គណៈកម្មាធិការព្រឹទ្ធសភាអាមេរិកទទួលបន្ទុកកិច្ចការការបរទេស កាលពីថ្ងៃព្រហស្បតិ៍ បានផ្តល់ការយល់ព្រមលើបេក្ខជនដែលលោកប្រធានាធិបតី ដូណាល់ ត្រាំ បានតែងតាំងឲ្យមើលការខុសត្រូវលើទីភ្នាក់ងារសហរដ្ឋអាមេរិកសម្រាប់ការផ្សព្វផ្សាយព័ត៌មានសកល ហៅកាត់ថា (USAGM) ដែលជាទីភ្នាក់ងាររបស់រដ្ឋាភិបាលសហព័ន្ធ ត្រួតពិនិត្យការផ្សាយរបស់រដ្ឋាភិបាលសហរដ្ឋអាមេរិក ដែលមានរួមទាំងសំឡេងសហរដ្ឋអាមេរិក និងវិទ្យុអាស៊ីសេរីផងដែរ។
នៅក្នុងការបោះឆ្នោតតាមខ្សែបន្ទាត់បក្ស ១២ ទល់ ១០ សំឡេងនោះ គណៈកម្មាធិការព្រឹទ្ធសភាអាមេរិក ទទួលបន្ទុកកិច្ចការការបរទេស ដែលគ្រប់គ្រងដោយគណបក្សសាធារណរដ្ឋនោះ បានត្រួសត្រាយផ្លូវ ដើម្បីបញ្ជូនការតែងតាំងលោក Michael Pack ទៅកាន់ព្រឹទ្ធសភាពេញអង្គ ដើម្បីធ្វើការបោះឆ្នោត។
ការតែងតាំងលោក Michael Pack ដែលជាអ្នកផលិតភាពយន្តឯកសារម្នាក់នោះ បានស្ថិតនៅក្រោមការពិចារណាអស់ពេលជិត ២ ឆ្នាំ មួយផ្នែកគឺដោយសារមានការព្រួយបារម្ភរបស់សមាជិកគណបក្សប្រជាធិបតេយ្យ អំពីការចោទប្រកាន់លើវិធីចាត់ចែងហិរញ្ញវត្ថុរបស់លោក។
កាលពីសប្តាហ៍មុន ការបោះឆ្នោតរបស់គណៈកម្មាធិការនេះត្រូវបានពន្យារពេលម្តងទៀត បន្ទាប់ពីការិយាល័យក្រសួងយុត្តិធម៌នៃរដ្ឋធានីវ៉ាស៊ីនតោន បានបើកការស៊ើបអង្កេតថា តើលោក Michael Pack មានបានប្រើប្រាស់មូលនិធិនៃអង្គការមិនរកចំណេញរបស់លោក ដែលមានឈ្មោះ Public Media Lab ដោយខុសច្បាប់ ដើម្បីផលប្រយោជន៍ខ្លួនលោកផ្ទាល់ឬយ៉ាងណា។
ក្នុងសវនាការកាលពីថ្ងៃព្រហស្បតិ៍ សមាជិកព្រឹទ្ធសភាមួយចំនួនខាងគណបក្សប្រជាធិបតេយ្យ មិនបានទទួលការយល់ព្រមលើបេក្ខភាពរបស់លោក Pack ដើម្បីពន្យារពេលសវនាការនេះម្តងទៀត រហូតដល់ពេលណាដែលលោក Pack អាចដោះស្រាយក្តីបារម្ភ ពាក់ព័ន្ធនឹងការចាត់ចែងលុយកាក់របស់លោកដាច់ស្រេចសិន ឬរហូតដល់ពេលណា ដែលការិយាល័យក្រសួងយុត្តិធម៌នៃរដ្ឋធានីវ៉ាស៊ីនតោន បញ្ចប់ការស៊ើបអង្កេតរបស់ខ្លួនហើយសិន។
សមាជិកព្រឹទ្ធសភានៃគណបក្សប្រជាធិបតេយ្យ លោក Bob Menendez បានថ្លែងតាមសម្តីដើមរបស់លោកថា៖ «លោក Michael Pack បានបោះបង់ចោលការតាំងចិត្តរបស់លោកចំពោះខ្ញុំ ហើយបានបដិសេធមិនព្រមធ្វើតាមការសន្យាលើរឿងដ៏សំខាន់នេះ»។
លោក Menendez បានបន្ថែមថា គណៈកម្មាធិការដែលដឹកនាំដោយគណបក្សសាធារណរដ្ឋនេះ បរាជ័យក្នុងការចាត់ចែងការតែងតាំងនេះ តាមរយៈការសហការគ្នារវាងគណបក្សទាំងពីរ។
លោក Menendez បានថ្លែងទៅកាន់លោកប្រធានគណៈកម្មាធិការ Jim Risch ថា៖ «លោកមិនទាំងបានធ្វើការឆ្លើយតបចំពោះការព្រួយបារម្ភរបស់សមាជិកពីគណបក្សប្រជាធិបតេយ្យទាំងមូលផង»។
លោកប្រធានគណៈកម្មាធិការព្រឹទ្ធសភា Jim Risch បានថ្លែងថា គណៈកម្មាធិការនេះបានត្រៀមខ្លួនដើម្បីពន្យារសវនាការតែងតាំង «បើសិនជាក្រសួងយុត្តិធម៌អាមេរិក ស្នើសុំឲ្យពន្យារពេលនោះ ក៏ប៉ុន្តែរឿងនេះមិនបានកើតឡើងទេ»។
វីអូអេ បានទាក់ទងជាមួយអ្នកនាំពាក្យរបស់លោកប្រធានគណៈកម្មាធិការ Jim Risch ដើម្បីសុំអត្ថាធិប្បាយបន្ថែម លើការចោទប្រកាន់ទាំងអស់នោះ។
ក្នុងសេចក្តីថ្លែងការមួយ លោក Risch ថ្លែងថា៖ «ខ្ញុំសប្បាយចិត្តណាស់ដែលនៅទីបំផុត គណៈកម្មាធិការនេះ អាចផ្តល់ការយល់ព្រមលើការតែងតាំងលោក Pack ឲ្យកាន់តំណែងជានាយកប្រតិបត្តិនៃទីភ្នាក់ងាររបស់រដ្ឋាភិបាលសហព័ន្ធ ដែលជាតួនាទីមួយ ដែលត្រូវបានទុកឲ្យនៅទំនេរ អស់ពេលជាយូរពេកហើយនោះ»។
លោក Menendez បានរៀបរាប់យ៉ាងលម្អិតអំពីការព្រួយបារម្ភរបស់សមាជិកគណៈកម្មាធិការខាងគណបក្សប្រជាធិបតេយ្យ ដោយចោទប្រកាន់ថា លោក Pack មិនបាននិយាយនូវការពិត អំពីទំនាក់ទំនងរវាងអង្គការមិនរកចំណេញ និងក្រុមហ៊ុនរកប្រាក់ចំណេញរបស់លោក ប្រាប់ទីភ្នាក់ងារប្រមូលពន្ធដារ។
ក្រុមហ៊ុនផលិតភាពយន្តរបស់លោក Pack Manifold Production, Inc. បានទទួលប្រាក់ជំនួយរាប់លានដុល្លារពីអង្គការមិនរកប្រាក់ចំណេញរបស់លោក នេះបើតាមសម្តីរបស់លោក Menendez។ ប៉ុន្តែលោក Pack នៅតែប្រាប់ទីភ្នាក់ងារពន្ធដារថា គ្មានការទាក់ទងគ្នារវាងក្រុមហ៊ុននិងអង្គការរបស់លោកទេ។ លោក Menendez បានថ្លែងថា លោក Pack នៅមិនទាន់បានកែតម្រូវលើការផ្តល់ព័ត៌មានមិនត្រឹមត្រូវ ទៅឲ្យទីភ្នាក់ងារពន្ធដារ និងគណៈកម្មាធិការព្រឹទ្ធសភា ពាក់ព័ន្ធនឹងការប្រកាសប្រាក់ចំណូលរបស់លោកនៅឡើយទេ។
លោកMenendez បានថ្លែងថា លោក Pack មិនទាន់ផ្តល់ជូនគណៈកម្មាធិការ នូវឯកសារនានាដែលរៀបរាប់អំពីការទាក់ទងគ្នារវាងអង្គការមិនរកប្រាក់ចំណេញ និងក្រុមហ៊ុនជំនួញរបស់លោក ដោយយកហេតុផលថា ការធ្វើបែបនេះប៉ះពាល់ដល់ព័ត៌មានសម្ងាត់របស់ក្រុមហ៊ុន។
«ផលប្រយោជន៍របស់ក្រុមហ៊ុន ជារឿងសម្ងាត់ដល់ថ្នាក់សមាជិកព្រឹទ្ធសភាអាមេរិក ដែលមានសិទ្ធិពិនិត្យព័ត៌មានសម្ងាត់ថ្នាក់កំពូល មិនអាចមើលបាន» នេះបើតាមសម្តីរបស់លោក Menendez។
វីអូអេ បានទាក់ទងជាមួយអ្នកនាំពាក្យលោក Pack ដើម្បីសុំអត្ថាធិប្បាយហើយ។
លោក Menendez បានចេញផ្សាយ កាលពីយប់ថ្ងៃព្រហស្បតិ៍ នូវវីដេអូបង្ហាញកិច្ចប្រជុំរបស់គណៈកម្មាធិការ ដែលដើមឡើយមានការផ្សាយជាសំឡេងតែប៉ុណ្ណោះ។
ក្នុងសេចក្តីថ្លែងការណ៍មួយ លោក Menendez បានថ្លែងថា៖
«កាលពីមួយសប្តាហ៍មុន សមាជិកទាំងអស់ខាងគណបក្សប្រជាធិបតេយ្យនៅក្នុងគណៈកម្មាធិការព្រឹទ្ធសភាទទួលបន្ទុកកិច្ចការការបរទេស បានផ្ញើលិខិតមួយច្បាប់ជូនលោកប្រធាន Risch ស្នើសុំឲ្យលោកផ្លាស់ប្តូរសេចក្តីសម្រចដ៏មានគ្រោះថ្នាក់ ដើម្បីរារាំងមិនឲ្យអ្នកសារព័ត៌មាន និងសាធារណជនអាមេរិកាំង មើលសវនាការនេះ។ សំណើរជាច្រើនលើករបស់ពួកគេ មិនត្រូវបានអើពើ»។
លោក Risch បានថ្លែងថា សេចក្តីសម្រេចបានធ្វើឡើង ដោយសារទីតាំងប្រជុំនៅក្រោមវិធានការរក្សាគម្លាតពីគ្នា ខណៈពេលមានរោគរាតត្បាតជំងឺកូវីដ១៩ និងថាម្យ៉ាងទៀត បន្ទប់ប្រជុំនោះ អាចផ្សាយបានតែសំឡេងប៉ុណ្ណោះ។
លោកប្រធានាធិបតី ត្រាំ បានតែងតាំងលោក Pack ឲ្យដឹកនាំទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសកល កាលពីជិត២ឆ្នាំមុន ហើយលោក ត្រាំ បានសម្តែងនូវការមិនសប្បាយចិត្ត ចំពោះការរង់ចាំ ដោយបានថ្លែងថា នេះពន្យារពេលគឺដោយសារការរារាំងរបស់គណបក្សប្រជាធិបតេយ្យ។ កាលពីមុន លោកប្រធានាធិបតី បានគំរាមផ្អាកដំណើរការរបស់សភាមួយរយៈ ដើម្បីរុញច្រានឲ្យមានការធ្វើសវនាការលើការតែងតាំងនេះ។
សេតវិមានបានចោទគណបក្សប្រជាធិបតេយ្យថា បានពន្យារពេលនៃការតែងតាំងនេះ កាលពីសប្តាហ៍មុន ក្រោយពីមានសេចក្តីរាយការណ៍អំពីការស៊ើបអង្កេតរបស់ការិយាល័យយុត្តិធម៌នៃរដ្ឋធានីវ៉ាស៊ីនតោន។ សេតវិមានបានសរសេរថា៖ «លោកប្រធានាធិបតីគាំទ្រការតែងតាំងលោក Michael Pack ហើយមានការអាក់អន់ចិត្ត ប៉ុន្តែមិនមានការភ្ញាក់ផ្អើលទេ ដែលពួកគណបក្សប្រជាធិបតេយ្យដែលមិនធ្វើអ្វីទាល់តែសោះនោះ ហើយជាថ្មីម្តងទៀត បានសម្រេចបង្ខូចកេរ្ត៍ឈ្មោះនយោបាយលើប្រវត្តិស្អាតស្អំរបស់បុគ្គលិកបម្រើសាធារណជនម្នាក់នេះ»។
កាលពីប៉ុន្មានសប្តាហ៍ថ្មីៗនេះ លោក ត្រាំ បានរិះគន់វីអូអេ ចំពោះការផ្សាយអំពីរឿងចិន ក្នុងអំឡុងវិបត្តិវីរ៉ុសកូរូណា។ នៅពេលដែលអ្នកសារព័ត៌មានសាកសួរលោកកាលពីសប្តាហ៏មុន អំពីការតែងតាំងលោក Pack នោះ លោក ត្រាំ បានថ្លែងថា៖ «VOA សំឡេងសហរដ្ឋអាមេរិក ដឹកនាំដោយវិធីអាក្រក់ណាស់។ ពួកគេមិនមែនជាសំឡេងសហរដ្ឋអាមេរិកទេ។ ពួកគេផ្ទុយពីសំឡេងសហរដ្ឋអាមេរិក»។
លោកស្រី Amanda Bennett នាយិកាវីអូអេ បានការពារបេសកកម្មរបស់ទីភ្នាក់ងារព័ត៌មានដែលឧបត្ថម្ភដោយរដ្ឋាភិបាលអាមេរិកនេះ នៅក្នុងសេចក្តីថ្លែងការណ៍មួយ កាលពីថ្ងៃសុក្រសប្តាហ៍មុន។
«យើងនាំចេញវិសោធនកម្មទី១ (នៃរដ្ឋធម្មនុញ្ញសហរដ្ឋអាមេរិកដែលចែងអំពីសេរីភាពសារព័ត៌មាននិងសេរីភាពនានា) ទៅកាន់ប្រជាពលរដ្ឋនៅទូទាំងពិភពលោក ដែលមិនអាចស្វែងរកព័ត៌មានជាក់លាក់ ពិតប្រាកដ និងអាចជឿទុកចិត្តបាន»។
លោកស្រី Amanda Bennett បន្ថែមទៀតថា៖ «ហេតុដូច្នេះហើយបានជា ៨០ ភាគរយនៃអ្នកស្តាប់និងទស្សនារបស់យើង ក្នុងចំណោមអ្នកស្តាប់យើងទាំងអស់ ២៨០ លាននាក់ ដែលតាមដានកម្មវិធីផ្សាយ ៤៧ ភាសា និងក្នុងប្រទេសជាង ៦០ និយាយថា ពួកគេចាត់ទុកកិច្ចការរបស់យើងថាអាចជឿទុកចិត្តបាន»។
ទីភ្នាក់ងារសហរដ្ឋអាមេរិកសម្រាប់ការផ្សព្វផ្សាយព័ត៌មានសកល (USAGM) ត្រួតពិនិត្យបណ្តាញផ្សាយស៊ីវិលរបស់សហរដ្ឋអាមេរិកចំនួន៥ គឺ វីអូអេ វិទ្យុអឺរ៉ុបសេរី (RFE/RL) ការិយាល័យផ្សាយគុយបា (OCB) អាស៊ីសេរី (Radio Free Asia) និងបណ្តាញផ្សាយទៅកាន់មជ្ឈឹមបូព៌ា (MBN)។
នៅក្នុងសវនាការរបស់លោកកាលពីខែកញ្ញា ឆ្នាំមុន លោក Pack បានថ្លែងតបទៅនឹងការព្រួយបារម្ភដែលថា លោកនឹងបញ្ជ្រាបភាពលម្អៀងនយោបាយលើទីភ្នាក់ងារ USAGM ដែលមានរួមទាំងវីអូអេផង ដែលតម្រូវតាមច្បាប់អាមេរិក ឲ្យផ្សាយព័ត៌មានមិនលម្អៀងនោះ។
លោកអះអាងថា៖ «ទីភ្នាក់ងារទាំងមូលនេះ ពឹងផ្អែកលើជំនឿដែលថា អ្នកយកព័ត៌មានទាំងអស់មានឯករាជ្យ ហើយគ្មានឥទ្ធិពលនយោបាយណាមួយ អាចបង្គាប់ឲ្យពួកគេ ត្រូវរាយការណ៍ព័ត៌មាន និងត្រូវនិយាយបែបណានោះទេ។ ខ្ញុំយល់ថា បើគ្មានការជឿទុកចិត្តបែបនេះទេ នោះទីភ្នាក់ងារនេះគឺមិនឯករាជ្យនោះទេ»៕
ប្រែសម្រួលដោយ ប៉ូច រាសី
