យោធាអ៊ុយក្រែនបានបញ្ជាក់នៅថ្ងៃព្រហស្បតិ៍នេះថា កងទ័ពរុស្ស៊ីបានវាយប្រហារកាលពីយប់មិញដោយប្រើដ្រូន ១០ គ្រឿងនិងមីស៊ីលមួយគ្រាប់។
កងទ័ពអ៊ុយក្រែនបានបញ្ជាក់ថា ប្រព័ន្ធការពារដែនអាកាសរបស់អ៊ុយក្រែនបានបំផ្លាញដ្រូន ៨ គ្រឿងក្នុងចំណោមនោះដោយបាញ់ទម្លាក់នៅតំបន់ Poltava តំបន់ Dnipropetrovsk តំបន់ Zaporizhzhia និងតំបន់ Kharkiv។
ការឈ្លានពានរបស់រុស្ស៊ីលើអ៊ុយក្រែនបានចាប់ផ្ដើមកាលពីថ្ងៃទី ២៤ ខែកុម្ភៈ ឆ្នាំ ២០២២ ហើយនៅខួបពីរឆ្នាំនៃសង្គ្រាមនេះ បណ្ដាមេដឹកនាំមកពីក្រុមប្រទេស G-7 នឹងរៀបចំកិច្ចប្រជុំតាមអនឡាញមួយនៅថ្ងៃសៅរ៍ខាងមុខដើម្បីពិភាក្សាអំពីការគាំទ្ររបស់ពួកគេចំពោះអ៊ុយក្រែន។
អ្នកនាំពាក្យសេតវិមានអ្នកស្រី Karine Jean-Pierre បានប្រាប់អ្នកកាសែតកាលពីថ្ងៃពុធថា ប្រធានាធិបតីអ៊ុយក្រែនលោក Volodymyr Zelenskyy ក៏នឹងចូលរួមនៅក្នុងការពិភាក្សានេះផងដែរ និងថាក្រុមប្រទេស G-7 នឹងពិភាក្សាអំពី «វិធានការដែលអាចធ្វើទាំងអស់គ្នាដើម្បីបន្តធ្វើឱ្យរុស្ស៊ីទទួលខុសត្រូវ»។
សហរដ្ឋអាមេរិកក៏នឹងត្រៀមបង្ហាញផងដែរនៅថ្ងៃសុក្រខាងមុខអំពីទណ្ឌកម្មថ្មីប្រឆាំងនឹងរុស្ស៊ីសម្រាប់ការឈ្លានពានរបស់រុស្ស៊ីលើអ៊ុយក្រែននិងការស្លាប់របស់មេបក្សប្រឆាំងរុស្ស៊ីលោក Alexey Navalny ក្នុងពន្ធនាគារ។
អ្នកនាំពាក្យក្រសួងការបរទេសសហរដ្ឋអាមេរិកលោក Matthew Miller បានប្រាប់អ្នកកាសែតកាលពីថ្ងៃពុធថា វិធានការរបស់សហរដ្ឋអាមេរិក «គឺជាទណ្ឌកម្មដ៏ខ្លាំងក្លាមួយ»។ លោកមិនបានផ្ដល់ព័ត៌មានលម្អិតណាមួយនៅមុនការប្រកាសអំពីទណ្ឌកម្មនេះនោះទេ។
បណ្ដាប្រទេសជាសមាជិកសហភាពអឺរ៉ុបបានអនុម័តកញ្ចប់ទណ្ឌកម្មថ្មីប្រឆាំងនឹងរុស្ស៊ី។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ការសម្រេចកាលពីថ្ងៃពុធម្សិលមិញនេះគឺត្រូវពេលនឹងខួបពីរឆ្នាំនៃការឈ្លានពានពេញទំហឹងរបស់រុស្ស៊ីលើអ៊ុយក្រែន និងបានធ្វើឡើងក្នុងពេលប៉ុន្មានថ្ងៃក្រោយមកបន្ទាប់ពីមេបក្សប្រឆាំងរុស្ស៊ីលោក Alexey Navalny បានស្លាប់។
ទណ្ឌកម្មទាំងនេះសំដៅលើបុគ្គលនិងអាជីវកម្មនានាដែលគេសង្ស័យថាបានជួយជ្រោមជ្រែងរដ្ឋាភិបាលរុស្ស៊ីនៅក្នុងសង្គ្រាមប្រឆាំងនឹងអ៊ុយក្រែន ដែលក្នុងនោះរួមមានទាំងក្រុមហ៊ុនចិនផងដែរ។
ប្រទេសបែលហ្ស៊ិក ដែលនៅពេលបច្ចុប្បន្ននេះជាប្រធានប្ដូរវេនរបស់សហភាពអឺរ៉ុប បាននិយាយថា កញ្ចប់ទណ្ឌកម្មនេះគឺជាកញ្ចប់ទណ្ឌកម្មដ៏ធំបង្អស់មួយដែលអនុម័តដោយសហភាពអឺរ៉ុប។
មន្ត្រីការទូតមួយចំនួនបាននិយាយថា ឯកអគ្គរដ្ឋទូតនានានៃសហភាពអឺរ៉ុបដែលមកពីប្រទេសជាសមាជិកទាំងអស់បានយល់ព្រមលើការដាក់ទណ្ឌកម្មលើក្រុមហ៊ុននិងបុគ្គលសរុបប្រហែល ២០០។
សហភាពអឺរ៉ុបបានដាក់ទណ្ឌកម្មជាច្រើនដងលើរុស្ស៊ីតាំងពីពេលដែលប្រធានាធិបតីរុស្ស៊ីលោក Vladimir Putin បានបញ្ជាទាហានរបស់លោកឱ្យចូលឈ្លានពានអ៊ុយក្រែនកាលពីជិត ២ ឆ្នាំមុនមក៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
វេទិកាបញ្ចេញមតិ