ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​រដ្ឋ​មន្ត្រី​ការ​បរទេសអាមេរិក​ជួប​មន្ត្រី​កំពូល​កូរ៉េខាង​ជើង​ក្នុង​ទីក្រុង​ញូវយ៉ក​មុន​ជំនួប​កំពូល​រវាង​លោក ត្រាំ ​និង​គីម ​ជុងអ៊ុន


លោក Kim Yong Chol (រូប​កណ្តាល) អញ្ជើញ​ទទួល​ទាន​អាហារ​ពេល​ល្ងាច​ជាមួយ​នឹង​លោក​រដ្ឋមន្ត្រី​ការបរទេស​អាមេរិក Mike Pompeo កាលពី​ថ្ងៃទី៣០ ខែឧសភា ឆ្នាំ២០១៨។

លោករដ្ឋ​មន្ត្រី​ការ​បរទេស​សហរដ្ឋ​អាមេរិក Mike Pompeo ​ត្រូវ​គេ​រំពឹង​នឹង​ជួប​ជាមួយ​ឧត្តមសេនីយ៍​កំពូលខាងជើង​នៅរសៀល​ថ្ងៃ​នេះ​នៅ​ក្នុង​ទីក្រុង​ញូវយ៉ក​សម្រាប់​ការ​ប្រុង​ប្រៀប​រៀប​ចំ​ការ​ចរចា​មុន​ពេលសន្និសីទ​កំពូល​ដែល​គ្រោង​ទុក​រវាង​ប្រធានា​ធិបតី​ដូណាល់ ​ត្រាំ​និង​មេដឹកនាំ​កូរ៉េខាង​ជើង ​គីម ​ជុង​អ៊ុន។

​លោករដ្ឋ​មន្ត្រី​ការ​បរទេស​អាមេរិក​ Pompeo ​នឹង​ជួប​ជាមួយ​លោក Kim Yong Chol ​អនុប្រធាន​គណៈកម្មាធិការ​មជ្ឈឹម​ដ៏​មាន​ឥទ្ធិ​ពល​និង​ជាអតីត​ប្រធាន​ទីភ្នាក់​ងារ​ចារកម្ម។​ លោកទាំង២​បាន​ជួប​គ្នា​២​ដង​រួចហើយ​នៅ​ក្នុង​ទីក្រុង​ព្យុងយ៉ាង។

ក្រសួង​ការបរទេស​សហរដ្ឋ​អាមេរិក​ប្រាប់​ឲ្យ​ដឹងថា ​លោករដ្ឋ​មន្ត្រី​ការ​បរ​ទេស Pompeo ​នឹង​ស្ថិត​នៅ​ទីក្រុង​ញូវយ៉ក​រហូតដល់​ថ្ងៃ​ព្រហស្បតិ៍​ស្អែក​នេះ។ លោក​ទាំង​២អាច​មាន​ពេល​វេលា​ជួប​គ្នា​ច្រើន​ដង។

លោក Jean Lee នាយក​នៃ​កម្មវិធីកូរ៉េ​នៅឯ​មជ្ឈមណ្ឌល Wilson បាន​និយាយ​ ថា​ «លោក Kim Yong Chol ជា​មនុស្ស​ម្នាក់​ដែល​និយាយ​ខ្សឹបដាក់​ត្រចៀកគីម ​ជុងអ៊ុន​បាន។ មិនត្រឹម​តែ​លោក​ផ្តល់​យោបល់​ខាង​យុទ្ធសាស្ត្រ​ដល់​គីម ​ជុង​អ៊ុន​ទេ ក៏​ប៉ុន្តែ ​លោក​ក៏​អាចពាំនាំ​ការចង់​បាន​របស់​គីម ​ជុង​អ៊ុន​មក​ប្រាប់​សហរដ្ឋ​អាមេរិក​បាន។ លោក​នឹង​មកកាន់​ទីក្រុង​ញូវយ៉ក​ដើម្បី​ចរចា​ជំនួស​គីម ជុង​អ៊ុន។ ការណ៍​នេះ​ជា​សញ្ញា​នៃការ​តាំង​ចិត្ត​ដ៏​ខ្លាំង​មួយ​ទៀត​សម្រាប់​សន្និសីទ​កំពូល​នេះ‍»។

​លោក Lee ​អតីត​ប្រធាន​ការិយាល័យ​ទីភ្នាក់​ងារ​ព័ត៌មាន Associated Press ប្រ​ចាំ​ទីក្រុង​ព្យុងយ៉ាង​ប្រាប់ VOA ​ថា ការ​ពិភាក្សា​ដ៏តឹងតែង​មួយ​ត្រូវ​គេ​រំពឹង​នឹង​ធ្វើ​ឡើង​នៅពេល​ដែល​ភាគី​សហរដ្ឋ​អាមេរិក​និង​កូរ៉េខាង​ជើង​ព្យាយាមឲ្យ​មានការ​មូល​មតិ​គ្នា​ចំពោះ​អ្វី​ដែល​មេដឹកនាំ​ទាំង២​នឹង​សម្រេច​នៅឯ​ជំនួប​កំពូល​ដែល​គេ​រំពឹង​ទុក​នេះ៕

XS
SM
MD
LG