អ្នកតាមដាន និងអ្នកប្រកបអាជីវកម្មនៅលើបណ្តាញសង្គមហ្វេសបុក(Facebook)បានលើកឡើងអំពីសារៈសំខាន់នៃប្រព័ន្ធសង្គមមួយនេះ និងផលប៉ះពាល់លើអាជីវកម្មរបស់ពួកគេ ប្រសិនបើបិទហ្វេសប៊ុកលែងឱ្យប្រើប្រាស់ក្នុងប្រទេសកម្ពុជា នាពេលណាមួយ។
ការពិភាក្សា រួមទាំងក្តីព្រួយបារម្ភមួយចំនួនបានកើតឡើង ក្រោយលោកនាយករដ្ឋមន្រ្តី ហ៊ុន សែន កាលពីសប្តាហ៍មុន បានព្រមានបិទហ្វេសប៊ុក ប្រសិនបើលោកចង់បិទ ស្របពេលរូបលោកផ្ទាល់ឈប់ប្រើប្រាស់បណ្តាញសង្គមមួយនេះ។ លោក ហ៊ុន សែន ឈប់ប្រើប្រាស់បណ្តាញសង្គមមួយនេះ ខណៈក្រុមប្រឹក្សាភិបាលក្រុមហ៊ុន Meta ដែលគ្រប់គ្រងហ្វេសប៊ុកបានអំពាវនាវឱ្យព្យួរគណនីហ្វេសប៊ុករបស់លោក ហ៊ុន សែន រយៈពេល៦ខែ ដោយថា វីដេអូមួយដែលបានបង្ហោះតាមទំព័រហ្វេសប៊ុករបស់លោកបានរំលោភវិធានរបស់ក្រុមហ៊ុន Meta ស្តីពីការគំរាមកំហែងហិង្សា។
ប្រធានមជ្ឈមណ្ឌលប្រជាពលរដ្ឋដើម្បីការអភិវឌ្ឍនៅកម្ពុជា លោក យង់ គិមអេង ដែលជាអ្នកប្រើប្រាស់ហ្វេសប៊ុកមួយរូប លើកឡើងថា ហ្វេសប៊ុកគឺជាប្រព័ន្ធសង្គមដែលមានប្រជាប្រិយភាពបំផុតសម្រាប់ប្រជាពលរដ្ឋកម្ពុជា ទាំងអ្នកប្រកបរបរផ្សេងៗ អ្នកសិក្សា អ្នកស្រាវជ្រាវ ហើយវាជាកន្លែងផ្តល់ចំណេះដឹង និងព័ត៌មានគ្រប់ប្រភេទ។ លោកបន្ថែមថា អ្នកប្រកបអាជីវកម្មបានប្រើប្រាស់ប្រព័ន្ធសង្គមមួយនេះ ដោយសារវាចំណេញពេលវេលា ងាយទំនាក់ទំនង និងចំណាយថវិកាតិច។
លោកថ្លែងថា៖ «ខ្ញុំមានការរីករាយណាស់ដោយសារសម្តេចនាយករដ្ឋមន្រ្តីមានប្រសាសន៍ថា លោកមិនបិទហ្វេសប៊ុកទេ អ៊ីចឹងនេះជាដំណឹងរីករាយ ហើយសង្ឃឹមថា វត្តមានហ្វេសប៊ុកជាវត្តមានមួយដ៏ សំខាន់ក្នុងការបម្រើឱ្យទាំងផ្នែកសង្គម ផ្នែកសេដ្ឋកិច្ច ក៏ដូចជានយោបាយ រួមទាំងវប្បធម៌ប្រពៃណីរបស់ប្រទេសយើង បាទ»។
ក្នុងរយៈពេល១០ឆ្នាំចុងក្រោយ ប្រព័ន្ធសង្គមហ្វេសប៊ុកត្រូវបានប្រើប្រាស់ជាបន្តបន្ទាប់ក្នុងប្រទេសកម្ពុជា ដែលរហូតមកដល់ពេលនេះមានអ្នកប្រើប្រាស់ជាង១០លាននាក់។ បន្ថែមពីការចែករំលែករឿងរ៉ាវផ្ទាល់ខ្លួន ការកម្សាន្ត និងចែករំលែកព័ត៌មាន ប្រព័ន្ធសង្គមមួយនេះត្រូវបានប្រើប្រាស់ដើម្បីរកស៊ី ក្នុងនោះមានការផ្សព្វផ្សាយលក់ផលិតផលផ្សេងៗ។
អ្នកស្រី ហួន ផល្លី អាយុ៣៣ឆ្នាំ ជាម្ចាស់សិប្បកម្មសាជីវកម្មខ្មែរ (Khmer Corp)ដែលលក់ផលិតផលស្បែកជើងដេរដោយដៃ ប្រាប់វីអូអេថា ប្រសិនបើបិទហ្វេសប៊ុកមែន វានឹងបង្កជាបញ្ហាច្រើនដល់អ្នករកស៊ី និងអ្នកបង្កើតមាតិកាផ្សេងៗ បាត់បង់លទ្ធភាពចែករំលែក និងបាត់បង់ព័ត៌មាន។ អ្នកស្រីបន្ថែមថា អ្នកស្រីប្រើប្រាស់បណ្តាញសង្គមផ្សេងៗសម្រាប់អាជីវកម្មរបស់អ្នកស្រី ប៉ុន្តែហ្វេសប៊ុកពេញនិយមជាងគេ។
អ្នកស្រីថ្លែងថា៖ «និយាយទៅក្រៅពីហ្វេសប៊ុក ក៏បងមាន Tik Tok តេឡេក្រាម អ៊ីនស្តាក្រាម ហើយលីងអ៊ីន។ និយាយទៅមានប្រើប្រាស់ច្រើនបណ្តាញ ប៉ុន្តែសម្រាប់អាជីវកម្មបងផ្ទាល់ គឺបងដាក់លក់លើហ្វេសប៊ុកបានច្រើន ជាភ្ញៀវច្រើនដែលគាត់កម្មង់តាមហ្វេសប៊ុក»។
ចំណែកអ្នកស្រី រឿន ស្រីល័ក្ខ ជាអាជីវករដែលប្រើប្រាស់ហ្វេសប៊ុក ដើម្បីលក់ផលិតផលថែរក្សាសក់ លើកឡើងថា កម្មវិធីហ្វេសប៊ុកមានគុណសម្បត្តិសម្រាប់ទំនាក់ទំនង និងអាជីវកម្ម ព្រោះហ្វេសប៊ុកមានភាពទូលំទូលាយ ហើយប្រជាពលរដ្ឋងាយស្រួលក្នុងការទាក់ទងតាមប្រព័ន្ធហ្វេសប៊ុក។ ទោះជាយ៉ាងណា អ្នកស្រីថ្លែងថា ប្រសិនបើរដ្ឋាភិបាលបិទប្រព័ន្ធសង្គមហ្វេសប៊ុក ប្រជាពលរដ្ឋនៅតែមានបណ្តាញសង្គមផ្សេងៗទៀតជំនួស ដូចជា Snapkyu 'ស្នេបគូ' និង Tamneak 'តាមអ្នក'ដែលបង្កើតឡើងដោយកូនខ្មែរ ប៉ុន្តែមិនទាន់ពេញនិយមនៅឡើយ។
អ្នកស្រីថ្លែងថា៖ «បងគិតថា បើអត់មានហ្វេសប៊ុកទេ ប្រជាពលរដ្ឋខ្មែរអាចងាកទៅគាំទ្រកម្មវិធី 'ស្នេបគូ' ក៏ដូចជា'តាមអ្នក' ដែលកម្មវិធីទាំងអស់ហ្នឹងមានមុខងារប្រហាក់ប្រហែលនឹងហ្វេសប៊ុកដែរ ថ្វីដ្បិតតែមិនទាន់ដើរលឿន ឬមិនទាន់មានមុខងារច្រើន ដូចហ្វេសប៊ុក។ តែបងគិតថា ប្រសិនបើប្រជាពលរដ្ឋងាកទៅគាំទ្រកម្មវិធីទាំងអស់ហ្នឹង វាប្រហែលជាអាច Update [ធ្វើបច្ចុប្បន្នភាព] និងធ្វើឱ្យល្អប្រសើរជាងហ្នឹង»។
ចំណែកអ្នកផលិតមាតិកាឌីជីថល លោក ជី សុផាត មើលឃើញពីសារៈប្រយោជន៍នៃបណ្តាញសង្គមហ្វេសប៊ុកសម្រាប់ប្រជាពលរដ្ឋកម្ពុជា ក្នុងការទទួលបានចំណេះដឹងនិងព័ត៌មានផ្សេងៗ។
លោកបញ្ជាក់ថា៖ «ជាធម្មតាហ្វេសប៊ុកនឹងមានព័ត៌មាន ក៏ដូចជាចំណេះដឹងច្រើន អ៊ីចឹងប្រសិនបើយើងអត់មានហ្វេសប៊ុក វាហាក់ដូចជាយើងខ្វះខាតនូវចំណុចណា មួយបន្ថែមសម្រាប់ប្រជាពលរដ្ឋរបស់យើង។ ប៉ុន្តែសម្រាប់ខ្ញុំ ខ្ញុំគិតថា ពេលដែលមានបញ្ហាណាមួយកើតឡើងចំពោះរដ្ឋាភិបាលណា... អត់មានហ្វេសប៊ុក ច្បាស់ណាស់នឹងមាន Platform (ទម្រង់ប្រព័ន្ធសង្គម)ផ្សេងទៀត ដើម្បីជួយគាត់ដដែល។ អានេះដូចជាប្រទេសណាមួយអ៊ីចឹង។ ប្រទេសខ្លះគាត់ពេញនិយម។ ប្រទេសខ្លះមិនប្រាកដថា ពេញនិយមហ្វេសប៊ុកទេ»។
គួរបញ្ជាក់ថា កាលពីថ្ងៃទី៣០ ខែមិថុនា លោកនាយករដ្ឋមន្រ្តី ហ៊ុន សែន បានលើកឡើងថា រដ្ឋាភិបាលរបស់លោកមិនបិទបណ្តាញសង្គមហ្វេសប៊ុកឡើយ ព្រោះវាជាតម្រូវការរបស់ប្រជាជនក្នុងការប្រើប្រាស់។
លោកថ្លែងថា៖ «ប៉ុន្តែខ្ញុំសូមបញ្ជាក់ថា ខ្ញុំមិនល្ងង់រហូតទៅដល់បិទបណ្តាញសង្គមដែលប្រជាជនកំពុងប្រើប្រាស់នោះទេ។ នេះជាតម្រូវការរបស់ប្រជាជន។ ខ្ញុំគ្រាន់តែបិទហ្វេសប៊ុករបស់ខ្ញុំចោលតែប៉ុណ្ណោះ ដើម្បីកុំឱ្យមានការជជែកវែកញែកតទៅទៀតទាក់ទិនជាមួយនឹងបញ្ហារឿងពាក្យសម្តីខ្លះដែលគេយកមកធ្វើជាកម្មវត្ថុនៃការពិចារណានៃក្រុមហ៊ុនហ្វេសប៊ុកតែប៉ុណ្ណោះ»។
ក្រោយឈប់ប្រើប្រាស់បណ្តាញសង្គមហ្វេសប៊ុកដែលមានអ្នកតាមដានជាង១៤លាននាក់ លោក ហ៊ុន សែន បានអំពាវនាវឱ្យប្រជាពលរដ្ឋ ជាពិសេសយុវជនដែលនិយមលេង Tik Tok ងាកមកតាមដាន Tik Tok របស់លោក ដែលលោកចាប់ផ្តើមប្រើប្រាស់ជាផ្លូវការ ចាប់តាំងពីថ្ងៃទី២៨ ខែមិថុនា ឆ្នាំ២០២៣៕
