អស់រយៈពេលជិត២សប្តាហ៍បន្ទាប់ពីការកាត់ឲ្យ Dzhokhar Tsarnaev ជាប់ទោសពីការបំផ្ទុះគ្រាប់បែកនៃការរត់ប្រណាំង Marathon ដ៏ប្រល័យនៅឆ្នាំ២០១៣ក្នុងទីក្រុង Boston គណៈវិនិច្ឆ័យសហព័ន្ធនឹងវិលត្រឡប់មកធ្វើការងារវិញនៅថ្ងៃអង្គារ ដើម្បីសម្រេចថាតើនឹងកាត់ទោសប្រហារជីវិតឬកាត់ទោសឲ្យជាប់គុកអស់មួយជីវិត។
រដ្ឋអាជ្ញាកំពុងស្វះស្វែងដាក់ទោសប្រហារជីវិតប្រឆាំងនឹងជនអន្តោប្រវេសន៍ជាតិឆេឆេនី អាយុ២១ឆ្នាំ ចំពោះការស្លាប់មនុស្ស៣នាក់នៅក្នុងការបំផ្ទុះគ្រាប់បែក ដែលបានកើតមានឡើងនៅកន្លែងផ្តាច់ព្រ័ត្រនៃការរត់ប្រណាំង។ ក៏ប៉ុន្តែឪពុកម្តាយរបស់ជនរងគ្រោះអាយុ៨ឆ្នាំ Martin Richard បានសុំឲ្យក្រសួង យុត្តិធម៌ដាក់ទោស Tsanaev ជាប់គុកអស់មួយជីវិតដោយគ្មានការដោះលែងឬក៏គ្មានសិទ្ធិប្តឹងឧទ្ធរណ៍ នៅក្នុងការដោះដូរជាមួយទោសប្រហារជីវិត។
លោក Bill និង Denis Richard បានសរសេរនៅក្នុងកាសែត The Boston Globe កាលពីសប្តាហ៍មុនថា «យើងដឹងថារដ្ឋាភិបាលមានហេតុផលរបស់ខ្លួននៅក្នុងការស្វះស្វែងដាក់ទោសប្រហារជីវិតនេះ។ ក៏ប៉ុន្តែការបន្តស្វះស្វែងដាក់ទោសប្រហារជីវិតនោះ អាចនាំឲ្យមានការប្តឹងឧទ្ធរណ៍រាប់សិបឆ្នាំហើយនឹងអូសបន្លាយពេលវេលានៃការឈឺចាប់បំផុតរបស់យើង»។
លោកស្រី Jessica Kenskyនិងលោក Patrick Downers គូស្រករនៅទីក្រុងបូស្តុនបានកំបុតជើងទាំង២នៅក្នុងការវាយប្រហារនោះ ក៏បានជំរុញឲ្យរដ្ឋអាជ្ញាទម្លាក់ចោលការខំប្រឹងប្រែងរបស់ខ្លួនដើម្បីស្វះស្វែងដាក់ទោសប្រហារជីវិតប្រឆាំងនឹង Dzhokar Tsanaev។
ការស្ទង់មតិសាធារណៈក្នុងទីក្រុងបូស្តុនបង្ហាញថា អ្នកស្រុកភាគច្រើនបានជំទាស់ប្រឆាំងទោសប្រហារជីវិតដល់ Tsanaev៕
