ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​សង្គ្រោះ​ជាតិ​អំពាវនាវ​ឲ្យ​អាជ្ញាធរ​បើក​ការ​ស៊ើប​អង្កេត​លើ​ការ​ប៉ះ​ទង្គិច​ហិង្សា​​ក្នុង​ខេត្តក្រចេះ


នៅថ្ងៃទី ០៩ ខែមីនា ឆ្នាំ២០១៨ គណបក្ស​សង្គ្រោះ​ជាតិ​ ដែល​ត្រូវ​បាន​រំលាយ​តាម​អំណាច​តុលាការ​កំពូល​ បាន​ចេញ​សេចក្តី​ថ្លែង​ការណ៍​ថ្កោល​ទោស​អំពើ​ហិង្សា​​ប្រើ​ប្រាស់​អាវុធ​លើ​ក្រុម​អ្នក​តវ៉ា​ក្នុង​ខេត្តក្រចេះ កាលពី​ថ្ងៃ​ទី ០៨ ខែមីនា ឆ្នាំ២០១៨។ (រូបថត៖ គណបក្ស​សង្គ្រោះ​ជាតិ)

អង្គការ​សង្គម​ស៊ីវិល ​គណបក្ស​សង្គ្រោះ​ជាតិ ​និង​ចលនា​សង្គ្រោះ​ជាតិ​ទាមទារ​ឲ្យ​មាន​ការ​ស៊ើប​អង្កេត​ឯករាជ្យ​អំពី​អំពើហិង្សា​នៅ​ខេត្ត​ក្រចេះ​ ដែល​រដ្ឋាភិបាល​បដិសេធ​ថា ​មាន​តែ​អ្នក​របួស​ប៉ុណ្ណោះ គឺ​មិន​មាន​មនុស្ស​ស្លាប់​ដូចការ​អះអាង​របស់​ពលរដ្ឋ​នោះ​ទេ។

គណបក្ស​សង្គ្រោះ​ជាតិ​ ដែល​ត្រូវ​បាន​រំលាយ​ទៅ​តាម​បណ្តឹង​របស់​រដ្ឋាភិបាល​ បាន​ថ្កោលទោស​ដាច់​អហង្ការ​ចំពោះ​ការ​ប្រើប្រាស់​កង​កម្លាំង​ប្រដាប់​អាវុធ​ ដើម្បី​បង្ក្រាប​«យ៉ាង​ឃោរឃៅ​ព្រៃ​ផ្សៃ»​ មក​លើ​ប្រជា​ពលរដ្ឋ​ស្លូត​ត្រង់​ នៅ​ភូមិ​ជើង​ឃ្លេ​ ឃុំ​ ២​ធ្នូ​ ស្រុក​ស្នួល​ ខេត្ត​ក្រចេះ​ បណ្តាល​ឲ្យ​ប្រជា​ពលរដ្ឋ​រង​របួស​ និង​ត្រូវ​បាន​ចាប់​ខ្លួន​ជាច្រើន​នាក់​ កាលពី​ថ្ងៃ​ព្រហស្បតិ៍​ ​ខណៈមិន​ទាន់​មាន​ការ​បញ្ជាក់​ព័ត៌មាន​អំពី​មនុស្ស​ស្លាប់​នោះ។​

សេចក្តី​ថ្លែង​ការណ៍​របស់​គណបក្ស​ប្រឆាំងកើត​មាន​ឡើង​ នៅ​ខណៈ​ក្រុម​អ្នក​តាម​ដាន​ហេតុ​ការណ៍​ ដែល​ផ្តើម​ចេញ​ពីទំនាស់​ដីធ្លីដ៏​ចម្រូងចម្រាស់នៅ​ខេត្ត​ក្រចេះ​ មាន​ការ​ភ័យ​ខ្លាច​មិន​ហ៊ាន​ផ្តល់​ព័ត៌មាន​ដើម្បី​បញ្ជាក់​ពី​ចំនួន​នៃ​អ្នក​ដែល​បាន​ស្លាប់​ និង​របួស​ ខណៈ​ដែល​ពលរដ្ឋ​មួយរូប ដែល​មាន​ទីលំនៅ​នៅ​ក្នុង​តំបន់​មាន​ទំនាស់ ​អះអាង​ពី​ការ​បាត់​ខ្លួន​បុរស​ម្នាក់​ វ័យ​ប្រហែល​ជា​ជាង​៤០​ឆ្នាំ។​

សេចក្តី​ថ្លែង​ការណ៍​របស់​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​ដោយ​តុលាការ​កំពូល​កាលពី​ឆ្នាំ​២០១៧ ​បាន​បញ្ជាក់​ឲ្យ​ដឹង​ក្នុង​ន័យ​ដើម​ថា៖​

«ការ​ប្រើ​ប្រាស់​អាវុធ​បាញ់​រះយ៉ាង​ព្រៃ​ផ្សៃមក​លើ​ប្រជា​ពលរដ្ឋ​ខ្មែរស្លូតត្រង់​ ដោយ​គ្រាន់​តែ​ពួក​គាត់​ទាមទារ​រក​ដំណោះ​ស្រាយ​បញ្ហា​ដីធ្លី​ ដែល​មាន​ទំនាស់​ជាមួយ​ក្រុមហ៊ុន​ឯក​ជន គឺ​ជា​អំពើឧក្រិដ្ឋ មិន​អាច​អត់​អត់ឱន​ឲ្យ​បាន​ឡើយ»។​

លោក ​សម រង្ស៊ី​ អតីត​ប្រធាន​គណបក្ស​ប្រឆាំង​ ក៏​បាន​ចេញ​ខ្សែអាត់​វីដេអូ​មួយ​ភ្លាមៗ​ ក្រោយ​ហេតុ​ការណ៍​បាញ់​ប្រហារ​នោះ​ ដោយ​លោក​បាន​ធ្វើ​ការ​ថ្កោល​ទោស​ដាច់​អហង្ការ​ចំពោះ​ទង្វើ​ដែល​លោក​អះអាងថា​ «ឃោរឃៅ»​ ផង​ដែរ។​ លោកថ្លែង​តាម​ខ្សែអាត់​វីដេអូ​ ដែល​បាន​បង្ហោះ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​ ៨ មីនា​ ឆ្នាំ២០១៨​ តាម​ន័យ​ដើម​ថា៖

«ខ្ញុំ​សូម​ថ្កោល​ទោស​យ៉ាង​ដាច់​អហង្ការចំពោះ​ទង្វើ​ដ៏ឃោរ​ឃៅ​នេះ​ មក​លើ​ប្រជា​រាស្ត្រ​ស្លូតត្រង់។​ ខ្ញុំ​ក៏សូម​ថ្កោល​ទោស​យ៉ាង​ទម្ងន់​ចំពោះ​អ្នក​មានអំណាច​សព្វ​ថ្ងៃ​ ក្នុង​នោះ​ មាន​ក្រុម​គ្រួសារ​ និង​បក្ខពួ​ក​លោក ​ហ៊ុន សែន​ ដែល​បាន​លួច​ប្លន់​ដី​ធ្លី​ប្រជា​រាស្ត្រ»។​

បន្ទាប់​ពី​ការ​បាញ់​ប្រហារ​ដោយ​អាវុធ​ជាច្រើន​គ្រាប់​ ​ដែល​បាន​កើត​ឡើង​កាលពី​ថ្ងៃ​ព្រហស្បតិ៍​នៅឃុំ​ ២​ធ្នូ ​ស្រុក​ស្នួល​ ខេត្ត​ក្រចេះ​នោះ​ ក្រុម​ប្រជា​ពលរដ្ឋ​ និង​មន្ត្រី​សិទ្ធិ​មនុស្ស​របស់​សមាគម​ការពារ​សិទ្ធិ​មនុស្ស​អាដហុក​ ​បាន​ផ្តល់​តួលេខ​ផ្សេងៗ​គ្នា​អំពី​ចំនួន​មនុស្ស​ស្លាប់​ថា​ មាន​ចំនួន​៦នាក់​ និង​របួស​ជាង​១០​នាក់ ​និង​ការ​ចាប់​ខ្លួន​អ្នក​តវ៉ា​ជា​ច្រើន​នាក់​ដែល​ជា​ប្រជា​ពលរដ្ឋ។ ​មន្ត្រី​សិទ្ធិ​មនុស្ស​របស់​សមាគម​ការពារ​សិទ្ធិ​មនុស្ស​អាដហុក​បាននិយាយ​យោង​ទៅ​លើ​ការ​ផ្តល់​ព័ត៌មាន​ពី​ប្រជា​ពលរដ្ឋ​អំពី​តួលេខ​មនុស្សស្លាប់ ​និងរង​របួស។​

ក៏​ប៉ុន្តែ​ មក​ដល់​យប់​ថ្ងៃ​ព្រហស្បតិ៍​ អាជ្ញាធរ​ខេត្ត​ក្រចេះ​បាន​ចេញ​សេចក្តី​បញ្ជាក់​ភ្លាមៗ​ ច្រាន​ចោល​ព័ត៌មាន​ដែល​ថា​ មាន​មនុស្ស​ជាច្រើន​នាក់​ស្លាប់​នោះ​ ដោយ​និយាយ​ថា​ ជា​រឿងមិន​ពិត​ ហើយ​ថា​ មាន​តែ​អ្នករងរបួស​ប៉ុណ្ណោះ​ ក្នុងនោះ​មាន​ប្រជា​ពល​រដ្ឋ​ពីរ​នាក់​ ​និង​អាជ្ញាធរ​មាន​សមត្ថ​កិច្ច​ចំនួន​៧នាក់។​

លោក​ ស៊ឹង សែនករុណា​ អ្នក​នាំពាក្យ​សមាគម​ការពារ​សិទ្ធិ​មនុស្ស​អាដហុក​ បាន​ប្រាប់​ VOA ​នៅ​រសៀល​ថ្ងៃ​សុក្រ​នេះ​ថា​ លោក​មិនទាន់​អាច​ផ្តល់​ព័ត៌មាន​ថ្មី​ បញ្ជាក់​ពី​ហេតុ​ការណ៍​នេះ​ទេ ​ខណៈ​ដែល​លោក​កំពុង​ប្រមែល​ប្រមូល​ព័ត៌មាន​បន្ថែម។​

«យើង​កំពុង​តែ​ធ្វើ​កិច្ចការ​ហ្នឹង។​ អត់​ទាន់​ផ្តល់​ព័ត៌មាន​អី​បាន​ជាក់លាក់​ទេ។ ​យើង​កំពុង​តែ​ធ្វើការ​ស្រាវ​ជ្រាវ​នៅ​ឡើយ។​ អីចឹង​ អាហ្នឹង​ក្នុង​ចំណុច​ហ្នឹង​ យើង​អាច​និយាយ​បាន​តែប៉ុណ្ណឹង​ទេ»។​

ពលរដ្ឋ​មួយ​រូប​ដែល​រស់នៅ​ក្នុង​តំបន់​មាន​ជម្លោះ​ ហើយដែលសុំ​មិន​បញ្ចេញ​ឈ្មោះ​ដោយ​បារម្ភពី​សុវត្ថិភាព​ផ្ទាល់​ខ្លួន​ បាន​បញ្ជាក់​ថា​ មាន​ប្រជា​ពលរដ្ឋ​ម្នាក់​បាន​បាត់​ខ្លួន​ ក្រោយ​ហេតុ​ការណ៍ដ៏​ហិង្សា​នោះ។ ​លោក​បាន​បញ្ជាក់​ថា​ មាន​ពលរដ្ឋ​ពីរនាក់​បាន​រង​របួស​ និង​មាន​ការ​ចាប់​ខ្លួន​ប្រជា​ពលរដ្ឋ​ជាច្រើន​នាក់​បញ្ជូន​ទៅ​តុលាការ។ ​ប៉ុន្តែ​លោក​មិនទាន់​អាច​បញ្ជាក់​ពី​អត្ត​សញ្ញាណ​បុរស​វ័យ​ជាង​ ៤០​ឆ្នាំ​ ដែល​បាន​ខ្លួន​នោះ​ទេ។​

កាលពី​ថ្ងៃ​ព្រហសហ្បតិ៍​ ម្សិលមិញ​នេះ​ លោក​ ស ចំរុង​ អភិបាល​ខេត្ត​ក្រចេះ​ បាន​បដិសេធ​ភ្លាមៗ​ចំពោះ​ព័ត៌មាន​ដែល​ថា ​មាន​មនុស្ស​ស្លាប់​ តែ​លោក​បាន​បញ្ជាក់​ប្រាប់​ VOA ​ថា​ ក្នុង​ឧប្បត្តិ​ហេតុ​នោះមនុស្ស​ពីរនាក់​បាន​រងរបួស​ ដោយមនុស្ស​ប្រុស​ម្នាក់​របួស​ភ្លៅ​ របួស​ស្រាល ហើយ​មនុស្ស​ស្រី​ម្នាក់​របួស​ត្រង់​កំប៉េះ​គូទ។

បន្ទាប់​មក​ទៀត​ រដ្ឋបាល​ខេត្ត​ក្រចេះ​បាន​ចេញ​សេចក្តី​ប្រកាស​មួយ​បញ្ជាក់​បន្ថែម​ទៀត​ថា​ គ្មាន​អ្នក​ស្លាប់​ក្នុងការ​បាញ់​ប្រហារ​នោះ​ទេ។​ សេចក្តី​ប្រកាសនេះ​បាន​ធ្វើ​ឡើង​ បន្ទាប់​ពីបណ្តាញ​ព័ត៌​មាន​ផ្សេងៗ​បាន​ធ្វើ​សេចក្តី​រាយ​ការណ៍​ ដោយ​បាន​បញ្ជាក់​ពី​ការ​បាត់​បង់​ជីវិត​របស់​អ្នក​តវ៉ា។​

សេចក្តី​ប្រកាស​របស់​រដ្ឋបាល​ខេត្ត​ក្រចេះ​ ចុះថ្ងៃ​ទី​៨ ខែ​មីនា​ ឆ្នាំ​២០១៨បាន​បញ្ជាក់​ថា​ ក្នុង​នាម​អាជ្ញាធរ​ខេត្ត​ សូម​ធ្វើ​ការ​បដិសេធ​ទាំង​ស្រុង​ចំពោះ​សារ​ព័ត៌មាន​ភ្នំពេញ​ប៉ុស្តិ៍​ កោះ​សន្តិភាព​ បណ្តាញ​សារ​ព័ត៌មាន​នានា និង​បណ្តាញ​ទំនាក់​ទំនង​សង្គម​ ដែល​បាន​ចុះផ្សាយ​ថា មានការ​ប៉ះ​ទង្គិច​រវាង​ក្រុម​ការងារ​ចម្រុះ​ថ្នាក់​ខេត្ត​ ជាមួយ​ប្រជា​ពលរដ្ឋ​ ក្នុង​ជម្លោះ​ដីធ្លី​នៅ​ក្រុមហ៊ុន​ចម្ការ​កៅស៊ូ​មេមត់​ ដែល​បណ្តាល​ឲ្យ​ស្លាប់​ប្រជា​ពលរដ្ឋ​ចំនួន​៦​នាក់​ និង​របួស​ចំនួន​៤០​នាក់​នោះ។ ​នេះជា​«ព័ត៌មាន​មិន​ពិត»។​

សេចក្តី​ប្រកាស​ដដែល​បាន​ពន្យល់​បន្ត​ថា ​ក្រុម​ការងារ​ចម្រុះបាន​ចុះ​អនុវត្ត​ការ​ការ​ពារ​សន្តិសុខ​ សុវត្ថិ​ភាព​ និង​កាយ​ប្រឡាយ​ព្រំដី​ក្រវ៉ាត់​ ផល​ប៉ះពាល់​ ទប់​ស្កាត់​សកម្មភាព​កាប់​ទន្ទ្រាន​រំលោភ​យក​ដី​ធ្លី​ក្រុមហ៊ុន​ពី​សំណាក់​ជន​មួយ​ក្រុម។​

រដ្ឋបាល​ខេត្ត​ក្រចេះ​បាន​ពណ៌នា​ក្នុង​សេចក្តី​ប្រកាស​នោះ​ តាម​ន័យ​ដើម​ថា៖​ «ចំពោះ​ការ​ប៉ះ​ទង្គិច​គ្នា​នោះ​គឺ​ដោយ​សារ​ប្រជា​ពលរដ្ឋ​បាន​ប្រមូល​កៀងគរ​គ្នា​ ធ្វើ​ការ​បិទ​ផ្លូវ​ជាតិ​លេខ​៧៦​ ​ក្រុមការងារ​បាន​ធ្វើការ​សម្រប​សម្រួល សុំ​ឲ្យ​បើក​ផ្លូវ​ ប៉ុន្តែ​ប្រជា​ពលរដ្ឋ​មិន​ព្រម​ ថែម​ទាំង​បាន​ប្រើ​ប្រាស់​នូវ​ហិង្សា​មក​លើ​ក្រុម​ការងារ​ និង​សមត្ថកិច្ច​ ដោយ​ប្រើ​កាំបិត​ ពូថៅ​ ដំបង​ ដុំថ្ម​ ចំពាម​កៅស៊ូ​ កាំភ្លើង​កែច្នៃ​ ព្រួញ​ ដប​សាំង​ បាញ់​តប​មក​លើ​ក្រុម​ការងារ​ ​បណ្តាល​ឲ្យ​មាន​របួស​ក្រុម​ការងារ​ចម្រុះ​ចំនួន​៧​នាក់។​ ពេល​នោះ​ក្រុម​ការងារ​ក៏​បាន​បង្ខំ​ចិត្ត​ផ្ទុះ​អាវុធ​ឡើង​លើ​ដើម្បី​ការពារ​ខ្លួន​ ក៏ដូច​ជា​ការពារ​សុវត្ថិភាព​ជូន​ក្រុម​ការងារ​ទាំង​មូល»។​

រដ្ឋបាល​ខេត្ត​ក្រចេះ​បាន​សង្កត់​ធ្ងន់​ក្នុង​ន័យ​ដើម​ថា៖​

«ក្នុង​ហេតុ​ការណ៍​នេះ​ គឺ​ពុំមាន​មនុស្ស​ស្លាប់​ទេ​ មាន​តែ​អ្នក​របួស​៩​រូប​ ក្នុង​នោះ​ ៧​រូប​ជា​សមត្ថ​កិច្ច»។​

តែ​ទោះបី​ជា​យ៉ាង​ណា​ក៏​ដោយ គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​ បាន​អំពាវនាវ​ឲ្យ​រដ្ឋាភិបាល​បើក​ការ​ស៊ើប​អង្កេត​ជា​បន្ទាន់​ ដោយ​មាន​ការ​ចូល​រួម​ពី​អង្គការ​ក្រៅ​រដ្ឋាភិបាល​ឯករាជ្យ​ ដើម្បី​ស្វែង​រកជន​ដៃដល់​ អ្នក​បញ្ជា​ និង​អ្នក​នៅ​ពីក្រោយ​ខ្នង​ ហើយនាំយក​មក​ផ្តន្ទាទោស​ តាម​ច្បាប់​ជា​ធរមាន។​

គណបក្ស​ប្រឆាំងបាន​អំពាវនាវ​ឲ្យរដ្ឋាភិបាលដោះលែង ​ជា​បន្ទាន់​ និង​ឥត​លក្ខខណ្ឌ​នូវប្រជា​ពលរដ្ឋ​ខ្មែរ​ ដែល​ត្រូវ​បាន​ចាប់​ខ្លួន​ដោយ​កង​កម្លាំង​ប្រដាប់​អាវុធ។​

លោក​នាយ​ឧត្តម​សេនីយ៍ ខៀវ សុភ័គ ​ អ្នក​នាំពាក្យ​ក្រសួង​មហាផ្ទៃ​ បាន​ច្រាន​ចោល​សេចក្តី​ថ្លែង​ការ​ណ៍​របស់​គណបក្ស​ប្រឆាំង​ ដែល​លោក​អះអាង​ថា ​ បាន​ស្លាប់​បាត់ទៅ​ហើយ​នោះ។ ​លោក​ថ្លែង​ថា៖​

«គណបក្ស​សង្គ្រោះជាតិ​នោះ​វា​ស្លាប់​បាត់​ទៅ​ហើយ​ ដូច្នេះ​ជា​របាយ​ការណ៍​របស់​ខ្មោច​គណបក្ស​ យក​មក​គិត​គូរធ្វើអី​ បាទ។ ​ខ្ញុំ​មិនចាប់​អារម្មណ៍​នឹង​របាយ​ការណ៍​របស់​ខ្មោច​គណបក្ស​សង្គ្រោះ​ជាតិ​ហ្នឹង​ទេ​ បាទ»។​

នៅពេល​ VOA ​សួរ​លោក​ថា​ តើ​រដ្ឋាភិបាល​ផ្ទាល់​អាច​នឹង​បើក​កិច្ច​ស៊ើប​អង្កេតទៅ​ក្នុង​ហេតុ​ការណ៍​នេះ​ឬទេ​ លោក​មាន​ប្រសាសន៍​ថា​ អាជ្ញាធរ​កំពុង​ធ្វើការ​លើ​រឿង​នេះ។ ​លោក​នាយ​ឧត្តមសេនីយ៍​មិន​អាច​បញ្ជាក់​អំពី​តួលេខ​នៃ​អ្នក​ស្លាប់​ និង​របួស ទេ​ ដោយ​លោក​បាន​បង្វែរ​សំណួរ​ទៅ​លោក​អភិបាល​ខេត្ត​ក្រចេះ។​

លោក​ ស ចំរុង​ អភិបាល​ខេត្ត​ក្រចេះ​ នៅ​ប្រកាន់​ជំហរ​ការពារ​សេចក្តី​ថ្លែង​ការណ៍របស់​អាជ្ញាធរ​ខេត្ត​ តែ​លោក​មិន​ទាន់​អាច​បញ្ជាក់​អំពី​អត្ត​សញ្ញាណ​នៃអ្នក​ដែល​បាន​រង​របួស​ទាំង​ពីរ​នាក់​នោះទេ។ ​យ៉ាង​ណាក៏​ដោយ លោក​អះអាង​ថា ស្រ្តី​ដែល​រង​របួស​បាន​សុំ​ចេញ​ទៅ​ទទួល​ការ​ព្យាបាល​នៅ​ខេត្ត​កំពង់​ចាម និង​ម្នាក់​ទៀត​កំពុង​ព្យាបាល​របួស​នៅ​ស្រុក​ស្នួល។ ​លោក​បាន​បញ្ជាក់​បន្ត​ថា​ អាជ្ញាធរ​មិន​ទាន់​បាន​បញ្ជូន​ជន​ដែល​ត្រូវ​បាន​ចាប់​ខ្លួន​ចំនួន​៧​នាក់​ទៅ​តុលាការ​ទេ។​

«នៅ​ទេ​ នៅ​សួរ​នៅ​អធិការ​ស្រុក»។​

លោក​បាន​អះអាង​ថា​ មិន​មាន​ការ​បាត់​ខ្លួន​ប្រជា​ពលរដ្ឋ​នោះ​ទេ។ ​លោក​បាន​បដិសេធ​មិន​ផ្តល់​សេច​កី្ត​អធិប្បាយទៅ​នឹង​សំណួរ​ថា​ តើ​អាជ្ញាធរ​នឹង​មាន​ការ​បើក​កិច្ច​ស៊ើប​អង្កេត​ទៅក្នុង​ហេតុ​ការណ៍​ដែល​បាន​កើត​ឡើង​កាល​ពីម្សិល​មិញ​ឬ​យ៉ាង​ណា​ទេ។​ លោក​បាន​បង្វែរ​សំណួរ​ទៅ​លោក​អភិបាល​ស្រុក​ស្នួល។​ VOA ​មិនទាន់​អាច​ទទួល​បាន​លេខ​ទូរស័ព្ទ​របស់​លោក​អភិបាល​ស្រុក​ស្នួល​នៅ​ឡើយ​ទេ ​មក​ដល់​យប់​ថ្ងៃ​សុក្រ​នេះ។​

លោក​ ស៊ឹង សែនករុណា​ អ្នក​នាំពាក្យ​សមាគម​ការពារ​សិទ្ធិ​មនុស្ស​អាដហុក​ បាន​លើក​ទឹក​ចិត្ត​ឲ្យ​រដ្ឋាភិបាល​បើក​ឲ្យ​មាន​ការ​ស៊ើប​អង្កេត​មួយ​ ដែល​មាន​ការ​ចូលរួម​ពី​អង្គការ​សង្គម​ស៊ីវិល​ និង​ភាគី​ពាក់​ព័ន្ធ​ក្នុង​ហេតុ​ការណ៍​ផ្ទុះ​អាវុធ​នេះ​ ដើម្បី​ឲ្យ​សាធារណ​ជន​អស់​ក្តី​មន្ទិល​អំពី​ព័ត៌មាន​ផ្តល់​ពី​ក្រុម​ប្រជា​ពលរដ្ឋ​អំពី​ចំនួន​មនុស្សស្លាប់​ ​ដែល​អាជ្ញាធរបាន​បដិសេធនោះ។​

បន្ថែម​លើការ​អំពាវនាវ​ឲ្យ​បើក​ការ​ស៊ើប​អង្កេតការ​បាញ់​ប្រហារ​នោះ​ ​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​តាម​បណ្តឹង​រដ្ឋាភិបាល បាន​ស្នើ​ឲ្យ​បញ្ឈប់​រាល់ការ​ប្រើប្រាស់​អំពើ​ហិង្សា​តាម​គ្រប់​រូបភាពមក​លើ​ប្រជា​ពលរដ្ឋ​ខ្មែរ​ និង​ដក​ហូត​ដី​សម្បទាន​ពីក្រុមហ៊ុន​ទុច្ចរិត​ មក​ចែក​ជូន​ប្រជា​ពលរដ្ឋ​ខ្មែរ​ក្រីក្រ​ ដែល​គ្មាន​ដីធ្លី​ សម្រាប់​ធ្វើ​ផ្ទះ​សម្បែង​ និង​ស្រែ​ចម្ការ៕

XS
SM
MD
LG