ភ្ជាប់​ទៅ​គេហទំព័រ​ទាក់ទង

គណបក្ស​សាធារណរដ្ឋ​ក្នុង​យុទ្ធនាការ​បោះឆ្នោត​ប្រធានាធិបតី​ឆ្នាំ​២០១២


លោក​មិត្ដ​រ៉មនី​អតីត​អភិបាល​រដ្ឋ​ម៉ាស្សាជូសិត្ដស៍​ចាប់​ដៃ​មនុស្ស​នៅ​ភោជនីយដ្ឋាន​ហ្វាម​បូយស៍​( Farm Boys)​ ពេល​លោក​អញ្ជើញ​ទៅ​ទីក្រុង​ឆាពិន​( Chapin)​ រដ្ឋ​សោវ​ការ៉ូឡាយ​ណា​(South Carolina)​។​លោក​អញ្ចើញ​​ទៅ​រដ្ឋ​អាយ៉ូវ៉ា​នៅ​ថ្ងៃ​សុក្រ​ទី​២០​ឧសភា​ជា​លើក​ដំបូង

លោក ដូណលដ៍ ត្រាម្ព (Donald Trump) ធ្វើ​ឲ្យ​មាន​ការ​ចាប់​អារម្មណ៍​ជា​ច្រើន​ មុន​លោក​សម្រេចដក​ខ្លួន​ចេញ​ពី​ការ​ប្រកួតប្រជែង​តំណែង​ប្រធានាធិបតី។ ក៏​ប៉ុន្ដែ​រហូត​មក​ដល់​ពេល​នេះ​ផល​ប៉ះពាល់​ធំ​ជាង​គេ​នៅ​ក្នុង​ការ​តែង​តាំង​បេក្ខជន​ប្រធានាធិបតី​មក​ពី​គណបក្ស​សាធារណ​រដ្ឋ​សម្រាប់​ការ​បោះ​ឆ្នោត​ឆ្នាំ​២០១២​គឺ​សេចក្ដី​សម្រេច​របស់​លោក​ ម៉ែក ហាកាប៊ី​ (Mike Huckabee) ដែល​ថា​លោក​នឹង​មិន​ឈរ​ឈ្មោះ​សម្រាប់​ការ​តែង​តាំង​ជា​បេក្ខជន​ប្រធានាធិបតី​ទេ ​ទោះបី​លោក​ស្ទើរ​តែ​ស្ថិតក្នុង​លំដាប់​កំពូល​ក្នុង​ការ​ស្ទង់​មតិ​សាធារណ:​ភាគ​ច្រើន​ក៏​ដោយ។

លោក​ ម៉ែក ហាកាប៊ី​ ពន្យល់​អំពី​សេចក្ដី​សម្រេច​របស់​លោក​ក្នុង​កម្មវិធី​ទូរទស្សន៍​ Fox News Sunday ថា៖

«ប៉ុន្ដែ​ខ្ញុំ​ជឿជាក់​នៅ​ក្នុង​ចិត្ដ​របស់​ខ្ញុំ​ថា​ មិន​មែន​ជា​ពេល​វេលា​ល្អ​សម្រាប់​ខ្ញុំ​ឈរ​ឈ្មោះ​ទេ។ ការ​ឈរ​ឈ្មោះ​នេះ​នឹង​មិន​កើត​មាន​ទេ​នៅ​ពេល​នេះ»។

ដោយ​នៅ​ពេល​ឥឡូវ​នេះ​លោក ម៉ែក ហាកាប៊ី​ហើយ​នឹង​លោក​ ដូណលដ៍ ត្រាម្ព​ ឈប់​ឈរ​ឈ្មោះ​នោះ​ អ្នក​មក​ពី​គណបក្ស​សាធារណ:រដ្ឋ​ខ្លះ​ផ្ដោត​អារម្មណ៍​ទៅ​លើ​លោក​មិត្ដ​រ៉មនី​ (Mitt Romney) អតីត​អភិបាល​រដ្ឋ​ម៉ាស្សាជូសិត្ដស៍​ (Massachusetts​) វិញ។ លោក​មិន​បាន​ប្រកាស​អំពី​ការ​សម្រេច​ជា​ផ្លូវ​ការ​ទេ​ ក៏​ប៉ុន្ដែ​លោក​បាន​អង្គាស​ប្រាក់​ជា​ច្រើន​ ហើយ​ស្ថិត​លំដាប់​កំពូល​ ក្នុង​ការ​ស្ទង់​មតិ​សាធារណ:​នៃ​អ្នក​ដែល​នឹង​ឈរ​ឈ្មោះ​ឲ្យ​គណបក្ស​សាធារណរដ្ឋ។

ទោះ​ជា​យ៉ាង​នេះ​ក្ដី​លោក រ៉មនី​កំពុង​តែ​ប្រឈម​នឹង​ការ​រិះ​គន់​យ៉ាង​ខ្លាំង​ពី​ក្រុម​អ្នក​អភិរក្ស​អំពី​ការ​កែ​ទម្រង់នៃ​ការ​ថែ​ទាំ​សុខភាព​នៅ​ក្នុងរដ្ឋ​ ម៉ាស្សាជូសិត្ដស៍​ ដែល​លោក​បាន​អនុម័ត​ក្នុង​តំណែង​លោក​ជា​អភិបាល​រដ្ឋ​ ហើយ​ដែល​បាន​ក្លាយ​ទៅ​ជា​គំរូ​សម្រាប់​ផែនការ​ថែ​ទាំ​សុខភាព​របស់​លោក​ប្រធានាធិបតី​ បារ៉ាក់ អូបាម៉ា​ដែល​សភា​ជាតិ​បាន​អនុម័ត​កាល​ពី​ឆ្នាំ​ទៅ។

លោក​ រ៉មនី​មិន​មែន​ជា​អ្នក​ឈរ​ឈ្មោះ​តែ​ម្នាក់​មក​ពី​គណបក្ស​សាធារណរដ្ឋដែល​ត្រូវ​ប្រឈម​មុខ​នឹង​បញ្ហា​ទេ។​ លោក ញូ ហ្គិងរីច​ (Newt Gingrich) ​អតីតប្រធាន​រដ្ឋ​សភា​ជាតិ​បាន​ឈរ​ឈ្មោះ​ជា​ផ្លូវ​ការ​ហើយ​ ក៏​ប៉ុន្ដែ​បន្ដ​ប្រឈម​នឹង​សំណួរ​អំពី​ការ​លែង​លះ​ភរិយា​ពីរ​ដង​ ហើយ​នឹង​ប្រវត្ដិផិត​ក្បត់​ភរិយា​ ដែល​ជា​បញ្ហា​ព្រួយ​បារម្ភ​ចំពោះ​អ្នក​អភិរក្សសង្គមដែល​ជា​ក្រុម​អ្នក​បោះឆ្នោត​សំខាន់​មួយ​នៅ​ក្នុង​ជួរ​គណបក្ស​សាធារណរដ្ឋ។

លោក​ហ្គិងរីច​ ថ្លែង​នៅក្នុង​កម្មវិធី​ជួប​ជា​មួយ​អ្នក​កាសែត នៅ​ទូរទស្សន៍​ NBC​ ថា៖

«ខ្ញុំ​ធ្លាប់​មាន​កំហុស​នៅ​ក្នុង​ជីវិត​របស់​ខ្ញុំ។​ ខ្ញុំ​ត្រូវ​ទៅ​ថ្វាយបង្គំ​ព្រះ​អាទិទេព​សុំ​ឲ្យ​ព្រះ​អង្គត្រា​ប្រណី​លើក​លែង​ទោស​ ហើយ​ស្វែង​រក​ការ​ផ្សះ​ផ្សា​ ហើយ​ខ្ញុំ​នឹង​សុំ​ឲ្យ​អ្នក​សាធារណរដ្ឋ​មើល​ខ្ញុំ​ជា​មនុស្ស​មាន​លក្ខណ:​សម្បត្ដិ​យ៉ាង​ដូច​ម្ដេចសព្វ​ថ្ងៃ​នេះ»។

លោក​រ៉ន​ផល​ (Ron Paul) ​សមាជិកសភា​មក​ពី​រដ្ឋ​តិចសាស​ បាន​ចូល​រួម​ក្នុង​ការ​ប្រជែង​នេះ​ដែរ​ ហើយ​លោក​ធីមផឡិនធី​ (Tim Pawlenty) អតីត​អភិបាលរដ្ឋ​ មីនីសូតា​ (Minnesota) ​ព្រម​ទាំង​លោក​រិជ​សាន់ថរ៉ុម​ (Rich Santorum) ​អតីត​សមាជិក​ព្រឹទ្ធសភាមក​ពី​រដ្ឋ​ផិន​ស៊ីលវាញ៉ា​ (Pennsylvania) ក៏​បាន​ឈាន​ទៅ​កាន់​ការ​ឈរ​ឈ្មោះ​ក្នុង​តំណែង​នៅ​សេតវិមាន​ដែរ។

ក៏​ប៉ុន្ដែ​ការ​ស្ទង់​មតិ​ថ្មីៗ​នេះ​បង្ហាញ​ឲ្យ​ឃើញ​ថាសមាជិក​គណបក្ស​សាធារណរដ្ឋមិន​សប្បាយ​ចិត្ដ​នឹង​ការ​តែង​តាំង​បេក្ខជន​សម្រាប់​ប្រធានាធិបតី​ ហើយ​ចង់​ឃើញ​ជម្រើស​ដទៃៗ​ទៀត​ដែល​ធ្វើ​ឲ្យ​គេ​មាន​អារម្មណ៍​ថា​ នេះជាការ​ប្រកួត​ប្រជែង​បេក្ខជន​ដ៏​ទូលាយ​បំផុត​នៃគណបក្ស​សាធារណរដ្ឋ​អស់​រយៈ​ជា​ច្រើន​ទស្សវត្សរ៍​មក​ហើយ។

លោក​មីត្ចដានី​ញែលស៍​ (Mitch Daniels) ​អភិបាល​រដ្ឋ​ ឥណ្ឌាយ៉ាណា​ (Indiana) និយាយ​ថា​លោក​នឹង​សម្រេច​ចិត្ដ​ឆាប់ៗ​នេះ​ថា​តើ​នឹង​ឈរ​ឈ្មោះ​ឬ​យ៉ាង​ណា​ ដូច​គ្នា​នឹង​លោក​ស្រី​សមាជិកសភា​មីស៊្សែលបាចមែន្ន​ (Michele Bachmann) ​ដែរ​ដែល​ជា​ស្ដ្រី​ជា​ទី​និយម​ជាង​គេ​ក្នុង​ចំណោម​អ្នក​អភិរក្ស​សង្គម​ ហើយ​នឹង​ក្រុម​អ្នក​គាំ​ទ្រចលនា​ Tea Party ​ដែល​ជំរុញ​ឲ្យ​មាន​រដ្ឋាភិបាល​តូច​ជាង​មុន។

ក៏​ប៉ុន្ដែ​ក្រុម​អ្នក​វិភាគ​និយាយ​ថា​ ការ​ឈរ​ឈ្មោះ​ប្រជែង​ជា​មួយ​ប្រធានាធិបតី​កាប់​កាប់​អំណាច​មិន​មែន​ជា​ការ​ងាយ​ស្រួល​ទេ​ ជា​ពិសេស​ប្រធានាធិបតី​ដូច​លោក​បារ៉ាក់​អូបាម៉ា ដែល​ពូកែ​អង្គាស​ប្រាក់​នឹង​ធ្វើ​យុទ្ធនាការ។

លោក​ ស្ទេហ្វិន​វេន ​(Stephen Wane) ​ដែល​ជា​សាស្ដ្រាចារ្យ​ខាង​មុខវិជ្ជា​រដ្ឋាភិបាល​នៅ​សាកល​វិទ្យាល័យចច​ថោន​ (Georgetown) ​នៅ​រដ្ឋធានី​វ៉ាស៊ីនតោន​ មាន​ប្រសាសន៍​ថា៖

«ដូច្នេះការ​ប្រជែង​ជា​មួយប្រធានាធិបតី​កាន់​កាប់​អំណាច​ ដែល​អាច​ស្ដារ​ សេដ្ឋកិច្ច​ឡើង​វិញ​ហើយ​នឹងប្រធានាធិបតី​កាន់​កាប់​អំណាច​ដែល​អាច​អង្គាស​ប្រាក់​បាន​យ៉ាង​ច្រើន​ហើយ​គ្មាន​អ្នក​ប្រឆាំង​នៅ​ក្នុង​ជួរ​គណបក្ស​របស់​លោក​ផ្ទាល់​ ដែល​នេះ​ជា​កម្លាំង​យ៉ាង​ខ្លាំង​មហិមា​ហើយ​គ្មាន​អ្នក​ឈរ​ឈ្មោះពិត​ប្រាកដណា​ម្នាក់ចង់​ប្រជែងនៅ​ពេល​នេះ​ទេ​បើ​គេ​អាច​រង់​ចាំ​បួន​ឆ្នាំ​ទៀត​នោះ»។

ក្រុម​ជំនាញ​ការណ៍​ភាគ​ច្រើន​ឃើញ​ថា​លោក​អូបាម៉ា​មាន​ជំហរ​ល្អ​សម្រាប់​ជាប់​ឆ្នោត​ម្ដង​ទៀត​ ក៏​ប៉ុន្ដែមិន​ទាន់​ច្បាស់​លាស់​នៅ​ឡើយ​ទេ។​ អស់​លោក​និយាយ​ថា​ ការដែលលោក​ប្រធានាធិបតី​ជាប់​ឆ្នោត​ម្ដង​ទៀត​សម្រេច​នៅ​លើ​ការ​លូតលាស់​នៃ​សេដ្ឋកិច្ច​ និង​ការ​ងារ​ ហើយ​ថា​ ​ការ​ថយចុះ​ដែល​មិន​អាច​រំពឹង​ទុក​ជា​មុន​អាច​ផ្លាស់​ប្ដូរ​ភ្លាមៗ​នូវ​ឥទ្ធិពល​នយោបាយ​នៅ​ឆ្នាំ​២០១២។

ក្នុង​ពេល​ជា​មួយ​គ្នា​នេះ​សមាជិក​គណបក្ស​សាធារណ:​រដ្ឋ​ខ្លះ​សង្ឃឹម​ថា​នឹង​ទាក់​ទាញ​អ្នក​ឈរ​ឈ្មោះ​ដទៃ​ទៀត​ឲ្យ​ចូល​ប្រជែង​ រួម​មាន​លោក ជែប​ប៊ុស្ស​ (Jeb Bush)​ អតីត​អភិបាលរដ្ឋ​ ហ្វ្លរីដា (Florida) ​ហើយ​នឹង​លលោក​អភិបាល​រដ្ឋ​ញូ​ជើស៊ី​ (New Jersey) ​គ្រីស​គ្រីស្ទី​ (Chris Christie)។​ប៉ុន្ដែ​លោក​ទាំង​ពីរ​នាក់​នេះ​បដិសេធ​ការ​ឈរ​ឈ្មោះ​សម្រាប់​តំណែង​ប្រធានាធិបតី​។

សមាជិក​គណបក្ស​សាធារណ:រដ្ឋ​ដ៏​ល្បី​ឈ្មោះ​ម្នាក់​ ដែល​មិន​បាន​ឲ្យ​សញ្ញា​ ថា​មាន​បំណង​ឈរ​ឈ្មោះ​ គឺ​លោក​ស្រី​ សារ៉ាហ៍​ផេលិន​ (Sarah Palin) ​អតីត​អភិបាលរដ្ឋ​អាឡាស្កា​ (Alaska) ​ដែល​ជា​បេក្ខនារី​សម្រាប់តំណែង​អនុប្រធានាធិបតី​ស.រ.អ.ក្នុងយុទ្ធនាការ​ឃោសនា​ឆ្នាំ២០០៨៕

ប្រែ​សម្រួល​ដោយ កង ស៊ីវន

XS
SM
MD
LG