ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព្រះមហាក្សត្រ​តែង​តាំង​ចៅក្រម​ថ្មី​សម្រាប់​សាលា​ក្តី​ខ្មែរ​ក្រហម


​លោក​ ជុង ​ឆាងហូ​ (Chung Chang-ho) ជនជាតិ​កូរ៉េ​ខាង​ត្បូង ត្រូវ​បាន​តែងតាំង​ជំនួស​លោក​ស្រី​ចៅក្រម​ ខាថឺរីន ម៉ារឈី យូហ៊ែល (Chatherine ​Marchi-Uhel) ​ដែល​ត្រូវ​វិល​ទៅ​បំពេញ​​ការងារ​​នៅ​ឯ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី។
​លោក​ ជុង ​ឆាងហូ​ (Chung Chang-ho) ជនជាតិ​កូរ៉េ​ខាង​ត្បូង ត្រូវ​បាន​តែងតាំង​ជំនួស​លោក​ស្រី​ចៅក្រម​ ខាថឺរីន ម៉ារឈី យូហ៊ែល (Chatherine ​Marchi-Uhel) ​ដែល​ត្រូវ​វិល​ទៅ​បំពេញ​​ការងារ​​នៅ​ឯ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី។

ព្រះមហាក្សត្រ​ខ្មែរ​សម្ដេច​ព្រះបរមនាថ​ នរោត្តម​ សីហមុនី​ បាន​តែងតាំង​ចៅក្រម​សញ្ជាតិ​កូរ៉េខាងត្បូង​ម្នាក់​ឲ្យ​ធ្វើ​ជា​ចៅក្រម​នៃ​អង្គបុរេ​ជំនុំជម្រះ​នៅ​ថ្ងៃ​ព្រហស្បតិ៍​នេះ ​ដែល​មន្ដ្រី​តុលាការ​និយាយថា ​នេះ​គឺ​ជា​ការ​តែងតាំង​ដោយ​យោង​តាម​ភាព​ចាំបាច់។

យោងតាម​សេចក្ដី​ប្រកាស​ព័ត៌មាន​របស់​សាលាក្ដី​ខ្មែរក្រហម​នៅ​រសៀល​ថ្ងៃនេះ ​លោក​ ជុង ​ឆាងហូ​ (Chung Chang-ho) ត្រូវ​បាន​តែងតាំង​ជំនួស​លោក​ស្រី​ចៅក្រម​ ខាថឺរីន ម៉ារឈី យូហ៊ែល (Chatherine ​Marchi-Uhel) ​ដែល​ត្រូវ​វិល​ទៅ​បំពេញការងារនៅ​ឯ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី។

លោក ជុង​ ឆាងហូ ​ត្រូវ​បាន​ជ្រើសរើស​ដោយ​លោក​អគ្គលេខាធិការ​អង្គការ​សហ​ប្រជាជាតិ​ បាន​ គីមូន​ ហើយ​លោក​នឹង​ត្រូវ​ចូលបំពេញ​ការងារ​ជា​ផ្លូវការ​ចាប់ពី​ថ្ងៃ​ចន្ទ័ ទី​១ ខែ​សីហា ​សប្ដាហ៍​ក្រោយនេះ​តទៅ។

លោក ​ឡាស​ អលសិន​ មន្ដ្រី​ផ្នែក​ទំនាក់ទំនង​កិច្ចការ​ច្បាប់​របស់​សាលាក្ដី​ខ្មែរ​ក្រហម​ខាង​ភាគី​អង្គការសហ​ប្រជាជាតិ​ មាន​ប្រសាសន៍​ថា ​ការតែងតាំង​ចៅក្រម​ថ្មី​នេះ​គឺ​ជា​ការ​ផ្លាស់ប្ដូរ​ធម្មតា​តែ​ប៉ុណ្ណោះ​ ក៏​ប៉ុន្ដែ​គឺ​ជា​ការ​តែងតាំង​ដែល​មាន​ភាព​ចាំបាច់។ លោក​បាន​ប្រាប់​វីអូអេ​ខ្មែរ​ថា៖

«ការ​តែងតាំង​លោក​ ជុង ​ឆាងហូ ​ជា​ចៅក្រម​ថ្មី​នៅ​អង្គបុរេ​ជំនុំជម្រះមាន​សារៈសំខាន់ ​ពីព្រោះចៅក្រម​មុន​គឺ​លោក​ស្រី ខាថឺរីន ម៉ារឈី យូហ៊ែល ​ត្រូវ​ត្រឡប់​ទៅ​កាន់​តួនាទី​ចាស់​របស់​គាត់វិញ​នៅ​តុលាការ​ព្រហ្មទណ្ឌ​អន្ដរជាតិ​នៃ​អតីត​ប្រទេស​យូហ្គោស្លាវី»។

លោក ជុង​ ឆាងហូ មាន​សញ្ញាប័ត្រ​អនុបណ្ឌិត​ច្បាប់​មក​ពី​សាកលវិទ្យាល័យ​ជាតិ​ក្រុង​សេអ៊ូល​ នៃ​ប្រទេស​កូរ៉េ​ខាងត្បូង។ លោក​ធ្លាប់​បម្រើការ​ជា​ចៅក្រម​នៅ​តុលាការ​ជាន់ខ្ពស់​ តុលាការ​ថ្នាក់​ស្រុក​ និង​បម្រើការ​នៅ​តុលាការ​សឹក។ លោក​ ជុង ​ឆាងហូ ​ក៏​ជា​អ្នក​ស្រាវជ្រាវ​ជាន់​ខ្ពស់​នៃ​សាលា​សេដ្ឋកិច្ច​ និង​វិទ្យាសាស្រ្ដ​នយោបាយ​នៃ​ទីក្រុងឡុងដ៍ ​និង​នៅ​សាកលវិទ្យាល័យ​ហុងកុង។

ស្ថានទូត​នៃ​សាធារណ​រដ្ឋ​កូរ៉េ​មិនទាន់​ផ្ដល់​ចម្លើយ​តប​តាម​សារ​អេឡិចត្រូនិច​ ស្ដីពី​ប្រតិកម្ម​ជុំវិញ​ការតែងតាំងលោក​ ជុង ​ឆាងហូ ​ជា​ចៅក្រមនៃ​សាលាក្ដី​ខ្មែរ​ក្រហម​នៅ​ឡើយ​ទេ​រហូត​មក​ទល់​នឹងល្ងាចនេះ៕

XS
SM
MD
LG