ភ្ជាប់​ទៅ​គេហទំព័រ​ទាក់ទង

សមាជិក​សភា​គណបក្ស​ប្រឆាំង​ម្នាក់​នៅ​ប្រទេស​ថៃ​ត្រូវ​ពួក​ជន​ប្រដាប់​អាវុធ​បាញ់


ពួកបាតុករអាវក្រហម​ប្រឆាំងរដ្ឋាភិបាល​ប៉ះទង្គិច​ជាមួយ​កងកម្លាំង​សន្តិសុខ​ នៅក្នុង​ទីក្រុង​បាងកក ប្រទេសថៃ កាលពី​ថ្ងៃ​ទី​៩​ខែ​មេសា​ ឆ្នាំ​២០១០។

ជន​ប្រដាប់​អាវុធ​បាន​ធ្វើ​ឲ្យ​សមាជិក​សភា​គណបក្ស​ប្រឆាំង​ម្នាក់​រងរបួស​នៅ​ក្នុង​ការ​បាញ់​ប្រហារ​ដោយ​ការជិះ​ម៉ូតូនៅក្នុង​រដ្ឋធានី​នៃ​ប្រ​ទេស​ថៃ​ដែល​ពួក​មេដឹកនាំ​គណបក្ស​ប្រឆាំង​និយាយ​ថា​ជំរុញ​ឡើង​ដោយ​រឿង​នយោបាយ។ ការ​វាយ​ប្រហារ​បាន​កើតមាន​ឡើង​នៅ​ពេល​ដែល​ប្រទេស​នោះ​រៀបចំ​ធ្វើ​ការបោះ​ឆ្នោត​ជាតិ​នៅក្នុង​ខែ​មិថុនា។

លោក ​Pracha ​Prasobdee ​សមាជិក​សភា​គណបក្ស​ប្រឆាំង​ថៃ​បាន​ធ្វើ​ដំណើរ​ក្នុង​រថយន្ត​របស់​លោក​នៅ​ខាង​ក្រៅ​រាជធានី​បាងកក​នៅ​ពេល​ដែល​ពួកជន​ប្រដាប់​អាវុធ​ជិះ​ម៉ូតូ​បាន​បើក​ការបាញ់​ប្រហារ​ធ្វើ​ឲ្យ​លោក​រង​របួស។ សេចក្តី​រាយការណ៍​ប្រាប់​ឲ្យ​ដឹង​ថា​ការ​រង​របួស​របស់​លោក​ Bracha ​មិន​គំរាម​កំហែង​ដល់​អាយុ​ជីវិត​ទេ។

ការ​បាញ់​សមាជិក​គណបក្ស​ប្រឆាំង​ភឿថៃបាន​កើតមាន​ឡើង​ភ្លាមៗ​បន្ទាប់ពី​លោក​ Abhisit ​Vejjajiva​ បាន​រំលាយ​សភា​ជាន់ទាប​មុនពេល​ការ​បោះឆ្នោត​ទូទៅ​នៅ​ថ្ងៃ​ទី៣​ខែ​មិថុនា។

អ្នកស្រី​ Naruemol ​Thandamrong​ ដែល​ត្រូវ​ជា​ប្អូនស្រី​របស់​លោក​និង​ជា​សហសេវិក​និង​សមាជិក​សភា​ដែរ​នោះ​ បាន​ប្រាប់​បណ្តាញ​ផ្សាយ​ព័ត៌មាន​ក្នុង​ស្រុក​ថា​ អ្នកស្រី​ជឿជាក់​ថា​ការ​វាយ​ប្រហារ​នេះ​មាន​ជាប់​ទាក់ទិន​និង​នយោបាយ។

ក្នុង​ការបោះឆ្នោត​ថ្ងៃ​ទី​៣​ ខែ​មិថុនា​ ពួក​អ្នក​បោះឆ្នោត​នឹង​ជ្រើសរើស​សមាជិក​សភា​៣៧៥​នាក់​ហើយនឹង​១២៥​ផ្សេង​ទៀត​ នឹង​ត្រូវ​តែងតាំង​ដោយ​គណបក្ស​នយោបាយ​នាៗ​នៅក្នុង​ប្រទេស​នៅក្នុង​ការ​បោះឆ្នោត​មួយ​ដែល​គេ​រំពឹង​ថា​មាន​ការ​ប្រកួត​ប្រជែង​ដ៏​ក្តៅ​គគុក។

គណបក្ស​ភឿថៃ​ បាន​ត្រូវ​គាំទ្រ​ដោយ​អតីត​នាយករដ្ឋ​មន្រ្តី​ Thanksin​ Shinawatra ​ដែល​ត្រូវ​បាន​បណ្តេញ​ចេញពី​តំណែង​នៅ​ឆ្នាំ​២០០៦​ដោយ​រដ្ឋប្រហារ​យោធា។ ក្រោយ​មក​លោក​បាន​ប្រឈមមុខ​ការចោទ​ប្រកាន់​ហើយ​បាន​ត្រូវ​កាត់​ឲ្យ​ជាប់​គុក​រយៈពេល​២​ឆ្នាំ។ លោក​បាន​រត់គេច​ខ្លួន​ចេញ​ពី​ប្រទេស​មុន​ពេល​ការ​ប្រកាស​សាលក្រម​ ក៏ប៉ុន្តែ​ប្រជាប្រីយភាព​របស់​លោក​នៅតែ​មាន​ជា​ដដែល។

លោក ​Chris ​Baker​ ជា​អ្នក​ធ្វើ​អត្ថាធិប្បាយ​និង​អ្នក​និពន្ធ​ស្តីពី​នយោបាយ​ប្រទេស​ថៃ​និយាយ​ថា​អំពើ​ហិង្សា​ខាង​នយោបាយ​ទំនង​ជា​កើនឡើង​មុនពេល​ការ​បោះឆ្នោត​ដូច​ការ​កើន​ឡើង​អំពើ​ហិង្សា​ខាង​ការ​បោះឆ្នោត​កាល​ពីពេល​ថ្មីៗ​នេះ។ លោក​ Baker​ និយាយ​ថា​អំពើ​ហិង្សា​បាន​ឡើង​ខ្ពស់​បំផុត​ក្នុង​ពេល​បោះឆ្នោត​កាល​ពីពេល​ថ្មីៗ​នេះ។

«អំពើ​ហិង្សា​ប្រាកដ​ជាបាន​កើនឡើង​យ៉ាងខ្លាំង​នៅក្រោម​លោក ​Thaksin​ ដែល​ការ​បោះឆ្នោត​បាន​ក្លាយ​ជា​ការ​មាន​សារៈសំខាន់​បំផុត​ហើយ​មនុស្ស​បាន​ចាប់​ផ្តើម​សម្លាប់​គ្នា។ ខ្ញុំ​មិន​គិតថា​យើង​នឹង​មាន​ភាព​ធូស្រាល​ទេ​។ ​យើង​នឹង​ឃើញ​មាន​អំពើហឹង្សា​ច្រើន»។

គណបក្ស​ផឿ​ថៃ​ក៏ត្រូវ​បាន​ទទួល​ការគាំទ្រ​ពី​គណបក្ស​រណៈសិរ្ស​ប្រជាធិបតេយ្យ​ដែល​លម្អៀង​ខាង​លោក​ Thaksin ​ដែល​គេ​ស្គាល់​ថា​ជា​ពួក​អាវ​ក្រហម​ដែល​បាន​ដឹកនាំ​បាតុកម្ម​នៅ​តាម​ផ្លូវ​ក្នុង​ឆ្នាំ​២០០៩​និង​ឆ្នាំ​២០១០​នៅ​ក្នុង​ការ​ប៉ុនប៉ង​មួយ​ដើម្បី​បង្ខំ​រដ្ឋាភិបាល​ Abhisit​ ដែល​កំពុង​កាន់​អំណាច​ឲ្យ​ចេញ​ពី​អំណាច។​ ពួកគេ​ បាន​ចោទ​ប្រកាន់​រដ្ឋាភិបាល​ថា​ខុសច្បាប់​ ពីព្រោះ​តែ​រដ្ឋាភិបាល​នេះ​គាំទ្រ​ដោយ​ពួក​យោធា។ រដ្ឋាភិបាល​បាន​ច្រានចោល​ការ​ចោទ​ប្រកាន់​នេះ៕

ប្រែ​សម្រួល​ដោយ ​ជឹង​ ប៉ូជីន

XS
SM
MD
LG