អ្នកជំនាញភាគច្រើនយល់ស្របគ្នាថាទំនាក់ទំនងរវាងសហរដ្ឋអាមេរិកនិងទីក្រុងម៉ូស្គូនាពេលបច្ចុប្បន្ននេះមានសភាពប្រសើរជាងទំនាក់ទំនងកាលពីប៉ុន្មានឆ្នាំមុន។
លោកប្រធានាធិបតី បារ៉ាក់ អូបាម៉ា (Brack Obama) បានកំណត់ការធ្វើឲ្យទំនាក់ទំនងប្រសើរឡើងជាមួយប្រទេសរុស្ស៊ីជាមូលដ្ឋានដ៏សំខាន់នៃគោលនយោបាយការបរទេសរបស់លោក។ ភ្លាមៗ បន្ទាប់ពីលោកបានស្បថចូលកាន់តំណែងជាប្រធានាធិបតីកាលពីពីរឆ្នាំមុនលោកបានសន្យាថានឹងកសាងទំនាក់ទំនងជាមួយទីក្រុងម៉ូស្គូឡើងវិញដែលទំនាក់ទំនងនេះមានសភាពតានតឹងនៅក្នុងកំឡុងពេលពីរបីឆ្នាំចុងក្រោយនៃរដ្ឋបាលរបស់លោកប្រធានាធិបតី ប៊ូស។ អ្នកជំនាញជាច្រើននិយាយថាទំនាក់ទំនងរវាងប្រទេសទាំងពីរពិតជាស្ថិតនៅក្នុងសភាពប្រសើរជាងមុន។
ឧត្តមសេនីយ៍ចូលនិវត្តន៍ អាន់ថូនី ហ្សីននី (Anthony Zinni) បានប្រកាន់យកទស្សនៈប្រយ័ត្នប្រយែងជាងមួយដោយលោកបានមានប្រសាសន៍ថាទំនាក់ទំនងរវាងប្រទេសទាំងពីរត្រូវតែធ្វើការគ្រប់គ្រងដោយប្រុងប្រយ័ត្ន។
«ប្រទេសរុស្ស៊ីនឹងក្លាយទៅជាប្រទេសដ៏មានអំណាចសំខាន់មួយ។ ខ្ញុំគិតថាយ៉ាងណាក៏ដោយពួកគេ(ជនជាតិរុស្ស៊ី)នឹងងើបឡើងវិញ។ ពួកគេកំពុងសម្លឹងមើលទីកន្លែងរបស់ពួកគេនៅលើពិភពលោក។ ពួកគេនៅតែមិនសប្បាយចិត្តនៅឡើយចំពោះការបាត់បង់ឥទ្ធិពលនៅក្នុងទ្វីបអឺរ៉ុបខាងកើត និងសូម្បីតែក្នុងភាគខាងត្បូងនៃព្រំដែនរបស់ពួកគេដែលពួកគេបានស្តីបន្ទោសយើងចំពោះការបាត់បង់នេះ។ ខ្ញុំគិតថានេះគឺជាទំនាក់ទំនងមួយដែលត្រូវការធ្វើការងារយ៉ាងច្រើន»។
ចំណែកឯអតីតទីប្រឹក្សាសន្តិសុខជាតិ ប្រែនត៍ ស្កោវក្រូហ្វត៍ (Brent Scowcroft) មានប្រសាសន៍ថា ទីក្រុងម៉ូស្គូនិងទីក្រុងវ៉ាស៊ីនតោនកំពុងចាប់ផ្តើមធ្វើការជាមួយគ្នា។
«ហើយវានឹងជាដំណើរការមួយដ៏យូរអង្វែងនិងយឺតពីព្រោះនៅមានការសង្ស័យជាច្រើនហើយពួកគេនឹងមិនធ្វើអ្វីតាមរបៀបដែលយើងចង់បាននោះទេ។ ហើយពួកគេជាធម្មជាតិមានគំនិតអរិភាពចំពោះយើង។ យើងមិនបានគិតថា អ្នកណាម្នាក់បានចាញ់សង្រ្គាមត្រជាក់នោះទេប៉ុន្តែពួកគេពិតជាគិតផ្សេងពីនេះ។ ដូច្នេះពួកគេនៅតែមានការឈឺចាប់ចំពោះការណ៍ពិតដែលថាពួកយើងងើបចេញពីសង្រ្គាមត្រជាក់ដោយមានលទ្ធផលល្អហើយដំណើរជីវិតទាំងមូលរបស់ពួកគេត្រូវបានបំផ្លាញ។ ដូច្នេះ យើងនៅមានផ្លូវវែងឆ្ងាយទៀតដែលត្រូវទៅប៉ុន្តែខ្ញុំគិតថាយើងកំពុងតែស្ថិតនៅលើផ្លូវត្រូវ»។
អតីតរដ្ឋមន្រ្តីក្រសួងការបរទេស ឡ័រែន អ៊ីហ្គលប៊ឺហ្គឺរ៍ (Lawrence Eagleburger) យល់ឃើញថា រុស្ស៊ីកំពុងតែដើរតួនាទីដ៏ប្រសើរជាងយ៉ាងច្រើនមួយជាអន្តរជាតិ។
«រុស្ស៊ីនាពេលចប្ចុប្បន្ននេះកំពុងតែស្ថិតនៅក្នុងដំណើរការនៃការព្យាយាមដើម្បីក្លាយទៅជាប្រទេសដែលមានអានុភាពខ្លាំងក្លាជាងមុនមួយនៅលើឆាកអន្តរជាតិ។ ហើយអ្នកក៏ត្រូវតែយល់ផងដែរថា ទីក្រុងម៉ូស្គូឥឡូវនេះ រុស្ស៊ីឥឡូវនេះ គឺមិនស្ថិតនៅក្នុងតួនាទីណាមួយដែលស្មើទៅនឹងតួនាទីរបស់អតីតសហភាពសូវៀតនោះទេ។ រុស្ស៊ីនាពេលឥឡូវនេះគឺខ្សោយជាងនិងមានឥទ្ធិពលតិចជាងច្រើនណាស់នៅលើឆាកអន្តរជាតិ។ ហើយឥទ្ធិពលមួយចំនួននៅលើឆាកអន្តរជាតិនិងតួនាទីផ្នែកសេដ្ឋកិច្ចនិងនយោបាយដ៏ខ្លាំងជាងមួយនៅលើពិភពលោកគឺជាអ្វីដែលរុស្ស៊ីកំពុងតែប្រឹងប្រែងយ៉ាងខ្លាំងដើម្បីសម្រេចឲ្យបាន។ ហើយប្រការនេះនឹងបន្តធ្វើឲ្យមានភាពខុសគ្នាមួយចំនួនរវាងប្រទេសយើងទាំងពីរ»។
ក្រុមអ្នកជំនាញនិយាយថាភាគីទាំងពីរបានតភ្ជាប់ភាពខុសគ្នា ខណៈពេលពួកគេបានព្រមព្រៀងគ្នាកាលពីឆ្នាំទៅ ទៅលើសន្ធិសញ្ញាថ្មីមួយក្នុងការកាត់បន្ថយអាវុធបរិមាណូយុទ្ធសាស្រ្តឬដែលបាញ់បានចម្ងាយឆ្ងាយ។
នៅក្នុងការប្រមើលមើលទៅមុខអ្នកជំនាញជាច្រើននិយាយថាទីក្រុងវ៉ាស៊ីនតោននិងទីក្រុងម៉ូស្គូគួរតែធ្វើការកសាងទំនាក់ទំនងដោយផ្អែកទៅលើការរីកចម្រើនដែលត្រូវបានធ្វើឡើងនៅក្នុងឆ្នាំ២០១០។ លទ្ធភាពនៃការចរចាថ្មីទៅលើការគ្រប់គ្រងអាវុធនិងការដាក់ពាក្យសុំរបស់រុស្ស៊ីដើម្បីក្លាយទៅជាសមាជិកម្នាក់នៃអង្គការពាណិជ្ជកម្មពិភពលោកគឺជាបញ្ហាគន្លឹះពីរដែលទីក្រុងវ៉ាស៊ីនតោននិងទីក្រុងម៉ូស្គូកំពុងតែប្រឈមមុខនៅក្នុងកំឡុងពេលប៉ុន្មានខែខាងមុខនេះ៕
ប្រែសម្រួលដោយ ឌី ខាំបូលី
