លោកនាយករដ្ឋមន្ត្រី ហ៊ុន សែន បានព្រមានបិទប្រព័ន្ធទំនាក់ទំនងសង្គមហ្វេសប៊ុក(Facebook) ក្រោយក្រុមហ៊ុន Meta ដែលគ្រប់គ្រងហ្វេសប៊ុកកំពុងពិចារណាអំពីការព្យួរគណនីរបស់លោករយៈពេល៦ខែ ហើយការព្យួរនេះត្រូវបានចំអកដោយក្រុមជំទាស់ដែលកំពុងរស់នៅក្រៅប្រទេស។
ការព្រមានរបស់ លោក ហ៊ុន សែន ធ្វើឡើងក្រោយលោកបានសម្រេចចិត្តឈប់ប្រើប្រាស់ប្រព័ន្ធសង្គមហ្វេសប៊ុក ដែលទំព័រហ្វេសប៊ុករបស់លោកដែលមានអ្នកចុចចូលចិត្ត (Likes) ដល់ទៅជាង ១៤លាននាក់។
នៅក្នុងពិធីជួបជុំជាមួយកម្មករនៅខេត្តពោធិ៍សាត់ នាថ្ងៃសុក្រនេះ លោក ហ៊ុន សែន បានប្រកាសគោរពទទួលយកគោលការណ៍របស់ Facebook តែបានគំរាមបិទបណ្តាញទំនាក់ទំនងសង្គមដ៏ពេញនិយមមួយនេះនៅកម្ពុជា។
លោកថ្លែងថា៖ «យប់មិញនេះ ពូបាន សម្រេចលុបចោល Facebook ដែលមានមនុស្ស ១៤លាននាក់ ១៤លាននាក់ លុបចោល Facebook ហើយឃើញពួកប្រឆាំងនៅក្រៅប្រទេសកំពុងសប្បាយ។ ក៏ប៉ុន្តែអ្នកត្រូវគិត បើខ្ញុំចេញបញ្ជាបិទ Facebook នៅស្រុកខ្មែរ លោកឯងដាច់ផ្ងារ ខ្ញុំគ្រាន់តែប្រាប់លោកឯងទេ តែមិនមែនជាមធ្យោបាយ ហ៊ុន សែន ត្រូវប្រកាន់យកទេ។ តែលោកឯងកុំ កុំប្រមាថ យុទ្ធសាស្ត្ររបស់ ហ៊ុន សែន ឱ្យសោះ»។
លោក ហ៊ុន សែន បានអះអាងថា ក្រុមហ៊ុន Meta ចាប់កំហុសតែលើការថ្លែងសារនយោបាយរបស់លោក ហើយមិនអើពើពាក្យសម្តីរបស់អ្នកជំទាស់ដែលប្រើពាក្យអសុរោះមកលើលោកផងដែរ។
លោកថ្លែងថា៖ «ពួកឯងនិយាយមកអញ អសុរោះប៉ុណ្ណាទៅ? រហូតដល់ប្រមាថកូនប្រពន្ធរបស់អញថាជាជនជាតិបរទេស។ អ៊ីចឹង ពួកអាដេញ Facebook ហ្នឹង អាគោលនយោបាយ Facebook វាបានគិតទេ អាហ្នឹង?»
លោកបន្ថែមថា៖ «អាហ្នឹងបានជាខ្ញុំ រង់ចំាមើលដែរ។ Facebook គេមានគោលការណ៍របស់គេ ខ្ញុំទទួលការគោរព។ ប៉ុន្តែ Facebook មើលរំលង ទៅលើបញ្ហាមួយចំនួនដែលធ្វើខុសនឹងគោលការណ៍របស់ Facebook អ៊ីចឹងមានន័យថាម៉េច? មានន័យថាម៉េច? ប្រយ័ត្នច្របាច់ក ហ៊ុន សែន លៀនអណ្តាតខ្លួនឯង»។
កាលពីថ្ងៃព្រហស្បតិ៍ ក្រុមប្រឹក្សាភិបាលក្រុមហ៊ុន Meta បានអំពាវនាវឲ្យព្យួរគណនីហ្វេសប៊ុករបស់ លោក ហ៊ុន សែន រយៈពេល ៦ខែ ដោយលើកហេតុផលថា វីដេអូមួយដែលបានបង្ហោះតាមទំព័រហ្វេសប៊ុករបស់លោក បានបំពានវិធានរបស់ក្រុមហ៊ុន Meta ទាក់ទងនឹងការគំរាមកំហែងហិង្សាលើគូប្រជែងខាងនយោបាយ។ ក្រុមប្រឹក្សាក៏បានរកឃើញថា ក្រុមហ៊ុន Meta មានកំហុសដោយបណ្តោយឱ្យវីដេអូដែលមានរយៈពេល ១ម៉ោងនិង៤១នាទីមានវត្តមានលើ Facebook។
ក្រោយឈប់ប្រើប្រាស់បណ្តាញសង្គមហ្វេសប៊ុកដែលលោកកាន់កាប់ជាផ្លូវការតាំងពីឆ្នាំ២០១៥ លោក ហ៊ុន សែន បានស្នើឱ្យសាធារណជនកុំទទួលស្គាល់គណនីហ្វេសប៊ុករបស់លោកជាង ២០ ផ្សេងទៀត និងគណនី TikTok ជាច្រើនទៀត ដោយថាគណនីទាំងនោះជាគណនីក្លែងក្លាយ។ លោកបន្ថែមថា លោកអាចបន្តរក្សាការទំនាក់ទំនងជាមួយសាធារណជនតាមប្រព័ន្ធ Telegram និង TikTok។
នាយករងប្រចាំតំបន់អាស៊ីនៃអង្គការ Human Rights Watch លោក Phil Robertson បាននិយាយក្នុងសេចក្តីថ្លែងការណ៍មួយស្តីពីការឈប់ប្រើប្រាស់ហ្វេសប៊ុករបស់ លោក ហ៊ុន សែនថា។ «នាយករដ្ឋមន្ត្រីកម្ពុជា លោក ហ៊ុន សែន ទីបំផុតត្រូវគេដកចេញ ដោយសារប្រើប្រព័ន្ធផ្សព្វផ្សាយសង្គម ដើម្បីញុះញង់ឲ្យមានអំពើហិង្សាលើក្រុមប្រឆាំង ហើយច្បាស់ណាស់ គាត់មិនចូលចិត្តការសម្រេចចិត្តនេះទេ។ … ការប្រឈមទល់មុខគ្នារវាងក្រុមហ៊ុនបច្ចេកវិទ្យាយក្សនិងជនផ្តាច់ការ ដោយសារបញ្ហាសិទ្ធិមនុស្ស គួរតែធ្វើយូរយារមកហើយ ព្រោះមានហានិភ័យធំធេងដោយសារតែគ្រោះថ្នាក់ពិតប្រាកដជាច្រើន បណ្តាលមកពីជនផ្តាច់ការប្រើប្រព័ន្ធផ្សព្វផ្សាយសង្គម ដើម្បីញុះញង់ឲ្យមានហិង្សា ដូចយើងឃើញកើតឡើងច្រើនដងពេកហើយក្នុងប្រទេសកម្ពុជា»។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ចាត់ទុកសេចក្តីថ្លែងការណ៍របស់អង្គការឃ្លាំមើលសិទ្ធិមនុស្ស Human Rights Watch ថា ជាការនិយាយដោយបង្កប់គំនុំនយោបាយ។
លោកថ្លែងថា៖ «ទីមួយខ្ញុំមិនដឹងថា ក្រុមហ៊ុន Facebook Meta ហ្នឹងគាត់សម្រេចយ៉ាងម៉េចនោះទេ ហើយផ្អែកទៅលើមូលដ្ឋានអី អាហ្នឹងជារឿងរបស់គាត់។ ទីពីរ សម្តេចតេជោ បានជូនដំណឹង ព័ត៌មានជាសាធារណៈហើយថាគាត់មិនប្រើប្រាស់ Facebook ទៀតទេ។ គាត់ប្រើប្រព័ន្ធ Telegram ហើយនិង TikTok ដែលងាយស្រួលក្នុងការចែករំលែកព័ត៌មាន និងទំនាក់ទំនងជាមួយសាធារណជន។ ចំណែកឯការចោទរបស់ Human Rights Watch វាជារឿងធម្មតា ជាទម្លាប់នយោបាយរបស់គាត់ហើយ ដែលគាត់តែងតែចោទប្រកាន់ទៅតាមគំនុំគុំកួនផ្នែកនយោបាយដែលគាត់មានជាមួយរដ្ឋាភិបាលនៅពេលកន្លងមក»។
ការសម្រេចរបស់ក្រុមហ៊ុន Meta កើតមានឡើង ខណៈកម្ពុជានឹងមានការបោះឆ្នោតជ្រើសរើសតំណាងរាស្ត្រនៅខែកក្កដាខាងមុខនេះ ដោយគ្មានគណបក្សជំទាស់សំខាន់មួយចូលរួម។ ក្រុមអ្នករិះគន់ចាត់ទុកថា ការបោះឆ្នោតនៅថ្ងៃទី២៣ ខែកក្កដា ខាងមុខនោះ មិនអាចយកជាការបានទេ ព្រោះគ្មានគណបក្សជំទាស់ គឺគណបក្សភ្លើងទៀននៅក្នុងការបោះឆ្នោតនោះ។
បើតាមសេចក្តីពន្យល់របស់ក្រុមប្រឹក្សាភិបាលក្រុមហ៊ុន Meta វីដេអូដែលនាំឱ្យឈានទៅដល់ការព្យួរគណនីរបស់លោក ហ៊ុន សែន នោះ មានខ្លឹមសារឆ្លើយតបរបស់លោកនាយករដ្ឋមន្ត្រីនឹងការចោទប្រកាន់ថា គណបក្សប្រជាជនកម្ពុជាដែលកំពុងកាន់អំណាចបានលួចសន្លឹកឆ្នោតក្នុងអំឡុងពេលបោះឆ្នោតមូលដ្ឋានក្នុងប្រទេសនៅឆ្នាំ២០២២។
ក្នុងវីដេអូនោះ លោកនាយករដ្ឋមន្ត្រីអំពាវនាវឱ្យគូប្រជែងនយោបាយរបស់គាត់ដែលធ្វើការចោទប្រកាន់នោះ ជ្រើសរើស រវាង«ប្រព័ន្ធផ្លូវច្បាប់» និង«ដំបង»។ បើតាមក្រុមប្រឹក្សាភិបាលក្រុមហ៊ុន Meta បន្ទាប់ពីការផ្សាយផ្ទាល់កាលពីថ្ងៃទី៩ ខែមករា ឆ្នាំ២០២៣ វីដេអូនេះត្រូវបានបង្ហោះដោយស្វ័យប្រវត្តិនៅលើទំព័រ Facebook របស់លោក ហ៊ុន សែន ដែលមានអ្នកចូលមើលប្រមាណ ៦០ម៉ឺនដង៕
