លោកប្រធានាធិបតី បារ៉ាក់ អូបាម៉ា មានប្រសាសន៍ថាមេដឹកនាំសភាទាំងពីរគណបក្សចាំបាច់ត្រូវធ្វើការជាមួយលោកដើម្បីសម្រេចឲ្យបានការសម្របសម្រួលដ៏ធំជាងគេបង្អស់ដើម្បីកាត់បន្ថយឱនភាពចំណាយនិងតម្លើងកម្រិតប្រាក់បំណុលរបស់ជាតិ។ លោក អូបាម៉ាបានប្រើសន្និសិទសារព័ត៌មានមួយដើម្បីធ្វើការគាបសង្កត់ទៅលើក្រុមអ្នកតាក់តែងច្បាប់ មុនកិច្ចប្រជុំចរចាគ្នាមួយទៀតនៅសេតវិមាន។
លោក អូបាម៉ាមានប្រសាសន៍ថា លោកនឹងជួបជាមួយមេដឹកនាំសភាសំខាន់ៗជារៀងរាល់ថ្ងៃ រហូតដល់បញ្ហាឱនភាពនិងប្រាក់បំណុលដោះស្រាយរួច។ លោក អូបាម៉ា និយាយថាអ្នកទាំងអស់គ្នានៅតែជឿថា ជាការមិនអាចទទួលយកបានទេដែលថាមិនតម្លើងប្រាក់បំណុលលើសពី១៤កណ្តក់សញ្ញា៣លានលានដុល្លារដែលលោកបន្ថែមថា មានកិច្ចការជាច្រើនដែលនៅមិនទាន់ធ្វើរួច។
លោក អូបាម៉ា បានប្រើសន្និសិទសារព័ត៌មានមួយដើម្បីបញ្ជូនសារនេះទៅក្រុមគណបក្សសាធារណរដ្ឋ។
«ខ្ញុំធ្លាប់បានឮចេញពីមិត្តខាងគណបក្សសាធារណរដ្ឋ អស់មួយរយៈពេលហើយថា វាជាការចាំបាច់ខាងសីលធម៌សម្រាប់យើង ដើម្បីពិនិត្យដោះស្រាយបញ្ហាឱនភាពនិងបំណុលរបស់យើង នៅក្នុងវិធីសាស្ត្រប្រាកដប្រជាមួយ។ ខ្ញុំ ធ្លាប់បានឮពីពួកគេថា នេះជារឿងមួយដែលកំពុងបង្កើតភាពមិនប្រាកដនិងទប់ស្កាត់ការវិនិយោគនៅក្នុងសហគមពាណិជ្ជកម្ម។ ដូច្នេះអ្វីដែលខ្ញុំនិយាយទៅកាន់ពួកគេនោះ គឺយើងត្រូវចាប់ផ្តើមធ្វើហើយ»។
លោក អូបាម៉ា ក៏បានទទួលស្គាល់ដែរអំពីការប្រឆាំងពីគណបក្សប្រជាធិបតេយ្យរបស់លោកចំពោះការពិចារណាឬការរួមបញ្ចូលការផ្លាស់ប្តូរយ៉ាងធំទូលាយហើយឆាប់រហ័សណាមួយដែលហៅថាកម្មវិធីសង្គម ដូចជាប្រាក់សម្រាប់ជួយចេញថ្លៃពេទ្យហៅ Medicare, Medicaid និងប្រាក់សម្រាប់ចូលនិវត្តន៍ហៅ Social Security។
«ខ្ញុំបានត្រៀមខ្លួនទទួលការរិះគន់ពីគណបក្សខ្ញុំដើម្បីសម្រេចការងារឲ្យបាន ហើយខ្ញុំរំពឹងថាភាគីម្ខាងទៀត មានបំណងនឹងធ្វើដូចគ្នាដែរ ប្រសិនបើពួកគេចង់មានន័យដូចអ្វីដែលពួកគេនិយាយនោះ។ រឿងនេះសំខាន់ណាស់»។
លោកប្រធានាធិបតីបានអះអាងថា លោកនិងលោកJohn Boehner ប្រធានសភានៃគណបក្សសាធារណរដ្ឋ ចង់បានកញ្ចប់ថវិកាចាយវាយដ៏ធំមួយ ដែលអាចធ្វើទៅបាន ដែលអាចដោះស្រាយបញ្ហាបំណុលនិងបញ្ហាឱនភាពសម្រាប់រយៈពេលយូរមួយ។ ប៉ុន្តែលោក Boehner បានបោះបង់កិច្ចប្រឹងប្រែងឲ្យបានកញ្ចប់ថវិកាធំជាងនេះដែលទាក់ទិននឹងទឹកប្រាក់ចំនួនច្រើនជាង៤លានលានដុល្លារ ដែលរួមចូលគ្នានូវការកាត់បន្ថយការចំណាយនិងតម្លើងប្រាក់ចំណូល។
នៅវិមានកាពីតូល មុនពេលលោកបានចាកចេញសម្រាប់ធ្វើការចរចាបន្ថែមទៀតនៅឯសេតវិមាននោះ លោក Boehnerបានបង្ហាញនូវ អ្វីដែលលោកបានហៅថា”តំបន់បែងចែក” លើបញ្ហាបំណុលនិងឧនភាពនោះ នៅតែមានធំធេងនៅឡើយ។
«លោកប្រធានាធិបតីបន្តទទូចចង់បានការតម្លើងពន្ធដារ ហើយឥឡូវនេះពួកគេទើបតែចាត់ទុកថាការកែទម្រង់កម្មវិធីជាមូលដ្ឋាន ដើម្បីដោះស្រាយបញ្ហា សម្រាប់អនាគតខ្លីនិងមធ្យម»។
លោក Boehner បានមានប្រសាសន៍ថា លោកយល់ស្របជាមួយលោកប្រធានាធិបតីថាសរអាមិនអាចអនុញ្ញាតឲ្យគ្មានសមត្ថភាពសងបំណុលទេ។ ប៉ុន្តែលោកបានកត់សម្គាល់ថាសភាត្រូវតែអនុម័តលើសេចក្តីព្រាងច្បាប់ណាមួយដើម្បីទប់ស្កាត់ការបាត់បង់សមត្ថភាពនេះ ហើយលោកបាននិយាយថាសំណើរបច្ចុប្បន្ននេះមិនអាចទទួលការអនុម័តពីសភាបានទេ។
លោក អូបាម៉ា បានបញ្ជាក់យ៉ាងច្បាស់លាស់ថាលោកនឹងបន្តជម្រុញឲ្យមានការដោះស្រាយធំបង្អស់ដែលអាចធ្វើទៅបាន ដោយនិយាយថាវាអាចនាំឲ្យងាយស្រួលក្នុងការដោះស្រាយបញ្ហាឧនភាពនិងការទប់ទល់បំណុលដែលនាំឲ្យមានផលចំណេញដល់សេដ្ឋកិច្ច។
ប្រែសម្រួលដោយ នុច សារីតា
