ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ពលរដ្ឋ​អាមេរិក ៥ នាក់ សិ្ថត​ក្នុងចំណោម​កងរក្សា​សន្តិភាព ៧ នាក់​ដែល​ស្លាប់​ក្នុង​ការធ្លាក់​ឧទ្ធម្ភាគចក្រ​នៅ​អេហ្ស៊ីប


ផែនទីនៃ​ឧបទ្វីប​ស៊ីណៃ​ នៅប្រទេស​អេហ្ស៊ីប។

កម្លាំង​ចម្រុះ​ និង​អ្នក​សង្កេត​ការណ៍​ដែល​ឃ្លាំ​មើល​កិច្ចព្រម​ព្រៀង​សន្តិភាព​អ៊ីស្រាអែល-អេហ្ស៊ីប​ឆ្នាំ​១៩៧៩ បាន​បញ្ជាក់​ពី​ការ​ស្លាប់កង​រក្សាសន្តិភាព​៧​នាក់​នៅ​ក្នុងការ​ធ្លាក់​ឧទ្ធម្ភាគចក្រ​ក្នុង​អំឡុង​បេសកកម្ម​ធម្មតា​នៅ​ឧបទ្វីប​ស៊ីណៃ​ប្រទេស​អេហ្ស៊ីប​ កាល​ពី​ថ្ងៃ​ព្រហស្បតិ៍។​

កម្លាំង​ចម្រុះ​និង​អ្នក​សង្កេត​ការណ៍នេះ​ បាន​និយាយ​ថា ​ជនរង​គ្រោះ​ក្នុង​ឧទ្ធម្ភាគចក្រ Black Hawk របស់​កងទ័ព​អាមេរិក​នោះ​ រួម​មាន​ជនជាតិ​អាមេរិក​៥​នាក់ ​និង​ជនជាតិ​បារាំង ​និង​ឆែក។ ពួកគេ​មិន​បាន​បង្ហាញ​ឈ្មោះអ្នក​ស្លាប់​ទេ​ ដោយរង់ចាំ​ការ​ជូន​ដំណឹង​ដល់​ក្រុម​គ្រួសារ។​

ក្រុម​ចម្រុះ​នោះ​បន្ថែម​ថា អ្នក​ទី​៨​ដែល​បាន​ជិះ​លើឧទ្ធម្ភាគចក្រ​នោះដែរ​ និងជា​ជនជាតិ​អាមេរិក​ម្នាក់ ​បាន​រស់រានមាន​ជីវិត​ ហើយ​ត្រូវ​បាន​ដឹកតាម​យន្តហោះ​ទៅ​កាន់​មន្ទីរពេទ្យ។ កម្លាំង​ចម្រុះនោះនិយាយ​ថា​ ​គ្មាន​ការ​បង្ហាញ​ថា​ ការ​ធ្លាក់​នោះបណ្តាល​មក​ពី​អ្វី​ផ្សេង​«ក្រៅ​ពីគ្រោះ​ថ្នាក់​ធម្មតា​នោះ​ទេ»។​

នៅ​ក្នុង​សេចក្តី​ថ្លែងការណ៍​មួយ​ដែល​ចេញ​ផ្សាយ​ដោយ​ក្រសួង​ការពារជាតិ​សហរដ្ឋ​អាមេរិក​ លោក Chris Miller​ រដ្ឋមន្ត្រី​ស្តីទី ​បានចូល​រួមគោរព​វិញ្ញាណក្ខន្ធ​អ្នក​ដែល​បាន​បាត់បង់​ជីវិត។​

ប្រធានាធិបតី​ជាប់ឆ្នោត​សហរដ្ឋ​អាមេរិក​លោក​ ចូ បៃដិន​ បាន​សម្តែង​ការ​រំលែក​ទុក្ខ​ចំពោះគ្រួសារអ្នកស្លាប់​ នៅ​ក្នុងសារ​តាមបណ្តាញ Twitter ​កាល​ពី​ថ្ងៃ​ព្រហស្បតិ៍។​

លោក​បាន​សរសេរ​ថា៖ «ខ្ញុំ​ចូលរួម​ជាមួយ​ពលរដ្ឋ​អាមេរិក​ទាំង​អស់​ក្នុង​ការ​ផ្តល់​កិត្តិយស​ដល់​ការ​លះបង់​របស់ពួក​គេ ដូច​ដែល​ខ្ញុំ​បាន​រក្សា​មនុស្ស​ជាទី​ស្រឡាញ់​របស់​ពួក​គេ នៅ​ក្នុង​ការ​អធិស្ឋាន​របស់​ខ្ញុំដែរ»។​


គ្រោះថ្នាក់​កាល​ពី​ថ្ងៃ​ព្រហស្បតិ៍​គឺ​ជា​ការ​ធ្លាក់​យន្តហោះ​ដ៏​គ្រោះថ្នាក់​បំផុត​សម្រាប់​យោធា​សហរដ្ឋ​អាមេរិក​នៅ​ឆ្នាំ​នេះ៕

XS
SM
MD
LG