ជ័យជម្នះដ៏ខ្លាំងក្លារបស់គណបក្សវឌ្ឍនភាពប្រជាធិបតេយ្យ(DPP) នៅកោះតៃវ៉ាន់ បានបង្ហាញជាគំរូល្អដល់គណបក្សប្រឆាំងនៅកម្ពុជា។ នេះបើតាមការលើកឡើងរបស់មន្ត្រីគណបក្សសង្គ្រោះជាតិ។
កញ្ញា កឹម មនោវិទ្យា អគ្គនាយករងកិច្ចការសាធារណៈនៃគណបក្សសង្គ្រោះជាតិដែលបានទៅចូលរួមសង្កេតការណ៍ការបោះឆ្នោតកាលពីថ្ងៃសៅរ៍សប្តាហ៍មុន បានបញ្ជាក់ថា កញ្ញាចាប់អារម្មណ៍នឹងការប្រើប្រាស់បច្ចេកវិទ្យាក្នុងការធ្វើទំនាក់ទំនងជាមួយនឹងអ្នកគាំទ្រវ័យក្មេង ដូចជាការប្រើប្រាស់បណ្តាញសង្គមជាដើម។
កញ្ញាបន្ថែមថា សារនយោបាយដែលបង្ហាញថាគណបក្សប្រកាន់ខ្ជាប់តាមលទ្ធិប្រជាធិបតេយ្យក៏សំខាន់ខ្លាំងដែរ៖
«គណបក្សគាត់គឺជាគណបក្សប្រជាធិបតេយ្យ ហើយគណបក្សកាន់អំណាចដែលចាញ់ទៅគាត់មិនមែនជាគណបក្សប្រជាធិបតេយ្យ។ ជាទូទៅមនុស្សជំនាន់ថ្មីមនុស្សក្មេងគេចង់បានគណបក្សប្រជាធិបតេយ្យហើយ។ រឿងសេដ្ឋកិច្ចក៏ជាបញ្ហាដែរ ព្រោះគណបក្សដឹកនាំសព្វថ្ងៃហ្នឹងមិនធ្វើឱ្យសេដ្ឋកិច្ចជឿនលឿនតាមអ្វីដែលគណបក្សហ្នឹងធ្វើបាន»។
អ្វីដែលគណបក្សសង្គ្រោះជាតិរៀនសូត្របានដែរ គឺស្មារតីតស៊ូរបស់គណបក្សវឌ្ឍនភាពប្រជាធិបតេយ្យ (DPP) ព្រោះគណបក្សនេះក៏ធ្លាប់បានឈ្នះឆ្នោត ហើយបាត់បង់ទៅវិញដែរ មុននឹងទទួលបានជ័យជម្នះជាថ្មីក្នុងការបោះឆ្នោតលើកនេះ។
កញ្ញាបានបន្ថែមថា៖
«អីចឹងធ្វើឱ្យខ្ញុំគិតឃើញថា ការតស៊ូមិនមែនងាយទេ ជាពិសេសការតស៊ូដើម្បីរកលទ្ធិប្រជាធិបតេយ្យ ហើយដល់បានមកហើយក៏អាចបាត់ទៅវិញទៀត។ ឧទាហរណ៍ ដូចជាគណបក្សគាត់នោះ។ សំខាន់គឺយើងត្រូវធ្វើការកែទម្រង់ខ្លួនយើងដែរ»។
គណបក្សសង្គ្រោះជាតិ និងគណបក្សវឌ្ឍនភាពប្រជាធិបតេយ្យគឺជាសមាជិកនៃក្រុមប្រឹក្សាអ្នកប្រជាធិបតេយ្យសេរីនិយមអាស៊ីហៅកាត់ថា CALD (Council of Asian Liberals and Democrats)។ គណបក្សដែលជាសមាជិកពេញសិទ្ធិ និងសមាជិកសង្កេតការណ៍នៃក្រុម CALD បានឈានទៅកាន់អំណាចជាបណ្តើរៗ។ ក្នុងនោះមាននៅប្រទេសហ្វីលីពីន ឥណ្ឌូនេស៊ី ភូមា និងចុងក្រោយនេះគឺនៅកោះតៃវ៉ាន់។
កញ្ញា កឹម មនោវិទ្យា បានបញ្ជាក់ថា សម្ព័ន្ធភាពដែលគណបក្សប្រឆាំងនេះមានជាមួយនឹងគណបក្សក្នុងតំបន់ផ្តល់ផលប្រយោជន៍ជាការជួយគ្នាទៅវិញទៅមកដែរ។ ដូចជាជួយគ្នាក្នុងការចេញសេចក្តីថ្លែងការណ៍នយោបាយផ្សេងៗ។
កញ្ញាបានបន្ថែមទៀតថា៖ «ទៅថ្ងៃមុខទៀត នៅពេលគណបក្សសង្គ្រោះជាតិជាគណបក្សនៅក្នុងរដ្ឋាភិបាលនឹងធ្វើឱ្យយើងមានទំនាក់ទំនងកាន់តែប្រសើរជាងនេះទៀតជាមួយនឹងប្រទេសជិតខាងនៅក្នុងតំបន់នេះ។ ... យើងមានទំនាក់ទំនងជាមួយនឹងថ្នាក់ដឹកនាំនៅក្នុងតំបន់អាស៊ីហ្នឹងជាច្រើនហើយជាយូរឆ្នាំមកហើយ»៕
