ភ្ជាប់​ទៅ​គេហទំព័រ​ទាក់ទង

មន្ដ្រី​ស៊ូដង់​ខាង​ត្បូង​ត្រៀម​ចាំ​លទ្ធផល​ការ​បោះ​ឆ្នោត​ប្រជាមតិ​។


សមាជិក​បុគ្គលិក​នៃ​ការ​បោះ​ប្រជាមតិ​តំបន់​ស៊ូដង់​ខង​ត្បូង​រៀប​ចំ​ការ​រាប់​សន្លឹក​ឆ្នោត​ជា​ផ្លូវ​ការ​ស្ដី​ពី​ឯករាជ្យ​ភាព​នៃ​តំបន់​ស៊ូដង់​ខង​ត្បូង​​នៅ​ថ្ងៃ​ទី​១៦​ខែ​មករា​ឆ្នាំ​២០១១

ក្រុង ហ៊្សូបា៖ នៅពេល​ដែល​ការបិទ​បញ្ជី​បោះឆ្នោត​កំពុង​ដំណើរការ​នៅក្នុង​ការ​បោះ​ឆ្នោត​ប្រជាមតិ​ដើម្បី​ឯករាជ្យភាព​ក្នុង​តំបន់​ស៊ូដង់​ភាគខាងត្បូង​ មេដឹកនាំ​របស់​ខ្លួន​កំពុង​ប្រុងប្រៀប​សម្រាប់​ថ្ងៃ​ចេញ​លទ្ធផល​ចុងក្រោយ​។​ពួកមន្រ្តី​និយាយ​ថាទោះបី​តំបន់​នោះ​ជ្រើសរើស​ផ្តាច់​ខ្លួន​ចេញ​ឬ​ស្ថិតនៅ​ជា​ផ្នែក​មួយ​នៃ​ប្រទេស​ស៊ូដង់​ក៏ដោយ​តំបន់​នោះ​ ប្រឈមមុខ​បញ្ហា​ដ៏ធំធេង​។

លោក​ ដេវីដ ហ្ក្រេសលី (David Gressly)​ មេដឹកនាំ​អង្គការ​សហ​ប្រជា​ជាតិ​ក្នុង​តំបន់​ស៊ូដង់​ខាង​ត្បូង​បានអញ្ជើញ​ទៅ​ដល់​តំបន់នោះ​មុន​ពេល​តំបន់​ខាង​ជើង​និង​ខាងត្បូង​បាន​ចុះ​ហត្ថលេខា​លើ​កិច្ច​ព្រម​ព្រៀង​សន្តិភាព​ដែល​បាន​បញ្ចប់​សង្គ្រាម​ស៊ីវិល​២​ទសវត្សរ៍​ហើយ​បាន​បង្កើត​រដ្ឋាភិបាល​តំបន់​ស្វ័យ​ភាព​ក្នុង​រដ្ឋ​ធា​នីហ្ស៊ូបា​។

លោក​មាន​ប្រសាសន៍​ថា​ ប្រជាពលរដ្ឋ​ស៊ូដង់​ភាគ​ខាង​ត្បូង​បាន​ប្រុងប្រៀប​ដើម្បី​ឯករាជ្យភាព​ហើយ​នឹង​ផលវិបាក​ដែល​ប្រទេស​នោះ​មាន​។

«ការងារ​ជាច្រើន​បាន​ត្រូវ​ធ្វើ​ក្នុងរយៈ​ពេល​៦​ឆ្នាំ​នៅ​ទឹកដី​ដែល​មាន​ការ​បែកបាក់​យ៉ាងខ្លាំង​។ ក្រុម​ប្រ​ដាប់អាវុធ​ជា​ច្រើន​ ដែល​ប្រតិបត្តិ​ក្នុងឆ្នាំ​២០០៥​ត្រូវ​បញ្ចូល​គ្នា​នៅ​ពេល​ឥឡូវនេះ​ មាន​ហេដ្ឋារចនា​សម្ព័ន្ធ​បន្តិចបន្តួច​ មិនមាន​ផ្លូវថ្នល់​ មិន​មាន​រដ្ឋាភិបាល​តំបន់​។ ទាំងអស់​នេះ​ បាន​ត្រូវ​កើតចេញ​ពី​ចំណុច​សូន្យ»​។

ក៏ប៉ុន្តែ ​លោក​និង​មនុស្ស​ភាគ​ច្រើន​ដែល​កំពុង​ធ្វើការ​នៅតំបន់​នេះ​ទទួលស្គាល់​ថា​ការងារ​ជា​ច្រើន​នៅ​មិនទាន់​បាន​ធ្វើ​។

លោក​ មូអាម ប្រូស​ធីអ៊ីក (Mou Ambrose Thiik)​ ធ្វើ​ការងារ​ផ្នែក​អភិ​បាល​កិច្ច​របស់​មូលនិធិ​ (Friederich Ebert Stiftung)​ របស់​ប្រទេស​អាល្លឺម៉ង់​។

អាទិភាព​ដ៏​សំខាន់​គឺ​ធ្វើ​ឲ្យ​មាន​អភិបាលកិច្ច​ត្រឹមត្រូវ​។​ វា​មាន​សារៈ​សំខាន់​ណាស់ពីព្រោះ​អភិបាលកិច្ច​នេះ​នឹង​បង្កើត​គ្រឹះ​ដ៏​ល្អ​សម្រាប់​ប្រព័ន្ធ​លទ្ធិ​ប្រជា​ធិប​តេយ្យ​ដែល​យើង​ចង់បាន​។

ពួក​មន្រ្តី​កត់​សម្គាល់​ថា​ រដ្ឋបាល​សាធារណៈ​មិនមាន​ប្រសិទ្ធភាព​ ជា​ពិសេស​នៅ​កម្រិត​មូលដ្ឋាន​បណ្តាលមក​ពី​ការ​ខ្វះ​បទ​ពិសោធ​និង​ការបណ្តុះ​បណ្តាល​។​ ពួកគេ ​និយាយថា​គេ​ត្រូវការ​ចំណាយ​ពេល​វេលា​ដើម្បី​ធ្វើឲ្យមាន​តម្លាភាព​និង​អភិបាលកិច្ច​ល្អ​។

លោកស្រី​ សារ៉ា​ ចនសុន (Sarah Johnson) ​អនុប្រធាន​កម្មវិធី​ ធ្វើ​ការ​ឲ្យ​មជ្ឈមណ្ឌល​ Carter​ដែល​បាន​ធ្វើ​ការ​អស់​រយៈ​ពេល​ជា​ច្រើន​ឆ្នាំ​ក្នុង​តំបន់​ស៊ូដង់​ភាគខាងត្បូង​។

«មាន​អាទិភាព​ជាច្រើន​ដូចជា​ គ្រឹះ​នៃ​ការ​ធ្វើឲ្យ​ប្រាកដប្រជា​ថា​វា​ជារដ្ឋ​មាន​សេ្ថរ​ភាព​ សន្តិភាព​ហើយ​នឹង​ការផ្តោត​ទៅ​លើ​ការស្ថាបនា​ផ្នែក​ដ៏​សំខាន់​នៃ​សេវាកម្ម​សិក្សា​អប់រំ​និង​សុខភាព​ហើយ​នឹង​ការ​ពង្រីកសេវាកម្ម​គ្រប់គ្រង​សំខាន់ៗ​នៅ​ក្នុង​តំបន់»​។

អាទិភាព​មួយទៀត​ គឺប្រាក់​ដើម្បី​ស្ថាបនា​ហេដ្ឋា​រចនាសម័្ពន្ធ​ ដូច​ជា​ផ្លូវថ្នល់​និង​កសិកម្ម​ដើម្បី​ជួយ​លើកស្ទួយ​វិស័យ​ពាណិជ្ជកម្ម​និង​ការងារ​។

ជនជាតិ​ស៊ូដង់​ភាគខាងត្បូង​ជាង​១៥០.០០០​នាក់​ បាន​ចាកចេញ​ពី​តំបន់​ខាង​ជើងវិលត្រឡប់​ទៅ​កាន់​ផ្ទះ​របស់​ខ្លួន​ក្នុង​រយៈពេល​១០​សប្តាហ៍​កន្លង​មកនេះ​។

ពួកគេ​ជាច្រើន​ បាន​ចាកចេញ​ពី​ប្រទេស​កំណើត​អស់​ជាច្រើន​ជំនាន់​មក​ហើយ​។ ​លោក​ភីធឺ​ ស្មើដុន (Peter Smerdon)​ ជា​អ្នកនាំពាក្យ​អង្គការ​កម្មវិធី​ស្បៀងអាហារ​ពិភពលោក​និយាយ​ថា​ ពួកគេ​ត្រូវការ​ជំនួយ​ម្ហូបអាហារ​នៅពេល​ដែល​ពួកគេ​ធ្វើដំណើរ​ទៅ​ផ្ទះវិញ​ក៏ដូចជា​ការជួយ​ឧបត្ថម្ភ​សម្រាប់​រយៈពេល​ប៉ុន្មានខែ​ក្រោយ​ពី​ពួកគេ​ទៅដល់​ផ្ទះ​របស់​ខ្លួន​៕

រាយ​ការណ៍​ដោយ​លោក​ជឹង​ប៉ូជិន។

XS
SM
MD
LG