ភ្ជាប់​ទៅ​គេហទំព័រ​ទាក់ទង

សហគមន៍​ជាតិ​និង​អន្តរជាតិ​សាលក្រម​ឌុច​សញ្ញា​បញ្ចប់​និទណ្ឌភាព


ភ្នំពេញ៖ សហគមន៍​ជាតិ​និង​អន្តរជាតិ​បាន​ហៅ​សាលក្រម​ដាក់​ទោស​អតីត​ប្រធាន​មន្ទីរ​សន្តិសុខ​ស-២១​ កាំង ហ្កេកអ៊ាវ​ ហៅ​ឌុច​ថា​ ជា​ការ​បញ្ចប់​និទណ្ឌភាព​និង​ការ​ផ្តល់​យុត្តិធម៌​ដល់​ប្រជា​ពលរដ្ឋ​ខ្មែរ​ដែល​ទទួល​រងគ្រោះ​ដោយ​ឧក្រិដ្ឋកម្ម​សង្គ្រាម​និង​ឧក្រិដ្ឋកម្មប្រឆាំងមនុស្ស​ជាតិ ​ព្រមទាំង​អំពើ​ឃោរឃៅ​ផ្សេងៗ​ទៀត។

នៅថ្ងៃ​ច័ន្ទនេះ​ បន្ទាប់ពី​តុលាការ​ពិសេស​ខ្មែរ​ក្រហម​បាន​កាត់​ទោស​ឱ្យ​អតីត​ប្រធាន​គុក​ទួល​ស្លែង​ ​កាំង ហ្កេកអ៊ាវ ​ហៅ​ឌុច ជាប់​ពន្ធនាគារ​ចំនួន​១៩ឆ្នាំ​អំពី​ការ​កាប់​សម្លាប់​ប្រជា​ពលរដ្ឋ​ខ្មែរ​ ប្រមាណ​១៤ ០០០​នាក់​ នៅក្នុង​ចុង​ទសវត្សរ៍​១៩៧០​ ​សហគមន៍​ផ្តល់​ជំនួយ​អន្តរជាតិ​ រដ្ឋាភិបាល​ និង​អង្គការ​សង្គម​ស៊ីវិល​បាន​សា្វគមន៍​សាលក្រម​នេះ ដោយ​ចាត់​ទុក​ថា​ ​ជា​ការ​បង្ហាញ​ពី​ការ​បញ្ចប់​និទណ្ឌភាព។

មនុស្ស​ប្រមាណ​១៤០០០នាក់​ត្រូវ​បាន​សម្លាប់​នៅ​មន្ទីរ​សន្តិសុខ​ស-២១ ​ក្រោម​ការ​គ្រប់គ្រង​របស់​ឌុច​ ពីឆ្នាំ​១៩៧៥ ​ដល់ ​ឆ្នាំ​១៩៧៩។ មាន​តែ​មនុស្ស​១២នាក់ ​ប៉ុណ្ណោះ​បាន​រួច​ជីវិត​ពី​មន្ទីរ​សន្តិសុខ​ស-២១​ នេះ។ ​មនុស្ស​ទាំងនេះ​ត្រូវ​បាន​ធ្វើ​ទារុណកម្ម​ ឬ​ប្រហារ​ជីវិត។

លោក​ធន សារ៉ាយ​ ប្រធាន​អង្គការ​សិទ្ធិ​មនុស្ស​ ADHOC ​បាន​ថ្លែង​ថា​ អង្គការ​សង្គម​ស៊ីវិល​អាច​ទទួល​យក​លទ្ធផល​នៃ​ការ​កាត់​ទោស​ឱ្យ​អតីត​ប្រធាន​គុក​ទទួល​ស្លែង​ ឌុច ជាប់​ពន្ធនាគារ​ចំនួន​១៩ឆ្នាំ​ ដែល​ប្រហាក់​ប្រហែល​នឹង​ទោស​ជាប់​ពន្ធនាគា​រ ១ ជីវិត​ ដោយសារ​តែ​ឌុច មាន​អាយុ​៦៧​ឆ្នាំ​ទៅហើយ​ ​ប៉ុន្តែ​អង្គការ​សង្គម​ស៊ីវិល​បាន​សម្តែង​ការ​ខកចិត្ត​ចំពោះ​ការ​សម្រេច​ក្តី​របស់​តុលាការ ​ដែល​មិន​និយាយ​ពី​ករណី​សំណង​រដ្ឋប្ប​វេណី​ជា​សមូហភាព​សម្រាប់​ជន​រងគ្រោះ។

លោក​ខៀវ កាញារិទ្ធ ​រដ្ឋមន្ត្រី​ក្រសួង​ព័ត៌មាន​ និង​ជា​អ្នកនាំពាក្យ​រដ្ឋាភិបាល​ បាន​ថ្លែង​ថា ​រដ្ឋាភិបាល​ បាន​សម្តែង​ការសប្បាយ​រីករាយ​ចំពោះ​លទ្ធផល​នៃ​កា​រកាត់​ទោស​ឌុច​ ហើយ​នេះ​គឺជា​ការ​បង្ហាញ​ពី​លទ្ធផល​នៃ​កិច្ច​សហប្រតិបត្តិការ​ដ៏ល្អ​រវាង​រាជ​រដ្ឋាភិបាលកម្ពុជា​ និង​អង្គការ​សហ​ប្រជាជាតិ​ក្នុងការស្វែងរក​យុត្តិធម៌​ជូន​ប្រជាពល​រដ្ឋខ្មែរ។

«វា​បាន​បង្ហាញ​ថា​ ទីមួយ​គឺការ​ប្តេជ្ញា​ចិត្ត​របស់​រាជ​រដ្ឋាភិបាល​កម្ពុជា ក្នុង​ការ​ស្វែងរក​យុត្តិធម៌​ជូន​ប្រជា​ពលរដ្ឋ​ខ្មែរ ​និង​ទីពីរ​ ​វាបាន​បង្ហាញ​អំពី​កម្រិត​ផ្នែក​វិជ្ជាជីវៈ​របស់​អង្គ​ចៅក្រម​របស់​យើង​ក្នុងការ​ស្វែងរក​យុត្តិធម៌​ជូន​ប្រជាពល​រដ្ឋខ្មែរ»។

សេចក្តីថ្លែងការណ៍​របស់​សហ​ប្រធាន​នៃ​តុលាការ​ខ្មែរក្រហម​ បាន​បញ្ជាក់​ថា​ ​ក្រុម​ប្រទេស​ផ្តល់ជំនួយ​បាន​ស្វាគមន៍​ការ​បញ្ចប់​សវនាការ​លើ​ករណី​កាំង ហ្កេកអ៊ាវ ​ហៅ​ឌុច​ អតីត​ប្រធាន​គុក​ទួល​ស្លែង​នេះ។

លោក​ Jean-Francois Desmazieres ​ឯក​អគ្គ​រដ្ឋទូត​បារាំង​ និង​លោក Masafumi Kuroki ឯក​អគ្គ​រដ្ឋទូត​ជប៉ុន​ប្រចាំ​នៅ​កម្ពុជា​ បាន​បញ្ជាក់​នៅក្នុង​សេចក្តីថ្លែងការណ៍​រួម ដែល​តំណាង​ឱ្យ​ក្រុម​ប្រទេស​ផ្តល់​ជំនួយ​អន្តរជាតិ​ថា​ ​សាលក្រម​នេះផ្តល់​ក្តី​សង្ឃឹម​ថា​ ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា​ នៅ​ទី​ បំផុត​នឹង​បំពេញ​បាន​តាម​ការ​សន្យា​របស់​ខ្លួន​ ក្នុងការ​ធ្វើ​ជា​យាន​ឆ្ពោះ​ទៅរក​យុត្តិធម៌ ​និង​ការបង្រួប​ បង្រួម​ជាតិ​សម្រាប់​ប្រជា​ពលរដ្ឋ​ខ្មែរ​ទាំងអស់​ ហើយ​ម្ចាស់​ជំនួយ​សូម​បញ្ជាក់​សារ​ជាថី​នូវ​ទំនុក​ចិត្ត​ និង​ការ​គាំទ្រ​របស់​ខ្លួន ចំពោះ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា​ ក្នុងការ​ផ្តល់​យុត្តិធម៌​ដល់​ប្រជា​ពលរដ្ឋ​ខ្មែរ​ និង​ជួយ​ប្រទេស​កម្ពុជា​ក្នុង​ការ​ពង្រឹង​ការ​ខិតខំ​របស់​ខ្លួន​ថែមទៀត​ ដើម្បី​នីតិ​រដ្ឋ។

សេចក្តីថ្លែងការណ៍​នេះ​បាន​បន្ត​ថា​ ​ ម្ចាស់​ជំនួយ​ទទួល​ស្គាល់​ការ​ប្តេជ្ញាចិត្ត​របស់​ក្រុម​ចៅក្រម​ជាតិ​ និង អន្តរជាតិ​ ព្រមទាំង​បុគ្គលិក​បម្រើការ​នៅក្នុង​តុលាការ​ខ្មែរ​ក្រហម​ទាំងអស់​ ចំពោះ​ការ​បំពេញ​ការងារ​ បាន​ពេញលេញ ​និង​ដោយ​ឯករាជ្យ​ ដើម្បី​លើក​កម្ពស់​បទដ្ឋាន​នៃ​ច្បាប់​ និង​ដំណើរ​ប្រពឹត្ត​ទៅ​ប្រកប ​ដោយ​ភាព​ត្រឹមត្រូវ។

លោក​ឯកអគ្គ​រដ្ឋទូត​ David Lipman ​ប្រធាន​នៃ​គណៈប្រតិភូ​សហ​ភាព​អឺរ៉ុប​ប្រចាំ​កម្ពុជា​ បាន​ហៅ សាលក្រម​នេះ​ថា ​បាន​ធ្វើឡើង​ស្រប​តាម​បទដ្ឋាន​អន្តរជាតិ។

លោក ​David Lipman ​បា​នថ្លែង​តាម​សម្តី​ដើម​ថា​ ​យើង​គឺជា​អ្នក​គាំទ្រ​ដ៏​រឹងមាំ។ ​យើង​គឺជា​អ្នក​ផ្តល់ ជំនួយ​ហិរញ្ញ​វត្ថុ​ជា​លក្ខណៈ​អន្តរជាតិ​ដ៏​សំខាន់​ដល់​សាលាក្តី​ខ្មែរ​ក្រហម​នេះ។

«នៅ​ពេល​បច្ចុប្បន្ន​នេះ វា​គឺ​សំខាន់​ខ្លាំង​ណាស់ ​នៅក្នុង​ប្រវត្តិសាស្ត្រ​នៃ​ប្រទេស​កម្ពុជា។ ​វា​បង្ហាញ​ថា​ ប្រទេស​កម្ពុជា​កំពុង​ប្រយុទ្ធ​ប្រឆាំង​នឹង​និទណ្ឌភាព​ ហើយ​វា​បង្ហាញ​ពី​ការ​ជ្រើសរើស​យក​យុត្តិធម៌​ និង​ការ​បង្រួប​បង្រួម​ជាតិ»។

លោក​ John E. Johnson អ្នក​នាំពាក្យ​ស្ថានទូត​សហ​រដ្ឋ​អាមេរិក​ប្រចាំ​កម្ពុជា ​បាន​ថ្លែង​តាម​សម្តី​ដើម​ថា​ «យើង​ស្វាគមន៍​ទាំងស្រុងចំពោះ​សេចក្តីថ្លែងការណ៍​រួម​របស់​ក្រុម​ប្រទេស​ផ្តល់​ជំនួយ​អន្តរជាតិ​នេះ»។

លោក​ Donna Guest​ នាយក​រង​នៃ​អង្គការ​សិទ្ធិមនុស្ស​ Amnesty International ​ប្រចាំ​តំបន់​អាស៊ី​-ប៉ាស៊ីហ្វីក​ បាន​និយាយ​នៅក្នុង​សេចក្តី​ថ្លែងការណ៍​ថា​ ​ការ​សម្រេច​ដល់​ការ​កាត់​ទោស​នៅក្នុង​ករណីលេខ​០០១​ ដែល​ត្រូវ​បាន​ធ្វើឡើង​ជា​ករណី​ទីមួយដោយ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា​ គឺ​ជា​បច្ចុប្បន្ន​ភាព​ជា​ប្រវត្តិ​សាស្ត្រ​ ​ប៉ុន្តែ​នៅតែ​ជា​ជំហាន​ទីមួយ​ឆ្ពោះ​ទៅ​រក​យុត្តិធម៌​សម្រាប់​ប្រជា​ពល រដ្ឋ​ជិត​២០០០​០០០នាក់ ​ដែល​ត្រូវ​បាន​សម្លាប់​ជា​លទ្ធផល​នៃ​មហា​ឧក្រិដ្ឋកម្ម​ដែល​បាន​ប្រព្រឹត្ត​ដោយ​របប​ខ្មែរ​ក្រហម។

លោក​ David Tolbert ប្រធាន​មជ្ឈមណ្ឌល​អន្តរជាតិ​សម្រាប់​យុត្តិធម៌​អន្តរ​កាល​ បាន​បញ្ជាក់​នៅក្នុង​ សេចក្តី​ថ្លែង​ការណ៍​ថា​ ​នៅ​ទីបញ្ចប់​ ឌុចត្រូវ​បាន​គេ​ឱ្យ​ទទួល​ខុសត្រូវ​ចំពោះ​អំពើ​ឃោរឃៅ​ព្រៃផ្សៃ​ ផ្សេងៗ​ដែល​គាត់​បាន​ប្រពឹត្ត។​ តាម​ការ​សម្រេច​ក្តី​នេះ​ ​តុលាការ​បាន​បង្ហាញ​ពី​សមត្ថភាព​របស់​ខ្លួន ធ្វើ​បាន​លទ្ធផល​ដ៏​សំខាន់​សម្រាប់​ប្រជា​ពល​រដ្ឋ​កម្ពុជា​ ​ទោះបី​ជា​មាន​ឧបសគ្គ​នានា​ចំពោះ​យុត្តិធម៌​ ដែល​រួម​មាន​ការ​ជ្រៀត​ជ្រែក​ផ្នែក​នយោបាយ​ ​ការ​ចោទ​ប្រកាន់​ពី​អំពើ​ពុករលួយ​ និង​ភាព​មិន​ច្បាស់លាស់​នៃ​មូលនិធិ។

លោក​ Jeremy Browne អនុ​រដ្ឋមន្ត្រី​ការ​បរទេស​អង់គ្លេស ​បាន​ថ្លែង​នៅ​ក្នុង​សេចក្តីថ្លែងការណ៍​ថា​ ​សាលក្រម​នៅ​ទីក្រុង​ភ្នំពេញ​បាន​បញ្ចូន​សារ​ដ៏​ខ្លាំង​មួយ​ ដែល​សហគមន៍​អន្តរជាតិ​ និង​មិន​អនុញ្ញាត ​ឱ្យ​បទ​ឧក្រិដ្ឋកម្ម​ដ៏​ធ្ងន់ធ្ងរ​បែប​នេះ​ប្រព្រឹត្ត​ឡើង​ដោយ​គ្មាន​ទោសទេ​ ​ទោះបី​ជា​ត្រូវ​ចំណាយ​ពេល​ដ៏​យូរ ដើម្បី​នាំ​យក​អ្នក​ប្រព្រឹត្ត​ទៅ​កាត់​ទោស​ក៏​ដោយ៕

XS
SM
MD
LG