សាលាដំបូងរាជធានីភ្នំពេញនៅថ្ងៃព្រហស្បតិ៍នេះ សម្រេចផ្ដន្ទាទោសឲ្យលោកស្រីថាក់ ឡានី សមាជិកព្រឹទ្ធសភាគណបក្សសម រង្ស៊ី ជាប់ពន្ធនាគាររយៈពេល១ឆ្នាំ៦ខែ និងពិន័យជាប្រាក់៨លាន ពាក់ព័ន្ធនឹងបទបរិហារកេរ្តិ៍ និងញុះញង់ឲ្យមានភាពវឹកវរ និងបង្គាប់ឲ្យសមត្ថកិច្ចចាប់ខ្លួនលោកស្រី សមាជិកព្រឹទ្ធសភារូបនេះ និងបង្គាប់ឲ្យសងសំណងចំនួន១០០រៀលទៅលោកនាយករដ្ឋមន្ត្រី ហ៊ុន សែន ដែលជាដើមបណ្ដឹង។
សមាជិកព្រឹទ្ធសភាគណបក្ស សម រង្ស៊ី គឺលោកស្រី ថាក់ ឡានី ត្រូវបានលោកនាយករដ្ឋមន្ត្រី ហ៊ុន សែន ប្ដឹងកាលពីថ្ងៃទី១ ខែសីហា តាមរយៈមេធាវីតំណាងរបស់លោក បន្ទាប់ពីមានការបង្ហោះវីដេអូមួយកាលពីចុងខែកក្កដា ដោយអង្គភាពព័ត៌មាន Fresh Newsដែលគេដឹងថា ស្និទ្ធនឹងគណបក្សប្រជាជនកម្ពុជាដែលបង្ហាញថា លោកស្រី ថាក់ ឡានី ថ្លែងថាលោក ហ៊ុន សែន នៅពីក្រោយការសម្លាប់លោក កែម ឡី។
ក្នុងសាលសវនាការនារសៀលថ្ងៃព្រហស្បតិ៍នេះ ចៅក្រមសាលាដំបូងរាជធានីភ្នំពេញ លោក អ៊ី ថាវរៈ ប្រកាសផ្ដន្ទាទោសលោកស្រី ថាក់ ឡានី ឲ្យជាប់ពន្ធនាគាររយៈពេល១ឆ្នាំ និង៦ខែ បង់ពិន័យជាប្រាក់៨លានរៀល ហើយនិងបង់សំណងជំងឺចិត្តទៅលោកនាយករដ្ឋមន្ត្រី ហ៊ុន សែន ចំនួន១០០រៀលតាមការស្នើសុំ។
លោកចៅក្រមក៏បានបង្គាប់ឲ្យសមត្ថកិច្ចចាប់ខ្លួនលោកស្រី ថាក់ ឡានី ភ្លាមៗពីបទ «បរិហារកេរ្តិ៍ជាសាធារណៈ និងញុះញង់ឲ្យមានភាពវឹកវរ ចលាចលដល់សន្តិសុខ សណ្ដាប់ធ្នាប់សង្គម» តាមមាត្រា៣០៥, ៤៩៤ និង៤៩៥នៃក្រមព្រហ្មទណ្ឌ។
លោក សំ សុគង់ មេធាវីការពារក្តីឲ្យលោកស្រី ថាក់ ឡានី ប្រាប់ VOA ថា ការសម្រេចរបស់តុលាការជាការប្រើប្រាស់ឆន្ទានុសិទ្ធិក្នុងការសម្រេច ដែលមានភាពអយុត្តិធម៌សម្រាប់កូនក្តីរបស់លោក។
លោកថា តុលាការមិនបានចាត់អ្នកជំនាញផ្នែកបច្ចេកវិទ្យាដើម្បីពិនិត្យមើលវីដេអូដែលយកមកធ្វើជាភស្តុតាងដាក់បន្ទុកទៅតាមការស្នើសុំរបស់ចុងចោទឡើយ។
លោកមេធាវីការពារក្តីរូបនេះ បន្ថែមថា ក្នុងសវនាការកន្លងមកតុលាការក៏មិនបានលើកឡើងពីចំណុចដែលពាក់ព័ន្ធនឹងការញុះញង់ ហើយថា ការលើកឡើងរបស់សាក្សីខាងដើមបណ្ដឹង មិនអាចជឿជាក់បាន ។
«ការប្រើប្រាស់ឆន្ទានុសិទ្ធិនេះហាក់ដូចជាមានការប្រើប្រាស់ឆន្ទានុសិទ្ធិខ្លាំង ហើយយើងឃើញថាបទល្មើសនេះ បើយើងមើលកម្រិតនៃការផ្ដន្ទាទោស ក៏ដូចជាបច្ច័យនេះគឺមានលក្ខណៈតិចតួច ប៉ុន្តែតុលាការសម្រេចរហូតដល់មានការចាប់ខ្លួន។ យើងគិតថាដូចជាមិនសមរម្យទាល់តែសោះ»។
លោក សំ សុគង់ បន្ថែមថា លោកនឹងពិភាក្សាជាមួយលោកស្រី ថាក់ ឡានី តាមរយៈការឆ្លើយឆ្លងវីដេអូតាមប្រព័ន្ធអ៊ីនធឺណិត ដើម្បីសម្រេចប្ដឹងឧទ្ធរណ៍ក្នុងពេលឆាប់ៗខាងមុខ ដោយលោករំពឹងថា សាលាឧទ្ធរណ៍នឹងផ្ដល់យុត្តិធម៌ជូនកូនក្ដីរបស់លោក។
លោក អ៊ី រិន្ទ ប្រធានលេខាធិការដ្ឋាន និងជាអ្នកនាំពាក្យសាលាដំបូងរាជធានីភ្នំពេញ ប្រាប់ VOA ថា លោកសុំមិនអធិប្បាយពាក់ព័ន្ធនឹងដំណើរការសវនាការ និងការសម្រេចរបស់ចៅក្រម ប៉ុន្តែលោកថា មេធាវី ឬចុងចោទអាចប្ដឹងទៅសាលាឧទ្ធរណ៍ ប្រសិនជាពួកគេមិនពេញចិត្តនឹងសាលក្រមរបស់សាលាដំបូងនេះ។
មុននឹងចាកចេញទៅបរទេស លោកស្រី ថាក់ ឡានី បានបដិសេធនឹងការចោទប្រកាន់ ហើយប្រាប់ទៅសារព័ត៌មានក្នុងស្រុកថា ពាក្យសម្ដីរបស់លោកស្រីត្រូវបានគេកាត់ត។
លោក ឈុន ប៊ុនសាន ស្វាមីរបស់លោកស្រី ថាក់ ឡានី ដែលបានចូលស្ដាប់ការប្រកាសសាលក្រមនារសៀលនេះ ប្រាប់ VOA ថា ភរិយារបស់លោកមិនបាននិយាយដូចការចោទប្រកាន់នោះទេ។ លោកបញ្ជាក់ថា សំឡេងដែលតុលាការយកមកធ្វើជាភស្តុតាងនោះគឺជាសំឡេងរបស់ភរិយាលោកពិតមែន ប៉ុន្តែលោកថា សំឡេងនេះត្រូវបានគេកាត់ត។
«ខ្មែរនៅក្នុងទូទាំងប្រទេសកម្ពុជាយើងទាំងមូល អ្នកណាទៅហ៊ានហៅលោក ហ៊ុន សែនថា អា ហ៊ុន សែន ដាច់សាច់អញ្ចឹង? ថ្ងៃសវនាការហ្នឹង ខ្ញុំអង្គុយស្ដាប់ដែរតើ ខ្ញុំឮច្បាស់ណាស់ថា វីដេអូក្លិបហ្នឹងដាក់ថា លោកស្រី ថាក់ ឡានី ថាតែម្ដង។ សំឡេងហ្នឹង ជាសំឡេងគាត់ហើយ ត្រង់ពាក្យមួយម៉ាត់ថា ចុះឡើងចុះឡើងថា ហ៊ុន សែន បាញ់ កែម ឡី។ ខ្ញុំថា គាត់ថ្លើមធំឯណាទៅហ៊ាននិយាយប៉ុណ្ណឹង?»
លោក ឈុន ប៊ុនសាន ក៏បានអំពាវនាវឲ្យតុលាការរកយុត្តិធម៌ឲ្យភរិយារបស់លោកដែលកំពុងបំពេញបេសកកម្មនៅក្រៅប្រទេស។
លោក គី តិច មេធាវីការពារក្តីឲ្យលោក ហ៊ុន សែន ប្រាប់ VOA ថា លោកពេញចិត្តនឹងការសម្រេចរបស់តុលាការ ដែលបានដាក់ទោសលោកស្រី ថាក់ ឡានី និងបានបង្គាប់ឲ្យផ្ដល់សំណង១០០រៀល ជូនលោក ហ៊ុន សែន តាមការទាមទារ។
«១០០ យើងសួរថាយកទៅធ្វើអី ខ្ញុំគិតថាយើងទាំងអស់គ្នាដឹងហើយយកទៅធ្វើអីក៏មិនកើតដែរ ប៉ុន្តែគ្រាន់តែអាហ្នឹងគឺជាការបង្ហាញទៅដល់ប្រជាពលរដ្ឋទៅដល់សាធារណជន ទាំងអស់ថាអាហ្នឹងគឺជាច្បាប់ គេទាមទារប៉ុន្មាន ជំងឺចិត្តហ្នឹងគឺថាត្រូវមានជំងឺចិត្តអញ្ចឹង ដើម្បីកុំឲ្យអ្នកប្រព្រឹត្តបទល្មើសហ្នឹងរួចខ្លួនរហូត»។
លោក សុក សំអឿន មេធាវីការពារសិទ្ធិមនុស្ស ប្រាប់ VOA ថា បទញុះញង់គឺជាការបង្គាប់ឲ្យប្រព្រឹត្ត ឬញុះញង់ឲ្យទៅប្រព្រឹត្តបទឧក្រិដ្ឋណាមួយ។
លោកបន្ថែមថា ការបកស្រាយរបស់តុលាការក្នុងសំណុំរឿងរបស់លោកស្រី ថាក់ ឡានី ហាក់មានភាពទូលាយ ដែលលោកថាអាចបង្កឲ្យមានការរឹតត្បិតសេរីភាពក្នុងការបញ្ចេញមតិ។
«ឧទាហរណ៍ថា បើយើងញុះញង់ថាឲ្យទៅសម្លាប់មនុស្សទៅអាហ្នឹងឲ្យច្បាស់ថាអាហ្នឹងញុះញង់ឲ្យទៅសម្លាប់។ ឧបមាថាញុះញង់បទឧក្រិដ្ឋទៅគេ តែមិនដឹងថាញុះញង់ឲ្យទៅធ្វើអីផង ដល់អញ្ចឹងខ្ញុំគិតថា ការបកស្រាយបទញុះញង់របស់តុលាការ វាដូចជាអត់ត្រូវ។ ធ្វើអញ្ចឹង វាឲ្យរឿងនយោបាយ គេអាចយករឿងអញ្ចឹងមកប្រើបាន ហើយអាបទល្មើសញុះញង់ហ្នឹង វាពាក់ព័ន្ធនឹងសិទ្ធិបញ្ចេញមតិ»។
ក្រៅពីប្ដឹងលោកស្រី ថាក់ ឡានី លោក ហ៊ុន សែន ក៏បានប្ដឹងលោក សម រង្ស៊ី ប្រធានគណបក្សប្រឆាំងដែលកំពុងនិរទេសខ្លួននៅប្រទេសបារាំង ពាក់ព័ន្ធនឹងការចោទថា រដ្ឋាភិបាលលោក ហ៊ុន សែន ជាអ្នកនៅពីក្រោយឃាតកម្មលើលោក កែម ឡី។
នេះជាលើកទីពីរហើយដែលលោក ហ៊ុន សែន ប្ដឹងស្ត្រីអ្នកនយោបាយរបស់គណបក្សប្រឆាំង បន្ទាប់ពីលោកស្រី មូរ សុខហួរ ត្រូវបានលោក ហ៊ុន សែន ប្ដឹងកាលពីពាក់កណ្ដាលឆ្នាំ២០០៩ពីបទបរិហារកេរ្តិ៍ បន្ទាប់ពីលោកស្រីធ្វើសន្និសីទកាសែតចោទប្រកាន់ចំពោះកំហុសរបស់លោក ហ៊ុន សែន មុនការដាក់ពាក្យបណ្ដឹងទៅតុលាការពាក់ព័ន្ធនឹងការលើកឡើងរបស់លោក ហ៊ុន សែន ដែលថ្លែងថា មានស្ត្រីជើងខ្លាំងម្នាក់ពូកែរករឿងគេ គឺរត់ទៅអោបគេសោះ តែថាគេប្រឡេះឡេវអាវរបស់ខ្លួន៕
