ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​អ្នក​លក់​ផលិត​ផល​អនឡាញ ​ថៃ ស្រីនាង ​នឹង​ត្រូវ​ដោះ​លែង​សប្តាហ៍​ក្រោយ ​ខណៈ​គ្រួសារ​បារម្ភ​អំពី​ការ​រកស៊ី


អ្នកស្រី​ វ៉ែន​ រចនា ដែលជាម្ចាស់​ទំព័រ​ហ្វេសប៊ុក​ឈ្មោះ ​ថៃ ស្រីនាង​ Onlineshop ត្រូវ​បាន​តុលាការ​សម្រេច​ឃុំខ្លួន​បណ្តោះអាសន្ន​និង​រង់ចាំ​ការកាត់​ទោស បន្ទាប់ពី​អ្នកស្រីត្រូវ​បាន​ចោទប្រកាន់ក្រោម​ច្បាប់​ជួញ​ដូរ​មនុស្ស​និង​ធ្វើ​អាជីវកម្ម​ផ្លូវ​ភេទ។ (រូបភាពដកស្រង់ពីបណ្តាញសង្គម)

ក្រុម​គ្រួសារ​របស់​អតីត​អ្នក​លក់​ផលិតផល​អនឡាញ​ ថៃ​ ស្រីនាង ​បង្ហាញ​ក្តី​បារម្ភ​ថា ​ស្រី​នាង ​អាច​ប្រឈម​ផល​លំបាក​ក្នុង​រក​ប្រាក់​ចំណូល​ប្រចាំ​ថ្ងៃ ​បន្ទាប់​ពី ​ស្រីនាង ​ដែល​តុលាការ​កាត់​ទោស​ព្យួរ​នោះ ​នឹង​ត្រូវ​ដោះ​លែង​នៅ​សប្តាហ៍​ក្រោយ។​

ស្រីនាង​ ដែល​មាន​ឈ្មោះ​ដើម​ វ៉ែន រចនា​ អាយុ​ ៣៩ ​ឆ្នាំ​ត្រូវ​គេ​មើល​ឃើញ​ថាតែង​តែ​ស្លៀក​ពាក់​ «ស៊ិចស៊ី» ​រួច​បង្ហោះ​តាម​បណ្តាញ​សង្គម​ហ្វេស​ប៊ុក។​ ស្រីនាង​ មាន​ទំព័រ​ហ្វេសប៊ុក​ឈ្មោះ ​ថៃ ស្រីនាង​Onlineshop។

ស្រីនាង​ ត្រូវ​បាន​តុលាការ​កាត់​ទោស​ឲ្យ​ជាប់​ពន្ធនាគារ​ ៦​ខែ ​កាល​ពី​ថ្ងៃ​ទី​២៤ ​ខែ​មេសា​ ក្រោម​ច្បាប់​ស្តីពី​អាជីវ​កម្ម​ផ្លូវភេទ​ និង​តាម​ក្រម​ព្រហ្មទណ្ឌ​ប្រទេស​កម្ពុជា​ ប៉ុន្តែ​ទោស​នោះ​ត្រូវ​ព្យួរ​មក​ត្រឹម​តែ ​២​ខែ​ ១៥​ ថ្ងៃ។​នេះ​បើ​តាម​ការ​បញ្ជាក់​របស់​អ្នកស្រី ​វ៉ែន​ មេត្តា ​បង​ស្រី​បង្កើត​របស់​ ស្រីនាង។​

អ្នក​ស្រី​ វ៉ែន មេត្តា​ វ័យ ​៤២​ឆ្នាំ​ ប្រាប់​ VOA ​នៅ​ថ្ងៃ​ព្រហស្បតិ៍​នេះ​ថា​ អ្នក​ស្រី​មិន​ហ៊ាន​ផ្តល់​ការ​អត្ថា​ធិប្បាយ​បែប​ណា​ចំពោះ​ការ​កាត់​សេចក្តី​របស់​តុលាការ​ទេ​ ​ប៉ុន្តែ​អ្វី​ដែល​អ្នកស្រី​បារម្ភ​នោះ​ គឺ​ការ​រក​ប្រាក់​ចំណូល​របស់​ប្អូន​ស្រី​ ក្រោយ​មាន​សេរីភាព​ឡើង​វិញ។​ អ្នកស្រី​ថា​ ស្រីនាង​ អាច​នឹង​ត្រូវ​ដោះ​លែង​នៅ​ថ្ងៃទី​ ៥ ​ខែ​ឧសភា​ បន្ទាប់​ពី​ត្រូវ​បាន​ចាប់​ខ្លួន​តាំង​ពី​ថ្ងៃ​ទី ​២០ ​ខែ​កុម្ភៈ។​

«ស្ថាន​ភាព​ឥឡូវ​ គឺ​ថា​លេខ​សូន្យ​ហើយ​ណ៎ា​ ហើយ​ចេញ​មក​ដឹង​គេ​ឲ្យ​យើង​លក់​យ៉ាង​ម៉េច? ​អី​យ៉ាង​ណា?​ យើង​អត់​ដឹង។​ ដល់​ថ្ងៃ​ទី ​៥​ ខែ​៥​ហ្នឹង​ គេ​នឹង​គេ​ធ្វើ​ក្រដាស​បែប​បទ​ឲ្យ​យើង​ចេញ។ ហ្នឹង​គេ​និយាយ​ប្រាប់​យើង​ ហើយ​បើ​តាម​មើល​ទៅ​ណ៎ា»។​

VOA ​មិន​ទាន់​អាច​សុំការ​អត្ថាធិប្បាយ​ពី​លោក ​អ៊ី រិន ​អ្នក​នាំ​ពាក្យ​សាលាដំបូង​រាជធានី​ភ្នំពេញ​ និង​លោក​ នុត សវនា ​អ្នក​នាំ​ពាក្យ​អគ្គ​នាយកដ្ឋាន​ពន្ធនាគារ​នៃ​ក្រសួង​មហា​ផ្ទៃ​បាន​ទេ ​នៅ​ថ្ងៃ​ព្រហស្បតិ៍​នេះ។​

ការ​ចាប់​ខ្លួន ​ថៃ ស្រីនាង ​ដែល​មាន​ឈ្មោះ​ពិត​ថា​ វ៉ែន រចនា​ បាន​កើត​ឡើង​ក្រោយ​ការ​ព្រមាន​របស់​លោក​នាយក​រដ្ឋ​មន្ត្រី​ ហ៊ុន សែន ​ថានឹង​ចាត់​វិធាន​ការ​ចំពោះ​ស្ត្រី​រូប​ណា ​ដែល​ផ្សព្វ​ផ្សាយ​លក់​ផលិត​ផល​ទាក់​ទង​នឹង​សម្ផស្ស​ដោយ​មាន​ការ​ស្លៀក​ពាក់​បែប​ «ស៊ិចស៊ី​ជ្រុល»​ នៅ​តាម​គេហ​ទំព័រ​ ឬ​បណ្តាញ​សង្គម​ហ្វេស​ប៊ុក។

វិធាន​ការ​របស់​លោក ​ហ៊ុន សែន ​បាន​រង​ការ​រិះគន់​ពី​ក្រុម​អង្គការ​ការពារ​សិទ្ធិ​មនុស្ស​ក្នុង​ស្រុក​មួយ​ចំនួន​ដែល​ថា ​«ការ​ពិន័យ​លើ​ស្ត្រី​ដោយ​សារ​តែ​ការ​ស្លៀក​សម្លៀក​បំពាក់​បែប​ស៊ិចស៊ី​នោះ​ គឺ​ជា​ផ្នែក​មួយ​នៃ​ឫស​គល់​អំពើ​ហិង្សា​ ជា​ជាង​ការ​ដោះស្រាយ​បញ្ហា​ ហើយ​វា​មិន​គួរ​កើត​ឡើង​នោះ​ទេ»។​

ចំណែក​លោក​ Nicholas Bequilin​ ប្រធាន​ប្រចាំ​តំបន់​អាស៊ី​ខាង​កើត​អាស៊ី​អាគ្នេយ៍​និង​ប៉ាស៊ីហ្វិក​ នៃ​អង្គការ​ Amnesty International ​បាន​និយាយ​កាល​ពី​ខែ​កុម្ភៈ​ថា​ប ទ​បញ្ជា​របស់​លោក​នាយក​រដ្ឋមន្ត្រី​ក្នុង​ការ​ចាត់​វិធាន​ការ​និង​អប់រំ​ស្ត្រី​ទាំង​នោះ​ «តំណាង​ឲ្យ​ការ​អនុវត្ត​បែប​គំរាម​កំហែង​នូវ​ការ​តាម​ដាន​របស់​រដ្ឋ​ ដើម្បី​បំពេញ​តាម​គោល​ការណ៍​បែប​រើស​អើង​ និង​ផ្ដល់​តម្លៃ​លើ​បុរស»។​

ប៉ុន្តែ​លោក​ ហ៊ុន សែន​ បាន​ការពារ​វិធាន​ការ​របស់​លោក​ និង​រិះគន់​អ្នក​សារ​ព័ត៌មាន​ និង​ក្រុម​អង្គការ​សិទ្ធិ​មនុស្ស​ទាំង​នោះ​យ៉ាង​ចាស់​ដៃ។​ លោក​លើក​ទឹក​ចិត្ត​ឲ្យ​ក្រុម​អ្នក​រិះគន់​ទាំង​នោះ​ ប្រាប់​ឲ្យ​ក្រុម​គ្រួសារ​របស់​ពួក​គេ​ស្លៀក​ពាក់​ស៊ិចស៊ី​ ហើយ​លោក​ថា​ លោក​នឹង​ជួយ​ផ្សព្វផ្សាយ​បន្ត។​

អ្នកស្រី​ ជឹម ចាន់នាង​ អគ្គ​លេខាធិការ​រង​របស់​គណៈ​កម្មាធិការ​នៃ​អង្គការ​មិនមែន​រដ្ឋាភិបាល​កម្ពុជា​ដើម្បី​អនុ​សញ្ញា​ CEDAW​ មិន​គាំទ្រ​ចំណាត់​ការ​រដ្ឋាភិបាល​ដែល​តម្រូវ​ឲ្យ​មាន​ការ​ចាប់​ខ្លួន​ស្ត្រី​មក​ផ្តន្ទា​ទោស​ចំពោះ​ការ​ស្លៀក​ពាក់​ ដែល​រង​ការ​ចោទ​ថា​ បាន​ធ្វើ​ឲ្យខូច​ប្រពៃណី​និង​តម្លៃ​របស់​ស្ត្រី​ខ្មែរ​នោះ​ទេ។

អ្នកស្រី​យល់​ថា​ ចំណាត់​ការ​បែប​នេះ​នឹង​រឹត​តែ​ធ្វើ​ឲ្យ​មាន​សម្ពាធ​សង្គម​កាន់​តែ​ធ្ងន់ធ្ងរ​មក​លើ​ស្ត្រី​រង​គ្រោះ​គឺ​ ថៃ ស្រីនាង​ អតីត​អ្នក​លក់​ផលិត​ផល​អនឡាញ​ និង​ស្ត្រី​ផ្សេង​ទៀត​ទៅ​ថ្ងៃ​អនាគត។​

«គាត់​អាច​បាត់​បង់​មុខ​របរ​របស់​គាត់​ ឬ​មួយ​ក៏គាត់​ចូល​មក​វិញ​ គាត់​មាន​ភាព​អាម៉ាស់​ ច៎ា​ខ្មាស​អៀន។​គ្រួសារ​របស់​គាត់​ដូច​គ្នា។​ នៅ​ពេល​ដែល​គាត់​បាត់​បង់ចំណូល​ ដល់​អ៊ីចឹង​វា​រង​ប៉ះពាល់​ដូច​គ្នា។​ ហើយ​សង្គម​របស់​យើង​ផល​ប៉ះពាល់​យូរ​អង្វែង​ គឺ​ធ្វើ​ឲ្យ​សង្គម​យើង​នៅ​តែ​រក្សា​ផ្នត់​គំនិត​អវិជ្ជមាន​ ទៅ​លើ​ស្ត្រី​ ហើយ​មិន​មែន​តែ​រង​គ្រោះ​តែ​គាត់​មួយ​ទេ​ គឺស្ត្រី​ផ្សេង​ទៀត»។​

កញ្ញា​ បុណ្យ រចនា​ នាយិកា​អង្គការ​ក្លាហាន​ដែល​ជា​អង្គការ​ធ្វើ​ការ​ងារ​លើក​ស្ទួយ​សិទ្ធិ​ស្រ្តី​ មាន​ប្រសាសន៍​ថា​ ការ​រក​ប្រាក់​ចំណូល​របស់​អតីត​អ្នក​លក់​ផលិត​ផល​អន​ឡាញ ​ថៃ ស្រីនាង​ នឹង​រង​ផល​ប៉ះ​ពាល់​ ព្រោះ​អតីត​អ្នក​លក់​ផលិត​ផល​រូប​នេះ​អាច​ប្រឈម​នឹង​ការ​រើស​អើង​ក្នុង​សង្គម។

«អ៊ីចឹង​សួរ​ថា ​តើការ​រើស​អើង​ហ្នឹង​វា​នឹង​មាន​ព្យសន​កម្ម​ប៉ះពាល់​ទៅ​ដល់​មុខ​របរ​របស់​គាត់បន្ថែម ​ឬ​ក៏​អត់​ហ្នឹង។​ អាហ្នឹង​ខ្ញុំ​គិត​ថា​ប្រហែល​ជា​មាន។ ​ប៉ុន្តែ​គ្រាន់​ថា​ដល់​កម្រិត​ធ្ងន់ ​ឬ​ក៏​កម្រិត​ស្រាល​បែប​ណា​ហ្នុង​ គឺ​ខ្ញុំ​ក៏​អត់​ហ៊ាន​សន្និដ្ឋាន​នៅ​ក្នុង​ស្ថានភាព​នេះ​ដែរ»។​

អ្នក​ការពារ​សិទ្ធិ​ស្ត្រី​រូប​នេះ​ក៏​បាន​បង្ហាញ​ការ​សោកស្តាយ​ ចំពោះ​ការ​កាត់​ទោស​អ្នក​លក់​ផលិត​ផល​អន​ឡាញ ​ថៃ ស្រីនាង​ ផង​ដែរ។​

«អ្វី​ដែល​កញ្ញា​ថៃស្រី​នាង​គាត់​បាន...​គាត់​ធ្វើ​កន្លង​មក​ហ្នឹង​សម្រាប់​យើង​ យើង​គិត​ថា​ជា​ការ​ប្រើ​ប្រាស់​នូវ​សិទ្ធិ​ក្នុង​ការ​បញ្ចេញ​មតិ​របស់​គាត់​ តាម​រយៈ​ការ​ប្រកប​របរ​វិជ្ជាជីវៈ​របស់​គាត់​ ដែល​ជា​របរ​សុចរិត​អ៊ីចឹង​ទៅ​ណ៎ា។​ អា​កន្លែង​ហ្នឹង​ខ្ញុំ​មាន​ការ​សោក​ស្តាយ ​ដែល​គាត់​ត្រូវ​បាន​រក​ឃើញ​ថា​មាន​ទោស​មាន​អី​អ៊ីចឹង​ទៅ​ណ៎ា»។​

យ៉ាង​ណា​ក៏​ដោយ​លោក ​ហ៊ុន សែន ​មាន​ប្រសាសន៍​កាល​ពី​ពេល​កន្លង​ទៅ​ថា ​លោក​ជំរុញ​ឲ្យ​មាន​ការ​លក់​ផលិត​ផល​អនឡាញ​ តែ​ការ​លក់​ដូរ​នោះ​មិន​មែន​យក​ខ្លួន​ប្រាណ​ទៅ​លក់​នោះ​ទេ។​

បន្ទាប់​ពី​ការ​ចាប់​ឃុំ​ខ្លួន ​ថៃ ​ស្រីនាង​ កាល​ពី​ខែ​កុម្ភៈ សាច់​ញាតិ​របស់​អ្នក​លក់​ផលិតផល​អនឡាញ​រូប​នេះ​ បាន​ត្អូញត្អែរ​រួច​ទៅ​ហើយ​ពី​ការ​ធ្លាក់​ចុះ​ប្រាក់​ចំណូល​ប្រចាំ​ថ្ងៃ​យ៉ាង​គំហុក​ ដោយ​សារ​មិន​មាន​វត្តមាន​របស់​ ថៃ ស្រីនាង​ ក្នុង​ការ​ផ្សព្វផ្សាយ​លក់​ផលិតផល​អនឡាញ​ ដែល​ភាគ​ច្រើន​ជា​ផលិត​ផល​សម្ផស្ស​និង​សម្លៀក​បំពាក់​របស់​ស្ត្រី។​

ការ​ថយ​ចុះ​ចំណូល​នេះ​ក៏​កំពុង​ធ្វើ​ឲ្យ​អ្នក​ស្រី​ ថៃ ស្រីនាង ​ប្រឈម​នឹង​ការ​រឹបអូស​បន្ទប់​ខុនដូ​ពីរ​បន្ទប់​ដែល​អ្នកស្រី​បាន​ទិញ​បង់​រំលស់​ ដោយ​ត្រូវ​ចំណាយ​ប្រមាណ ​១.០០០​ដុល្លារ ​ក្នុង​មួយ​ខែ។​ នេះ​បើ​តាម​ការ​បញ្ជាក់​របស់​អ្នកស្រី ​វ៉ែន មេត្តា ​បង​ស្រី ​របស់​ថៃ ស្រីនាង៕

តួលេខនៃករណីឆ្លងជំងឺកូវីដ១៩

XS
SM
MD
LG