ភ្ជាប់​ទៅ​គេហទំព័រ​ទាក់ទង

អាមេរិកជំរុញប៉ាគីស្ថានឲ្យបង្កើនការប្រយុទ្ធនឹងភេរវកម្ម


ទាហាន​ប៉ាគីស្ថាន​ឈរ​យាម​យ៉ាង​ប្រុង​ប្រយ័ត្ន​​ នៅ​តាម​បណ្តោយ​ព្រំដែន​រវាង​ប្រទេស​អាហ្វហ្កាននីស្ថាន​ និង​ប៉ាគីស្ថាន​។

អ៊ីស្លាម៉ាបាដ៖ រដ្ឋាភិបាល​ក្រុង​វ៉ាស៊ីង​តោនបង្កើនការ​ដាក់​សម្ពាធ​ទៅ​លើ​ប្រទេស​ប៉ាគីស្ថាន ឲ្យ​ខឹតខំ​ថែម​ទៀតប្រយុទ្ធ​ប្រឆាំង​នឹង​ក្រុម​សកម្ម​ប្រយុទ្ធ​តាលីបាន និង​អាល់កៃដា។

តំបន់​វ៉ាហ្ស៊ីរីស្ថាន​ភាគ​ខាង​ជើង(North Waziristan) ស្ថិត​នៅ​ក្នុង​ប្រទេស​ប៉ាគីស្ថាន ប៉ុន្តែស្ថិត​ខាង​ក្រៅ​ច្បាប់។ ដោយ​មាន​ទី​តាំង​នៅ​តាម​បណ្តោយព្រំ​ដែនជាមួយប្រទេស​អាហ្វកានីស្ថាន តំបន់វ៉ាហ្ស៊ី​រី​ស្ថានភាគ​ខាង​ជើង បាន​ក្លាយ​ជា​ច្រក​ឆ្លង​កាត់សម្រាប់​អំពើ​ភេរវកម្ម។​ វា​ជា​ស្ថាន​ភាព​ចម្រុះ​គ្នា​នៃអង្គការជី​ហាដ​ (jihadi) ​ប្រដាប់​អាវុធ ដែល​រួមមានក្រុម​តាលី​បានរបស់​អាហ្វ​កានី​ស្ថាន និង​ប៉ាគីស្ថាន អាល់​កៃ​ដា និង​ក្រុម​បះ​បោរដ៏​មរណៈ​បំផុត​មួយ ដែល​ជា​បណ្តាញរបស់ចាឡាលូឌីន ហាគានី (Jalaluddin Haqqani)។

អាមេរិក​ចង់​ឲ្យកង​ទ័ពប៉ាគីស្ថាន​វាយ​ប្រហារក្រុម​បះ​បោរ​ទាំង​នេះនៅក្នុងតំបន់​វ៉ាហ្ស៊ីរីស្ថានភាគ​ខាង​ជើង ដែល​ក្រុម​នេះកំពុងធ្វើ​ការ​វាយ​ប្រហារដ៏​មរណៈ ទៅ​លើកងកម្លាំង​អាមេរិក និងអង្គការ​ណេតូនៅអាហ្វកា​នីស្ថាន។ លោក​ឧត្តម​នាវីឯក ម៉ៃ ម៉ូឡែន នាយ​អគ្គ​សេនា​ធិការ​សហរដ្ឋអាមេរិក ពិពណ៌នា​តំបន់​វ៉ាហ្ស៊ី​រីស្ថាន​ ថា​ជា​«ចំណុច​សំខាន់​នៃ​អំពើ​ភេរវកម្ម»។

មន្ត្រីប៉ាគីស្ថានបាន​ថ្លែង​ថា ពួក​គេ​នឹង​មិនប្រញាប់ប្រញាល់​ចាត់​វិធាន​ការ​យោធា​នៅ​ទីនោះ​ទេ។

លោក ​មហាមេឌ កំរ៉ាន ខាន (Mohammad Kamran Khan) ​តំណាង​តំបន់វ៉ាហ្ស៊ីរីស្ថាន​ភាគខាង​ជើងនៅ​ក្នុង​រដ្ឋ​សភា​ប៉ាគីស្ថាន ថ្លែង​ថា៖

«សភាពការណ៍​នៅតំបន់​វ៉ាហ្ស៊ីរីស្ថាន​ភាគ​ខាង​ជើងមិន​ទាន់​ល្អ​ទេ ដោយ​សារ​តែមាន​ការវាយ​ប្រយុទ្ធ​គ្នាដោយកាំ​ភ្លើង​ជា​រៀង​រាល់​ថ្ងៃ ហើយមាន​កំណត់​មុខ​សញ្ញា​ដើម្បី​សម្លាប់ និង​ចាប់​ជំរិតទៀត​ផង»។

លោក​ខាន​ ប៉ាន់​ស្មាន​ថា មាន​ក្រុម​សកម្ម​ប្រយុទ្ធ​បរទេស​ចំនួន​ពី៥​ពាន់ ទៅ​៦​ពាន់​នាក់ ​ដែលស្ថិត​នៅ​ក្នុង​តំបន់​វ៉ាហ្ស៊ីរីស្ថានភាគ​ខាង​ជើងនា​ពេល​បច្ចុប្បន្ន​នេះ។

មេដឹកនាំ​កុល​សម្ព័ន្ធ​ក្នុង​មូល​ដ្ឋាន និយាយ​ថា ​ជន​ជាតិ​អារ៉ាប់ អ៊ូស្បៀក តាហ្សីក ឆេកឆិន និង​ក្រុមអ្នកប្រយុទ្ធ ដែល​ត្រូវ​បាន​ពិពណ៌នាថា​ជា«​ជីហាឌ​ ​ស» ដែល​មាន​ន័យថា​ពួក​សកម្ម​ប្រយុទ្ធអឺរ៉ុប បានចូល​មកតំបន់​វ៉ាហ្ស៊ីរីស្ថាន​ភាគ​ខាងជើង ដើម្បីប្រយុទ្ធ​ជាមួយកងកម្លាំង​អាមេរិក និងអង្គការណេតូនៅ​អាហ្វកានីស្ថាន។

ប៉ាគីស្ថាន​បញ្ជាក់​ថា ខ្លួន​នឹង​ពិចារណាការវាយ​លុកខាង​យោធានៅតំបន់វ៉ាហ្ស៊ីរីស្ថាន​ភាគ​ខាងជើង​ តែ​នៅពេល​ណា​ដែលតំបន់​កុល​សម្ព័ន្ធ​ដទៃៗ​ទៀតមាន​ស្ថិរភាព​តែ​ប៉ុណ្ណោះ​ ដែល​មន្ត្រី​យោធា​បាន​និយាយ​ថា ​អាច​ត្រូវ​ការ​រពេល​៦​ខែ​ទៀត។

លោក​ឧត្តមសេនីយ៍​ឯកប៉ាគីស្ថាន លោក​ អាហ្សីវ យ៉ាស៊ីន ម៉ាលីក (Asif Yasin Malik) ដែល​ជាមេ​បញ្ជាការ​យោធា​កំពូល​មួយ​រូប​នៅ​ក្នុង​តំបន់​នោះមាន​ប្រសាសន៍​ថា៖

«អ្វី​ដែល​យើង​ត្រូវ​ធ្វើ ​គឺ​ត្រូវ​ធ្វើឲ្យ​មាន​ស្ថិរភាព​ដល់​តំបន់​ទាំង​មូល។ ​ មាន​តំបន់​ដ៏​ធំស្ថិត​នៅ​ក្រោម​បញ្ជា​របស់​ខ្ញុំ។ ដូច្នេះ ខ្ញុំ​ត្រូវ​តែ​ធ្វើ​ឲ្យ​តំបន់​ផ្សេងៗ​ទៀត​មានស្ថិរភាព​សិន ​បន្ទាប់​មក ប្រហែលជា​ពិនិត្យ​មើល​តំបន់ វ៉ាហ្ស៊ីរីស្ថាន​ភាគ​ខាង​ជើង»។

អ្នកវិភាគអាស៊ី​ខាង​ត្បូង​ថ្លែង​ថា នៅ​ពេល​និយាយ​អំពី​ក្រុម​សកម្ម​ប្រយុទ្ធនៅ​តំបន់វ៉ាហ្ស៊ីរីស្ថាន​ភាគ​ខាង​ជើង ប៉ាគីស្ថាន និង​សហរដ្ឋ​អាមេរិក នឹង​មាន​ជម្លោះផល​ប្រយោជន៍​។ ​គេបាន​ប​ញ្ជាក់​ថា លោក​ហាហ្គានី (Haqqani) មាន​ទំនាក់​ទំនង​យ៉ាង​ជិត​ស្និទ្ធជាមួយ​ស្ថាប័នស៊ើបការ​សម្ងាត់ និង​កិច្ចការ​សន្តិសុខ​របស់​ប៉ាគីស្ថាន ហើយត្រូវ​បាន​ចាត់​ទុក​ថា ជា​សម្ព័ន្ធ​មិត្តដ៏មានសក្តា​នុ​ពល ដែល​អាចជួយ​ឲ្យទី​ក្រុង​អ៊ីស្លាម៉ាបាតគ្រប់​គ្រង​ឡើង​វិញ​នូវ​ទឹក​ដីព្រំ​ដែនរបស់ខ្លួននៅប្រទេសអាហ្វកានីស្ថានក្រោយពី​ប្រតិបត្តិការ​របស់​អង្គការណេតូ។

អាមេរិក​បាន​បង្កើនការ​វាយ​ប្រហារតាម​យន្ត​ហោះ​គ្មាន​មនុស្ស​បើក នៅ​តំបន់វ៉ាហ្ស៊ីរីស្ថានភាគ​ខាង​ជើង ក្នុង​កិច្ច​ប្រឹង​ប្រែង​ដើម្បី​រា​រាំងជនសកម្ម​ប្រយុទ្ធពី​ការ​ប្រើប្រាស់​តំបន់​នោះ​ជា​ជម្រក​សុវត្ថិ​ភាព។ ប៉ុន្តែរដ្ឋាភិបាលក្រុង​វ៉ាស៊ីនតោន និងអ៊ីស្លាម៉ាបាត បាន​ដឹង​ថា ការ​វាយ​ប្រហារបែប​នេះ​តែ​មួយ​មុខ ទំនងជា​មិន​អាច​បញ្ឈប់​សកម្ម​ភាព​របស់​ក្រុម​សកម្ម​ប្រយុទ្ធនៅ​ក្នុងអ្វី​ដែលត្រូវ​បាន​ស្គាល់​ថា ជាតំបន់​សំខាន់​បំផុតនៃ​អំពើ​ភេរវកម្មបាន​ទេ៕

ប្រែសម្រួល​ដោយ លី សុខឃាង

XS
SM
MD
LG