អ្នកស្រី Paetongtarn Shinawatra បានបញ្ជាក់ពីការឈរឈ្មោះជាបេក្ខជននាយករដ្ឋ មន្រ្តីកាលពីថ្ងៃទី៥ ខែមេសា ដោយប្តេជ្ញាបង្កើនប្រាក់ឈ្នួលប្រចាំថ្ងៃ និងផ្តល់ជាសាច់ ប្រាក់ទៅដល់ពលរដ្ឋថៃគ្រប់រូប ប្រសិនបើអ្នកស្រីជាប់ឆ្នោត ស្របពេលត្រកូលគ្រួសារដ៏មានឈ្មោះបោះសំឡេងបំផុតក្នុងឆាកនយោបាយថៃនឹងចូលរួមប្រជែងនៅក្នុងការបោះឆ្នោតនាថ្ងៃទី១៤ ខែឧសភាខាងមុខដែលត្រូវបានគេមើលឃើញថាជារឿងសំ ខាន់មួយ ប្រសិនបើគណបក្សគាំទ្រលទ្ធិប្រជាធិបតេយ្យនឹងទទួលបានអំណាចឡើងវិញពីយោធា ដែលបានចាក់ឬសយ៉ាងជ្រៅចូលក្នុងឆាកនយោបាយ។
ប្រវត្តិសាស្រ្តសម័យទំនើបរបស់ថៃពោរពេញទៅដោយរដ្ឋប្រហារ ហើយរដ្ឋប្រហារពីរក្នុងចំណោមនោះបានសំដៅមកលើនាយករដ្ឋមន្រ្តីត្រកូល Shinawatra មានបាតុកម្មហិង្សាតាមដងផ្លូវ ហើយរដ្ឋាភិបាលបោះឆ្នោតជ្រើសតាំងដែលបានដួលរលំយ៉ាងឆាប់រហ័សទៅវិញនៅក្នុងការប្រជែងមួយរវាងក្រុមអ្នកដែលចង់បានលទ្ធិប្រជាធិបតេយ្យទូលំទូលាយជាងមុននិងក្រុមអភិជនអភិរក្សនិយមគាំទ្ររាជវង្ស។
អតីតអគ្គមេបញ្ជាការយោធាលោក Prayuth Chan-ocha វ័យ៦៩ឆ្នាំបានដឹកនាំរដ្ឋាភិ បាលគាំទ្រដោយយោធាចាប់តាំងពីដឹកនាំរដ្ឋប្រហារក្នុងឆ្នាំ២០១៤ដែលបានទម្លាក់រដ្ឋាភិបាលរបស់លោកស្រី Yingluck ដែលជាម្តាយមីងរបស់អ្នកស្រី Paetongtarn។ ក្រុមអ្នកជំនាញនិយាយថាលោកPrayuthប្រហែលត្រូវពឹងផ្អែកលើរដ្ឋាភិបាលសំ ឡេងភាគតិចដែលមិនបានឈ្នះដាច់នៅសភាជាន់ទាបឬរដ្ឋសភាបន្ទាប់ពីការបោះឆ្នោត ប៉ុន្តែលោកអាចទាញសំឡេងគាំទ្រពីសមាជិកព្រឹទ្ធសភា២៥០នាក់ ដែលមិនត្រូវបានបោះឆ្នោតជ្រើសតាំង និងដែលលោកបានជ្រើសដោយខ្លួនឯងផ្ទាល់។
ប៉ុន្តែអ្នកស្រី Paetongtarn ដែលមានអាយុ៣៦ឆ្នាំនិងគណបក្ស Peu Thai របស់អ្នក ស្រីជាឧបសគ្គចម្បងចំពោះការវិលត្រឡប់មកកាន់អំណាចសាជាថ្មីរបស់លោក Prayuth។
«យើងនឹងជួយគ្នាទៅវិញទៅមកដើម្បីនាំយកលទ្ធិប្រជាធិបតេយ្យរបស់យើងមកវិញ ដើម្បីនាំយកជីវិតរបស់យើងដែលត្រូវបានធ្វើឲ្យសាបរលាបអស់ពេលជិតមួយទសវត្សរ៍មកវិញ»។ នេះបើយោងតាមសម្តីរបស់អ្នកស្រីទៅកាន់ក្រុមអ្នកគាំទ្រដែលបានមកពេញកីឡដ្ឋានក្រុងបាងកក កាលពីថ្ងៃពុធ ទី៥ ខែមេសា ហើយការលើកឡើងនេះគឺ សំដៅទៅរដ្ឋប្រហារដឹកនាំដោយលោក Prayuth។
អ្នកស្រី Paetongtarn ជាកូនស្រីរបស់មហាសេដ្ឋីដែលកំពុងនិរទេសខ្លួនគឺលោក Thaksin វ័យ៧៣ឆ្នាំដែលទទួលបានការគាំទ្រពីពលរដ្ឋនៅតំបន់ជនបទថៃហើយបានឈ្នះការបោះឆ្នោតជានាយករដ្ឋមន្រ្តីនៅឆ្នាំ២០០១។ ហើយបន្ទាប់មក នៅឆ្នាំ ២០០៥ លោកត្រូវបានទម្លាក់ចេញពីអំណាចដោយរដ្ឋប្រហារនៅឆ្នាំបន្ទាប់និងត្រូវបានរកឃើញថាជាប់ទោសពីបទពុករលួយ។ លោកមិនដែលបានត្រឡប់មកប្រទេសថៃវិញទេចាប់តាំងពីឆ្នាំ២០០៨មក។
អ្នកស្រី Paetongtarn ដែលត្រូវបានស្គាល់តាមឈ្មោះក្រៅថា Ung Ing កំពុងជាប់រវល់ធ្វើយុទ្ធនាការឃោសនា បើទោះបីអ្នកស្រីមានផ្ទៃពោះ៨ខែក៏ដោយ។ គណបក្ស Pheu Thai អះអាងថា ជ័យជម្នះភ្លូកទឹកភ្លូកដីអាចកើតមាន ប្រសិនបើគណបក្សទទួលបានអាសនៈប្រមាណ៣១០ពីសភាដែលមានអាសនៈសរុប៥០០ហើយគណបក្សកំពុងតែរំពឹងលើការប្រើប្រាស់ត្រកូល Shinawatra។
ដោយកត់សម្គាល់ថា មានតែជ័យជម្នះភ្លូកទឹកភ្លូកដីទេដែលអាចធានាការកែប្រែឡើងវិញនូវនយោបាយសម្រាប់ប្រទេសថៃ អ្នកស្រីបានថ្លែងថា៖ «យើងបានឈ្នះការបោះ ឆ្នោតនានាគ្រប់ពេល ប៉ុន្តែអំណាចរបស់យើងត្រូវបានប្លន់យកដោយរដ្ឋប្រហារនិងជនក្បត់នៅសភា... យើងមិនចង់បានរដ្ឋប្រហារមួយទៀតនោះទេ»។
មនុស្សរាប់ពាន់នាក់បានអបអរសាទរ ខណៈដែលគណបក្ស Pheu Thai បានបង្ហាញ
បេក្ខភាពសម្រាប់តំណែងនាយករដ្ឋមន្រ្តីដូចជា អ្នកស្រី Paetongtarn លោក Chaikasem Nitisiri អតីតរដ្ឋមន្រ្តីយុត្តិធម៌និងលោក Srettha Thavisin ដែលកាលពីថ្ងៃអង្គារ ទី៤ ខែមេសាបានចុះចេញពីតំណែងជានាយកប្រតិបត្តិក្រុមហ៊ុនSansiri ដែលជាក្រុមហ៊ុនអចលនទ្រព្យធំជាងគេបង្អស់មួយនៅថៃ។
គណបក្ស Pheu Thai និយាយថាខ្លួននឹងដំឡើងប្រាក់ឈ្នួលអប្បបរមាមកត្រឹមក្រោម ១៨ដុល្លារមកពីតួលេខបច្ចុប្បន្នដែលមានប្រមាណ១០ដុល្លារ ដើម្បីធានាថា និស្សិតបញ្ចប់ការសិក្សានឹងចាប់ផ្តើមជាមួយនឹងប្រាក់ខែអប្បបរមា៧៣៥ដុល្លារក្នុងមួយខែ ហើយនឹងផ្តល់ឲ្យពលរដ្ឋថៃដែលមានអាយុលើសពី១៦ឆ្នាំនូវ«ប្រាក់ឌីជីថល» ចំនួន ៣០០ដុល្លារដើម្បីចាយវាយក្នុងសេដ្ឋកិច្ច។ គណបក្សនេះមិនបានបកស្រាយពេញ លេញពីបែបផែនដែលខ្លួននឹងផ្តល់ហិរញ្ញប្បទានចំពោះការសន្យាដូចនេះនោះទេ។
លោក Srettha បាននិយាយថា៖ «ខ្ញុំសូមប្រកាសដូចនេះទៅកាន់ពិភពលោក។ ថៃនឹងឆ្លងកាត់ការផ្លាស់ប្តូរថ្មី យើងនឹងចូលក្នុងឆាកអន្តរជាតិឡើងវិញ យើងនឹងធ្វើការកសាងអនាគតប្រសើរជាងមុនសម្រាប់ពលរដ្ឋថៃ»។
អ្នកជំនាញជាច្រើននិយាយថា លោក Srettha ជាបេក្ខជនទំនងជាងគេបំផុតក្នុងការក្លាយជាជម្រើសនាពេលចុងបញ្ចប់សម្រាប់តំណែងនាយករដ្ឋមន្រ្តី ប្រសិនបើគណ បក្សទទួលបានជ័យជម្នះភ្លូកទឹកភ្លូកដី។ ប៉ុន្តែពួកគេក៏បានព្រមានពីឧបសគ្គនាពេលខាងមុខសម្រាប់គ្រួសារត្រកូល Shinawatra ផងដែរដែលត្រូវបានស្អប់ដោយសមា ជិកមួយចំនួនក្នុងជួរក្រុមអភិជនអភិរក្សនិយមដែលពួកគេបានចាត់ទុកអ្នកស្រី Paetongtarn ជាអាយ៉ងរបស់លោក Thaksin។ បន្ថែមពីការចូលកាន់អំណាចដោយយោធា ក្រុមអភិជននេះតែងតែទាញការគាំទ្រពីតុលាការធម្មនុញ្ញដើម្បីបង្រ្កាបគូបដិបក្ខនៅពេលការបោះឆ្នោតមើលទៅមិនអំណោយផល។
លោក Napon Jatusripitak អ្នកជំនាញផ្នែកវិទ្យាសាស្រ្តនយោបាយនិងអ្នកស្រាវជ្រាវប្រចាំវិទ្យាស្ថានសិក្សាអាស៊ីអាគ្នេយ៍ Yusof-Ishak Institute នៅប្រទេសសិង្ហបុរីនិយាយថា៖ «ខ្ញុំគិតថា លទ្ធភាពនៃការរំលាយគណបក្សមួយមុនឬក្រោយការបោះឆ្នោតដើម្បីផ្តល់ការចំណេញដល់រដ្ឋាភិបាលចម្រុះដែលគាំទ្រដោយយោធាមិនអាចត្រូវមើលរំលងនោះទេ»។
លោក Prayuth បានប្រឈមមុខនឹងបាតុកម្មគាំទ្រលទ្ធិប្រជាធិបតេយ្យ ក៏ដូចជាក្រុមមន្រ្តីខ្លះបានងាកមកប្រឆាំងរូបលោកក្នុងជួរនយោបាយផងដែរ។ ប៉ុន្តែលោកបានតតាំងនឹងក្រុមអ្នករិះគន់ក្នុងការចូលរួមប្រជែងនៅក្នុងការបោះឆ្នោតនាខែឧសភាខាងមុខ។ ប៉ុន្តែនៅក្រោមរដ្ឋធម្មនុញ្ញ ដែលត្រូវបានតាក់តែងឡើងបន្ទាប់ពីមានរដ្ឋប្រហារចុងក្រោយ មិនមាននាយករដ្ឋមន្រ្តីថៃណាអាចកាន់តំណែងលើសពី ១០ឆ្នាំនោះទេ។ ការណ៍នេះធ្វើឲ្យលោក Prayuth សល់ពេលតែពីរឆ្នាំប៉ុណ្ណោះក្នុងការដឹកនាំ ប្រសិនបើលោកគោរពតាមរដ្ឋធម្មនុញ្ញ។
លោកបានថ្លែងប្រាប់ក្រុមអ្នកសារព័ត៌មានកាលពីថ្ងៃចន្ទ ទី៣ ខែមេសាថា៖ «បើទោះបីនៅសល់រយៈពេលពីរឆ្នាំក៏នៅមានតម្លៃ ពីព្រោះនេះមានន័យថាជាការដឹកនាំបន្តពីរយៈពេល៨ឆ្នាំកន្លងមកនេះ ដែលខ្ញុំបានកាន់តំណែង ខ្ញុំដឹងច្បាស់ពីគ្រប់បញ្ហាទាំងអស់»។
សម្រាប់មនុស្សជាច្រើននៅក្នុងប្រទេសមួយដែលគេឃើញមានការកើតមានអំពើហិង្សានយោបាយតាមពេល ការវិលត្រឡប់ចូលកាន់តំណែងសាជាថ្មីរបស់លោក Prayuth នឹងជារឿងនឹកស្មានមិនដល់មួយ បន្ទាប់ពីរយៈពេលច្រើនឆ្នាំដែលសេរីភាពត្រូវបានរឹតត្បិត ស្របពេលសេដ្ឋកិច្ចបានដុនដាប ដោយធ្វើឲ្យមនុស្សរាប់លាននាក់ធ្លាក់ក្នុងភាពក្រីក្រ។
លោក Pisarn Janparn អ្នកបើកតាក់ស៊ីនិងជាអ្នកគាំទ្រគណបក្ស Pheu Thai បាននិយាយថា៖ «លោក Thaksin Shinawatra បានធ្វើឲ្យពលរដ្ឋយល់ពីនិយមន័យនៃលទ្ធិប្រជាធិបតេយ្យ។ រាល់គោលនយោបាយត្រូវបានកើតមានឡើងពិតប្រាកដហើយធ្វើឡើងសម្រាប់ពលរដ្ឋ»។
លោកថ្លែងទៀតថា៖ «ពលរដ្ឋបានទ្រាំទ្រច្រើនណាស់រួចមកហើយ។ ប្រសិនបើរដ្ឋាភិ បាលមិនផ្តល់តាមការប្រាថ្នារបស់ពលរដ្ឋ រឿងអ្វីក៏អាចកើតឡើងដែរ។ នៅពេលមនុស្សស្រេកឃ្លាន រឿងអ្វីក៏អាចកើតឡើងដែរ»៕
ប្រែសម្រួលដោយលោក ណឹម សុភ័ក្រ្តបញ្ញា
