ភ្ជាប់​ទៅ​គេហទំព័រ​ទាក់ទង

មន្ត្រី​អ.ស.ប.​​មិន​អាច​សិក្សា​អំពី​ជនភៀស​ខ្លួន​ដោយ​រដ្ឋាភិបាល​អត់​សហការ

  • គង់ សុឋានរិទ្ធ

ក្រុម​បុរស​ជនជាតិ​ដើម​តំបន់​ភ្នំ​វៀតណាម ឬ Montagnard ដើរ​តាម​ផ្លូវ​ចេញ​ពី​តំបន់​ព្រៃ​ជ្រៅ​នៅចម្ងាយ​​ប្រមាណ​៧០​គីឡូម៉ែត្រ​ភាគ​ឦសាន​​ក្រុង​បានលុង​ទី​រួម​ខេត្ត​រតនគីរី​កាល​ពី​ថ្ងៃ​ទី​២២ ខែ​កក្កដា ឆ្នាំ​២០០៤។ Reuters

ប្រតិភូ​របស់​អង្គការ​សហ​ប្រជាជាតិបាន​ចាក​ចេញ​ពី​ខេត្ត​រតន​គីរី​នៅ​រសៀល​ថ្ងៃ​សុក្រ​នេះ​ ក្រោយ​ពីអាជ្ញាធរខេត្ត​បដិសេធ​មិនព្រម​សហការ​ក្នុង​ការ​ស្វែង​រកជន​ជាតិ​ដើម​ភាគ​តិច​វៀតណាម​ចំនួន​១៣​នាក់​ដែល​កំពុង​លាក់​ខ្លួន​នៅ​ក្នុង​ព្រៃ​របស់​ខេត្ត​នេះ។​

លោក​ឆាយ ធី ​អ្នក​សម្រប​សម្រួលសមាគម​ការ​ពារ​សិទ្ធិ​មនុស្ស​អាដហុក​ប្រចាំ​ខេត្ត​រតន​គីរី ​ដែល​បាន​សហការ​ជាមួយ​ក្រុម​ប្រតិភូនេះ ​បានឲ្យ​ដឹង​ថា​ មន្ត្រី​អង្គការ​សហ​ប្រជាជាតិ​ទទួល​បន្ទុក​ផ្នែក​ជន​ភៀស​ខ្លួន​ និង​ទទួល​បន្ទុក​ផ្នែក​សិទ្ធិ​មនុស្ស​ចំនួន​បួន​នាក់​ បាន​ធ្វើ​ដំណើរ​ត្រឡប់​មក​ទី​ក្រុង​ភ្នំពេញ​វិញ​ ក្រោយ​ពី​បាន​ជួប​ជាមួយ​លោក​ជា ប៊ុនធឿន ​ស្នងការ​រង​នគរបាល​ខេត្ត​រតន​គីរី​កាល​ពី​រសៀល​ថ្ងៃ​ព្រហស្បតិ៍។​

នៅ​ក្នុង​ជំនួប​នោះ​ លោក​ជា ប៊ុនធឿន​បានបញ្ជាក់​ថា​ កង​ប៉ូលិសមិន​អាច​សហការ​ជាមួយ​ក្រុម​មន្ត្រី​អង្គការ​សហ​ប្រជាជាតិ​ក្នុង​ការ​ស្វែង​រក​ជនភៀស​ខ្លួន​វៀតណាម​ទេ​ ដោយសារ​គ្មាន​បញ្ជា​ពី​ថ្នាក់​លើ។​

«តាម ​អ.ស.ប.​ ​មាន​មន្ត្រី​អ.ស.ប.​ ​ពីរ​នាក់បាន​ប្រជុំ​ជាមួយ​ស្នងការ​រង​ លោក​ជា ប៊ុនធឿន។ ​លោក​ជា ប៊ុនធឿន​ប្រាប់​ថា​ គាត់​មិន​អាច​សហការ​បាន​ទេ ដោយសារ​មិន​មាន​បញ្ជា​ពី​ក្រសួង​មហាផ្ទៃ​ ឬ​ពី​រដ្ឋា​ភិបាល។​ ហើយ​មន្ត្រី​អ.ស.ប.​ត្រឡប់​ទៅ​ភ្នំពេញ​វិញ​នៅ​ម៉ោង​នេះ»។​ ​

លោក​នាយ​ឧត្តម​សេនីយ៍​ខៀវ សុភ័គ អ្នក​នាំពាក្យ​ក្រសួង​មហា​ផ្ទៃ​ទទួល​ស្គាល់​ថា​ មិន​ទាន់​មាន​ការ​អនុញ្ញាត​ឲ្យ​មន្ត្រី​មកពី​ឧត្តម​ស្នង​ការ​អង្គការ​សហ​ប្រជាជាតិ​សម្រាប់​ជន​ភៀស​ខ្លួន​ (UNHCR)​ និងមន្ត្រី​ការិយា​ល័យ​ឧត្តម​ស្នង​ការ​អង្គការ​សហ​ប្រជាជាតិ​សម្រាប់​សិទ្ធិ​មនុស្ស​នៅ​កម្ពុជា​ចុះ​បេសក​កម្ម​ទៅ​កាន់​ខេត្ត​រតន​គីរី​ទេ ​ហើយ​ក៏​មិន​មាន​បញ្ជា​ឲ្យ​អាជ្ញាធរខេត្ត​ឲ្យ​ធ្វើ​កិច្ច​សហការ​ជាមួយ​អង្គការ​សហ​ប្រជាជាតិ​សម្រាប់​ស្វែង​រក​ជន​ភៀស​ខ្លួន​ពី​តំបន់​ខ្ពង់​រាប​វៀតណាម​នោះ​ដែរ។​

«សូម​សរសើរ ​កោត​សរសើរ​អាជ្ញាធរ​មូលដ្ឋាន ​ដែល​រង់​ចាំ​បញ្ជា​ពី​ក្រសួង​មហា​ផ្ទៃ។ ​ដូច្នេះ​ទាក់​ទង​គ្នា​ត​ទៅ​ទៀត​ទៅ!»។​

លោក​ខៀវ សុភ័គ​បាន​ផ្តល់​យោបល់​ឲ្យ​មន្ត្រី​អង្គការ​សហ​ប្រជាជាតិ​ភ្ជាប់​ទំនាក់​ទំនង​ជាមួយ​នាយក​រដ្ឋបាល​អន្តោ​ប្រវេសន៍​របស់​ក្រសួង​មហា​ផ្ទៃ​ដែល​មាន​សិទ្ធិ​សម្រេច​ក្នុង​ការ​ផ្តល់​ភ្លើង​ខៀវ​ដល់​អាជ្ញាធរ​មូល​ដ្ឋាន​ក្នុង​ការ​សហការ​ ឬ​យ៉ាង​ណា​ ឬ​អនុញ្ញាត​ឲ្យ​មន្ត្រី​អង្គការ​សហ​ប្រជាជាតិ​ចុះ​ស្វែង​រក​ជន​ជាតិ​តំបន់​ភ្នំវៀតណាម​ឬ​យ៉ាង​ណា។​

វីអូអេ​បានព្យាយាម​ទាក់ទងសុំការ​បកស្រាយ​ពី​លោក​ឧត្តម​សេនីយ៍​សុខ ផល ​អគ្គនាយក​នៃ​អគ្គនាយក​អន្តោប្រវេសន៍​របស់​ក្រសួង​មហា​ផ្ទៃ​ តែ​មិន​អាច​ទាក់ទង​បាន​ទេ​នៅថ្ងៃ​នេះ។​ លោក​ថង សាវុន​ អភិបាល​ខេត្ត​រតន​គីរីមិន​អាច​ផ្តល់​ព័ត៌មាន​បន្ថែម​ទេ ​ដោយសារ​តែ​លោក​កំពុង​ជាប់​រវល់​ប្រជុំ។​

រី​ឯ​លោកស្រី​វីវាន តាន់ ​អ្នក​នាំពាក្យ​ឧត្តម​ស្នង​ការ​អង្គការ​សហ​ប្រជាជាតិ​សម្រាប់​ជន​ភៀស​ខ្លួន​ប្រចាំ​តំបន់​ក៏វីអូអេ​មិន​អាច​ទាក់​ទង​បាន​ដែរ។

មន្ត្រី​អង្គការ​សហ​ប្រជាជាតិ​ចំនួន​បួន​រូបបាន​ទៅ​ដល់​ខេត្ត​រតន​គីរី​កាល​ពី​ថ្ងៃ​ពុធ​ដើម្បី​ពិនិត្យ​ស្ថាន​ភាព​ជាក់​ស្តែង​អំពីជនជាតិ​ដើម​ភាគតិច​ម៉ុងតាញ៉ា​ វៀតណាម​ ក្រោយ​ពី​បាន​សុំ​ការ​អនុញ្ញាត​ពី​ក្រសួង​មហាផ្ទៃ​ដោយ​មិន​មាន​ការ​ឆ្លើយ​តប​កាល​ពី​សប្តាហ៍​មុន។​ ​ជនជាតិ​ចារ៉ាយ​វៀតណាម​ទាំង​នេះ​បាន​គេ​ច​ខ្លួន​ពី​ការ​ធ្វើ​ទុក្ខ​បុក​ម្នេញ​របស់​អាជ្ញាធរវៀត​ណាម និង​បាន​មក​ដល់​ក្នុងព្រៃ​នៃ​ខេត្ត​រតន​គីរី​ចាប់​តាំង​ពី​ចុង​ខែ​តុលា​មក​ម្ល៉េះ​ ដើម្បី​ស្វែង​រក​សិទ្ធិ​ជ្រក​កោន​នៅ​ប្រទេស​ទី​៣។​

កាល​ពី​ថ្ងៃ​អង្គារ ​ឧត្តម​ស្នង​ការ​អង្គការ​សហ​ប្រជាជាតិ​សម្រាប់​ជន​ភៀស​ខ្លួន(UNHCR)​ បាន​សម្តែងកង្វល់​ចំពោះ​ស្ថាន​ភាព​ជន​ជាតិ​ដើម​ភាគ​តិច​ដែល​គេច​ខ្លួន​ពី​តំបន់​ខ្ពង់​រាប​វៀតណាម​នេះ​ ​បន្ទាប់​ពី​មាន​សេចក្តី​រាយ​ការណ៍​ដែល​ថា​ កង​ប៉ូលិសកម្ពុជា​បើក​ប្រតិបត្តិការ​តាម​ចាប់​ពួក​គេ​ និង​បញ្ជូន​ពួក​គេ​ទៅ​ឲ្យ​អាជ្ញាធរប្រទេស​វៀតណាម​វិញ។​

​អង្គការ​សហ​ប្រជាជាតិ​ទទូច​ឲ្យរដ្ឋា​ភិបាល​កម្ពុជា​បញ្ឈប់​សកម្ម​ភាព​នេះ​ ហើយ​បាន​ស្នើ​ឲ្យ​មាន​ការ​សហ​ការរួម​គ្នា​ដើម្បី​ចុះពិនិត្យ​ក្រុម​ជន​ជាតិ​ដើម​ភាគ​តិច​ទាំង​នេះ៕

XS
SM
MD
LG