ភ្ជាប់​ទៅ​គេហទំព័រ​ទាក់ទង

នគរបាល​ជាតិ​តាម​ប្រមាញ់​ប្រធាន​ក្រុមហ៊ុន​ជ្រើសរើស​ពលករ​ទៅ​ធ្វើការ​នៅ​ម៉ាឡេស៊ី


នគរបាល​ជាតិ​តាម​ប្រមាញ់​ប្រធាន​ក្រុមហ៊ុន​ជ្រើសរើស​ពលករ​ទៅ​ធ្វើការ​នៅ​ម៉ាឡេស៊ី

នគរបាល​កំពុង​តាម​ស្វែង​រក​ចាប់​ខ្លួន​លោក​សម​ ពិសី​ នាយក​ក្រុមហ៊ុន​ ធី&ភី​ ខូអិលធីឌី​ (T&P Co., Ltd.) ដែល​ជា​ទីភ្នាក់ងារ​ជ្រើសរើស​ពលករ​កម្ពុជា​ទៅ​បម្រើ​ការងារ​នៅ​ប្រទេស​ម៉ាឡេស៊ី​អំពី​បទ​បង្ខាំង​មនុស្ស​ដោយ​ខុស​ច្បាប់​ បទ​ជ្រើស​រើស​អនីតិជន​ដោយ​ខុស​ច្បាប់​ និង​បទក្លែង​ឯកសារ។

ដីកា​តាម​ចាប់​ខ្លួន​លោក​សម​ ពិសី​នេះ​ បាន​ធ្វើ​ឡើង​បន្ទាប់​ពី​នគរបាល​បានឆ្មក់​ចូល​ទៅ​ក្នុង​ក្រុមហ៊ុន​ធី&ភី​ ខូអិលធីឌី​ នៅ​ក្នុង​ខេត្ត​កំពង់​ឆ្នាំង​កាល​ពី​ចុង​សប្តាហ៍​ ដើម្បី​សង្គ្រោះ​ក្មេង​ស្រី​ក្រោម​អាយុ​១៨​ឆ្នាំ​ចំនួន​៣០​នាក់​ដែល​កំពុង​ទទួល​ការបណ្តុះ​បណ្តាល​ឲ្យ​បម្រើ​ការ​តាម​ផ្ទះ​នៅ​ប្រទេស​ម៉ាឡេស៊ី។

លោក​ឧត្តម​សេនីយ៍​ទោ​ ប៊ិត​ គឹមហុង​ ប្រធាន​នាយកដ្ឋាន​ប្រឆាំង​ការ​ជួញដូរ​មនុស្ស ​និង​ការពារ​អនីតិជន​នៃ​ក្រសួង​មហាផ្ទៃ​បាន​ថ្លែង​ថា ​លោក​បាន​ស្នើសុំ​ទៅ​នាយកដ្ឋាន​អន្តោប្រវេសន៍​ និង​បាន​បញ្ជូន​ដីកា​ទៅ​មន្ត្រី​អន្តោប្រវេសន៍​ច្រក​ទ្វា​ព្រំដែន​ទាំង​អស់​ដើម្បី​ចាប់​ខ្លួន​លោក ​សម​ ពិសី​ តាម​ដីកា​បញ្ជា​ឲ្យ​ចាប់​ខ្លួន​របស់​តុលាការ​ បើ​លោក​ប៉ុនប៉ង​ឆ្លងដែន​ដើម្បី​រត់គេច​ពី​ការ​ចោទប្រកាន់។

លោក​ឧត្តមសេនីយ៍ត្រី ​ជីវ​ ផល្លី ​អនុប្រធាន​នាយកដ្ឋាន​ប្រឆាំង​ការ​ជួញដូរ​មនុស្ស ​និង​ការពារ​អនីតិជន​នៃ​ក្រសួង​មហាផ្ទៃ ​បាន​ថ្លែង​ថា ​លោក​ សម ​ពិសី ​នាយក​ក្រុមហ៊ុន ​ធី​&​ភី ​ខូអិល​ធី​ឌី​នេះ​ត្រូវតែ​ទទួល​ខុស​ត្រូវ​ចំពោះ​មុខ​ច្បាប់​ទាក់ទង​នឹង​ការ​ជ្រើសរើស​អនីតិជន​ ការ​ក្លែង​ឯកសារ​ និង​ការ​បង្ខាំង​មនុស្ស​ដោយ​ខុស​ច្បាប់។

«យើង​សង្ស័យ​ថា​ប្រធាន​ក្រុមហ៊ុន​នេះ​នៅ​ភ្នំពេញ។ ​ប៉ុន្តែ​ឥឡូវ ​យើង​មានដីកា​ហើយ។​ យើង​កំពុង​តែ​តាម​ស្វែងរក​គាត់​ ដើម្បី​នាំខ្លួន​ទៅ​តុលាការ​ ហើយ​ចាត់​ការ​តាម​ផ្លូវ​ច្បាប់។ ​យើង​នឹង​តាម​ប្រមាញ់​គាត់ ​តាម​រក​គាត់ ​មិន​អត់​ឱនឲ្យ​គាត់​រួច​ផុត​ពី​សំណាញ់​ច្បាប់​ទេ។ ​ប៉ុន្តែ​ឥឡូវ ​គាត់​កំពុង​គេច​ខ្លួន។​ អញ្ចឹង​ យើង​កំពុង​តែ​រក​គាត់»។

លោក​ ពេញ​ វិបុល ​ព្រះរាជអាជ្ញា​អម​សាលា​ដំបូង​ខេត្ត​កំពង់ឆ្នាំ ​បាន​ចេញ​ដីកា​បញ្ជា​ឲ្យ​ចូល​ខ្លួន​ចុះ​ថ្ងៃ​ទី​១០​ ខែ​តុលា ​ដោយ​ចោទ​ប្រកាន់​លោក​ សម ​ពិសី ​នាយក​ក្រុមហ៊ុន ​ធី&ភី ​ខូអិលធីឌី​ អំពី​បទ​បង្ខាំង​មនុស្ស​ដោយ​ខុស​ច្បាប់។

លោក​ឧត្តមសេនីយ៍ ​ជីវ ​ផល្លី ​បាន​បញ្ជាក់​តាម​សម្តី​ដើម​ថា៖

«​យើង​កំពុង​សុំ​ទៅ​ព្រះរាជអាជ្ញា ​ដើម្បី​ឲ្យ​ចោទ​ប្រកាន់លោក​ពិសី​ ពី​បទ​ល្មើស​ទៀត​បន្ថែម ​គឺ​បទ​ជ្រើសរើស​អនីតិជន​ដោយ​ខុស​ច្បាប់ ​និង​បទ​ក្លែង​ឯកសារ​ បន្ទាប់​ពី​នគរ​បាល​បាន​រក​ឃើញ»។

លោក​ឧត្តមសេនីយ៍ ​ជីវ​ ផល្លី ​បាន​បន្ត​ថា​ នគរបាល​បាន​ចាប់​ឃុំ​ខ្លួន​ជនសង្ស័យ​បួន​នាក់​ពាក់ព័ន្ធ​នឹង​អំពើ​ខុសច្បាប់​របស់​ក្រុមហ៊ុន​ ធី&ភី ​ខូអិលធីឌី​នេះ ​រួម​មាន​ឈ្មោះ ​ឡុង ​សីណា ​អាយុ ​៣០​ឆ្នាំ ​តំណាង​ក្រុមហ៊ុន​នៅ​មជ្ឈមណ្ឌល​បណ្តុះ​បណ្តាល​ក្នុង​ខេត្ត​កំពង់ឆ្នាំង​ ត្រូវ​បាន​ចោទ​អំពី​បទ​បង្ខាំង​មនុស្ស​ដោយ​ខុស​ច្បាប់​ចំពោះ​ការ​ចាក់​សោរ​ក្មេង​ស្រី​ក្នុង​បន្ទប់ ខណៈ​ដែល​មេ​ខ្យល់​ឈ្មោះ​ ប៉ែន ​សំអាង​ អាយុ​៤៥​ឆ្នាំ​ត្រូវ​បាន​ចោទ​ប្រកាន់​អំពី​បទ​ក្លែង​បន្លំ​ឯកសារ ​និង​មាន​បំណង​បញ្ជូន​មនុស្ស​ឆ្លង​ដែន​ដោយ​ខុស​ច្បាប់។ អ្នក​ស្រី​ ខឹម​ ស្រី ​អាយុ​៤៥​ឆ្នាំ ​និង​អ្នកស្រី ​សឿន​ សី ​អាយុ​៤៤​ឆ្នាំ​ដែល​ជា​ម្តាយ​របស់​អនីតិជន​ពីរ​នាក់​ ក្នុង​ចំណោម​៣០​នាក់ ​ត្រូវ​បាន​ចោទ​ប្រកាន់​អំពី​បទ​ក្លែង​បន្លំ​ឯកសារ​បន្ថែម​អាយុ​កូន​របស់​ខ្លួន។

លោក ​មឿន​ តុលា ​ប្រធាន​ផ្នែក​កម្មវិធី​សិទ្ធិ​ការងារ​នៃ​មជ្ឈមណ្ឌល​ច្បាប់​សម្រាប់​សហគមន៍​បាន​ថ្លែង​ថា​ អាជ្ញាធរ​ត្រូវ​ស្វែងរក​ចាប់​ខ្លួន​អ្នក​ទទួល​ខុស​ត្រូវ​របស់​ក្រុមហ៊ុន​នេះ​មក​ដាក់​ទោស​ឲ្យ​ខាង​តែ​បាន។​ ក្រុមហ៊ុន​នេះ​ត្រូវ​តែ​បិទ​ដើម្បី​ជា​គំរូ​មួយ​ដល់​ក្រុមហ៊ុន​ផ្សេងៗ និង​ជា​ការ​កែប្រែ​មុខ​មាត់​របស់​កម្ពុជា។

«ការ​ជ្រើសរើស​ពលករ​ឲ្យ​ទៅ​ធ្វើ​ការ​នៅ​ប្រទេស​ម៉ាឡេស៊ី​នេះ ​ដោយសារ​តែ​កង្វះ​នៃ​ការ​ការពារ​ និង​កង្វះ​នៃ​ការ​ត្រួតពិនិត្យ​ឲ្យ​ដិតដល់។ យើង​ឃើញ​ថា​ ការ​ជ្រើសរើស​ពលករ​នេះ​ ហាក់​ដូច​ជា​ធ្លាក់​ទៅ​ជា​ទម្រង់​នៃ​ការ​ជួញដូរ​មនុស្ស»។

លោក ​អាន ​ប៊ុនហាក់ ​ប្រធាន​សមាគម​នៃ​ទីភ្នាក់ងារ​ជ្រើសរើស​ពលករ​កម្ពុជា​ បាន​ថ្លែង​ថា​ទង្វើ​ខុស​ច្បាប់​របស់​ក្រុមហ៊ុន​ ធី​&​ភី​ខូអិលធីឌី​នេះ​ អាច​ធ្វើ​ឲ្យ​មាន​ការ​ភ័យខ្លាច​ដល់​ពលករ​ដែល​មាន​បំណង​ទៅ​ធ្វើការ​ក្រៅ​ប្រទេស​តាម​រយៈ​ក្រុមហ៊ុន​ជ្រើសរើស​ពលករ​ផ្សេង​ៗ​ទៀត​ និង​ធ្វើ​ឲ្យ​ប៉ះពាល់​ដល់​ផលប្រយោជន៍​របស់​ក្រុមហ៊ុន​ជ្រើសរើស​ពលករ​ត្រឹមត្រូវ​ដទៃ​ទៀត។

«សមាគម​បាន​ធ្វើ​ការ​ណែនាំ​សឹក​បបូរ​មាត់​ហើយ​អំពី​បញ្ហា​អនីតិជន ​និង​បញ្ហា​បង្ខាំង​មនុស្ស​នេះ។ ក៏​ប៉ុន្តែ​ករណី​នេះ​នៅ​តែ​កើត​ឡើង។ ​ដូច្នេះ​យើង​ពិត​ជា​មាន​ការ​សោកស្តាយ​ចំពោះ​អំពើ​របស់​ក្រុមហ៊ុន​នេះ»។

លោក​ ហូ ​វុទ្ធី​ អនុ​ប្រធាន​នាយកដ្ឋាន​ការងារ​នៃ​ក្រសួង​ការងារ​ បាន​បញ្ជាក់​ថា​ក្រុមហ៊ុន​នេះ​ត្រូវ​បាន​បិទ៕

XS
SM
MD
LG