ស្នងការនគរបាលរាជធានីភ្នំពេញ នៅព្រឹកថ្ងៃព្រហស្បតិ៍នេះ បានឲ្យដឹងថា ក្នុងឆ្នាំ២០១៦ មានការតវ៉ាធ្វើបាតុកម្ម កូដកម្មជិត១៤០០លើក ក្នុងនោះមានកូដកម្មខ្លះមានការគាំទ្រពីអង្គការសង្គមស៊ីវិលដើម្បីផ្តួលរំលំរដ្ឋាភិបាល។ អ្នកដែលត្រូវបានចោទប្រកាន់ថា ជាអ្នកធ្វើការតវ៉ាទាំងនោះ ដូចជាប្រជាពលរដ្ឋ សមាជិកគណបក្សប្រឆាំង និងអង្គការសង្គមស៊ីវិលជាដើមនោះ បានច្រានចោលការចោទប្រកាន់នេះ ហើយថា រដ្ឋាភិបាលព្យាយាមទម្លាក់កំហុសលើពួកគេដើម្បីបិទបាំងអសមត្ថភាពរបស់ខ្លួន។
ក្នុងឆ្នាំ២០១៦មានការតវ៉ា និងធ្វើបាតុកម្មជិត១៤០០លើក ដែលការតវ៉ាខ្លះមានការគាំទ្រពីអង្គការក្រៅរដ្ឋាភិបាល ក្នុងគោលដៅផ្តួលរំលំរដ្ឋាភិបាលស្របច្បាប់។ នេះបើយោងតាមរបាយការណ៍ដែលចេញដោយស្នងការនគរបាលរាជធានីភ្នំពេញ។
របាយការណ៍បូកសរុបសភាពការណ៍ កិច្ចប្រតិបត្តិការ ការងារ រក្សាសន្តិសុខ សណ្តាប់ធ្នាប់សង្គម ឆ្នាំ២០១៦ និងទិសដៅឆ្នាំ២០១៧ ដែលបង្ហាញដោយស្នងការរាជធានីភ្នំពេញ នៅព្រឹកថ្ងៃព្រហស្បតិ៍នេះ សរសេរក្នុងន័យដើមថា៖ «សភាពការណ៍សន្តិសុខមានការប្រែប្រួលស្មុគស្មាញ ក្នុងនោះមានបញ្ហាខ្លះបានជះឥទ្ធិពលដោយផ្ទាល់ ឬដោយប្រយោលដល់រាជធានីភ្នំពេញ ដូចជាការបង្កើតឲ្យមានបដិវត្តន៍ពណ៌ យុទ្ធនាការថ្ងៃច័ន្ទពណ៌ខ្មៅ ដោយមានការគាំទ្រពីអង្គការក្រៅរដ្ឋាភិបាល ក្នុងគោលដៅផ្តួលរំលំរាជរដ្ឋាភិបាលស្របច្បាប់»។
របាយការណ៍នេះបន្តថា ករណីតវ៉ាធ្វើបាតុកម្ម និងកូដកម្មក្នុងឆ្នាំ២០១៦មានចំនួនជិត១៤០០លើក រីឯក្នុងឆ្នាំ២០១៥មាន ៤៤៣លើក។ ក្នុងនោះ ការតវ៉ាទាមទាររបស់កម្មករ កម្មការិនីរោងចក្រក្នុងឆ្នាំ២០១៦មានចំនួន៩៦៦លើក ការធ្វើបាតុកម្ម និងកូដកម្មដោយគណបក្សនយោបាយមានចំនួន៣៥៩លើក និងការធ្វើបាតុកម្មទាមទាររបស់ពលរដ្ឋចំនួន២២១លើក។
របាយការណ៍នោះបញ្ជាក់ថា ការបង្កើតបដិវត្តន៍ពណ៌ និងយុទ្ធនាការថ្ងៃច័ន្ទពណ៌ខ្មៅមានចំនួន៣០លើក ដែលទាមទារឲ្យដោះលែងមន្រ្តីអង្គការសង្គមស៊ីវិល៤នាក់ និងមន្រ្តីគ.ជ.ប. ម្នាក់ ដោយឥតលក្ខខណ្ឌ និងស្រាវជ្រាវរកឃាតករពិតដែលបានបាញ់សម្លាប់លោក កែម ឡី ជាដើម។ របាយការណ៍ដដែលបន្ថែមថា ការតវ៉ាទាមទារទាំងនោះមានការគាំទ្រពីអង្គការក្រៅរដ្ឋាភិបាល ក្នុងគោលដៅផ្តួលរំលំរដ្ឋាភិបាលស្របច្បាប់។
VOA បានព្យាយាមទាក់ទងលោក ជួន សុវណ្ណ ស្នងការនគរបាលរាជធានី និងលោកភួង ម៉ា ឡៃ ស្នងការរងរាជធានីភ្នំពេញ និងលោក គៀត ច័ន្ធថារិទ្ធ អ្នកនាំពាក្យអគ្គស្នងការដ្ឋានប៉ូលិសជាតិ ដើម្បីសុំការអធិប្បាយបន្ថែមលើរបាយការណ៍នេះ តែមិនអាចទាក់ទងបានទេនៅថ្ងៃព្រហស្បតិ៍នេះ។
មន្រ្តីគណបក្សប្រឆាំង មន្រ្តីការពារសិទ្ធិមនុស្ស និងសកម្មជនដីធ្លី បានច្រានចោលរបាយការណ៍ដែលលើកឡើងថា ការតវ៉ាទាមទារដែលកើតមានកន្លងមក មានគោលដៅផ្តួលរំលំរដ្ឋាភិបាល ហើយថា ការលើកឡើងនេះជាលេសបិទបាំងអសមត្ថភាពរបស់រដ្ឋាភិបាលក្នុងការដោះស្រាយបញ្ហាសង្គម។
លោកស្រី មូរ សុខហួរ តំណាងរាស្រ្តគណបក្សសង្គ្រោះជាតិ ប្រាប់ VOA ថា ការតវ៉ារបស់ប្រជាពលរដ្ឋធ្វើឡើងដោយសន្តិវិធី និងស្របតាមច្បាប់រដ្ឋធម្មនុញ្ញ។ ការតវ៉ាទាំងនេះកើតឡើងដោយសាររដ្ឋាភិបាលមិនបានរកដំណោះស្រាយសមស្រប ដូច្នេះប្រជាពលរដ្ឋមានតែតវ៉ាដោយសន្តិវិធីដើម្បីជំរុញឲ្យរដ្ឋាភិបាលដោះស្រាយបញ្ហារបស់ពួកគេ។ លោកស្រីបន្ថែមថា រដ្ឋាភិបាលមិនមានសមត្ថភាព និងគ្មានឆន្ទៈដើម្បីដោះស្រាយបញ្ហាជូនប្រជាពលរដ្ឋបាន ហេតុនេះហើយបានជាបង្កើតរបាយការណ៍នេះដើម្បីចោទប្រកាន់លើពលរដ្ឋខ្លួនឯង។
លោកស្រីមានប្រសាសន៍ថា៖
«ក្នុង១០ឆ្នាំហ្នឹង រាជរដ្ឋាភិបាលបានធ្វើអ្វីដើម្បីដោះស្រាយបញ្ហារបស់ប្រជាពលរដ្ឋដែលគាត់យំស្រែក រហូតចំណាកស្រុក រហូតដល់បាត់បង់ការសិក្សារបស់កុមារា កុមារីទៅទៀត។ តើគួរឲ្យគាត់ធ្វើបាតុកម្មទេ? បើសិនជាគាត់ផ្តួលរលំ តើសញ្ញាអី? អ្នកខ្លះមានតែផ្កាឈូក អ្នកខ្លះត្រឹមតែពាក់អាវពណ៌នេះ ពណ៌នោះ។ ផ្តួលរំលំអី? រដ្ឋាភិបាលខ្លាចស្អី? បញ្ហាតែមួយទេគឺអសមត្ថភាពនៃអ្នកដឹកនាំគ្រប់ជាន់ថ្នាក់ទាំងអស់»។
អ្នកស្រី បូវ សោភា សកម្មជនដីធ្លីនៅតំបន់បឹងកក់ ដែលតែងចូលរួមក្នុងយុទ្ធនាការថ្ងៃច័ន្ទពណ៌ខ្មៅ បានប្រាប់ VOA ថា រដ្ឋាភិបាលបង្កើតរបាយការណ៍នោះមកដើម្បីបិទបាំងកំហុសដែលបានធ្វើចំពោះប្រជាពលរដ្ឋកន្លងមក។ អ្នកស្រីបន្តថា អង្គការសង្គមស៊ីវិលតែងជួយការពារប្រជាពលរដ្ឋឲ្យរួចពីការរំលោភសិទ្ធិមនុស្ស និងការរំលោភដីធ្លីជាដើម មិនមែនគាំទ្រឲ្យមានការផ្តួលរំលំរដ្ឋាភិបាល ដូចការចោទប្រកាន់នោះទេ។
អ្នកស្រីថា៖
«ពេលដែលគាត់និយាយហ្នឹងវាប៉ះពាល់ដល់ប្រទេសជាតិប៉ុណ្ណា? ដែលខ្លួនឯងជាថ្នាក់ដឹកនាំមួយ ជាអាជ្ញាធរមួយ ដែលជាអ្នកការពារប្រទេសជាតិ ដល់ទីបំផុតបែរជាចោទប្រជាពលរដ្ឋខ្លួនឯង ហើយអ្នកដែលជួយប្រជាជនយើង បែរជាគិតថា គេចង់ផ្តួលរំលំរដ្ឋាភិបាល។ បើពួកខ្ញុំមានអាវុធផ្តួលរំលំរដ្ឋាភិបាល មិនមែនប្រជាពលរដ្ឋបឹងកក់ជាង៣ពាន់គ្រួសារត្រូវបានគេយកដីទាំងស្រស់ ហើយដល់ឥឡូវយកដីបឹងកក់យកទៅលក់មួយការ៉េ សុទ្ធតែ៥ពាន់ ទៅ៧ពាន់ដុល្លារ។ សួរថា តើពួកខ្ញុំមានសមត្ថភាពអី?»
លោក អំ សំអាត ប្រធានការិយាល័យបច្ចេកទេសស៊ើបអង្កេតនៃអង្គការការពារសិទ្ធិមនុស្ស លីកាដូ បានប្រាប់ VOA ថា ក្នុងពេលកន្លងប្រជាពលរដ្ឋតវ៉ាទាមទារ និងធ្វើបាតុកម្ម ដោយសារបញ្ហារបស់ពួកគេមិនទទួលបានការដោះស្រាយ។ លោកបន្ថែមថា ប្រជាពលរដ្ឋជាង៩០ភាគរយបានតវ៉ាពាក់ព័ន្ធនឹងបញ្ហារំលោភដីធ្លី។
លោកមានប្រសាសន៍ថា៖
«បញ្ហាដែលតវ៉ាកន្លងមកគ្មានការជ្រោមជ្រែងអីទេ។ បើសិនមិនមានការរំលោភបំពានរឿងដីធ្លីរបស់គាត់ទេ ខ្ញុំជឿថា ពួកគាត់មិនមានការតវ៉ានោះទេ»។
រដ្ឋាភិបាលតែងបង្រ្កាបបាតុករ ដែលទាមទាររកដំណោះស្រាយបញ្ហាសង្គម និងទាមទារឲ្យដោះលែងអ្នកដែលកំពុងជាប់ឃុំមួយចំនួន តាមរយៈការគំរាមកំហែង ការវាយដំ ការចាប់ខ្លួន និងការដាក់ឃុំក្នុងពន្ធនាគារជាដើម៕