លោក Lawrence Wong ត្រូវបានស្បថចូលកាន់តំណែងជានាយករដ្ឋមន្ត្រីថ្មីរបស់ប្រទេសសិង្ហបុរីនេះកាលពីថ្ងៃទី ១៥ ខែឧសភា ដោយលោកបានក្លាយជានាយករដ្ឋមន្ត្រីថ្មីដំបូងរបស់ប្រទេសនេះក្នុងរយៈពេល ២០ ឆ្នាំកន្លងទៅ និងជាមេដឹកនាំទី ៤ ចាប់តាំងពីប្រទេសសិង្ហបុរីទទួលបានឯករាជ្យមក។
ពិធីនេះកត់សម្គាល់ដំណើរការផ្លាស់ប្តូរផ្ទេរអំណាចដ៏ប្រុងប្រយ័ត្នមួយ ក្នុងបំណងដើម្បីធានាពីនិរន្តរភាពនៅក្នុងប្រទេសដែលជាទីក្រុងដ៏សម្បួររុងរឿងមួយនេះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
លោក Wong ដែលមានវ័យ ៥១ ឆ្នាំស្ថិ តក្នុងចំណោមមនុស្សសម្រិតសម្រាំងមួយក្រុមតូច ដែលគេហៅថាជាក្រុមមេដឹកនាំ «4G» ដែលជាក្រុមអ្នកនយោបាយជំនាន់ថ្មីមួយ ដែលត្រូវបានជ្រើសរើសដោយផ្ទាល់ ក្នុងចំណោមគណបក្សកាន់អំណាចដែលគ្រប់គ្រងប្រទេសសិង្ហបុរីអស់រយៈពេលជាយូរមកហើយ គឺគណបក្សសកម្មភាពប្រជាជន ឬ People's Action Party (PAP) ដើម្បីដឹកនាំអំណាចបន្តទៅមុខទៀត នៅក្នុងប្រទេសដែលជាមជ្ឈមណ្ឌលហិរញ្ញវត្ថុនិងពាណិជ្ជកម្មអាស៊ីមួយនេះ។
លោក Wong គឺជាមេដឹកនាំសិង្ហបុរីទី ១ ដែលបានកើតក្រោយប្រទេសនេះទទួលបានឯករាជ្យក្នុងឆ្នាំ ១៩៦៥។ លោកក៏នឹងរក្សាតំណែងបច្ចុប្បន្នជារដ្ឋមន្ត្រីក្រសួងហិរញ្ញវត្ថុផងដែរ និងដឹកនាំប្រទេសនេះបន្តពីលោក Lee Hsien Loong ដែលបានដឹកនាំប្រទេសសិង្ហបុរីអស់រយៈពេល ២០ ឆ្នាំកន្លងទៅ។ លោក Lee Hsien Loong ដែលមានអាយុ ៧២ ឆ្នាំនោះ ជាកូនប្រុសរបស់លោក Lee Kuan Yew ដែលជាស្ថាបនិកនៃប្រទេសសិង្ហបុរីទំនើប ដែលបានស្ថិតនៅក្នុងឆាកនយោបាយរហូតដល់លោកទទួលមរណភាពកាលពីឆ្នាំ ២០១៥។
ការកាន់តំណែងបន្តនេះត្រូវបានគិតគូរអស់ពេលជាយូរមកហើយ ដោយលោក Lee មានគម្រោងថានឹងចុះចេញពីតំណែងមុនពេលលោកមានអាយុ ៧០ ឆ្នាំ តែត្រូវបានផ្អាកដោយជំងឺរាតត្បាតកូវីដ១៩ និងដោយបេក្ខភាពដែលត្រូវទទួលតំណែងជំនួសលោក បានបដិសេធមិនព្រមទទួលតំណែង ដែលធ្វើឱ្យមានការបើកផ្លូវជាថ្មីសម្រាប់អ្នកផ្សេងក្នុងការទទួលយកតំណែងនេះ ក្នុងឆ្នាំ ២០២១។
លោក Wong បានសន្យាថានឹងដឹកនាំប្រទេសដោយ «សុភាពរាបសានិងមានការទទួលខុសត្រូវខ្ពស់»ចំ ពោះប្រទេសសិង្ហបុរីនិងប្រជាជនរបស់ប្រទេសនេះ ដែលមានចំនួន ៥លាន ៩សែននាក់ និងសន្យាប្រឹងប្រែងឱ្យអស់ពីសមត្ថភាពសម្រាប់ប្រជាជន។
លោក Wong ចាប់មានកេរិ៍្តឈ្មោះល្បីក្នុងឆ្នាំ ២០២០ ក្នុងពេលលោកបំពេញមុខងារជាសហប្រធានថ្នាក់ជាតិសម្រាប់ប្រយុទ្ធប្រឆាំងនឹងជំងឺរាតត្បាតកូវីដ១៩ និងត្រូវបានតែងតាំងជាអ្នកស្នងតំណែងជំនួសលោក Lee កាលពីខែមេសា ឆ្នាំ ២០២២ ក្រោយពីមានការពិគ្រោះយោបល់ជាច្រើនដង រវាងថ្នាក់ដឹកនាំនយោបាយនិងសហការីរបស់លោករួចមក។
លោកត្រូវបានតំឡើងតួនាទីទៅជាឧបនាយករដ្ឋមន្ត្រី និងបានដឹកនាំការងារអនុវត្តការពិគ្រោះយោបល់សាធារណៈថ្នាក់ខ្ពស់មួយ ដើម្បីពិនិត្យដោះស្រាយពីផលប៉ះពាល់សង្គមរវាងរដ្ឋាភិបាលនិងប្រជាជន ដែលកំពុងប្រឈមនឹងបញ្ហាមួយចំនួនដូចជាចីរភាព វិសមភាពនិងបញ្ហាការងារជាដើម។
និរន្តរភាពនិងស្ថិរភាព
លោក Wong បានធ្វើការរុះរើគណៈរដ្ឋមន្ត្រីតិចតួចប៉ុណ្ណោះកាលពីថ្ងៃទី ១៣ ខែឧសភាកន្លងទៅ ដោយតំឡើងឋានៈរដ្ឋមន្ត្រីក្រសួងពាណិជ្ជកម្មឱ្យធ្វើជាឧបនាយករដ្ឋមន្ត្រីរបស់លោក និងកត់សម្គាល់ថា និរន្តរភាពនិងស្ថិរភាពជាកត្តាចម្បងក្នុងការរុះរើគណៈរដ្ឋមន្ត្រីនេះ។ លោកក៏បានសន្យាថានឹងធ្វើការរុះរើគណៈរដ្ឋមន្ត្រីក្នុងទ្រង់ទ្រាយធំមួយ បន្ទាប់ពីការបោះឆ្នោតដែលនឹងត្រូវកំណត់ធ្វើនៅឆ្នាំក្រោយ។
លោក Lee Hsien Loong នឹងនៅតែស្ថិតក្នុងគណៈរដ្ឋមន្ត្រីថ្មីរបស់លោក Wong ដោយមានតួនាទីជាទេសរដ្ឋមន្ត្រីដូចអតីតនាយករដ្ឋមន្ត្រីសិង្ហបុរីមុនៗដែរ ដោយរក្សាតួនាទីនយោបាយរបស់ក្រុមគ្រួសារត្រកូល Lee ដែលមានជាយូរមកហើយ។
ឪពុករបស់លោក Lee Hsien Loong គឺលោកអតីតនាយករដ្ឋមន្ត្រី Lee Kuan Yew បានចុះចេញពីតំណែងជាមេដឹកនាំសិង្ហបុរីក្នុងឆ្នាំ ១៩៩០ និងបានស្ថិតក្នុងគណៈរដ្ឋមន្ត្រីនៃអ្នកស្នងតំណែងរបស់លោកអស់ពេល ២១ ឆ្នាំ ដោយដំបូងឡើយធ្វើជាទេសរដ្ឋមន្ត្រីហើយក្រោយមកក៏ធ្វើជា «ព្រឹទ្ធាចារ្យរដ្ឋមន្ត្រី»នៅក្នុងរដ្ឋាភិបាលរបស់លោក Lee Hsien Loong។
នាយករដ្ឋមន្ត្រីដែលចេញពីតំណែងលោក Lee Hsien Loong បានថ្លែងប្រាប់ក្រុមអ្នកចូលរួមក្នុងសំឡេងរំភើបក្នុងចិត្តថា៖ «ខ្ញុំមានអារម្មណ៍ពេញចិត្តនិងភាពបានសម្រេចចប់សព្វគ្រប់»។
មេដឹកនាំគណបក្សប្រឆាំងលោក Pritam Singh បាននិយាយនៅថ្ងៃទី ១៥ ខែឧសភាថា លោក Wong បានទទួលតំណែងនេះក្នុងពេលវេលាប្រឈមមួយដែលគ្មានភាពប្រាកដប្រជានិងបរិយាកាសខាងក្រៅដែលមិនអាចព្យាករណ៍ទុកជាមុន ក៏ដូចជាការផ្លាស់ប្តូរក្នុងជំនាន់ដ៏សំខាន់មួយនៅក្នុងប្រទេស។
លោកបាននិយាយទៀតថា៖ «ក្រោមការដឹកនាំរបស់នាយករដ្ឋមន្ត្រី Wong គណបក្សកម្មករ (Workers' Party) [ដែលជាគណបក្សប្រឆាំង] នឹងបន្តដើរតួនាទីក្នុងអង្គនីតិបញ្ញតិ្ត ដើម្បីជំរុញផលប្រយោជន៍ដល់ប្រទេសនិងប្រជាជនសិង្ហបុរី»៕
ប្រែសម្រួលដោយ លោក ជ្រា វណ្ណារិទ្ធ
វេទិកាបញ្ចេញមតិ