ក្នុងរយៈពេល៦ខែទៀត ប្រទេសរុស្ស៊ី ប្រឈមនឹងការបោះឆ្នោតរដ្ឋសភា ហើយបន្ទាប់មក ដំណែងប្រធានាធិបតី។
ប្រព័ន្ធនយោបាយរបស់រុស្ស៊ីដែលត្រូវបានគ្រប់គ្រងយ៉ាងប្រុងប្រយ័ត្ន បានទទួលរងនូវភាពញ័ររញ្ជួយ នៅពេលដែលបុរសមានទ្រព្យធនច្រើនជាងគេបំផុតម្នាក់របស់ប្រទេសនេះ បានលាលែងពីកិច្ចការនយោបាយដែលគេមិននឹកស្មានដល់ ហើយលោកបានអំពាវនាវឲ្យមានការបណ្តេញចេញ «មេអាយ៉ង» របស់លោកនៅវិមានក្រិមឡាំង (Kremlin)។ លោក ម៉ៃឃល ប្រូខូរ៉ូវ (Mikhail Prokhorov) មិនមែនជាមហទ្ធជនធម្មតាទេ។ ដោយមានកំពស់ពីរម៉ែត្រនិងមានប្រាក់ចំនួន១៨ពាន់លានដុល្លារ បុរសនៅលីវ អាយុ៤៦ឆ្នាំរូបនេះគ្រប់គ្រងទ្រព្យសម្បត្តិដ៏មានតម្លៃជាច្រើន ដោយរាប់ទាំងក្រុមកីឡាវិជ្ជាជីវៈ New Jersey Nets ដែលជាក្រុមមួយនៃសមាគមកីឡាបាល់បោះជាតិ (National Basketball Association) របស់សហរដ្ឋអាមេរិក។
ប៉ុន្តែវិមានក្រិមឡាំងបានគិតថា ពួកគេអាចដាក់ការគ្រប់គ្រងទៅលើលោក ប្រូខូរ៉ូវ បាន។ ដោយគណបក្សរួបរួមរុស្ស៊ី (United Russia party) ដែលកំពុងកាន់អំណាចបានធ្លាក់ចុះនៅក្នុងការស្ទង់មតិមហាជន ពួកគេបានចាត់តាំងឈ្មោះលោកឲ្យដឹកនាំគណបក្សបុព្វហេតុត្រូវ (Right Cause Party)។ នេះជា«គណបក្សហោប៉ៅ» ដែលជាគម្រោងគ្រប់គ្រងដោយវិមានក្រិមឡាំង ដែលមានគោលបំណងដើម្បីទាក់ទាញក្រុមអ្នកបោះឆ្នោតដែលនៅដាច់តែឯង ទៅចូលរួមក្នុងការបោះឆ្នោតរដ្ឋសភានៅខែធ្នូ ដោយមិនបង្កការគំរាមកំហែងពិតប្រាកដទេ។ ផ្ទុយទៅវិញ លោក ប្រូខូរ៉ូវ បានបង្ហាញថា លោកមានហោប៉ៅ ប្រភេទខុសពីនេះ។ លោកបានបង់ប្រាក់ទៅលើផ្ទាំងប៉ាណូរាប់រយដែលមានដាក់តម្លើងនៅទូទាំងប្រទេសរុស្ស៊ី ដើម្បីផ្សព្វផ្សាយសារអ្នកជាតិនិយមរបស់លោកទៅកាន់ប្រជាពលរដ្ឋ។
លោក វិចទ័រ ដាវីដូហ្វ (Victor Davidoff) ជាអ្នកវិភាគនយោបាយនៅទីក្រុងម៉ូស្គូ។
«លោក ប្រូខូរ៉ូវ បានបង្ហាញថា លោកមានភាពឯករាជ្យខ្លាំងពេក រហូតដល់មិនអាចគ្រប់គ្រងបានទេ។ ហើយជាការពិតណាស់ ភាពឯករាជ្យគឺជាអ្វីដែលអាចបំភ័យមនុស្សដែលកំពុងកាន់អំណាច និងទស្សនៈទាំងស្រុងនៃលទ្ធិប្រជាធិបតេយ្យដែលមានការគ្រប់គ្រង ដែលលោក ភូទីន (Putin) បានបង្កើតឡើងក្នុងអំឡុង១០ឆ្នាំចុងក្រោយនេះ»។
លោក ម៉ៃឃល ខូដូកូវស្គី (Mikhail Khordokovsky) មហាសេដ្ឋីរុស្ស៊ីចុងក្រោយដែលចូលប្រឡូកក្នុងនយោបាយ ស្ថិតក្នុងបន្ទប់នៃមន្ទីរឃុំឃាំងនៅក្បែរតំបន់អាក់ទិច (Arctic) ដែលបានបំរើទោសអស់ពាក់កណ្តាលនៃទោសជាប់ពន្ធនាគាររយៈពេល១៣ឆ្នាំរបស់លោក»។
លោក សើហ្គី ម៉ាកូវ (Sergei Markov) អ្នកតំណាងរាស្ត្រម្នាក់នៃគណបក្សគ្រប់គ្រងអំណាច ថ្លែងថា លោក ប្រូខូរ៉ូវ ក៏បានបំពានច្បាប់ដែរ។
ដោយមិននិយាយថា លោក ប្រូខូរ៉ូវ គួរចូលក្នុងពន្ធនាគារ លោកចោទប្រកាន់មហាសេដ្ឋីរូបនេះ ពីបទនាំយកកិច្ចការធ្វើជំនួញនិងប្រាក់របស់លោកចូលទៅក្នុងនយោបាយរុស្ស៊ី។ ចាប់តាំងពីឆ្នាំ២០០០ ជាឆ្នាំដែលលោក វ្លាឌីមៀរ ភូទីន (Vladimir Putin) បានឡើងកាន់អំណាច ច្បាប់នៅក្នុងនយោបាយរុស្ស៊ីមានកាន់តែតឹងឡើងៗ។ គណបក្សប្រឆាំងពណ៌នាច្បាប់ទាំងនោះថា ជាការបោចស្លាបមាន់ មួយសរសៃម្តងៗ។ លោក ភូទីន បានបញ្ឈប់ការបោះឆ្នោតផ្ទាល់សម្រាប់ដំណែងអភិបាល ព្រឹទ្ធសភា និងចៅហ្វាយក្រុងភាគច្រើន បានដាក់ក្រុមហ៊ុនទូរទស្សន៍ឲ្យនៅក្រោមការគ្រប់គ្រងរបស់វិមាន ក្រិមឡាំង ហាមឃាត់គណបក្សប្រឆាំងទាំងអស់ ដែលលើកលែងតែគណបក្សប្រឆាំងភក្តីបីប៉ុណ្ណោះ បំបាត់ជម្រើសនៃការបោះឆ្នោតប្រឆាំងនឹងបេក្ខជនទាំងអស់ ហើយបន្ទាប់មក បន្ថយចំនួនអ្នកចេញទៅបោះឆ្នោតក្នុងកម្រិតអប្បបរមាសម្រាប់ការបោះឆ្នោតដ៏មានសុពលភាព ឲ្យនៅត្រឹមមួយសម្លេងតែប៉ុណ្ណោះ។
ជារួម អារម្មណ៍របស់ប្រជាពលរដ្ឋរុស្ស៊ីកាន់តែមានភាពជូរចត់ខ្លាំងឡើង។ នៅក្នុងការស្ទង់មតិកាលពីខែមុន ៥៤ភាគរយនៃអ្នកឆ្លើយសំណួរបានគិតថា ការបោះឆ្នោតរដ្ឋសភា នៅខែធ្នូនឹងមានការ«លួចបន្លំ»។ បើយោងតាមក្រុមហ៊ុនឡេវ៉ាដា (Levada) ដែលជាក្រុមហ៊ុនស្ទង់មតិដូចគ្នាដែរបានឲ្យដឹងថា ពាក់កណ្តាលនៃនិស្សិតសាកលវិទ្យាល័យ និងសហគ្រិនរបស់រុស្ស៊ីចង់ធ្វើអន្តោប្រវេសន៍។ ហើយពាក់កណ្តាលនៃប្រជាពលរដ្ឋរុស្ស៊ីជឿថា អំពើពុករលួយនៅក្នុងសម័យលោក ភូទីន មានភាពធ្ងន់ធ្ងរជាងបុព្វការីរបស់លោក គឺលោក បូរីស យ៉ែលស៊ីន (Boris Yeltsin)។
នៅក្នុងបរិយាកាសនេះ វិមាន ក្រិមឡាំង មិនចង់ឲ្យក្រុមលោកខាងលិចសង្កេតការណ៍ទៅលើ«លទិ្ធប្រជាធិបតេយ្យដែលមានការគ្រប់គ្រង»របស់រុស្ស៊ីទេ។ ក្នុងសប្តាហ៍នេះ ការចរចាបានប្រព្រឹត្តធ្វើ ទាក់ទងនឹងចំនួនអ្នកសង្កេតការណ៍អឺរ៉ុប ដែលនឹងត្រូវផ្តល់ទិដ្ឋការជូន។ ក្រុមមន្ត្រីរៀបចំការបោះឆ្នោតរុស្ស៊ីបាននិយាយថា ពួកគេនឹងទទួលបានតែមួយភាគបីនៃអ្នកសង្កេតការណ៍ចំនួន២៦០នាក់ប៉ុណ្ណោះ ដែលសហភាពអឺរ៉ុបចង់បញ្ជូនមកឲ្យ។
បន្ទាប់ពីការបោះឆ្នោតរដ្ឋសភា ប្រជាពលរដ្ឋរុស្ស៊ីនឹងបោះឆ្នោតជ្រើសរើសប្រធានាធិបតីនៅខែមីនា។ នៅក្នុងការបោះឆ្នោតប្រធានាធិបតីចុងក្រោយ លោក ភូទីន បានរង់ចាំរហូតដល់ក្រោយការបោះឆ្នោតរដ្ឋសភាក្នុងខែធ្នូឆ្នាំ២០០៧ ទើបបានប្រកាសថា មនុស្សរបស់លោក គឺលោក ឌីមីទ្រី មេឌវេដេវ (Dmitry Medvedev) ជាបេក្ខជនរបស់គណបក្សគ្រប់គ្រងអំណាច។
លោក ម៉ាកូវ ថ្លែងម្តងទៀតថា គណបក្សគ្រប់គ្រងអំណាចអាចធ្វើការជាមួយបុរសណាមួយក៏បានដែរ។ ប៉ុន្តែលោក ភូទីន ដែលឥឡូវជានាយករដ្ឋមន្ត្រី ត្រូវបានចាត់ទុកយ៉ាងទូលំទូលាយថាជាបេក្ខជននាំមុខគេ។ បន្ទាប់ពីគណបក្សកាន់អំណាចបានចាញ់ការបោះឆ្នោតចំនួនពាក់កណ្តាលក្នុងចំណោមការបោះឆ្នោតតំបន់ចំនួន១២ កាលពីខែមីនា លោក ភូទីន បានបង្កើតក្រុមធំមួយឈ្មោះ រណសិរ្សប្រជាពលរដ្ឋរុស្ស៊ីទាំងមូល (All-Russia Popular Front) ដើម្បីទាក់ទាញក្រុមអ្នកបោះឆ្នោតឯករាជ្យ។ កាលពីឆ្នាំមុន លោកបានតែងតាំងមនុស្សដែលស្មោះត្រង់នឹងលោកដើម្បីគ្រប់គ្រងទីក្រុងធំជាងគេបំផុតចំនួនពីររបស់រុស្ស៊ី រួមមានទីក្រុងម៉ូស្គូ និងសេនភីធឺស្បើក (St. Peterburg)។
ពលរដ្ឋរុស្ស៊ីកាន់តែច្រើនឡើងៗជឿថា នៅក្នុងខែធ្នូខាងមុខ លោក ភូទីន នឹងប្រកាសថា បេក្ខជនដំណែងប្រធានាធិបតីគឺ លោក វ្លាឌឺមៀរ ភូទីន៕
ប្រែសម្រួលដោយ លី សុខឃាង
