ភ្ជាប់​ទៅ​គេហទំព័រ​ទាក់ទង

ក្រោយ​មរណភាព​របស់​ប៊ិន​ឡាដិន​អ្នក​ខ្លះ​យល់​ថា​ជា​ឱកាស​ប្តូរ​អាទិភាព


រូបភាព​ អូសាម៉ា​ ប៊ិន ​ឡាដិន និង​លោក​ប្រធានាធិបតី​សហរដ្ឋ​អាមេរិក បារ៉ាក់​ អូបាម៉ា ត្រូវ​បាន​បញ្ចាំង​នៅ​លើ​អេក្រង់​មួយ​​នៅ​ក្នុង​ពេល​មាន​ការ​សូត្រ​ធម៌​​មួយ​ឧទ្ទិស​ដល់​មេដឹកនាំ​ក្រុម​អាល់កៃដា​​ដែល​ត្រូវ​បាន​សម្លាប់​រូប​នេះ។ ការ​សូត្រ​ធម៌​នេះ​បាន​ប្រព្រឹត្ត​

មេដឹកនាំ​ភេរវកម្ម​ អូសាម៉ា ប៊ិន ឡាដិន​ ត្រូវ​បាន​សម្លាប់​ ប៉ុន្តែ​អង្គការ​ភេរវកម្ម​របស់​គាត់​អាច​នៅ​តែ​ជា​ការ​គំរាម​កំហែង។ ក្រោយ​ពី​ការ​វាយ​ប្រហារ​ភេរវកម្ម​ថ្ងៃ​ទី១១ ខែ​កញ្ញា ឆ្នាំ​២០០១​មក​សហរដ្ឋ​អាមេរិក​បាន​ផ្លាស់​ប្តូរ​គោលនយោបាយ​ការ​បរទេស​របស់​ខ្លួន​មក​ផ្តោត​ការ​យកចិត្ត​ទុក​ដាក់​លើ​សង្គ្រាម​ប្រឆាំង​អំពើ​ភេរវកម្ម​ខ្លាំង​ជាង​លទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស។

ក្រុម​អ្នក​វិភាគ​បាន​និយាយ​នៅ​ថ្ងៃ​ពុធ​នេះ​ថា សេរីភាព​ស៊ីវិល​និង​សេរីភាព​ជា​មូលដ្ឋាន​នៅ​ទូទាំង​ពិភពលោក​ត្រូវ​បាន​ធ្លាក់​ចុះ​ដោយសារ​ការ​ព្រួយ​បារម្ភ​ផ្នែក​សន្តិសុខ​របស់​អាមេរិក​និង​សម្ព័ន្ធមិត្ត​របស់​ខ្លួន​ក្នុង​រយៈពេល​១០​ឆ្នាំ​កន្លង​មក​នេះ។

ការ​ឆ្លើយ​តប​របស់​រដ្ឋាភិបាល​សហរដ្ឋ​អាមេរិក​ចំពោះ​ការ​វាយ​ប្រហារ​ភេរវកម្ម​នៅ​ថ្ងៃ​ទី​១១​ខែ​កញ្ញា​ឆ្នាំ២០០១​ មាន​ផលវិបាក​អវិជ្ជមាន​សម្រាប់​ចលនា​សិទ្ធិមនុស្ស​នៅ​ទូទាំង​ពិភពលោក។

លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា បាន​ថ្លែងថា សហរដ្ឋ​អាមេរិក​មាន​ដំណើរ​វែង​ឆ្ងាយ​ដើម្បី​ឱ្យ​ទទួល​បាន​អំណាច សីលធម៌​ដែល​បាន​បាត់​បង់​កាល​ពី​១០​ឆ្នាំ​មុន។ លោក អ៊ូ វីរៈ បាន​បន្ត​ថា ចំពោះ​ការ​ស្លាប់​អូសាម៉ា ប៊ិន ឡាដិន ត្រូវ​បាន​សង្ឃឹម​ថា អាមេរិក​យក​ឱកាស​នេះ ដើម្បី​បិទ​ទំព័រ​ព្រឹត្តិការណ៍​ថ្ងៃទី​១១ ខែ​កញ្ញា និង​ផ្តល់​អាទិភាព​ដល់​ការ​គោរព​សិទ្ធិ​មនុស្ស​ សេរីភាព​ស៊ីវិល​ និង​នីតិរដ្ឋ។ លោក អ៊ូ វីរៈ បាន​បន្ថែម​ថា​ អំពើ​ភេរវកម្ម​បាន​ចង​ភ្ជាប់​ទំនាក់​ទំនង​ថ្មី​រវាង​អាមេរិក​និង​កម្ពុជា។ លោក វីរៈ បាន​ប្រាប់​វីអូអេ​ខ្មែរ​ថា៖

«ចាប់​ពី​ថ្ងៃ​ទី១១ ខែ​កញ្ញា​ ឆ្នាំ ២០១១មក អាមេរិក​ព្យាយាម​សហការ​ជាមួយ​រដ្ឋាភិបាល​កម្ពុជា​ដោយ​ផ្តោត​ទៅ​លើ​តែ​រឿង​ភេរវកម្ម ប៉ុន្តែ​គិត​តិច​តួច​អំពី​បញ្ហា​សិទ្ធិ​មនុស្ស។ សហរដ្ឋ​អាមេរិក​បាន​កែ​ប្រែ​គោលនយោបាយ​របស់​ខ្លួន​ចំពោះ​កម្ពុជា ហើយ​មក​ដល់​ពេល​នេះ សហរដ្ឋ​អាមេរិក​សុខចិត្ត​ធ្វើ​ជាមិត្ត​របស់​កម្ពុជា​ក្នុង​ការ​សហការ​ប្រយុទ្ធ​ប្រឆាំង​នឹង​អំពើ​ភេរវកម្ម។ អញ្ចឹង​ហើយ គោលនយោបាយ​ក្នុង​ការ​គាំទ្រ​លទ្ធិប្រជាធិបយ្យេ និង​សិទ្ធិ​មនុស្ស​មាន​ការ​ធ្លាក់​ចុះ»។

លោក​ឈាង វណ្ណារិទ្ធ នាយក​ប្រតិបត្តិ​នៃ​វិទ្យាស្ថាន​ខ្មែរ​សម្រាប់​សហប្រតិបត្តិការ​និង​សន្តិភាព​ បាន​ថ្លែង​ថា ​ទំនាក់ទំនង​អាមេរិក-កម្ពុជា​ត្រូវ​បាន​ពង្រឹង​តាមរយៈ​កិច្ច​ខំប្រឹងប្រែង​ប្រឆាំង​អំពើ​ភេរវកម្ម​ដែល​បាន​ផ្តួចផ្តើម​គំនិត​និង​គាំទ្រ​ដោយ​អាមេរិក។

«សហរដ្ឋ​អាមេរិក​បាន​ជួយ​បច្ចេកទេស​និង​ចំណេះ​ដឹង​ផ្សេងៗ​ដល់​កម្ពុជា​ក្នុង​ការ​ប្រយុទ្ធ​ប្រឆាំង​នឹង​អំពើ​ភេរវកម្ម។ យើង​បាន​បង្កើត​នាយកដ្ឋាន​ប្រឆាំង​អំពើ​ភេរវកម្ម​ដែល​មាន​ការ​គាំទ្រ​ពី​សហរដ្ឋ​អាមេរិក។ ដូច្នេះ ភេរវកម្ម​បាន​ជួយ​ឱ្យ​ទំនាក់​ទំនង​អាមេរិក-កម្ពុជា​ជិត​ស្និទ បន្ទាប់​ពី​ការ​វាយ​ប្រហារ​ភេរវកម្ម​ថ្ងៃទី១១ ខែកញ្ញា ឆ្នាំ២០០១។»

លោក ​ឈាង វណ្ណារិទ្ធ បាន​បន្ត​ថា អាមេរិក​បាន​ចាត់​ទុក​កម្ពុជា​ថា​ជា​ដៃគូ​ដ៏​សំខាន់​ក្នុង​ការ​ប្រយុទ្ធ​ប្រឆាំង​នឹង​អំពើ​ភេរវកម្ម​តាមរយៈ​ការ​គាំទ្រ​សមត្ថភាព និង​បច្ចេកទេស​បូករួម​នឹង​ការ​ចែករំលែក​ព័ត៌មាន​សម្ងាត់។

«ចាប់​ពី​ឆ្នាំ​២០០១​មក យើង​ឃើញ​ថា ភេរវកម្ម​គឺ​ជា​ផ្នែក​មួយ​នៃ​ផលប្រយោជន៍​របស់​អាមេរិក ហើយ​ក៏​ជា​អាទិភាព​មួយ​នៅ​ក្នុង​គោលនយោបាយ​ការ​បរទេស​អាមេរិក។ ប៉ុន្តែ​យើង​ត្រូវ​យល់ថា ចំពោះ​តម្លៃ​នៃ​នយោបាយ​ការ​បរទេស​សហរដ្ឋ​អាមេរិក​នៅ​តែ​ភ្ជាប់​ទៅ​នឹង​ការ​គោរព​សិទ្ធិមនុស្ស។ ​សហរដ្ឋ​អាមេរិក​អនុវត្ត​ទាំងគោលនយោបាយ​ប្រឆាំង​អំពើ​ភេរវកម្ម និង​ការគោរព​សិទ្ធិមនុស្ស។ ចំពោះ​កម្ពុជា សហរដ្ឋអាមេរិក​នៅ​តែផ្តោត​ការ​យក​ចិត្តទុកដាក់​ទាំង​វិស័យ​ប្រឆាំង​អំពើ​ភេរវកម្ម និង​ទាំង​វិស័យ​សិទ្ធិមនុស្ស»។

លោក​សុក សំអឿន នាយក​ប្រតិបត្តិ​នៃ​ក្រុម​អ្នក​ច្បាប់​ការពារ​សិទ្ធិ​កម្ពុជា បាន​ថ្លែង​ថា សហរដ្ឋ​អាមេរិក​អាច​ផ្លាស់​ប្តូរ​ការ​បំពាន​សិទ្ធិមនុស្ស​ក្នុង​រយៈពេល​១០​ឆ្នាំ​កន្លង​មក​នេះ បន្ទាប់​ពីអូសាម៉ា ប៊ិន ឡាដិន ត្រូវ​បាន​សម្លាប់។ លោក សំអឿន ថ្លែង​ដូច្នេះ​ថា៖

«សហរដ្ឋ​អាមេរិក​នឹង​ត្រូវ​តែ​ប្រឹង​ប្រែង​ខ្លួន​ឯង ដើម្បី​បង្ហាញ​ពិភពលោក​អំពី​ភាពជា​គំរូ​សម្រាប់​លទ្ធិ​ប្រជាធិបតេយ្យ និង​ការ​គោរព​សិទ្ធិ​មនុស្ស។ សហរដ្ឋ​អាមេរិក​ត្រូវ​តែ​បង្កើត​បច្ចេកទេស ឬ​វីធិសាស្ត្រ មធ្យោបាយ​ផ្សេងៗ​សម្រាប់​ជនសង្ស័យ​ភេរវករ ឬ​អ្នកទោស ដើម្បី​ជៀស​វាង​ការ​ធ្វើ​ទារុណកម្ម និង​ការ​រំលោភ​សិទ្ធិ​មនុស្ស។ ប៊ិន ឡាដិន​ស្លាប់​ហើយ។ ខ្ញុំ​គិត​ថា សហរដ្ឋ​អាមេរិក​ត្រូវ​ធ្វើ​ការ​កែ​លម្អប្រព័ន្ធ​ប្រតិបត្តិការ​របស់​ខ្លួន។ អាមេរិក​នឹង​មិន​ផ្លាស់​ប្តូរ​គោលនយោបាយ​ការ​បរទេស​របស់​ខ្លួន​ក្នុង​ការ​ប្រយុទ្ធ​ប្រឆាំង​នឹង​អំពើ​ភេរវកម្ម​ទេ​ ពីព្រោះ​ ប៊ិន​ឡាដិន​ បាន​ស្លាប់ ប៉ុន្តែ​អង្គការ​ភេរវកម្ម​របស់​គាត់​មិន​ទាន់​បាន​ស្លាប់​ទាំង​ស្រុង​ទេ»។

ឧត្តមសេនីយ៍ឯក ខៀវ សុភ័គ អ្នក​នាំ​ពាក្យ​ក្រសួង​មហា​ផ្ទៃ បាន​ថ្លែង​ថា ប៊ិន ឡាដិន ​ស្លាប់​ហើយ តែ​អង្គការ​ចាត់​តាំង​របស់​ប៊ិន ឡាដិន ឬ​អង្គការ​ភេរវកម្ម​ទាំងអស់​ក្នុង​សាកល​លោក​មិន​ទាន់​រលាយ​នៅ​ឡើយ។

«ខ្ញុំ​យល់ថា កិច្ច​សហប្រតិបត្តិការ​ពី​មុខ​យើង​នៅ​តែ​ពង្រឹង។ កិច្ច​សហប្រតិបត្តិការ​រវាង​សមត្ថកិច្ច​របស់​យើង​ជាមួយ​សមត្ថកិច្ច​តំបន់ និង​ពិភពលោក​ ជាពិសេស​សហរដ្ឋ​អាមេរិក​ ដើរ​តួនាទី​សំខាន់​ណាស់​ក្នុង​ការ​ប្រយុទ្ធ​ប្រឆាំង​នឹងអំពើ​ភេរវកម្ម​នៅ​ក្នុង​ពិភពលោក។ យើង​ត្រូវ​ប្រុងប្រយ័ត្ន​ចំពោះ​អំពើ​ភេរវកម្ម»។

ឧត្តមសេនីយ៍​ឯក ខៀវ សុភ័គ បាន​បន្ត​ថា កម្ពុជា​បាន​ទទួល​ផលប្រយោជន៍​ច្រើន​ណាស់​ពី​កិច្ច​សហប្រតិបត្តិការ​ប្រឆាំង​អំពើ​ភេរវកម្ម​ជាមួយ​អាមេរិក​ ដូចជា​ការ​កាត់ទោស​ចលនា​កងទ័ព​សេរី​ជាតិ​កម្ពុជា​ដែល​ជា​អង្គការ​ភេរវកម្ម​ដឹកនាំ​ដោយ​ឈុន យ៉ាសិទ្ធិ​ និង​ការ​ចាប់​ខ្លួន​មេភេរវកម្ម​ហាំបាលី។

លោក កុយ គួង អ្នក​នាំ​ពាក្យ​ក្រសួង​ការ​បរទេស​កម្ពុជា បាន​ថ្លែង​ថា​ កម្ពុជា​នៅ​តែ​រក្សា​ទំនាក់ទំនង​និង​កិច្ច​សហប្រតិបត្តិការ​ជាមួយ​អាមេរិក​ក្នុង​ការ​ប្រយុទ្ធ​ប្រឆាំង​នឹង​អំពើ​ភេរវកម្ម​នេះ​ដដែល៕

XS
SM
MD
LG