វ៉ាស៊ីនតោន៖ សកម្មភាពប្លន់រថយន្តក្រុងមួយគ្រឿងដែលផ្ទុកទេសចរណ៍ហុងកុង កាលពីខែមុន នៅក្នុងទីក្រុងម៉ានីឡា (Manila) បានជំរុញឲ្យមានការលុបចោលការស្នាក់នៅសណ្ឋាគារជាច្រើនពាសពេញប្រទេសហ្វីលីពីន។ Ira Mellman នៃវីអូអេរាយការណ៍ថា កោះរមណីយដ្ឋានដ៏មានប្រជាប្រិយភាពមួយកន្លែងបានទទួលរងផលប៉ះពាល់ដ៏ធ្ងន់ធ្ងរបំផុត។
រលកសមុទ្រពណ៌ខៀវបន្តបោកបក់ទៅលើឆ្នេរខ្សាច់ពណ៌ស ដែលនៅតែស្រស់ស្អាតនៅកោះបូរ៉ាខេ (Boracay) នៃប្រទេសហ្វីលីពីន ដែលស្ថិតនៅចម្ងាយប្រហែល៣៤៥គីឡូម៉ែត្រ ភាគខាងត្បូងរដ្ឋធានីម៉ានីឡា។
ប៉ុន្តែ ឥឡូវនេះ កៅអីអង្គុយលេង និងកៅអីសម្រាប់ទម្រេតខ្លួនជាច្រើន នៅតាមឆ្នេរសមុទ្រ គ្មានមនុស្សអង្គុយទេ បន្ទាប់ពីអតីតមន្ត្រីប៉ូលីសម្នាក់របស់ប្រទេសហ្វីលីពីនបានប្លន់រថយន្តក្រុងមួយគ្រឿង ដែលដឹកទេសចរហុងកុង នៅក្នុងទីក្រុងម៉ានីឡា កាលពីថ្ងៃទី២៣ ខែសីហា។ ទេសចរចំនួន៨នាក់ត្រូវបានសម្លាប់។
ការផ្សព្វផ្សាយជាសាធារណៈស្តីពីទង្វើនោះ និងការសម្រេចចិត្តរបស់រដ្ឋាភិបាលក្រុងហុងកុង ក្នុងការព្រមានការដំណើរទៅកាន់ហ្វីលីពីន បានជះឥទ្ធិពលយ៉ាងខ្លាំងទៅលើវិស័យទេសចរទាំងអស់របស់ប្រទេសនេះ។ ពីរថ្ងៃបន្ទាប់ពីមានការចាប់ចំណាប់ខ្មាំង ការកក់បន្ទប់ចំនួន៨០០ត្រូវបានលុបចោលវិញ នៅសណ្ឋាគារទាំងឡាយនៅកោះបូរ៉ាខេ (Boracay) តែមួយប៉ុណ្ណោះ។
កាលពីឆ្នាំមុន កោះបូរ៉ាខេបានទទួលស្វាគមន៍ទេសចរចំនួន៦៥ម៉ឺននាក់។ ក្រុមទេសចរមកពីប្រទេសចិនមានចំនួន១៨ភាគរយនៃចំនួននេះ។ លោកម័រហ្គែន វូ (Morgan Wu) ស្ថិតក្នុងចំណោមអ្នកដែលបានធ្វើដំណើរចេញពីតៃវ៉ាន់។ លោកថ្លែងថា៖
«តាមពិត ខ្ញុំមានអារម្មណ៍ខ្លាចបន្តិចដែរ នឹងការមកកាន់ទីនេះ»។
MGM គឺជារមណីយដ្ឋានមួយកន្លែង ដែលរកកល់ដួលរលំដោយសារតែគ្មានអតិថិជន។ ក្រុមទេសចរមកពីប្រទេសចិនមានចំនួនពាក់កណ្តាលនៃមុខរបរទាំងមូល។ ក្រុមទេសចរមកពីក្រុងហុងកុងមានចំនួន៧ភាគរយ។ លោកអេឌវីន រ៉េមុនដូ (Edwin Raymundo) ជាអ្នកគ្រប់គ្រងទូទៅនៃសណ្ឋាគារនោះ។ លោករ៉េមុនដូ បន្តថា៖
«ជាការពិតណាស់ មានផលប៉ះពាល់មែន ដោយសារតែយើងក៏មានទទួលការកក់នៅឯការិយាល័យក្នុងក្រុងម៉ានីឡា ហើយការិយាល័យទាំងនោះទទួលបន្ទុកការកក់ទាំងអស់ ហើយការិយាល័យនោះរាយការណ៍មកខ្ញុំថា មានការលុបចោលមួយចំនួន ដោយសារតែឧបទ្ទវហេតុនេះ»។
លោករ៉េមុនដូ មានប្រសាសន៍ថា នៅមានក្រុមទេសចរខ្លះ បានហូរចូលមកពីប្រទេសចិន ប៉ុន្តែ ការធ្វើជំនួញមកពីខាងទីក្រុងហុងកុងត្រូវជាប់គាំងទាំងស្រុងតែម្តង។ លោកថ្លែងថា៖
«ខ្ញុំបន់ស្រន់សូមឲ្យឧបទ្ទវហេតុនេះផុតរលត់ទៅ ហើយឧបទ្ទវហេតុនេះនឹងមិនអូសបន្លាយពេលយូរជាងនេះទេ។ ហើយទំនាក់ទំនងរវាងប្រទេសយើង និងក្រុងហុងកុងនឹងស្ថិតនៅដដែល»។
ទេសចរមួយចំនួន និយាយថា ប្រតិកម្មចំពោះឧបទ្ទវហេតុចាប់ចំណាប់ខ្មាំងត្រូវបាននិយាយពន្លើស។ លោក ខាឡូស ណាហ្សារីណូ (Carlos Nazarino) ជាអ្នកព័ត៌មានវិទ្យា មកពីក្រុងម៉ានីឡា។ លោក ណាហ្សារីណូ មានប្រសាសន៍ថា៖
«ឧបទ្ទវហេតុនេះពិតជាអាក្រក់ណាស់ ដោយសារតែមានរឿងមួយកើតឡើង ដោយសារតែមនុស្សម្នាក់នេះបានប្រព្រឹត្តរឿងនោះឡើង។ ឧបទ្ទវហេតុនេះបានប៉ះពាល់ដល់មនុស្សជាច្រើន»។
ស្តេហ្វានី (Stephanie) ដែលជាទេសចរណ៍មកពីប្រទេសអាឡឺម៉ង់ បានថ្លែងថា៖
«ហ្វីលីពីនមិនមែនជាប្រទេសដ៏គ្រោះថ្នាក់នោះទេ។ វាជាប្រទេសដ៏ល្អ និងមានប្រជាពលរដ្ឋយ៉ាងសុភាពរាបសារ។ ប៉ុន្តែ អ្នកដឹងទេថា អ្វីដែលបានកើតឡើង នាពេលឥឡូវនេះ ជាចំណុចផ្តោតការយកចិត្តទុកដាក់ ហើយមនុស្សគ្រប់រូបកំពុងនិយាយអំពីរឿងនេះ។ ប៉ុន្តែខ្ញុំយល់ថាអ្វីៗនឹងត្រូវផ្លាស់ប្តូរ»។
អជ្ញាធរទេសចរកំពុងព្យាយាមធ្វើកិច្ចការនោះហើយ ដោយនិយាយថា ពួកគេនឹងបើកយុទ្ធនាការផ្សព្វផ្សាយយ៉ាងធំមួយ ដើម្បីស្តារមុខមាត់ហ្វីលីពីនឡើងវិញ ព្រមទាំងធ្វើការបង្កើនថវិកាដើម្បីទាក់ទាញទេសចរមកវិញ៕
ប្រែសម្រួលដោយ លី សុខឃាង
