ភ្ជាប់​ទៅ​គេហទំព័រ​ទាក់ទង

ការ​ប្រើ​ប្រាស់​គ្រាប់​មីន​ក្នុង​ពិភពលោក​​ថយ​ចុះ


លោក Stephen Goose ប្រធាន​និពន្ធ​នាយក​អង្គការ​ឃ្លាំ​មើល​គ្រាប់​មីន (Landmine Monitor)​ ឆ្លើយ​សំណួរ​នៅ​ក្នុង​​សន្និសីទ​សារព័ត៌មាន​អំពី​របាយការណ៍​​ឃ្លាំ​មើល​គ្រាប់​មីន​ 2006 Landmine Monitor Report នៅ​ស្នាក់ការ​អ.ស.ប. ក្នុង​ក្រុង​​ហ្សឺណែវ ប្រទេស​​ស្វ៊ីស​កាល​

សេចក្ដី​រាយការណ៍​ថ្មី​មួយ​បានរក​ឃើញ​ថា មាន​ការ​ជឿន​លឿន​យ៉ាង​ច្រើន​ក្នុង​ការ​ហាម​ប្រាម​ការ​ប្រើ​ និង​ផលិត​គ្រាប់​មីន​សម្លាប់​មនុស្ស។ ទិន្នន័យ​នៅ​ក្នុង​សេចក្ដី​រាយការណ៍​របស់​អង្គការ​ឃ្លាំមើល​គ្រាប់​មីន (Landmine Monitor) ឆ្នាំ២០១០​ បង្ហាញ​ឲ្យ​ឃើញ​ថា​ កាល​ពី​ឆ្នាំ​ទៅ​មាន​ការ​ជឿន​លឿន​គួរ​ឲ្យ​កត់​សម្គាល់​នៅ​ក្នុង​ការ​អនុវត្ដ​សន្ធិសញ្ញា​ស្តីពី​ការ​ហាម​គ្រាប់​មីន (Mine Ban Treaty) ឆ្នាំ​១៩៩៧។

លោក ម៉ាក ហ៊ីហ្សណាយ (Mark Hiznay) អ្នក​ស្រាវ​ជ្រាវ​ជាន់​ខ្ពស់​នៃ​អង្គការ​សិទ្ធិ​មនុស្ស (Human Rights Watch) និយាយ​ថា អង្គការ​នេះ​ភ្ញាក់​ផ្អើល​យ៉ាងខ្លាំង​ដោយ​បាន​ឃើញ​ថា​ ១២​ឆ្នាំ​ក្រោយ​ពី​សន្ធិសញ្ញា​ស្តី​ពី​ការ​ហាម​ប្រាម​គ្រាប់​មីនឆ្នាំ​១៩៩៧​ត្រូវ​បាន​ចរចា​មក កម្រិត​នៃ​សកម្មភាព និង​កម្រិតនៃការប្ដេជ្ញា​ចិត្ដរបស់​ក្រុម​ប្រទេស​ចង់​បំបាត់​អាវុធ​នេះ មាន​សភាព​ខ្លាំង​ក្លា​ដូច​សព្វ​មួយ​ដង។ លោក ម៉ាក ហ៊ីហ្សណាយ ថ្លែង​ថា៖

«អាវុធ​នេះ​នឹង​មិន​ត្រូវ​បាន​កប់​ក្នុង​ដី​ត​ទៅ​ទៀតទេ ។ អាវុធ​នេះ​នឹង​ត្រូវ​ចេញ​មក​ពី​ក្នុង​ដី​វិញ ហើយ​ចំនួន​ជន​រង​គ្រោះកំពុង​តែ​ធ្លាក់​ចុះ ដែល​នេះជា​អ្វី​ដែលយើង​ចង់​បាន​ពី​សន្ធិសញ្ញា​នេះ»។

លោក​ ម៉ាក ហ៊ីហ្សណាយ ​ និយាយ​ថា ការ​ប្រើ​គ្រាប់​មីន​បាន​ចុះ​ថយ​ជា​ច្រើន។ លោក​និយាយ​ថា ប្រទេស​រុស្ស៊ី ត្រូវ​បាន​ដក​ចេញ​ពី​បញ្ជីនៃ​ប្រទេស​ប្រើ​បា្រស់​គ្រាប់​មីននៅ​ឆ្នាំ​នេះ​ ដោយ​ទុក​ឲ្យ​ប្រទេស​ភូមា​ជា​ប្រទេស​តែ​មួយ​គត់​ដែល​មាន​រដ្ឋា​ភិបាល​បន្ត​រាយគ្រាប់​មីន​យ៉ាង​សកម្ម​នៅ​ក្នុង​ដី ។

លោក​និ​យាយ​ថា​ ក្រុម​ប្រដាប់​អាវុធ​មិន​មែន​របស់​រដ្ឋ​នៅ​ក្នុង​ប្រទេស​៦ គឺ​ប្រទេស​អាហ្វហ្កានីស្ថាន​ កូឡុំប៊ី ​ឥណ្ឌា​ ប៉ាគីស្ថាន​ ភូមា​ និង​យេមែន​ បន្ដ​ប្រើ​គ្រាប់​មីន​ត​ទៅ​ទៀត៕

ប្រែ​សម្រួល​ដោយ កង​ ស៊ីវន

XS
SM
MD
LG