ភ្ជាប់​ទៅ​គេហទំព័រ​ទាក់ទង

ឯកសិទ្ធិ​និង​សម្ពាធ​ជា​ប្រវត្ដិ​​រឿង​ស្នេហា​ក្នុង​ព្រះ​រាជ​វង្សា​នុវង្សអង់គ្លេស


ព្រះ​អង្គ​ម្ចាស់ ​វីលៀម (William) និង​​គូ​ដណ្ដឹង​របស់​ទ្រង់​គឺ​​នាង​ខេត​ មីដឹល​តុន (Kate Middleton) ​ទ្រង់យាង​ចេញ​ពី​ស្ថានទូត​​នៃ​នប្រទេស​នូវែល​ហ្សេឡង់ (New Zealand) នៅ​ទី​ក្រុង​ឡុង​ប្រទេស​អង់គ្លេស​នៅ​ថ្ងៃ​ទី​២៥​ខែ​កុម្ភ: ​ឆ្នាំ​​២០១១​។​

អាពាហ៍​ពិពាហ៍​រវាង​ព្រះ​អង្គ​ម្ចាស់​វីល្លាម (William) នៃ​ប្រទេស​អង់គ្លេស​និង​នាង​ ឃែធើរីន មីដលថុន (Catherine Middleton) នឹង​ត្រូវ​បាន​ប្រារព្ធ​នៅ​ថ្ងៃ​ទី​២៩​ខែ​មេសា​ ដែល​ពិធី​នេះ​ត្រូវ​បានគេ​រំពឹង​ថា មាន​មនុស្ស​រាប់​ពាន់​លាន​នាក់​នៅ​ជុំ​វិញ​ពិភព​លោក​ នឹង​មើល។ ក្រុម​អ្នក​ពិនិត្យ​មើល​បាន​កោត​សរសើរ​ចំពោះ​អនាគត​ព្រះ​អង្គ​ម្ចាស់​ក្សត្រី​ថា​ជាស្ដ្រី​ថ្មី​ម្នាក់​ដ៏​ល្អ​ផូរផង់​សម្រាប់​ព្រះ​រាជ​វង្សា​នុវង្ស។ ទោះ​បី​ជា​ដំណើរជីវិតរបស់​នាង​ ទៅ​កាន់​ព្រះ​បរមរាជវាំង​មិន​រលូន​គ្រប់​ពេល​ក៏​ដោយ​ ឥឡូវ​នេះ​នាង​ប្រឈម​មុខ​នឹង​ឯកសិទ្ធ​ដ៏​អស្ចារ្យ​ដែល​នឹង​មាន​ផ្សាយ​នៅ​ក្នុងព័ត៌មាន​សំខាន់ៗ​ក្នុង​ពិភព​លោក។

កាល​ពី​ខែ​វិច្ឆិកា​មុន​ ព្រះ​អង្គ​ម្ចាស់​វីល្លាម និង​នាង​ ឃែធើរីន មីដលថុន​ បង្ហាញ​ខ្លួន​នៅ​មុខ​ម៉ាស៊ីន​ថត​រូប​ ដើម្បី​ប្រកាស​អំពី​ការ​ភ្ជាប់​ពាក្យ​របស់​ពួក​គេ។​នាង​ដែល​នឹង​ក្លាយ​ទៅ​ជាកូន​ក្រមុំ​ ឆ្លើយ​សំណួរអ្នក​យក​ព័ត៌មាន​ម្នាក់​អំពី​ហេតុ​ដែល​ព្រះ​អង្គ​ម្ចាស់​មិន​បាន​ប្រកាស​ការ​ភ្ជាប់​ពាក្យ​នេះ​ឆាប់​ជាង​នេះ។

«ពិត​ណាស់​ហើយ​ យើង​ទាក់​ទាង​គ្នា​ជា​យូរ​ណាស់​មក​ហើយ។ យើង​បាន​និយាយ​អំពី​អនាគត​របស់​យើង​ ហើយ​វា​ហាក់​ដូច​ជា​ជំហាន​ធម្មតា​របស់យើង​ទាំង​ពីរ​នាក់»។

ប្រវត្ដិ​នៃ​គូ​ស្រករ​នេះ​បាន​ចាប់​ផ្ដើម​កាល​ពី​១០​ឆ្នាំ​មុន​ នៅ​ស្រុក​ ស៊ែន្ត អ៊ែនឌ្រូ (St. Andrews) ប្រទេស​ស្កុតលែន (Scotland) ដែល​នៅ​ទី​នោះ​ ព្រះ​អង្គ​ម្ចាស់​បាន​រៀន​នៅ​សាកលវិទ្យាល័យក្នុង​ឆ្នាំ​២០០១។ នៅ​ទី​នោះ​ហើយ​ ដែល​ទ្រង់​បាន​ជួប​នាង ​ឃែធើរីន មីដលថុន ដែល​ជា​និស្សិត​ដូច​គ្នា។

ក្រុម​អ្នក​សង្កេត​បាន​សន្មត់​ថា ព្រួញ​ស្នេហ៍បានបាញ់​ចំ​ព្រះ​អង្គ​ម្ចាស់​ វីល្លាម ពេល​ទ្រង់​បាន​ទត​ឃើញ​នាង​ឃែធើរីន មីដលថុន ដែល​បង្ហាញ​ម៉ូដសម្លៀក​បំពាក់ ដោយ​ពេល​នោះ​នាង​បាន​ស្លៀក​ពាក់​រ៉ូបស្ដើង​ មើល​ឃើញ​សាច់។​ អ្នក​ទាំង​ពីរ​ក្លាយ​ជា​មិត្ត​ភក្ដិ​នឹងគ្នា​ ហើយ​រស់​នៅ​ជា​មួយ​គ្នាក្នុង​ផ្ទះ​មួយ​ជា​មួយ​និស្សិត​ដទៃ​ទៀត។ គេ​មិន​ដឹង​ច្បាស់​ទេ​ថា​តើ​ទ្រង់ និង​នាង​ចាប់​ចិត្ត​នឹង​គ្នា​ពេល​ណា​ទេ​ ក៏​ប៉ុន្ដែ​លោកស្រី​ លីនដា ខាន្នីងហាម (Linda Cunningham) ម្ចាស់​ហាងកាហ្វេ​ក្នុង​មូលដ្ឋាន​អះអាង​ថា​ ព្រះ​អង្គ​ម្ចាស់ វីល្លាម ចែចង់​អនាគត​គូ​ដណ្ដឹង​របស់​ទ្រង់​ពេល​ទ្រង់​សោយ​នំ​បារាំង​នឹង​កាហ្វេ​ជា​មួយ​នាង។ លោក​ស្រី​ ខាន្នីងហាម និយាយ​ថា​ដំបូង​ឡើង​លោកស្រី​មិន​ជឿ​ទេ។ លោក​ថ្លែង​ថា៖

«នាង​តែង​តែ​ចូល​មក​ជា​មួយ​មិត្ដ​ភក្ដិ​របស់​ទ្រង់​ ហើយ​ទ្រង់​តែង​តែ​យាង​ចូល​មក​ជា​មួយមិត្ដ​ភក្ដិ​របស់​ទ្រង់។ ហេតុ​ដូច្នេះ​ហើយ​ ទ្រង់ និង​នាង​ស្ថិត​នៅ​ក្នុង​អគារ​ជា​មួយ​គ្នា​ ក៏​ប៉ុន្ដែមិន​សូវ​អង្គុយ​ជា​មួយ​គ្នា​ទេ។ បន្ទាប់​មក​ទៀត​ ពេល​យើង​ឮ​ថា​ទ្រង់​ហើយនឹង​នាង​ចាប់​ចិត្ដ​នឹង​គ្នា​នោះ​ យើង​ក៏​មើល​ទៅ​ឃើញ​ដូច្នោះ​មែន»។

ក្រោយ​ពី​បញ្ចប់​ការ​សិក្សា ទ្រង់ និង​នាង​ ក៏​ត្រូវ​បាន​បណ្ដាញ​ផ្សាយ​ព័ត៌មាន​ពិភពលោក​ផ្សព្វផ្សាយ​អំពី​អ្នក​ទាំង​ពីរ​ជា​ថ្មី​ម្ដង​ទៀត។​ ការ​តាម​ថត​របស់​ បណ្ដាញ​ផ្សាយ​ព័ត៌មាន​បាន​ឡើង​ដល់​កម្រិត​កំពូលនៅ​ឆ្នាំ​២០០៧​ នៅ​ពេល​ដែល​ព្រះ​អង្គ​ម្ចាស់​វីល្លាម បាន​ផ្ដាច់​ការ​ទាក់​ទាង​គ្នា​រយ:ពេល​ជា​ច្រើន​ខែ។

ព្រះរាជ​វង្សានុវង្ស​មិន​សូវ​មាន​ទំនាក់​ទំនង​ល្អ​ជាមួយ​នឹង​បណ្តាញ​ព័ត៌មាន​ជា​យូរ​ណាស់​មក​ហើយ ដោយ​សារ​តែ​ព្រះរាជ​មាតា​របស់​ព្រះអង្គ​ម្ចាស់​ វីល្លាម គឺ​ម្ចាស់​ក្សត្រិយ​ ដាអាណា (Diana) ដែល​ទ្រង់​បាន​សោយ​ទី​វង្គត់​នៅ​ក្នុង​គ្រោះ​ថ្នាក់​រថយន្ដ​នៅ​ឆ្នាំ​១៩៩៧​ នៅ​ពេល​ដែល​មាន​អ្នក​ថត​រូប​ជិះ​ម៉ូ​តូ​ដេញ​តាម​ថត។​ ព្រះអង្គ​ម្ចាស់វីល្លាម តាំង​ព្រះទ័យ​ថា នឹង​ការពារ​នាង​ ឃែធើរីន មីដលថុន ពី​ការ​យាយី​ពី​បណ្ដាញ​ផ្សាយ​ព័ត៌មានដែល​ព្រះ​មាតា​របស់​ទ្រង់​បាន​ជួប​ប្រទះ។

ក្រុម​មេធាវី​របស់​ព្រះ​បរម​រាជ​វាំង​ ព្រមាន​អ្នកថត​រូប​ឲ្យ​ថយ​ចេញ​ឆ្ងាយ​ពេល​ពួក​គេ​ចូល​ទៅ​ជិត។ ព្រះអង្គម្ចាស់​ វីល្លាម និងនាង ឃែធើរីន ជួប​គ្នា​វិញ​ ហើយ​នៅ​ខែ​តុលា​ឆ្នាំ​២០១០​ ព្រះ​អង្គ​ម្ចាស់​ វីល្លាម បាន​ស្នើ​សុំរៀប​អាពាហ៍​ពិពាហ៍​ជា​មួយ​នាង​ពេល​ទ្រង់​សម្រាក​វិសមកាល​នៅ​ប្រទេស​កេនយ៉ា​ ដោយ​បាន​ជូន​ព្រះ​ទម្រង់​ភ្ជាប់ពាក្ស​របស់​សព​ព្រះ​មាតា​របស់​ទ្រង់​ទៅ​ឲ្យ​នាង។

នាង ឃែធើរីន ឬ​ព្រះ​អង្គ​ម្ចាស់​ក្សត្រី​ ឃែធើរីន​ ដែល​គេ​នឹង​ត្រូវ​បាន​ស្គាល់​ព្រះនាម​ក្រោយ​អាពាហ៍​ពិពាហ៍​ ហៀប​នឹង​ចូល​ទៅ​ក្នុង​ពិភព​មួយ​ដែលត្រូវ​បាន​ស្គាល់​ថា​ជា​របស់អ្នក​មាន​ឯកសិទ្ធ​មួយ​ចំនួន​តូច​ប៉ុណ្ណោះ។

លោក​ ដ្យូ លីតថល (Joe Little) ជា​និពន្ធ​នាយក​នៃ​ទស្សនាវដ្ដី​ ម៉ាដ្យេស្ទី (Majesty) ដែល​ជា​ទស្សនាវដ្ដី​ សរសេរ​អំពី​ព្រះរាជ​វង្សា​នុវង្ស។ លោកនិយាយ​ថា៖

«ខ្ញុំចង់​ដឹងថា តើ​នាង​អាច​ស្រមៃឃើញ​ថា នាង​មានព្រឹត្ដិការណ៍នេះ​កាល​ដប់​ឆ្នាំ​មុន​ទេ?។ ខ្ញុំ​គិត​ថា​អត់ទេ។ ពិត​មែន​ហើយ មាន​ការ​បែក​បាក់​គ្នា​នៅ​ក្នុង​រឿង​ស្នេហា​ក្នុងព្រះរាជ​វង្សា​នុវង្ស។ ហើយ​ពេល​គេ​ជា​គ្នា​វិញ​ គេ​មាន​ចំណង​ស្នេហ៍​កាន់​តែ​ខ្លាំង​ជាង​មុន។ ខ្ញុំគិត​ថា នាង​ឃែធើរីន​ មាន​ពេល​ប្រកប​ដោយ​មនោរម្មណ៍​ជា​ច្រើន​ ​ហើយពេល​វេលា​បែប​នេះ​សង្ឃឹម​ថា​នឹង​បន្ដ​មាន​ក្នុង​រយ:ពេល​ជា​ច្រើន​ឆ្នាំ​តទៅ។

រឿង​ធំ​បំផុត​ដែល​នាង​ ឃែធើរីន​ ត្រូវ​ប្រឈម​នោះ​គឺ​ការ​ប្រៀប​ធៀប​ដោយ​ជៀស​មិន​ផុត​រវាង​នាង​ និង​ព្រះ​អង្គ​ម្ចាស់​ក្សត្រី​ ដាអាណា។

ម្ចាស់​ក្សត្រី​ ដាអាណា មាន​ព្រះ​ជន្មាយុ​ត្រឹមតែ​២០​ព្រះ​វស្សា​ប៉ុណ្ណោះ​ពេល​ ព្រះ​អង្គ​ម្ចាស់​ក្សត្រី​រៀប​អាពាហ៍​ពិពាហ៍​ជា​មួ​យ​ព្រះ​អង្គ​ម្ចាស់​ ឆាលស៍ (Charles)។ ប្រទេស​អង់​គ្លេស និង​ប្រទេស​ស្ទើរ​តែ​ទាំង​អស់​ក្នុង​ពិភព​លោក​ចាប់​អារម្មណ៍។

នាង​ឃែធើរីន​ ធំ​ដឹង​ក្ដី​នៅ​ក្នុង​គ្រួសារ​មាន​ទ្រព្យ​សម្បត្ដិ។​ ឪពុក​ម្ដាយ​របស់​នាង​ជា​មហាសេដ្ឋី​ដោយ​មាន​មុខរបរ​ខ្លួន​ឯង។ គេ​មាន​គេហទំព័រ​លក់​វត្ថុ​សម្រាប់​ពិធី​ជប់​លៀង​ពី​ផ្ទះ​របស់​គេ​នៅ​ទី​ក្រុង​ឡុងដ៍ភាគ​ខាង​លិច។ ម្ដាយ​របស់​នាង​ ជា​អតីត​អ្នក​ទទួល​ភ្ញៀវ​លើ​យន្ដ​ហោះ​ ហើយ​មាន​គ្រួសារ​ជា​អ្នក​ជីក​រ៉ែ​ធ្យូង​ហើយ​នឹង​ឈ្មួញ​លក់​សាច់។

នៅ​ក្នុង​ប្រទេស​មួយ​ដែល​គិត​អំពី​វណ្ណ:ជា​និច្ច​ មាន​ការ​និយាយ​ច្រើន​អំពី​ការ​ដែល​នារី​មក​ពី​គ្រួសារ​ជា​រាស្ដ្រ​សាមញ្ញ​នឹង​ត្រូវ​រៀប​អាពាហ៍​ពិពាហ៍​ជា​មួយ​ព្រះ​អង្គម្ចាស់។

លោក​ ដ្យូ លីតថល និពន្ធ​នាយក​ទស្សនាវដ្ដី​ម៉ាដ្យេស្ទី​ និយាយថា រឿង​នេះ​នឹង​នាំ​ផល​ប្រយោជន៍​ទៅ​ថ្វាយ​ព្រះ​រាជ​វង្សា​នុវង្ស។

«នាង​ ឃែធើរីន​ គឺ​ជា​ស្ដ្រី​ប្រៀប​បាន​ទៅ​នឹង​ខ្យល់​បរិសុទ្ធ។ ខ្ញុំ​ហ៊ាន​និយាយ​ថា​ មួយ​រយ:​មក​ហើយ​ គ្មាន​ភាព​ស្រស់​បំព្រង​នៅ​ក្នុង​ព្រះ​រាជ​វង្សានុវង្ស​អង់គ្លេស​ទេ ហើយ​យើង​នឹង​មាន​ភាព​ស្រស់​បំព្រង​នេះ»។

ព្រះ​អង្គ​ម្ចាស់​វីល្លាម ស៊ាំ​នឹង​ជីវិត​មួយ​ប្រៀប​បាន​ទៅ​នឹង​ត្រី​ក្រឹម​ដែល​រស់​ក្នុង​កែវ​ មិន​សូវ​មាន​សេរីភាព ក្នុង​ឋាន:​ទ្រង់​ជា​ព្រះ​អង្គ​ម្ចាស់។ ចំពោះនាង​ ឃែធើរីន​ វិញ​ ដំណើរ​ប្រកបដោយ​ឯកសិទ្ធិ​ដ៏​កម្រ​មាន​ និង​សម្ពាធដែល​រង់​ចាំ​នាង​នៅ​ពេល​ខាង​មុខ​នេះ​ ចាប់​ផ្ដើម​ឡើង​បន្ទាប់​ពី​ពិធី​អាពាហ៍​ពិពាហ៍​នេះ​ឯង៕

ប្រែ​សម្រួល​ដោយ​ កង​ ស៊ីវន

XS
SM
MD
LG