សហរដ្ឋអាមេរិក អូស្ត្រាលី ឥណ្ឌា និងជប៉ុនបានប្រកាសវិធានការជាបន្តបន្ទាប់កាលពីថ្ងៃចន្ទ ដើម្បីជំរុញសន្តិសុខដែនសមុទ្រ និងបានសម្តែងការព្រួយបារម្ភអំពីការបំភិតបំភ័យ និងសកម្មភាពដ៏គ្រោះថ្នាក់នៅក្នុងសមុទ្រចិនខាងត្បូង។
រដ្ឋមន្ត្រីការបរទេសជប៉ុនអ្នកស្រី Yoko Kamikawa បានប្រាប់អ្នកយកព័ត៌មានថា សណ្តាប់ធ្នាប់អន្តរជាតិកាន់តែមានភាពមិនប្រាកដប្រជា ចំពេលដែលរុស្ស៊ីបន្តការឈ្លានពានប្រឆាំងនឹងអ៊ុយក្រែន ការបាញ់មីស៊ីលផ្លោងរបស់កូរ៉េខាងជើង និងការប៉ុនប៉ងប្រើប្រាស់កម្លាំងដើម្បីផ្លាស់ប្តូរស្ថានភាពនៅសមុទ្រចិនខាងកើត និងខាងត្បូង។
អ្នកស្រីKamikawa បានថ្លែងដូចនេះស្របពេលជាមួយរដ្ឋមន្ត្រីការបរទេសអាមេរិក លោក Antony Blinken រដ្ឋមន្ត្រីការបរទេសអូស្ត្រាលីអ្នកស្រី Penny Wong និងរដ្ឋមន្ត្រីការបរទេសឥណ្ឌាលោក Subrahmanyam Jaishankar បន្ទាប់ពីរៀបចំទទួលក្រុមមេដឹកនាំទាំងនេះសម្រាប់កិច្ចពិភាក្សានៅទីក្រុងតូក្យូ។
លោកBlinken បាននិយាយថា បន្ថែមពីលើការពង្រឹងសន្តិសុខដែនសមុទ្រ និងសេរីភាពនៃការធ្វើនាវាចរណ៍ ក្រុមប្រទេសទាំងនេះក៏ធ្វើការដើម្បីពង្រឹងសន្តិសុខសម្រាប់ខ្សែកាបក្រោមសមុទ្រសំខាន់ៗ និងសហការលើកិច្ចខិតខំប្រឹងប្រែងសង្គ្រោះគ្រោះមហន្តរាយផងដែរ។
ក្រុមនេះមិនបានលើកឡើងពីឈ្មោះប្រទេសចិនក្នុងការអត្ថាធិប្បាយរបស់ខ្លួនអំពីសន្តិសុខដែនសមុទ្រទេ ប៉ុន្តែសកម្មភាពរបស់ចិនក្នុងតំបន់បាននាំឲ្យមានការស្តីបន្ទោសម្តងហើយម្តងទៀត។
សហរដ្ឋអាមេរិក និងជប៉ុនបានចេញសេចក្តីថ្លែងការណ៍ផ្ទាល់ខ្លួនកាលពីថ្ងៃអាទិត្យដោយចោទប្រកាន់ចិនពី«សកម្មភាពបង្កអស្ថិរភាព»នៅសមុទ្រចិនខាងត្បូង។
អ្នកនាំពាក្យក្រសួងការបរទេសចិន លោក Lin Jian បានឆ្លើយតបកាលពីថ្ងៃចន្ទ ដោយព្រមានសហរដ្ឋអាមេរិក និងជប៉ុនឱ្យ «បញ្ឈប់ការបង្កើតសត្រូវដែលស្រមើស្រមៃ»៕
ព័ត៌មានមួយចំនួនសម្រាប់សេចក្តីរាយការណ៍នេះត្រូវបានផ្តល់ដោយទីភ្នាក់ងារសារព័ត៌មាន Associated Press, Agence France-Presse និង Reuters
