អាជ្ញាធរប៉ាគីស្ថានបង្អាក់សេវាទូរសព្ទដៃនិងសេវាអ៊ីនធឺណិតនៅថ្ងៃបោះឆ្នោត នៅថ្ងៃព្រហស្បតិ៍នេះ នៅពេលក្រុមអ្នកបោះឆ្នោតបានបោះឆ្នោតនៅក្នុងការបោះឆ្នោតសភាដែលមានរឿងចម្រូងចម្រាស់ហើយនោះ។
សេចក្តីប្រកាសកាលពីពេលព្រឹករបស់ក្រសួងមហាផ្ទៃនៅមុនស្ថានីយ៍បោះឆ្នោតបើកដំណើរការសម្រាប់ក្រុមអ្នកមានសិទ្ធិបោះឆ្នោតប្រមាណ ១២៨ លាននាក់ បាននិយាយថា ការបង្អាក់សេវាទូរសព្ទគឺដើម្បី «បន្ធូរការគំរាមកំហែងខាងសន្តិសុខ» និង «ថែរក្សាច្បាប់និងសណ្តាប់ធ្នាប់»។ សេចក្តីប្រកាសនេះមិនបានពិភាក្សាការផ្អាកសេវា អ៊ីនធឺណិតទេ។
ការផ្អាកសេវាទាំងនេះមានឡើងក្រោយការផ្ទុះគ្រាប់បែកពីរដាច់ដោយឡែកពីគ្នានៅខាងក្រៅការិយាល័យឃោសនាបោះឆ្នោតក្នុងខេត្ត Baluchistan នាប៉ែកនិរតីប្រទេសកាលពីថ្ងៃពុធ ដែលបានសម្លាប់មនុស្ស ៣០ នាក់ ដោយក្រុមសកម្មប្រយុទ្ធរដ្ឋអ៊ិស្លាមបានអះអាងទទួលខុសត្រូវដល់ការបំផ្ទុះគ្រាប់បែកទាំងនេះ។
រដ្ឋាភិបាលបានដាក់ពង្រាយទាហាន កងប៉ារ៉ានិងប៉ូលិសជាង ៦៥.០០០ នាក់ ដើម្បីផ្តល់សន្តិសុខដល់ស្ថានីយ៍បោះឆ្នោតរាប់ម៉ឺននៅក្នុងប្រទេសនេះ ដែលមានប្រជារាស្ត្រច្រើនទី ៥ ក្នុងពិភពលោក ដោយមានប្រជាពលរដ្ឋប្រមាណ ២៤១ លាននាក់។
ការផ្ទុះគ្រាប់បែកមួយសំដៅលើពួកប៉ូលិសយាមល្បាតនៅក្នុងស្រុក Dera Ismail Khan នាផ្នែកពាយ័ព្យប្រទេសកាលពីរសៀលថ្ងៃព្រហស្បតិ៍ បានសម្លាប់ប៉ូលិសយ៉ាងតិចណាស់ ៥ នាក់។ គ្មានក្រុមណាមួយអះអាងទទួលខុសត្រូវភ្លាមៗទេដល់ការបំផ្ទុះគ្រាប់បែកនេះ។
តែការផ្អាកសេវាទូរសព្ទនិងសេវាអ៊ីនធឺណិតបាននាំឱ្យមានការចោទប្រកាន់ថាជាការប៉ុនប៉ងមួយទៀត ដោយរដ្ឋាភិបាលបណ្តោះអាសន្នគាំទ្រដោយពួកយោធា ដើម្បីបន្លំសន្លឹកឆ្នោត ដោយរឹតត្បិតក្រុមបេក្ខជនស្មោះត្រង់នឹងគណបក្សរបស់អតីតនាយករដ្ឋមន្ត្រីជាប់ពន្ធនាគារលោក Imran Khan កុំឱ្យមានការគាំទ្រច្រើន៕
វេទិកាបញ្ចេញមតិ