ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ ​ហ៊ុន សែន​ ​បន្ត​បេសក​កម្ម​ការ​ទូត​នៅ​ប៉ែក​អឺរ៉ុប​ដែល​មិនទាន់​ទទួល​ស្គាល់​លទ្ធផល​នៃ​ការ​បោះ​ឆ្នោត​នៅ​កម្ពុជា


លោក​នាយករដ្ឋ​មន្ត្រី ហ៊ុន សែន​ចេញ​ដំណើរ​ពី​ប្រទេស​កម្ពុជា​ទៅ​ក្រុង​ប្រ៊ុចសែល​ប្រទេស​ប៊ែលហ្ស៊ិក​ដើម្បី​​ចូល​រួម​កិច្ចប្រជុំអាស៊ី អឺរ៉ុប​កាល​ពី​ពាក់​កណ្តាល​យប់ថ្ងៃទី​១៦​ឈាន​ចូល​ថ្ងៃទី​១៧ ខែ តុលា ឆ្នាំ​ ២០១៨។(រូបភាពពី​ហ្វេសប៊ុក​លោក​ ហ៊ុន សែន)
លោក​នាយករដ្ឋ​មន្ត្រី ហ៊ុន សែន​ចេញ​ដំណើរ​ពី​ប្រទេស​កម្ពុជា​ទៅ​ក្រុង​ប្រ៊ុចសែល​ប្រទេស​ប៊ែលហ្ស៊ិក​ដើម្បី​​ចូល​រួម​កិច្ចប្រជុំអាស៊ី អឺរ៉ុប​កាល​ពី​ពាក់​កណ្តាល​យប់ថ្ងៃទី​១៦​ឈាន​ចូល​ថ្ងៃទី​១៧ ខែ តុលា ឆ្នាំ​ ២០១៨។(រូបភាពពី​ហ្វេសប៊ុក​លោក​ ហ៊ុន សែន)

«ការងារ​យោធា​កូន​ទាហាន​ដើរ​មុខ​មេទា​ហាន​ដើរ​ក្រោយ ឯ​ការងារ​នយោបាយ​វិញ​គឺ​មេដឹកនាំ​ដើរ​មុខ អ្នក​ជំនួយ​ការ​ដើរ​ក្រោយ​វិញ​ ​ហើយ​នេះ​ប៉ះ​លើ​រូប​ខ្ញុំ​តែ​ម្តង ​គឺ​ដើរ​មុខ​ជា​និច្ច។»

​ក្រោយ​បេសក​កម្មការ​ទូត​ដោយ​ផ្ទាល់​នៅ​ទីតាំង​ដ៏​ធំ​បន្ទាប់​ពី​មហាសន្និបាត​អង្គការ​សហ​ប្រជា​ជាតិ​លើក​ទី៧៣ ​ក្នុង​បុរីញូវយ៉ក ដើម្បី​ស្វះស្វែង​រក​ការ​គាំទ្រ​បន្តបន្ទាប់​ពី​សហគមន៍​អន្តរជាតិ ចំពោះ​រដ្ឋាភិបាល​ថ្មី​របស់​កម្ពុជា​ ​លោក​នាយក​រដ្ឋមន្ត្រី​ ​ហ៊ុន សែន​ ​បាន​ប្រឹងប្រែង​មិន​ឈប់ឈរ​ក្នុង​រយៈ​ពេល​ជិត​ ២ខែចុង​ក្រោយ​នេះ ដើម្បី​យក​ជ័យ​ជម្នះ​ផ្នែក​ការ​ទូត​លើ​ឆាក​អន្តរជាតិ ​នៅ​ពេល​ដែល​ក្រុម​ជំទាស់ប្រឹងប្រែង​កៀរគរ​ប្រទេស​ជាច្រើន​មិនឲ្យ​ទទួល​ស្គាល់​រដ្ឋា​ភិបាល​ថ្មី​កើត​ចេញ​ពី​ការ​បោះឆ្នោត​ ​ថ្ងៃទី២៩​ ខែ​កក្កដា ​ឆ្នាំ២០១៨។ ​

លោក​នាយករដ្ឋ​មន្ត្រី​បាន​ដឹកនាំ​គណៈ​ប្រតិភូ​កម្ពុជា​របស់​លោក​ទៅ​កាន់​មហា​សន្និបាតអ.ស.ប​កាល​ពី​ចុង​ខែកញ្ញា និង​ទៅ​ប្រទេស​ជប៉ុន ​ឥណ្ឌូនេ​ស៊ី​ ​ជា​ដើម។​ ​ហើយ​នៅ​ក្នុង​រយៈ​ពីរ​សប្តាហ៍​ខាង​មុខ​នេះ​លោក​នឹង​ដឹកនាំ​គណៈប្រតិភូ​ទៅ​កាន់​សហភាព​អឺរ៉ុប​ចូល​រួម​ក្នុង​កិច្ច​ប្រជុំ​កំពូល​អាស៊ី អឺរ៉ុប ដែល​ជា​វេទិកា​ពិភព​លោកធំ​មួយ​ទៀត។​ ​

​ក្រៅ​ពី​មាន​ដំណើរ​ទស្សន​កិច្ចជា​ផ្លូវ​ការ​ទៅ​កាន់​ប្រទេសតួកគី ​ដើម្បី​រឹត​ចំណង​ទាក់ទង​ការទូត​និង​វិស័យ​ផ្សេងៗ​ទៀត​ក្នុង​លំដាប់​ទ្វេភាគ​ដើម្បី​បង្ហាញ​ថា​ស្ថិត​ក្នុង​សភាព​បែប​ណា​ក៏​ដោយ​ ​រាជ​រដ្ឋា​ភិបាល​ថ្មី​នេះ​មាន​ការ​ពង្រីក​ទំនាក់​ទំនង​ជា​មួយ​ប្រទេស​នា​នា​បន្ថែម​បន្ត​បន្ទាប់។​ ​បន្ថែម​លើ​នេះ ​នាយក​រដ្ឋ​មន្ត្រី​កម្ពុជា​ក៏​មាន​ការ​គម្រោង​ការ​ចូល​រួម​សន្និ​សីទ​ស្តីពី​ពាណិជ្ជកម្ម​ពិភព​លោក​ដែល​រៀបចំ​ដោយ​ ​អ.ស.ប ​ក្នុង​ប្រទេស​ស្វីស​ផង​ដែរ។

ក្នុង​ពេល​ចេញ​ដំណើរ​ពី​ប្រទេស​កម្ពុជា​កាល​ពី​ពាក់​កណ្តាល​យប់​ម្សិល​មិញ ​លោកនាយក​រដ្ឋ​មន្ត្រី​ហ៊ុន សែន​ ​បាន​បង្ហោះ​សារ​តាម​ហ្វេស​ប៊ុក​របស់​លោក​ប្រាប់​ដល់​ជន​រួមជាតិ​អំពី​ដំណើរ​បេសក​កម្មការ​ទូត​និង​គម្រោង​នា​នា​នៅ​ក្រៅ​ប្រទេស​ ចាប់​ផ្តើម​ពី​ក្រុង​ប្រ៊ុចសែល ​ប្រទេស ​ប៊ែលហ្ស៊ិក​ដែល​មាន​កិច្ច​ប្រជុំ​អាស៊ី-អឺរ៉ុប​ ​អំពី​កិច្ច​សហប្រតិ​បត្តិការ​និង​ការ​ដោះស្រាយ​ដោយ​ឈរ​លើផល​ប្រ​យោជន៍​រួម​លើ​បញ្ហាន​យោបាយ​សេដ្ឋ​កិច្ច​និង​បញ្ហា​សង្គម​ជា​ដើម​ដែល​មាន​ដៃ​គូ​ចំនួន​៥៣​ប្រទេស​ចូល​រួម។

«បន្ទាប់​ពី​ប្រជុំ​អាស៊ី​អឺរ៉ុប ខ្ញុំ​នឹង​ធ្វើ​ទស្សនៈ​កិច្ច​នៅ​ប្រទេស​តួកគី ចាប់ពី​ថ្ងៃ​ទី២០ ដល់ថ្ងៃទី ២២ តុលា។ ក្នុង​ថ្ងៃទី ២២ តុលា ដដែល​ខ្ញុំ​នឹង​ត្រូវ​ចេញ​ពី​ប្រទេស​តួកគី មក ទីក្រុង​ហ្សឺណែវ ប្រទេស​ស្វីស​ដើម្បី​ចូលរួម​សន្និសីទ​ស្តីពី​ពាណិជ្ជកម្ម នឹង​មាន​គម្រោង​ចាកចេញ​ពី​ប្រទេស​ស្វីស​នៅ​យប់​ថ្ងៃ​ទី ២៤ តុលា»។

លោក​ ​ហ៊ុន សែន​ ​បាន​សរសេរ​បន្ត​ថា៖​

«ការងារ​យោធា​កូន​ទាហាន​ដើរ​មុខ​មេទា​ហាន​ដើរ​ក្រោយ ឯ​ការងារ​នយោបាយ​វិញ​គឺ​មេដឹកនាំ​ដើរ​មុខ អ្នក​ជំនួយ​ការ​ដើរ​ក្រោយ​វិញ​ ​ហើយ​នេះ​ប៉ះ​លើ​រូប​ខ្ញុំ​តែ​ម្តង ​គឺ​ដើរ​មុខ​ជា​និច្ច។ តើ​នេះ​ជា​ព្រហ្ម​លិខិត​ដែល​តម្រូវ​អោយ​ខ្ញុំ​ធ្វើ​ក្នុង​ជាតិ​នេះ​មែន​ទេ? តែបើ​ទោះជា​ដោយ​មូល​ហេតុណា​ក៏​ដោយ ខ្ញុំត្រូវ​តែ​ធ្វើ​ដើម្បី​សេចក្តី​សុខ និង​ការ​រីកចម្រើន​របស់​ជាតិយើង»។

​លោក​ ហ៊ុន សែន​ ក៏​បាន​បន្ត​ថា​ការងារ​មួយ​ដែល​លោក​ ​មិន​អាច​បោះបង់​ចោល​បាន គឺ​ជួប​បង​ប្អូន​ប្រជា​ជន​ និង​និស្សិត​ខ្មែរ​ដែល​កំពុង​រស់នៅ​និង​រៀន​សូត្រ​នៅ​អឺរ៉ុប​ដែល​ពួក​គេ​កំពុង​រង់​ចាំ​ជួប​លោក​នៅ​ទីនោះ។ ​

«ក្រឡេក​មើល​កម្មវិធី​ការងារ​នៅ​ក្រៅ​ប្រទេស​លើក​នេះ​ពិត​ជា​មមាញឹក​ស្ទើរ​តែ​រក​ពេល​បាយ​មិន​ឃើញ​ប្រជុំ​ផង​ជំនួប​ទ្វេភាគី​ផង តែ​ខ្ញុំ​ពេញ​ចិត្ត​នឹង​ធ្វើ​កិច្ចការ​នេះ​ ព្រោះ​ជា​ប្រយោជន៍​ជាតិ​យើង»។ ​

​ការ​តស៊ូ​លើឆាក​អន្តរជាតិ​ដែល​ជា​កន្លែង​តាន​តឹ​ង​ផ្នែក​ការទូត​ ​នេះ ក្នុង​ពេលស​ហភាពអឺរ៉ុប និង​សហ​រដ្ឋ​អាមេរិក​មិន​ទទួល​ស្គាល់​លទ្ធផលនៃ​ការ​បោះឆ្នោត ហើយ​មាន​ទណ្ឌកម្ម​នា​នា ​បាន​ដាក់​និង​កំពុង​សិក្សា​ដំណាល​គ្នា​ នោះ​ដែល​ក្រុម​ជំទាស់​មិន​ទទួល​ស្គាល់​លទ្ធផល​នៃ​ការ​បោះ​ឆ្នោត​និង​តវ៉ា​ឲ្យ​មាន​ដំណោះ​ស្រាយ​នយោបាយ​ផង​ដែរ។​ ​បេសក​កម្មការ​ទូត​នេះ​ដែរ​គឺ​កើត​ឡើង​ក្នុងពេល​ស្មុគ​ស្មាញ​បំផុត​ដែល ត្រូវគេ​គិតថា​ជាការ បង្ហាញ​ឲ្យ​ដឹង​ថា​កម្ពុជា មាន​មិត្ត​ច្រើន មាន​កិច្ច​ប្រតិបត្តិការ និង​ការ​គាំទ្រ​ច្រើន ហើយ​ក៏ទប់​ស្កាត់​មិនចង់​ឃើញ​ការព្យួរ​ការអនុគ្រោះ​ពន្ធនាំ​ចូល​ផលិតផល​កម្ពុជា​ទាំងអស់​លើក​លែង​តែអាវុធ ដែល​សហភាពអឺរ៉ុប​កំពុង​សិក្សា​ក្រោយ​ពី​មាន​ការធ្លាក់ចុះ​ប្រជាធិប​តេយ្យ​និង​សិទ្ធិ​មនុស្ស​ថ្មីៗ ហើយ​ត្រូវ​គេរិះ​គន់​ថា​មិន​ទាន់​មាន​ការ​ស្តា​ឡើង​វិញ​នោះ។

តែ​ក្រុម​ជំទាស់​បាន​ដាក់​កម្មវិធី​ធ្វើ​បាតុកម្ម​ប្រឆាំង​នឹង​វត្ត​មាន​លោក​នាយករដ្ឋមន្ត្រី ហ៊ុន សែន ក្នុងពេល​លោក​ចូល​រួម​កិច្ចប្រជុំ អាស៊ី អឺរ៉ុប តំណាង​ឲ្យ​កម្ពុជា នៅ​ទីក្រុង​ប្រ៊ុចសែល​ ​នឹងអាច​ធ្វើ​បាតុកម្ម​នៅ​ឯសន្និសីទ​ស្តីពី​ពាណិជ្ជកម្ម​នៅ ទីក្រុង​ហ្សឺណែវ​ប្រទេស​ស្វីស​នៅ​ថ្ងៃ​ទី២៣ ​ដល់​ថ្ងៃ​២៤ ផងដែរ។ ការ​ធ្វើ​ដូច្នេះគឺ​ដើម្បី​ទាមទារ​ឲ្យ​មាន​ការ​ស្តា​ប្រជាធិប​តេយ្យ​ឡើង​វិញ និង រក​បាន​ដំណោះ​ស្រាយ​នយោបាយ​ ​ប្រជាធិប​តេយ្យ និង​ការ​បង្រួប​បង្រួមជាតិ។ ​

យ៉ាង​ណា​ក្រុម​អ្នកគាំ​ទ្រ​លោក​នាយក​រដ្ឋមន្ត្រី​ក៏​រង់ចាំ​ទទួល​ស្វាគមន៍​នឹង​ជួបសំណេះ​សំណាល​ជា​មួយ​គណៈប្រតិភូ​កម្ពុជា​និង​លោក ​ហ៊ុន សែន​ ​ផង​ដែរ។

​លោក​បណ្ឌិត​ ​ឈាង វណ្ណារិទ្ធ​ ​អ្នកវិភាគ​កិច្ចការ​តំបន់​ ​បាន​ថ្លែង​ថា​នេះ​គឺជាភាព​សកម្ម​ខាង​ការទូត​របស់​កម្ពុជា​ជាង​ពេល​មុនៗ​ ​ដើម្បី​ឆ្លើយ​តប​និង​ក្រុម​ជំទាស់​ផង​ ​ពង្រីក​មុខមាត់​កម្ពុជា​លើ​ឆាក​អន្តរជាតិ​ផង​ ​ដើម្បី​កុំ​ឲ្យ​មាន​ការ​ចោទ​ប្រកាន់​ថា​កម្ពុជា​ងាក​ទៅ​រក​ចិន។

​«កម្ពុជា​ចង់​បង្ហាញ​ពី​ត្រូវ​ការ​ពហុនិយម​ ​ហើយ​ក៏​មិន​មែន​ឯកោទេ​»។

លោក​ ​វណ្ណារិទ្ធ​ ​ថ្លែង​ដូច្នេះ​ដោយ​យោង​ថា​មាន​ដំណើរ​ទស្សន​កិច្ច​ច្រើន​និង​កម្មវិធី​វេទិកា​ពិភព​លោក​ច្រើន​ ​ដែល​កម្ពុជា​កំពុង​បង្កើន​ទំនាក់​ទំនង​ ​ដូច​ជា​ ​តួកគី​ ​និង​ហុងគ្រី​ ​ជា​ដើម។

រាជ​រដ្ឋាភិបាល​ថ្មី​របស់​លោក​នាយករដ្ឋ​មន្ត្រី ​ហ៊ុន សែន​ ​ប្រឈម​មុខ​នឹង​បញ្ហាភាព​ស្រប​ច្បាប់​ទោះ​ជា​មាន​ប្រទេស​ជា​ច្រើន​បាន​ទទួល​ស្គាល់​ជា​បណ្តើរៗ​ក្តី។ មេដឹក​នាំ​កម្ពុជា​និង​បក្សកាន់​អំណាច​ធ្លាប់​បាន​បញ្ជាក់​ថា​ខ្លួន​មិន​ខ្វល់​នឹង​ការ​ទទួល​ស្គាល់​ឬ​មិន​ទទួល​ស្គាល់​របស់​អន្តរជាតិ​នោះទេ។

​ការ​តស៊ូមតិ​នៅ​ក្នុង​សហភាព​អឺរ៉ុប​និង​បណ្តា​ប្រ​ទេស​ជា​ច្រើន​ទៀត​របស់​ក្រុម​ជំទាស់​នេះ​គឺ​ ​ជា​ការ​ឆ្លើយ​តប​នឹង​ការ​រំលាយគណ​បក្ស​ជំទាស់​សង្គ្រោះ​ជាតិ​ ​មុន​ការ​បោះ​ឆ្នោត មេដឹកនាំ​ក្រុម​ជំទាស់​រង​ការ​ចោទ​ប្រកាន់​និង​ ឃុំខ្លួន​ហើយ​នឹង​ត្រូវ​បាន​ដក​សិទ្ធ​ធ្វើ​នយោ​បាយ​ជា​ដើម។​ ​រឿង​នេះ​បណ្តាល​ឲ្យ​សហ​ភាព​អឺរ៉ុប​កំពុង​ពិចារ​ណាព្យួរ​ការ​អនុគ្រោះ​ពន្ធនាំ​ចូល​ ​ខណៈ​សហ​រដ្ឋ​អាមេរិក​កំពុង​ពិចារ​ណា​ដាក់​ទណ្ឌកម្ម​ផ្សេងៗ​ទៀត​ដែរ ​បន្ថែម​ពី​លើ​ការ​រឹត​ត្បិត​ទិដ្ឋា​ការ​និង​បង្កក​ទ្រព្យ​សម្បត្តិ​ដល់​មន្ត្រី​កម្ពុជា​និង​បុគ្គល​មួយ​ចំនួន៕

XS
SM
MD
LG