ប្រធានាធិបតីកូរ៉េខាងត្បូងកំពុងផ្តល់សញ្ញាទៅប្រទេសកូរ៉េខាងជើងថា លោកមានបំណងចង់បន្ថយភាពតានតឹងលើតំបន់ឧបទ្វីបកូរ៉េ។ នៅក្នុងការកត់សម្គាល់កាលពីថ្ងៃច័ន្ទ លោកប្រធានាធិបតីបានលើកឡើងសារជាថ្មីម្តងទៀតពីការបន្តសន្តិភាពជាមួយរដ្ឋាភិបាលក្រុងព្យុងយ៉ាង។
នៅក្នុងសន្ទរកថាមួយនៅថ្ងៃរំលឹកវិញ្ញាណខន្ធកងទ័ព លោកប្រធានាធិបតីលី ម្យុងបាក់ (Lee Myung Bak)អំពាវនាវឲ្យកូរ៉េខាងជើងទាក់ទងជាមួយ កូរ៉េខាងត្បូងដោយសន្តិវិធី។
លោកប្រធានាធិបតីមានប្រសាសន៍ផងដែរថា កូរ៉េខាងជើង គួរតែឈប់ប្រើការប្រឈមមុខដាក់គ្នានិងជម្លោះបន្តទៀតហើយបែរទៅជម្រុញឲ្យមានសន្តិភាព និងវិបុលភាពនឹងគ្នាវិញ។ យ៉ាងណាមិញ លោកបានសន្យាថា កូរ៉េខាងត្បូងនឹងបន្តបង្ហាញពីភាពស្មោះត្រង់ និងកិច្ចខិតខំប្រឹងប្រែងយ៉ាងខ្លាំងក្នុងដំណើរសន្តិភាពលើតំបន់ឧបទ្វីបកូរ៉េ។
ប្រទេសកូរ៉េទាំងពីរមិនមានទំនាក់ទំនងការទូតរវាងគ្នាទេ។ កូរ៉េទាំងពីរបានប្រយុទ្ធគ្នាយ៉ាងខ្លាំងក្នុងសង្រ្គាមស៊ីវិលអស់រយៈពេលបីឆ្នាំក្នុងទសវត្សរ៍ឆ្នាំ១៩៥០ និងគ្មានការចុះហត្ថលេខាលើសន្ធិសញ្ញាសន្តិភាពទេ។
នៅក្នុងសន្ទរកថារបស់លោកនៅក្នុងពិធីរលឹកវិញ្ញាណខន្ធកងទ័ព លោកប្រធានាធិបតី មិនបានលើកឡើងពីកិច្ចពិភាក្សាជាសម្ងាត់ជាច្រើន នាពេលថ្មីៗនេះរវាងមន្រ្តីនៃប្រទេសទាំងពីរទេ។
ប្រែសម្រួល ហ៊ុយ សម្ផស្ស
