ភ្ជាប់​ទៅ​គេហទំព័រ​ទាក់ទង

ស្ត្រី​មាន​ផ្ទៃពោះ​នៅ​Sierra Leone​ កំពុង​ត្រូវបាន​បដិសេធ​ការថែទាំ​សុខភាព


ស្ត្រីមានផ្ទៃពោះទាំងនេះអង្គុយមើលទូរទស្សន៍​នៅពេលរង់​ចាំ​សម្រាល​​កូន​នៅ​មន្ទីរពេទ្យ Princess Christian នៅក្នុងទី​ក្រុង​ Freetown​ ប្រទេស​ Sierra Leone​ (រូបថតនៅថ្ងៃទី១០ខែកញ្ញា​ឆ្នាំ​​២០១០)

អង្គការ​សិទ្ធិមនុស្ស​ Amnesty​ International​ ឲ្យដឹងថា​ ស្ត្រីមានផ្ទៃពោះ​នៅក្នុង​ប្រទេស​Sierra Leone​ កំពុង​ត្រូវបាន​បដិសេធ​ការថែទាំ​សុខភាព​ហើយ​ត្រូវបាន​បង្ខំ​ឲ្យ​ទិញថ្នាំ​ទោះបី​ជាមាន​បណ្តើមគំនិត​នៃ​ការថែទាំ​សុខភាព​ឥត​គិតថ្លៃ​ពាសពេញ​ប្រទេស​មួយ​ដែល​បានដាក់​ឲ្យមាន​ កាលពី​ឆ្នាំទៅ​ក៏ដោយ។

នៅក្នុង​ខែមេសា​ឆ្នាំ២០១០​ ប្រទេស​ Sierra​ Leone​បាន​ចាប់ផ្តើម​កម្មវិធី​ថែទាំ​សុខភាព​ឥត​គិតថ្លៃ​មួយ​មាន​ទឹកប្រាក់​៩០លាន​ដុល្លារ​ ដែល​បំបាត់​ការបង់​ថ្លៃពេទ្យ​សម្រាប់​ស្ត្រីមានផ្ទៃពោះ​និង​ស្ត្រីបំបៅដោះ កូន​ នៅឯ​មជ្ឈមណ្ឌល​សុខភាព​ទាំងឡាយ​ដែល​កាន់កាប់​ដោយ​រដ្ឋាភិបាល។

ប្រទេស​ Sierra​ Leone​ជា​កន្លែងមួយ​នៃ​កន្លែង​ដែល​មាន​គ្រោះថ្នាក់​បំផុត​ក្នុងការ​ឲ្យកំណើត​ទារក​នៅក្នុង​ពិភពលោក។​ រដ្ឋាភិបាល​និយាយថា​ការសន្យា​ផ្តល់​ការព្យាបាល​ឥតគិត​ថ្លៃនោះ​បាននាំ​ឲ្យ​ស្ត្រីមានផ្ទៃពោះ​យ៉ាងច្រើន​ចូលមក​មជ្ឈមណ្ឌល​សុខភាព​ដើម្បី​ពិនិត្យពោះ​មុន​ពេលកើត​និង​ដើម្បី​សម្រាលកូន។

ទោះជាយ៉ាងណា​ អង្គការ​សិទ្ធិមនុស្ស​ Amnesty​ International​ បាន​និយាយ​កាលពី​ថ្ងៃអង្គារ​ថា​គ្រឿងបរិក្ខា​ប្រើប្រាស់​សុខភាព​ជិត​អស់មាន​ឱសថ​សម្រាប់​ចែកចាយ​ ឬ​ក៏អាច​ត្រូវបាន​បង្ខំឲ្យ​ស្ត្រី​ទាំងនោះ​ទិញឱសថ​ដែល​ត្រូវការ​ជាចាំបាច់​ដែល​គួរតែ​ទទួលបាន​ដោយ​ឥតគិតថ្លៃ​ ហើយ​ក៏​ធ្វើឲ្យ​ខកខាន​ដល់​អ្នកដែល​គ្មានប្រាក់។

លោក​ Rajat​ Khosla​ អ្នកសម្រប​សម្រួល​ច្បាប់​សុខភាព​របស់​អង្គការ​ Amnesty​ International​បាន​មាន​ប្រសាសន៍ថា​ ត្រូវបន្ទោស​ដល់​អំពើ​ពុករលួយ​និង​ការត្រួតពិនិត្យ​មិន​ដិតដល់។

«ឱសថ​និង​គ្រឿងបរិក្ខាពេទ្យ​ត្រូវបាន​លួចយកចេញ​ពី​ប្រព័ន្ធ​ថែទាំ​សុខភាព​ ហើយ​ត្រូវបាន​គេ​យក​ទៅ​ធ្វើ​ជា​ឱសថ​សម្រាប់​លក់​ទៅវិញ។​ ហើយទីពីរ​ ការផ្គត់ផ្គង់​និង​ការគ្រប់គ្រង​ឱសថ​ ប្រព័ន្ធ​ដែល​បាន​ដាក់​ឲ្យមាន​ក្នុង​កន្លែងនោះ​ វាស្មុគស្មាញ​និង​ចាត់ការ​ខ្សោយ​ខ្លាំងណាស់។​ រឿង​មិន​ដំណើរការ​នៃ​ប្រព័ន្ធ​សុខភាព​ ពាក់ព័ន្ធ​ជាមួយនឹង​ការប្រុងប្រយ័ត្ន​លើការ​ត្រួតពិនិត្យ​ និងការ​ទទួល​ខុសត្រូវ​ បានបង្កើត​បរិយាកាស​មួយ​បើកដៃ​ឲ្យមាន​ការប្រព្រឹត្ត​អាក្រក់​និង​អំពើ​ពុករលួយ។​ សូម្បី​តែនៅពេល​ដែល​គេដឹងហើយ​ក៏​កម្រឃើញ​មាន​ការដាក់​ទណ្ឌកម្ម​ណា​មួយ​ដែរ»។

អង្គការ​ Amnesty​ ឲ្យដឹងថា​អំពើ​ពុករលួយ​និង​ការពន្យាពេល​នៅ​កំពង់ផែ​ក្នុងទីក្រុង​ Freetown​ បន្ត​ផ្អាក​ការផ្តល់​ឱសថ​ ហើយ​ការកត់ត្រា​បញ្ជី​មិនល្អ​ និង​ការគ្រប់គ្រង​បញ្ជី​សារពើភ័ណ្ឌ​នៅ​ក្នុង​មជ្ឈមណ្ឌល​សុខភាព​ធ្វើ​ឲ្យមាន​ការលំបាក​ដើម្បី​តាមដាន​គ្រឿងបរិក្ខា​និង​ឃាត់​បុគ្គលិក​ដែល​ទទួល​ខុសត្រូវ។

អង្គការ​ Amnesty​ឲ្យដឹងថា​ស្ត្រី​ដែល​មិន​អាច​ចូល​ទៅរក​ការព្យាបាល​គ្មានវិធី​ដើម្បី​តវ៉ា​ទេ។​លោក​ Khosla​ បាននិយាយថា​ ស្ត្រី​បានប្រាប់​អង្គការ​ Amnesty​ថាពួកគេ​បាក់ទឹកចិត្ត​ខ្លាំង​ណាស់​ហើយ​ពួកគេ​លែងត្រឡប់​ទៅ​មជ្ឈមណ្ឌល​សុខភាព​វិញទៀត​ សូម្បី​តែពួកគេ​ដឹងថា​មាន​បញ្ហា​នៅពេល​សម្រាលកូន​ក៏ដោយ។

«ទាល់តែ​រដ្ឋាភិបាល​ចាត់​វិធានការ​ពង្រឹង​ប្រព័ន្ធ​ បើមិន​ដូច្នោះទេ​មាន​គ្រោះថ្នាក់​នៃ​ការដើរ​ថយក្រោយ​ពី​សមិទ្ធផល​ដែល​បានទទួល​នៅ​ក្នុង​មួយឆ្នាំកន្លះ​កន្លងមក​ ជាមួយនឹង​ច្បាប់​ថែទាំ​សុខភាព​ឥត​គិតថ្លៃ»។

នៅខែ​កក្កដា​ ប្រធានាធិបតី​Sierra​ Leone​ លោក​ Ernest​ Bai​ Koroma​ បានអំពាវនាវ​ឲ្យ​ចាត់​វិធានការណ៍​លើ​បទឧក្រិដ្ឋ​នៅក្នុង​បណ្តើមគំនិត​នៃ​ការថែទាំ​សុខភាព​ឥតគិតថ្លៃ។​ អង្គការ​ Amnesty​ និយាយថា​រដ្ឋាភិបាល​បានចាត់​វិធានការ​កែតម្រូវ​ជាក់ស្តែង​មួយចំនួន​ រួមមាន​ការតម្លើង​ប្រាក់បៀវត្សរ៍​ដល់​បុគ្គលិក​សុខភាព​និង​ផ្តល់​ការហ្វឹកហាត់​ដល់​ពួកគេ​ ប៉ុន្តែ​កិច្ចការ​ជាច្រើន​ត្រូវ​ធ្វើឲ្យបាន​ចប់សព្វគ្រប់​ដើម្បី​បង្កើន​ការទទួល​ខុសត្រូវ​និង​ធ្វើឲ្យ​ប្រសើរ​ដល់​ការថែទាំ​សុខភាព​ ជាពិសេស​នៅក្នុង​តំបន់​ជនបទ។

ប្រែសម្រួល​ដោយ​ នុច សារីតា

XS
SM
MD
LG