ប្រទេសរុស្ស៊ីនៅថ្ងៃអង្គារនេះ បានហៅការចោទប្រកាន់ថាកីឡាកររបស់ខ្លួនប្រើប្រាស់ថ្នាំជំនួយកម្លាំងនិងការចោទថាមានកិច្ចខំប្រឹងប្រែងលាក់បាំងរឿងនេះ ថាជាការចោទប្រកាន់គ្មានមូលដ្ឋានជាក់លាក់ ហើយទទូចថា ខ្លួនគោរពតាមគោលការណ៍យ៉ាងតឹងរឹងរបស់ទីភ្នាក់ងារពិភពលោកប្រឆាំងនឹងការប្រើប្រាស់ថ្នាំជំនួយកម្លាំង និងគោលការណ៍របស់គណកម្មាធិការអូឡាំពិកអន្តរជាតិ។
សេចក្តីថ្លែងការនេះ បានចេញផ្សាយមួយថ្ងៃ បន្ទាប់ពីទីភ្នាក់ងារពិភពលោកប្រឆាំងនឹងការប្រើប្រាស់ថ្នាំជំនួយកម្លាំងបានចេញសេចក្តីរាយការណ៍មួយ ដែលបានចោទយ៉ាងធ្ងន់ធ្ងរលើក្រុមកីឡាករ ក្រុមគ្រូបង្វឹក វេជ្ជបណ្ឌិត ព្រមទាំងស្ថាប័នរុស្ស៊ីផ្សេងៗរួមទាំងទីភ្នាក់ងារប្រឆាំងថ្នាំជួយកម្លាំងនៃប្រទេសរុស្ស៊ី ក៏ដូចជាកន្លែងពិសោធន៍មួយក្នុងទីក្រុងមូស្គូ ដែលបានធ្វើតែស្តសម្រាប់ការប្រកួតកីឡាអូឡាំពិកក្នុងទីក្រុង Sochi ផង។
អ្នកនាំពាក្យរដ្ឋាភិបាលក្រុងមូស្គូ លោក Dmitry Peskov បានថ្លែងប្រាប់អ្នកយកព័ត៌មាននៅថ្ងៃអង្គារនេះថា ពុំទាន់ឃើញមានភស្តុតាងអ្វីដែលគាំទ្រការចោទប្រកាន់ទាំងនោះទេ។ ស្របពេលជាមួយគ្នានេះដែរ ក្រសួងកីឡានៃប្រទេសរុស្ស៊ីបានចេញសេចក្តីថ្លែងការណ៍របស់ខ្លួនមួយនិយាយថា ខ្លួនបានដឹងអំពីបញ្ហាក្នុងចំណោមកីឡាកររុស្ស៊ី ហើយបានប្រកាសអំពីការតាំងចិត្តរបស់ខ្លួនក្នុងការបង្ក្រាបការប្រើប្រាស់ថ្នាំជំនួកម្លាំងក្នុងវិស័យកីឡា។
ក្រសួងនេះបាននិយាយទៀតថា ខ្លួនបានរៀបចំខ្លួនរួចជាស្រេចហើយដើម្បីសហការណ៍ជាមួយទីភ្នាក់ងារពិភពលោកប្រឆាំងនឹងការប្រើប្រាស់ថ្នាំជំនួយកម្លាំង ដើម្បីបំបាត់ការបំពានធ្វើឡើងដោយទីភ្នាក់ងារប្រឆាំងនឹងការប្រើប្រាស់ថ្នាំជំនួយកម្លាំងរបស់ប្រទេសនេះ៕
