ប្រធានាធិបតីហ្វីលីពីនលោក Rodrigo Duterte បានសន្យាការពារអធិបតេយ្យភាពដែនសមុទ្ររបស់ប្រទេសហ្វីលីពីន នៅក្នុងជំនួបជាមួយឯកអគ្គរដ្ឋទូតចិន។ នេះបើតាមការបញ្ជាក់របស់អ្នកនាំពាក្យរបស់លោកនៅថ្ងៃព្រហស្បត៍នេះ។
ការសន្យារបស់លោក Duterte នេះបានធ្វើឡើង ស្របពេលដែលមានការព្រួយបារម្ភពីអន្តរជាតិកើនឡើង អំពីវត្តមាននាវាដ៏ច្រើនរបស់ចិននៅក្នុងសមុទ្រចិនខាងត្បូង។
ប្រទេសហ្វីលីពីន បានប្រឆាំងនឹង«វត្តមានដ៏ណែនណាន់តាន់តាប់និងមានលក្ខណៈគំរាមកំហែង» របស់នាវាជាង ២០០ គ្រឿង ដែលហ្វីលីពីនជឿថា ត្រូវបានបញ្ជាដោយកងជីវពលដែនសមុទ្រ ដែលបានចតនៅតំបន់ថ្មប៉ប្រះទឹក Whitsun Reef នៅក្នុងរង្វង់តំបន់សេដ្ឋកិច្ចផ្ដាច់មុខរបស់ប្រទេសហ្វីលីពីន។
លោក Harry Roque អ្នកនាំពាក្យលោកប្រធានាធិបតី Duterte បានបញ្ជាក់នៅក្នុងសន្និសីទកាសែតថា៖ «លោកប្រធានាធិបតីបាននិយាយថា យើងពិតជាមានការព្រួយបារម្ភ។ ប្រទេសណាក៏ដោយក៏ព្រួយបារម្ភដែរ នៅពេលឃើញវត្តមាននាវាដ៏ច្រើនបែបនេះ»។
សហរដ្ឋអាមេរិក ប្រទេសជប៉ុន និងកាណាដា ក៏បានសម្តែងនូវការភ្ញាក់ផ្អើលផងដែរអំពីនាវារបស់ចិនទាំងនេះ។
លោក Roque បាននិយាយថា លោក Duterte បានបញ្ជាក់ឡើងវិញចំពោះឯកអគ្គរដ្ឋទូតចិនលោក Huang Xilian ថា ប្រទេសហ្វីលីពីន បានឈ្នះរឿងក្តីជាប្រវត្តិសាស្ត្រនៅក្នុងឆ្នាំ ២០១៦ ដែលបានបង្ហាញយ៉ាងច្បាស់អំពីសិទ្ធិអធិបតេយ្យរបស់ខ្លួនលើតំបន់ទាំងនោះ៕
