ភ្ជាប់​ទៅ​គេហទំព័រ​ទាក់ទង

ប៉ាគីស្តាន​បាន​ចាប់ផ្តើម​ចាត់​វិធានការណ៍​សន្តិសុខ​នៅទីក្រុង​ Abbottabad


អ្នកកាសែតប៉ាគីស្តានដើរជុំវិញបរិវេណផ្ទះអ្នកជិតខាងនៃ​​កន្លែង​លាក់​ខ្លួនរបស់​ អូសាម៉ា ប៊ីនឡាដិន​ ក្នុងទីក្រុង Abbottabad, នៅ​ថ្ងៃទី៧​ខែ​ឧសភា ឆ្នាំ​២០១១។​

បន្ទាប់​ពី​ការ​វាយឆ្មក់​នៃ​កងកុម្ម៉ង់ដូ​សហរដ្ឋ​អាមេរិក​ ដែល​បាន​សម្លាប់​ អូសាម៉ា​ប៊ិនឡាដិន​មេដឹកនាំ​ពួក​អាល់កៃដា​កាលពី​ដើម​សប្តាហ៍​មុន​នៅក្នុង​ទីក្រុង​ Abbottabad មក​ ក្រុម​មន្ត្រី​ប៉ាគីស្តាន​បាន​ចាប់​ផ្តើម​ធ្វើការ​ចាត់​វិធានការណ៍​សន្តិសុខ​មួយ​នៅ​ទីនោះ។

ក្រុម​ប៉ូលីស​និង​កងយោធា​កំពុង​បិទផ្លូវ​ ដើម្បី​ដាក់​កន្លែង​ឆែកឆេរ​អត្តសញ្ញាណប័ណ្ណ​និង​ធ្វើការ​ឃាត់ខ្លួន​នៅក្នុង​ទីក្រុង​ Abbottabad​ កន្លែង​ដែល​ អូសាម៉ា​ប៊ិនឡាដិន​និង​គ្រួសារ​របស់គាត់​បាន​លាក់ខ្លួន​នៅក្នុង​បរិវេណផ្ទះ​មាន​ជញ្ជាំងមាំ​បិទជិត​ ដែល​ជាក់ស្តែង​សង់​សំរាប់​ការ​លាក់​កំបាំង​ខ្លួន​ដ៏​ខ្ពស់​បំផុត។

ប៉ូលីស​កំពុង​ឆែកឆេរ​ពី​ផ្ទះ​មួយ​ទៅ​ផ្ទះ​មួយ​ នៃពួក​អ្នករស់នៅ​ជិតខាង​ដើម្បី​បញ្ជាក់​ប័ណ្ណ​សំគាល់​ខ្លួន​អ្នករស់នៅ​ នៅក្នុង​ទីក្រុងនោះ​ ក្នុង​កិច្ច​ប្រឹងប្រែង​យ៉ាង​ជាក់ស្តែង​មួយ​ដើម្បី​ស្វែងរក​បក្សពួក​អ្នកគាំទ្រ​បណ្តាញ​ភេរវកម្ម​របស់​ ប៊ិនឡាដិន​ ខ្លះៗទៀត​ដែល​អាច​នៅ​មាន​សេសសល់។

មុន​ការ​វាយឆ្មក់​ដ៏​សម្ងាត់​របស់​ សរអា​ ដែល​បាន​សម្លាប់​ប៊ិនឡាដិន​ ទីក្រុង Abbottabad​ ដែល​ត្រូវបាន​ចាត់ទុក​ថាជា​ទីក្រុង​ដ៏មាន​សុវត្តិភាព​ជាងគេ​បង្អស់​មួយ​ នៃ​ទីក្រុង​ទាំងឡាយ​នៅក្នុង​ខេត្ត​ Khyber-Pakhtunkhwa​ ដែល​ជាកន្លែង​ដែលមាន​ការវាយ​ប្រហារ​ពួក​សកម្ម​ប្រយុទ្ធ​ជាច្រើន។​ ក្រុងនោះ​ជា​យោធភូមិ​មួយ​ ជា​កន្លែង​បណ្ឌិតសភា​យោធា​របស់​ប្រទេស​ និង​ជា​ទីកន្លែង​ដ៏សមរម្យ​ពិសេស​មួយ​ សំរាប់​ពួកយោធា​ចូលនិវត្តន៍។

ទោះ​ជា​យ៉ាង​ណា​ក្តី​ឥឡូវ​នេះ​ មាន​អ្នករស់នៅ​ នៅ​ទីនោះ​ខ្លះៗ​ភ័យខ្លាច​ថា​ការ​វាយឆ្មក់​នៅ​ពេល​យប់​ដែល​បាន​សម្លាប់​ប៊ិនឡាដិន​នោះ​ អាចនាំ​មកនូវ​អំពើ​ឃោរឃៅ​ជាច្រើន​ទៀត​ដល់​ទីក្រុង។​ បុរស​ម្នាក់​ដែល​បាន​ប្រាប់​ថា​ឈ្មោះ​ Tariq​ និយាយ​ថា​ គាត់​និង​គ្រួសារ​របស់​គាត់​មិនមានអារម្មណ៍ ​ថាមាន​សុវត្តិភាព​ត​ទៅ​ទៀត​ឡើយ។​ Tariq​ និយាយ​ថា​គ្រួសារ​របស់​គាត់​ខ្លាច​ខ្លាំង​ណាស់​ ជាពិសេស​នៅ​ពេលយប់។​ គាត់​និយាយ​ថា​ គាត់​បារម្ភថា​ នឹង​អាច​មាន​ការវាយ​ប្រហារ​មួយ​ទៀត។

អ្នក​រស់នៅ​ក្នុងទី​ក្រុង​ Abbottabad​ ដទៃៗ​ទៀត​ ដែល​មិន​ធ្លាប់​ជួប​នឹង​ការ​ត្រួតពិនិត្យ​សន្តិសុខ​តឹងរឹង​បែបនេះ​ មិន​សប្បាយ​ចិត្ត​ទេ។​ និស្សិត​សាកល​វិទ្យាល័យ​ម្នាក់​ដែល​ប្រាប់ថា​គាត់​ឈ្មោះ​ Saif​ និយាយថា​ កន្លែង​ឆែកឆេរ​បណ្តាល​ឲ្យ​មាន​បញ្ហា​ច្រើន។

«យើង​កំពុង​ប្រឈម​នឹង​បញ្ហា​គួរ​ឲ្យខ្លាច​ជាច្រើន​ ប៉ុន្តែ​បញ្ហា​ដែល​ខ្លាំង​ជាងគេ​បំផុត​នោះ​គឺ​ការ​ឆែក​សន្តិសុខ។​ ខ្ញុំ​គិតថា​ វា​ជាការ​ធ្វើឲ្យ​ប្រសើរ​ឡើងនោះ​ជា​ការពិត​ ប៉ុន្តែ​ក្រៅ​ពីនោះ​ លោកអ្នក​ដឹងទេ​ ថាវានាំ​ឲ្យមាន​ការលំបាក​ខ្លាំង​ណាស់​សព្វថ្ងៃ​នេះ។​ កន្លែង​ឆែកឆេរ​ ព្រមទាំង​ប័ណ្ណ​សំគាល់​ខ្លួន​ជាដើម។ល។នោះ​ មិន​ថា​ចំពោះ​លោកអ្នក​រស់នៅ​ ក្នុង​តំបន់​ណា​មួយ​ទេ។»

ក្រុម​អ្នក​កាសែត​នៅ​ក្នុង​ទីក្រុង​រាយការណ៍​ថា​ ពួកគេ​មិនត្រូវ​បាន​អនុញ្ញាត​ឲ្យទៅ​ជិត​បរិវេណ​ផ្ទះ​នោះ​ទេ។​ អ្នកកាសែត​ជាច្រើន​ត្រូវបាន​ព្រមាន​ថា​នឹង​ត្រូវ​បណ្តេញ​ចេញ​ពីទីក្រុង​ទាំងអស់។​នៅពេល​ជា​មួយ​គ្នា​នេះ​ ក្រុម​អាជ្ញាធរ​ប៉ាគីស្តាន​និយាយថា​ សម្រាប់​ពេល​នេះ​ វាដូច​ជា​ឆាប់​ពេក​ដែល​និយាយថា​តើនឹងមាន​អ្វី​កើតឡើង​ ចំពោះ​ផ្ទះសម្បែង​ដែល​ជា​កន្លែង​ប៊ិនឡាដិន​ត្រូវ​បាន​សម្លាប់​នោះ។

ប្រែ​សម្រួល​ដោយ នុច សារីតា

XS
SM
MD
LG