ដោយមានលំហូរចូលកាន់តែច្រើននៃការវិនិយោគនិងក្រុមហ៊ុនបច្ចេកវិទ្យាធំៗ ប្រទេសសិង្ហបុរីបានក្លាយជាទីតាំងលំដាប់កំពូលថ្មីមួយសម្រាប់អាជីវកម្មរបស់ប្រទេសចិន។ ទោះបីជាអាជីវកម្មទាំងនោះបានជួយជំរុញទៅមុខនូវសេដ្ឋកិច្ចរបស់ប្រទេសនេះក៏ដោយ ក៏មិនមែនមនុស្សគ្រប់គ្នាសុទ្ធតែពេញចិត្តនោះឡើយ។
នៅកម្រិតផ្លូវការ ទំនាក់ទំនងរវាងសិង្ហបុរីនិងចិននេះកំពុងមានភាពរីកចម្រើន។ កាលពីដើមខែកុម្ភៈ ប្រព័ន្ធផ្សព្វផ្សាយរដ្ឋរបស់ប្រទេសចិនបានលើកសរសើរអំពីកិច្ចប្រជុំមួយនៅប្រទេសសិង្ហបុរីដែលមានវត្តមានចូលរួមប្រហែល ២០០ នាក់ពីមេដឹកនាំអាជីវកម្មសិង្ហបុរីនិងចិននិងអ្នកតាក់តែងគោលនយោបាយនានា ដែលបានអំពាវនាវឱ្យមានការពង្រឹងទំនាក់ទំនងអាជីវកម្ម ការលើកកម្ពស់ការការពារកម្មសិទ្ធិបញ្ញា និងការគាំទ្រចំពោះសន្ធានកម្មនិងមជ្ឈត្តការ។
ទោះបីជាសេចក្ដីរាយការណ៍របស់ទីភ្នាក់ងារសារព័ត៌មាន Xinhua របស់ចិនផ្តោតលើសារៈសំខាន់នៃទីផ្សារចិនចំពោះប្រទេសសិង្ហបុរីក៏ដោយ ក៏សិង្ហបុរីបានទាក់ទាញក្រុមហ៊ុនដែលផ្តល់មូលនិធិដោយបរទេសជាច្រើន ដែលក្នុងនោះរួមមានទាំងក្រុមហ៊ុនចិនផងដែរ ហើយនៅឆ្នាំ ២០២២ សិង្ហបុរីបានវ៉ាដាច់ទីក្រុងហុងកុងក្នុងការក្លាយជាមជ្ឈមណ្ឌលហិរញ្ញវត្ថុកំពូលនៅអាស៊ីនិងធំបំផុតទី ៣ នៅលើពិភពលោក។
សារព័ត៌មាន Financial Times បានរាយការណ៍ថា អ្នកតាមដានជំនួញបានប៉ាន់ស្មានថា ក្រុមហ៊ុនចិនរាប់រយបានផ្លាស់ទីដោយស្ងាត់ៗទៅប្រទេសសិង្ហបុរី ឬបានចុះបញ្ជីនៅទីនោះនៅចន្លោះខែវិច្ឆិកា ឆ្នាំ ២០២១ និងខែវិច្ឆិកា ឆ្នាំ ២០២២។ កាសែតនេះបានកត់សម្គាល់ថា ចំនួនក្រុមហ៊ុនចិនពិតប្រាកដដែលបានបង្កើតឡើងគឺមិនច្បាស់ថាមានចំនួនប៉ុន្មាននោះទេ ដោយសារតែសិង្ហបុរីមិនបានបង្ហាញប្រភពប្រទេសនៅក្នុងស្ថិតិសាធារណៈរបស់ខ្លួន។
ក្រុមហ៊ុនបច្ចេកវិទ្យាចិនកាន់តែច្រើនដូចជាក្រុមហ៊ុន Alibaba ក្រុមហ៊ុន ByteDance ក្រុមហ៊ុន Huawei ក្រុមហ៊ុន Kuaishou ក្រុមហ៊ុន China Telecom និងក្រុមហ៊ុន China Mobile ជាដើម បានវិនិយោគនៅក្នុងប្រទេសសិង្ហបុរីលើផ្នែកមជ្ឈមណ្ឌលទិន្នន័យនិងបន្ទប់ពិសោធន៍។
ក្រុមហ៊ុន Guide Me Singapore ដែលជាបុត្រសម្ព័ន្ធមួយរបស់ក្រុមហ៊ុន Hawksford ដែលផ្តល់សេវាកម្មចុះបញ្ជីអាជីវកម្មនិងសេវាកម្មគាំទ្រផ្សេងៗ បានបញ្ជាក់ថា សិង្ហបុរីជាប់ចំណាត់ថ្នាក់ជាមជ្ឈមណ្ឌលនវានុវត្តន៍កំពូលនៅក្រៅតំបន់ Silicon Valley របស់សហរដ្ឋអាមេរិក ដោយក្រុមហ៊ុន ៨០ ក្នុងចំណោមក្រុមហ៊ុនបច្ចេកវិទ្យា ១០០ របស់ពិភពលោកមានទីស្នាក់ការនៅទីនោះ។
ទោះបីជាអាជីវកម្មត្រូវបានគេស្វាគមន៍ក៏ដោយ ក៏អ្នករិះគន់បាននិយាយថា លំហូរចូលនៃដើមទុនយ៉ាងច្រើនរបស់ចិនបានបណ្ដាលឱ្យមានការកើនឡើងនូវសកម្មភាពខុសច្បាប់នៅប្រទេសសិង្ហបុរី ដែលនេះគឺបង្ហាញឱ្យឃើញអំពីបញ្ហានៃវិធានការគ្រប់គ្រងរបស់ប្រទេសនេះ។
អ្នកស្រី Aya Adachi នាយកអង្គការ Mapping China បានប្រាប់ VOA ថា ប្រទេសសិង្ហបុរីបានបង្ហាញនូវស្ថាប័នសាជីវកម្មថ្មីមួយនៅឆ្នាំ ២០២០ ដែលមានឈ្មោះថា Variable Capital Company (VCC) ដែលមានបំណងទាក់ទាញទ្រព្យសកម្មរបស់អ្នកគ្រប់គ្រងមូលនិធិនិងការិយាល័យគ្រួសារដែលបានចុះបញ្ជីនៅក្នុងដែនយុត្តាធិការដែលបង់ពន្ធទាបដូចជាកោះ Cayman Islands និងប្រទេសលុចសំបួជាដើម។
អ្នកស្រី Adachi ដែលអង្គការរបស់អ្នកស្រីឃ្លាំមើលកិច្ចការបរទេសនិងសេដ្ឋកិច្ចរបស់ប្រទេសចិន បានថ្លែងថា៖ «ការផ្លាស់ប្តូរបរិយាកាសបទបញ្ញត្តិរបស់សិង្ហបុរីបានទាក់ទាញសកម្មភាពខុសច្បាប់របស់ចិនកាន់តែច្រើន។ ប៉ុន្តែជាក់ស្តែង នោះមិនមែនជាចេតនារបស់រដ្ឋាភិបាលសិង្ហបុរីតាំងពីដំបូងនោះទេ»។
អ្នកស្រី Maíra Martini អ្នកជំនាញផ្នែកស្រាវជ្រាវនិងគោលនយោបាយនៃអង្គការតម្លាភាពអន្តរជាតិ (Transparency International) ដែលជាអង្គការប្រឆាំងអំពើពុករលួយ បានប្រាប់សារព័ត៌មាន Financial Times ថា ហានិភ័យរបស់ស្ថាប័ន VCC គឺថា ពួកគេ «ជាធម្មតាដំណើរការដូចប្រអប់ខ្មៅអ៊ីចឹង» ហើយ «អាចមានភាពទាក់ទាញខ្លាំងសម្រាប់ឧក្រិដ្ឋជនពុករលួយនិងឧក្រិដ្ឋជនដទៃទៀត»។
សារព័ត៌មាន Straits Times របស់សិង្ហបុរីបានរាយការណ៍ថា កាលពីខែសីហាឆ្នាំមុន សិង្ហបុរីបានរកឃើញករណីលាងលុយកខ្វក់ដ៏ធំបំផុតក្នុងប្រវត្តិសាស្ត្ររបស់ខ្លួន ដែលពាក់ព័ន្ធនឹងសាច់ប្រាក់និងទ្រព្យសកម្មចំនួន ៣ ពាន់លានដុល្លារ ហើយជនសង្ស័យចំនួន ១០ នាក់ដែលត្រូវបានចាប់ខ្លួនគឺជាជនជាតិចិន។
នៅក្នុងអត្ថបទមួយដែលចេញផ្សាយនៅលើវេបសាយព័ត៌មាន Asia Sentinel កាលពីដើមខែកុម្ភៈ លោក Andy Wong Ming Jun បានបញ្ជាក់ថា ក្រុមហ៊ុនចិនប្រើប្រាស់ក្រុមហ៊ុនដែលបានចុះបញ្ជីនៅក្នុងប្រទេសសិង្ហបុរីដើម្បីធ្វើឱ្យអាជីវកម្មរបស់ពួកគេមើលទៅដូចជាមិនសូវមានទំនាក់ទំនងជាមួយប្រទេសចិន ដែលនេះជាដំណើរការដែលគេហៅថា «ការលាងក្រុមហ៊ុននៅសិង្ហបុរី ឬ Singapore Washing»។
លោកបានសរសេរថា រឿងនេះកំពុងបង្កផលវិបាកខាងការទូតនិងកេរ្តិ៍ឈ្មោះសម្រាប់សិង្ហបុរី «ខណៈដែនទឹកភូមិសាស្ត្រនយោបាយរវាងចិននិងក្រុមបស្ចិមប្រទេស ជាពិសេសសហរដ្ឋអាមេរិក កាន់តែមានភាពច្របូកច្របល់»។
កម្មវិធីចែកផ្សាយវីដេអូតាមអនឡាញ TikTok បានប្តូរទីស្នាក់ការកណ្តាលនៅអាស៊ីរបស់ខ្លួនពីទីក្រុងប៉េកាំងទៅកាន់ប្រទេសសិង្ហបុរី នៅចំពេលដែលមានការកើនឡើងនូវការត្រួតពិនិត្យលើក្រុមហ៊ុន Bytedance ដែលជាក្រុមហ៊ុនមេរបស់ខ្លួននៅប្រទេសចិន និងចំពេលដែលមានសំណួរថាតើ TikTok អាចការពារទិន្នន័យរបស់អ្នកប្រើប្រាស់ពីការជ្រៀតជ្រែករបស់រដ្ឋាភិបាលចិនដែរឬក៏អត់។
ទោះជាយ៉ាងណាក៏ដោយ អ្នកខ្លះជឿថា ការរិះគន់រឿងលាងក្រុមហ៊ុននៅសិង្ហបុរីនេះមានចេតនាសម្លឹងមើលការវិនិយោគរបស់ចិនដោយការលាបពណ៌។
លោក Tan Khee Giap ប្រធានគណៈកម្មាធិការជាតិសិង្ហបុរីសម្រាប់កិច្ចសហប្រតិបត្តិការសេដ្ឋកិច្ចប៉ាស៊ីហ្វិក (Singapore National Committee for Pacific Economic Cooperation) បានលើកឡើងថា ក្រុមហ៊ុនពហុជាតិរបស់អឺរ៉ុបនិងអាមេរិកក៏បានមកវិនិយោគនៅប្រទេសសិង្ហបុរីផងដែរ ប៉ុន្តែមិនត្រូវបានចោទប្រកាន់ពីរឿងលាងក្រុមហ៊ុននៅសិង្ហបុរីនេះទេ។ ហើយការចោទប្រកាន់នេះក៏មិនបានធ្វើឡើងចំពោះក្រុមហ៊ុនជប៉ុននិងកូរ៉េខាងត្បូងដែលបានប្តូរទីស្នាក់ការកណ្តាលក្នុងតំបន់របស់ពួកគេទៅសិង្ហបុរីដែរ។
លោកបានសួរថា ហេតុអ្វីបានជាកំណត់យកតែប្រទេសចិនជាគោលដៅ?។ លោកបានបញ្ជាក់ថា ហេតុផលគឺ «ដោយសារតែចិនអាចមានប្រព័ន្ធនយោបាយនិងគុណតម្លៃខុសពីអឺរ៉ុបនិងសហរដ្ឋអាមេរិក»។
អតីតរដ្ឋមន្ត្រីក្រសួងយុត្តិធម៌សិង្ហបុរីលោក Walter Woon យល់ស្របចំពោះការលើកឡើងបែបនេះ។
លោកបានថ្លែងដូច្នេះថា៖ «ពិតណាស់ នឹងមានមនុស្សមួយចំនួនប្រើប្រាស់សិង្ហបុរីជាមូលដ្ឋាន ប៉ុន្តែវាមិនកំណត់ចំពោះតែជនជាតិចិននោះទេ។ ដូចប្រទេសដែលជាមជ្ឈមណ្ឌលហិរញ្ញវត្ថុផ្សេងទៀតផងដែរ តួយ៉ាងដូចជាប្រទេសស្វីសជាដើម អ្នកនឹងរកឃើញក្រុមជាក់លាក់មួយចំនួនជាមិនខាន។ សូម្បីតែសហរដ្ឋអាមេរិកក៏មិនអាចគេចពីមនុស្សទុច្ចរិតដែលបង្កើតនិងប្រើអាមេរិកជាមូលដ្ឋានបានដែរ»។
អ្នកស្រី Adachi នៃអង្គការMapping China បាននិយាយថា សិង្ហបុរីចង់រក្សានូវរូបភាពអព្យាក្រឹតផ្នែកនយោបាយ ខណៈដែលកំពុងប្រឹងប្រែងបញ្ឈប់ការកើនឡើងនៃសកម្មភាពឧក្រិដ្ឋកម្មពីប្រទេសចិន ដែលករណីនេះអាចបង្ខំសិង្ហបុរីឱ្យផ្លាស់ប្តូរទិសដៅរបស់ខ្លួន។
អ្នកស្រីបានថ្លែងថា៖ «ក្នុងកម្រិតខ្លះ ខ្ញុំគិតថា រដ្ឋាភិបាលសិង្ហបុរីត្រូវប្រឈមនឹងការដាក់ចេញនូវវិធានការតឹងរ៉ឹងដើម្បីទប់ស្កាត់សកម្មភាពខុសច្បាប់របស់ជនជាតិចិនទាំងនេះមិនឱ្យកើតឡើង។ ហើយការធ្វើបែបនេះអាចនឹងផ្ទុយពីគំនិតនៃការរក្សាឱ្យបាននូវបរិយាកាសបទបញ្ញត្តិមួយដែលមានភាពសេរីនិងមិនសូវមានភាពស្មុគស្មាញ»៕
នាង Adrianna Zhang រាយការណ៍បន្ថែមលើសេចក្តីរាយការណ៍នេះ។
