ករណីលាងលុយកខ្វក់ដ៏ធំក្នុងប្រទេសសិង្ហបុរីបានបង្កឱ្យមានការយកចិត្តទុកដាក់ជាខ្លាំង។
ក្នុងការលបចូលវាយឆ្មក់ជាច្រើនកន្លែងនៅទូទាំងប្រទេសសិង្ហបុរីកាលពីពាក់កណ្តាលខែសីហាកន្លងទៅ ក្រុមអាជ្ញាធររបស់ប្រទេសនេះបានរឹបអូសយកបាននូវទ្រព្យសម្បត្តិដែលមានតម្លៃជិត១.០០០លានដុល្លារអាមេរិក ដែលក្នុងនោះរួមមានខុនដូទំនើបជាង១០០កន្លែង និងរថយន្តមានតម្លៃជាច្រើនគ្រឿងទៀត។ នេះជាករណីនៃការលាងលុយកខ្វក់ដ៏ធំបំផុតមួយ ដែលមិនធ្លាប់កើតមានក្នុងទីក្រុងដែលជាប្រទេសមួយនេះ។
ក្រុមអាជ្ញាធរបានរឹបអូសយកបានកញ្ចប់ស្បោងរាប់រយ ដែលមានរបស់របរប្រើប្រាស់ថ្លៃៗ ដូចជាទឹកអប់ម៉ាកល្បីៗ Hermes, Chanel, Prada នាឡិកាដៃម៉ាក Patek Philippe និងគ្រឿងអលង្ការជាដើម ដែលមានតម្លៃសរុបរហូតដល់ទៅ១០០.០០០ដុល្លារអាមេរិក។ រូបភាពដែលប៉ូលិសបានផ្សាយពីដបស្រាដែលត្រូវបានរឹបអូស មានលំនាំដូចជាកន្លែងដាក់តាំងស្រាស៊ីវិល័យ chateau នៅប្រទេសបារាំង។
ក្រុមប៉ូលិសសិង្ហបុរីបាននិយាយថា របស់របរទុច្ចរិតទាំងនេះ ត្រូវគេទទួលបានពីក្រុមឧក្រិដ្ឋជនដែលមានការរៀបចំធ្វើសកម្មភាពនៅក្រៅប្រទេស ដែលក្នុងនោះក៏មានការឆបោក scamនិងការលេងល្បែងតាមប្រព័ន្ធអនឡាញផងដែរ ដោយប្រាក់ដែលទទួលបាន ត្រូវបាននាំយកមកទុកក្នុងប្រទេសសិង្ហបុរី និងតាមរយៈស្ថាប័នហិរញ្ញវត្ថុរបស់ប្រទេសនេះផងដែរ។
មនុស្ស១០នាក់ត្រូវបានចាប់ខ្លួន ក្នុងការចូលវាយឆ្មក់កាលពីថ្ងៃទី១៥ ខែសីហាកន្លងទៅ ហើយមនុស្ស១២នាក់ផ្សេងទៀត ពេលនេះ«កំពុងជួយ»អាជ្ញាធរក្នុងការស៊ើបអង្កេតបន្តទៅមុខទៀត។ ដោយឡែក បុគ្គល៨នាក់ទៀត កំពុងត្រូវបានប៉ូលិសតាមស្វែងរកចាប់ខ្លួននៅឡើយ។
មនុស្សដែលត្រូវបានចាប់ខ្លួនទាំងនោះ ទំនងហាក់ដូចជាក្រុមអន្តរជាតិ ដែលរួមមានជនជាតិស៊ីប តួកគី កម្ពុជា និងជនជាតិវ៉ានូទូ ដែលជាប្រទេសកោះតូចមួយក្នុងមហាសមុទ្រប៉ាស៊ីហ្វិក។ បុរសទាំងអស់នោះសុទ្ធតែកាន់លិខិតឆ្លងដែនរបស់ចិន។
សារព័ត៌មានក្នុងស្រុកបានផ្សព្វផ្សាយថា បុរសដែលត្រូវបានចាប់ខ្លួនទាំងអស់នោះ មកពីខេត្ត Fujian ប្រទេសចិន។
គេនៅមិនទាន់ដឹងច្បាស់នៅឡើយទេថា តើលុយទាំងនេះត្រូវនាំចូលក្នុងប្រទេសសិង្ហបុរីដោយរបៀបណា ហើយហេតុដូចម្តេចបានជាគេមិនដឹងអស់ពេលជាយូរមកហើយ។ សារព័ត៌មានក្នុងប្រទេសសិង្ហបុរីមួយចំនួនរាយការណ៍ថា សមាជិកខ្លះនៃក្រុមដែលត្រូវបានចាប់ខ្លួនទាំងនេះ បានរស់នៅក្នុងប្រទេសសិង្ហបុរីអស់រយៈពេលរហូត៦ឆ្នាំឯណោះ៕
