ព្រឹទ្ធសភាដែលគ្រប់គ្រងដោយគណបក្សប្រជាជនកម្ពុជា នៅថ្ងៃព្រហស្បតិ៍នេះ បានឯកភាពយល់ព្រមលើវិសោធនកម្មច្បាប់បោះឆ្នោត ដែលស្នើដោយលោកនាយករដ្ឋមន្រ្តី ហ៊ុន សែន ដើម្បីទប់ស្កាត់សមាជិកគណបក្សជំទាស់ដែលមិនទៅបោះឆ្នោត។ នេះបើតាមសេចក្តីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភាចេញផ្សាយនៅថ្ងៃទី២៩ ខែមិថុនា ក្រោយមានកិច្ចប្រជុំនៅព្រឹទ្ធសភា។
សមាជិកព្រឹទ្ធសភាបានឱ្យយោបល់ថា៖ «ឯកភាពទាំងស្រុង ទៅលើសេចក្តីព្រាងច្បាប់ទាំងមូល ដោយឥតកែប្រែ និងចាត់ទុកជាការប្រញាប់ចំនួន ៥៩សំឡេងនៃចំនួនសមាជិកព្រឹទ្ធសភាទាំងមូល»។
សេចក្តីព្រាងវិសោធនកម្មច្បាប់បោះឆ្នោតនេះនឹងកំហិតសិទ្ធិឈរឈ្មោះរបស់អ្នកនយោបាយ និងធានាថា វិសោធនកម្មច្បាប់បោះឆ្នោតដែលស្នើដោយលោកនាយករដ្ឋមន្រ្តី ហ៊ុន សែន សម្រាប់ការបោះឆ្នោតជ្រើសតាំងតំណាងរាស្រ្ត កំណត់ថា លុះត្រាតែបេក្ខជនបានអនុវត្តសិទ្ធិបោះឆ្នោតដោយបានបោះឆ្នោតសម្រាប់ការបោះឆ្នោតជាសាកលចំនួនពីរលើកចុងក្រោយជាប់គ្នា ទើបអាចឈរឈ្មោះឱ្យគេបោះឆ្នោតឲ្យបាន លើកលែងតែករណីដែលមិនអាចអនុវត្តសិទ្ធិបោះឆ្នោតនេះមានមូលហេតុសមស្រប។ សម្រាប់ការបោះឆ្នោតឃុំសង្កាត់ វិសោធនកម្មច្បាប់បោះឆ្នោតកំណត់លក្ខខណ្ឌនេះដូចគ្នានឹងការបោះឆ្នោតតំណាងរាស្រ្ត៕
