម្ភ​អំពី​សុវត្ថិភាព​នៃ​ការអភិវឌ្ឍថាមពល​នុយក្លេអ៊ែរ​ ជាពិសេស​នៅក្នុង​ប្រទេស​ដែល​ងាយ​រង​គ្រោះ​ ដោយ​គ្រោះ​មហន្តរាយ​ធម្មជាតិ​នានា។​ តំបន់​អាស៊ីប៉ាស៊ីហ្វិក​មាន​ការ​វាយ​ប្រហារ​ដោយ​ការ​រញ្ជួយ​ផែនដី​ ខ្យល់ព្យុះ​ត្រូពិច​ ទឹកជំនន់​នៅ​រដូវភ្លៀង​ និង​ការហូរច្រោះ​ដីបាក់​ជា​រៀង​រាល់ឆ្នាំ។

បន្ទាប់​ពី​មហន្តរាយ​នៅក្នុង​ប្រទេស​ជប៉ុន​មក​ មន្ត្រី​ផ្លូវការ និង​សកម្មជន​នានា​នៅ​ក្នុង​តំបន់​ បាន​អំពាវនាវ​ឲ្យ​មាន​ការ​ពិចារណា​ឡើង​វិញ​ នូវ​ការអនុវត្ត​ថាមពល​នុយក្លេអ៊ែរ។

ប្រធាន​គណៈកម្មការ​ថាមពល​បរមាណូ​វៀតណាម​ វុង ហ៊ូ ឌុន​ និយាយ​ថា ប្រទេស​លោក​កំពុង​មើល​គ្រោះអាសន្ន​នៅ​ជប៉ុន​យ៉ាង​ដិតដល់​ ហើយ​បាន​ដឹង​អំពី​ការ​ព្រួយបារម្ភ​សាធារណៈ។​ ប៉ុន្តែ​លោក​និយាយថា​ ពួកគេ​គិត​ថា ការព្រួយបារម្ភ​នោះ​នឹង​មិន​មានផល​ប៉ះ​ពាល់​លើ​គម្រោងការ​របស់​ពួកគេ​ដើម្បី​សង់​រោងចក្រ​ថាមពល​នុយក្លេអ៊ែរ​ ចំនួន​យ៉ាង​តិច​៨​នោះ​ទេ។

លោក​ វុង​ និយាយថា​ ពួកគេ​នឹង​ប្រើ​បច្ចេកវិជ្ជានុយក្លេអ៊ែរ​ថ្មី​បំផុត​ ដែល​លោក​និយាយ​ថា នឹង​មាន​សុវត្ថិភាព​ជាង​បច្ចេកវិជ្ជា​ជំនាន់ចាស់​ដែល​ត្រូវ​បាន​ប្រើ​នៅ​ឯ​រោងចក្រ​នុយក្លេអ៊ែរ ហ្វ៊ុគុស្ស៊ីម៉ា ដេអៃជី (Fukushima​ Daiichi)​ របស់​ជប៉ុន។ លោក​ វុង ថ្លែង​ថា៖

«យើង​នឹង​ជ្រើស​យក​បច្ចេកវិជ្ជា​នៃ​ថាមពល​នុយក្លេអ៊ែរ​ទំនើប។​ មាន​ន័យថា ប្រហែល​ជា​យើង​ជ្រើស​យក​បច្ចេកវិជ្ជា​ជំនាន់​ទីបី​ ឬ​លើស​ពីនេះ។​ បច្ចេកវិជ្ជា​នេះ​ល្អ​ណាស់​ ពេលណា​មាន​គ្រោះថ្នាក់​ដូចជា​ការរញ្ជួយ​ដី​នៅ​ជប៉ុន​ដែល​លោក​អ្នក​បាន​ឃើញ​នេះ»។

លោក​ វុង​ និយាយថា​ ពួកគេ​គ្រោង​នឹង​ចាប់ផ្តើម​សង់​រោងចក្រ​ថាមពល​នុយក្លេអ៊ែរ​ដំបូង​បង្អស់​របស់​វៀតណាម​នៅ​ក្នុង​រយៈ​បីឆ្នាំ។​ ប្រទេស​ថៃ​គ្រោង​នឹង​កសាង​រោងចក្រ​នុយ​ក្លេអ៊ែរ​ដល់​ទៅ​៥​មិនហួស​ពីឆ្នាំ​២០២៥។

បន្ទាប់​ពី​គ្រោះអាសន្ន​នៅ​ជប៉ុន​មក​ រដ្ឋាភិបាល​ថៃ​បាន​ឲ្យ​ដឹងថា ខ្លួន​ក៏​អាច​លើក​យក​ការ​ព្រួយ​បារម្ភ​មកពិចារណា​អំពី​សុវត្ថិភាព​នុយក្លេអ៊ែរ​ដែរ​ ដោយ​បញ្ហា​នេះ​បាន​ក្លាយ​ជា​ការ​យក​ចិត្តទុក​ដាក់​នៃ​សាធារណៈ​កាន់តែ​ច្រើន​ឡើង។

ប៉ុន្តែ​អ្នកនាំ​ពាក្យ​របស់​រដ្ឋាភិបាល​ថៃ​ លោក​ ប៉ានីតាន់​ វតនាយ៉ាកន​ និយាយ​ថា​ រដ្ឋាភិបាល​នឹង​មិន​ពន្យា​ការអភិវឌ្ឍ​ថាមពល​នុយក្លេអ៊ែរ​របស់​ខ្លួន​ឡើយ។​ លោក​វតនាយ៉ាកន​ថ្លែង​ថា៖

«ទាល់​តែ​យើង​ដឹងប្រាកដ​ថា​ មានអ្វី​កើតឡើង​នៅ​ជប៉ុន​នោះ​ ខ្ញុំ​គិត​ថា​ រដ្ឋាភិបាល​ជា​ច្រើន​ប្រហែល​ត្រូវការ​ព័ត៌មាន​បន្ថែម​អំពី​បញ្ហា​នេះ។​ ដូច្នេះ​ខ្ញុំ​គិត​ថា​ ​ពិតប្រាកដ​ណាស់​ថា​ បញ្ហា​នេះ​បង្កើន​ការព្រួយបារម្ភ​ ប៉ុន្តែ​ការព្រួយបារម្ភ​ទាំងនេះ​មិនមែន​ជា​រឿង​ថ្មី​ទេ។​ ដោយ​សង្ឃឹមថា​ គណៈកម្មាធិការ​របស់​យើង​ដែល​កំពុង​ធ្វើការ នឹង​នាំមក​ជាមួយ​នូវ​រូបភាព​ដ៏​ទូលំ​ទូលាយ​មួយ​អំពី​រឿង​នេះ»។

លោក​ វតនាយ៉ាកន​ និយាយ​ថា​ ប្រសិន​បើមាន​ការពន្យា​ណា​មួយ​នៅ​ក្នុង​ផែនការ​ថាមពល​នុយក្លេអ៊ែរ​របស់​ថៃ​នោះ គឺ​មក​ពី​ឧបសគ្គ​នៃ​បច្ចេកទេស និង​ការ​សិក្សា​អំពី​និរន្តរភាព​ហើយ​មិនមែន​មកពី​ប្រតិកម្ម​ទៅ​នឹង​គ្រោះអាសន្ន​នុយក្លេអ៊ែរ​ជប៉ុន​ទេ។

លោក​ ខាល ថេយយើរ៍ ​អ្នកឯកទេស​ខាងកិច្ចការ​អាស៊ីអាគ្នេយ៍​នៃ​សាកលវិទ្យាល័យ​ ញូ សោធ វ៉េលស៍ (New​ South​ wales) នៃ​ប្រទេស​អូស្ត្រាលី​ មានប្រសាសន៍​ថា​ គ្រោះអាសន្ន​នុយក្លេអ៊ែរ​នៅ​ជប៉ុន​អាចនាំ​ឲ្យ​មាន​ការពិនិត្យ​ហ្មត់ចត់​ឡើងវិញ​នូវ​គម្រោងការ​សុវត្ថិភាព​គ្រោះ​ថ្នាក់​នុយក្លេអ៊ែរ​ទាំងឡាយ​នៅ​ក្នុង​ប្រទេស​មួយ​ចំនួន។​ ប៉ុន្តែ​លោក​ថ្លែង​ថា​ សេចក្តីត្រូវការ​ថាមពល​នុយក្លេអ៊ែរ​ដែល​កើន​ឡើង​យ៉ាងលឿន​របស់​តំបន់​អាស៊ីអាគ្នេយ៍​នោះ​ មានន័យ​ថា​តំបន់​នេះ​មាន​ជម្រើស​ផ្សេងៗ​ក្រៅ​ពី​ការផលិត​ថាមពល​នុយក្លេអ៊ែរ។​ លោក ថេយើរ៍ ថ្លែង​ដូច្នេះ​ថា៖

«លោក​អ្នក​មាន​ថាមពល​ផលិត​ពី​កម្លាំងទឹក​ លោកអ្នក​អាច​ផ្តោត​លើ​ជីវៈឥន្ធនៈ​ លោក​អ្នក​អាច​ប្រើ​ថាមពល​ផលិត​ពី​កម្លាំង​ខ្យល់​បាន។​ ប៉ុន្តែ​ទំហំ​នៃ​ការលូតលាស់​សេដ្ឋកិច្ច​ កំណើន​នៃ​ការប្រើប្រាស់​ មនុស្ស​ឈានដល់​កម្រិត​ប្រើ​ប្រាស់​ឧបករណ៍ និង​របស់របរ​ក្នុង​ផ្ទះ​ដែល​ប្រើ​ថាមពល ដែល​ទាំងអស់​នេះគួរ​ត្រូវ​គិត​ជាមុន​ដើម្បី​កុំឲ្យ​មាន​សេចក្តី​ត្រូវការ​ថាមពល​ដ៏​សម្បើម»។

រោងចក្រ​ នុយក្លេអ៊ែរ​ បាតាអាន (Bata’an​) របស់ហ្វីល្លីពីន​ដែល​ត្រូវ​បាន​សង់​នៅទសវត្ស៍​១៩៨០​នោះ​ ជា​រោងចក្រ​ថាមពល​នុយក្លេអ៊ែរ​តែ​មួយគត់​នៅ​អាស៊ីអាគ្នេយ៍ ប៉ុន្តែ​ ពីព្រោះ​តែ​ការព្រួយបារម្ភ​អំពី​ការរញ្ជួយ​ផែនដី និង​ភ្នំភ្លើង​ដែល​នៅជិតៗ​នោះ​ រោងចក្រ​នោះ​មិនត្រូវ​បានដំណើរការ​ទេ។​ ទោះជា​យ៉ាងណា​ រដ្ឋាភិបាលហ្វីល្លីពិន​កំពុង​ពិចារណា​ធ្វើ​ឲ្យ​រោង​ចក្រ​នុយក្លេអ៊ែរ​នោះ​ដំណើរការ​ឡើងវិញ​ដើម្បី​បំពេញ​សេចក្តី​ត្រូវការ​ថាមពល​របស់​ខ្លួន។

ប្រែសម្រួល​ដោយ នុច សារីតា។

XS
SM
MD
LG