ភ្ជាប់​ទៅ​គេហទំព័រ​ទាក់ទង

លោក​ អូបាម៉ា​ពុះពារ​នឹង​ការ​រិះគន់​ទៅ​លើ​ភាព​ជា​អ្នក​ដឹកនាំ​និង​គោល​នយោបាយ​សេដ្ឋកិច្ច​


លោក​ប្រធានាធិបតី​បារ៉ាក់​អូបាម៉ា​ ពេល​ថ្លែង​សុន្ទរកថា​ប្រចាំ​សប្ដាហ៍​ នៅ​ថ្ងៃ​ទី​១៣​ខែ​សីហា​ ឆ្នាំ​២០១១។​

នៅ​ក្នុង​ភាព​ចលាចល​ខាង​ទីផ្សារ​ហ៊ុន ដែល​កើត​មាន​កាល​ពី​សប្តាហ៍​មុន​ លោក​ប្រធានាធិបតី​ អូបាម៉ា​ បាន​ប្រឈម​មុខ​ទៅ​នឹង​ការ​រិះគន់​កាន់​តែ​ខ្លាំង​ទៅ​លើ​ភាព​ជា​អ្នក​ដឹកនាំ​និង​គោល​នយោបាយ​សេដ្ឋកិច្ច​របស់​លោក។​ ការ​រិះគន់​មួយ​ចំនួន​ត្រូវ​បាន​ធ្វើ​ឡើង​ដោយ​បេក្ខជន​ដំណែង​ប្រធានាធិបតី​ឆ្នាំ​២០១២​ របស់​គណបក្ស​សាធារណរដ្ឋ​ផង​ និង​ចេញ​ពី​អ្នក​កាសែត​និង​ឥស្សរជន​អាមេរិកាំង​ដើម​កំណើត​អាហ្វ្រិក​ឆ្នើមៗ​មួយ​ចំនួន​ផង។

ការ​រិះគន់​កាន់​តែ​ខ្លាំង​ទៅ​លើ​លោក​ អូបាម៉ា​ បាន​កើត​ឡើង​បន្ទាប់​ពី​ការ​សម្រុះ​សម្រួល​ដ៏​លំបាក​របស់​លោក​ជាមួយ​ក្រុម​អ្នក​សាធារណរដ្ឋ​ចំពោះ​ឳន​ភាព​និង​កញ្ចប់​នៃ​គម្រោង​កាត់​បន្ថយ​បំណុល​ក្នុង​ទឹក​ប្រាក់​ចំនួន​ ២.៤​ លាន​លាន​ដុល្លារ​ និង​ចំ​ពេល​ដែល​ទីផ្សារ​ភាគ​ហ៊ុន​ឡើង​ចុះ​ដោយ​គ្រប់​គ្រង​លែង​បាន​ បន្ទាប់​ពី​ការ​បញ្ចុះ​ពិន្ទុ​នៃ​ការ​ជំពាក់​បំណុល​របស់​សហរដ្ឋ​អាមេរិក​ ដោយ​ទីភ្នាក់ងារ​កំណត់​ពិន្ទុ​ឥណទាន​យ៉ាង​ធំ​មួយ។

ការ​រិះ​គន់​ក៏​ផ្តោត​ទៅ​លើ​អ្វី​ដែលសេដ្ឋវិទូ​ភាគ​ច្រើន​យល់​ស្រប​នោះ​ដែរ​ គឺ​ថា​កម្ម​វិធី​ជួយ​សង្រ្គោះ​សេដ្ឋកិច្ច​ចំនួន​ ៨០០​ ពាន់​លាន​ដុល្លារ​របស់​លោក​ប្រធានាធិបតី​ ដែល​អនុម័ត​ដោយ​រដ្ឋសភា​កាល​ពី​ពីរ​ឆ្នាំ​មុន​ សម្រាប់​ឆ្លើយ​តប​ទៅ​នឹង​វិបត្តិ​ហិរញ្ញវត្ថុ​និង​ដំណើរ​សេដ្ឋកិច្ច​មិន​ជឿន​លឿន​នោះ​ គឺ​មិន​គ្រប់​គ្រាន់​សម្រាប់​ការ​បង្កើន​ការ​ងារ​និង​រក្សា​បាន​នូវ​ការ​ងើប​ឡើង​វិញ​នោះ​ទេ។

ក្នុង​ចំណោម​បេក្ខជន​ប្រធានាធិបតី​របស់​គណបក្ស​សាធារណរដ្ឋ​សម្រាប់​ឆ្នាំ​២០១២​ ដែល​ស្វះ​ស្វែង​ដើម្បី​ជំនួស​លោក​ អូបាម៉ា​ នៅ​ឯ​សេតវិមាន​ លោក​ មីត​ រ៉ូមនី​ (Mitt​ Romney)​ អតីត​អភិបាល​រដ្ឋ​ ម៉ាសាជូសេត​ (Massachusetts)​ កំពុង​ប្រើ​ប្រាស់​ភាសា​ដ៏​មុត​ស្រួច​កាន់​តែ​ខ្លាំង​ឡើង​ដើម្បី​ផ្ចាញ់​ផ្ចាល​ចំពោះ​អ្វី​ដែល​លោក​ពណ៌នា​ថា​ជា​ភាព​ខ្វះ​បទ​ពិសោធន៍​របស់​លោក​ប្រធានាធិបតី។

លោក​ រ៉ូមនី​ បាន​និយាយ​ដូច្នេះ​នៅ​ឯ​កិច្ច​ពិភាក្សា​ទល់​គ្នា​របស់​បេក្ខជន​គណបក្ស​សាធារណរដ្ឋ​កាល​ពី​ថ្ងៃ​ព្រហស្បតិ៍​ ក្នុង​រដ្ឋ​ អាយអូវ៉ា​ (Iowa)។

«ខ្ញុំ​នឹង​មិន​ពិសា​អាហារ​សម្រាប់​ឆ្កែ​របស់​លោក​ បារ៉ាក់​ អូបាម៉ា​ ទេ។​ អ្វី​ដែល​លោក​បាន​ផ្តល់​ជូន​ មិន​មែន​ជា​អ្វី​ដែល​ខ្ញុំ​យក​មក​ធ្វើ​នោះ​ទេ​ ប្រសិន​បើ​ខ្ញុំ​ជា​ប្រធានាធិបតី​នៃ​សហរដ្ឋ​អាមេរិក​វិញ​នោះ»។

ការ​វាយ​តម្លៃ​ដ៏​ធ្ងន់​ធ្ងរ​បំផុត​មួយ​ចំនួ​ន​ទៅ​លើ​លោក​ អូបាម៉ា​ ផុស​ចេញ​ពី​អ្នក​កាសែត​ឆ្នើមៗ​ខ្លះ​ ដែល​ចោទ​សួរ​អំពី​សមត្ថភាព​ដឹកនាំ​របស់​លោក​ប្រធានាធិបតី​ ព្រម​ទាំង​សមានចិត្ត​ផ្ទាល់​ខ្លួន​របស់​លោក​ទៀត​ផង។

អ្នក​ធ្វើ​អត្ថាធិប្បាយ​ដទៃ​ទៀត​ ដោយ​មិន​និយាយ​ដល់​ក្រុម​អ្នក​តាក់​តែង​ច្បាប់​និយម​ឆ្វេង​ជ្រុល​នៃ​គណបក្ស​ប្រជាធិបតេយ្យ​របស់​លោក​ អូបាម៉ា​ ផង​នោះ​ បាន​ចោទ​សួរ​ពី​ការ​ប្តេជ្ញាចិត្ត​របស់​លោក​ក្នុង​ការ​ប្រឈម​មុខ​ទៅ​នឹង​អ្វី​ដែល​លោក​ប្រធានាធិបតី​ខ្លួន​ឯង​បាន​ពណ៌នា​ថា​ជា​ភាព​ដាច់​អហង្ការ​របស់​គណបក្ស​សាធារណរដ្ឋ។

ជា​ការ​ពិត​ណាស់​ លោក​ អូបាម៉ា​ មិន​មែន​ជា​ប្រធានាធិបតី​ដំបូង​បង្អស់​មក​ពី​គណបក្ស​នយោបាយ​ធំ​ណា​មួយ​ ដែល​ប្រឈម​មុខ​ទៅ​នឹង​ការ​រិះ​គន់​ខ្លាំងៗ​បែប​នេះ ​នៅ​ក្នុង​ដំណាក់​កាល​នៃ​អាណត្តិ​ដំបូង​របស់​លោក​ឡើយ។

ប៉ុន្តែ​សម្រាប់​លោក​ប្រធានាធិបតី​អាមេរិកាំង​ដែល​មាន​ដើម​កំណើត​អាហ្វ្រិក​ដំបូង​របស់​ប្រទេស​នេះ​វិញ​ ការ​ថ្លែង​កាល​ពី​ប៉ុន្មាន​ខែ​ថ្មីៗ​នេះ​របស់​ឥស្សរជន​អាមេរិកាំង​ដើម​កំណើត​អាហ្រ្វិក​ឆ្នើមៗ​ពីរ​រូប​ អាច​ជា​ការ​ទិតៀន​ដ៏​គួរ​ឲ្យ​ឈឺ​ចាប់​ជាង​ធម្មតា។

លោក​ ខ័រណែល​ វ៉េស​ (Cornel​ West)​ សាស្រ្តាចារ្យ​ដែល​និយាយ​ឥត​សំចៃនៅ​សាកល​វិទ្យាល័យ​ ព្រីនស្តុន​(Princeton​ University)​ បង្ក​ឲ្យ​មាន​ភាព​ចម្រូង​ចម្រាស់​កាល​ពី​ដើម​ឆ្នាំ​នេះ​ ដោយ​និយាយ​ថា ​លោក​ អូបាម៉ា​ ស្ថិត​នៅ​ក្នុង​គ្រោះថ្នាក់​«អាច​ក្លាយ​ទៅ​ជា​អ្នក​តំណាងមុខ​មាត់​ស្បែក​ខ្មៅ​ម្នាក់​ទៀត​របស់​មហទ្ធជន​នៃ​សង្កាត់​ពាណិជ្ជកម្ម​វ័លស្ទ្រីត​ (Wall​ Street)»។

ការ​អធិប្បាយ​នេះ​គឺ​សំដៅ​ទៅ​រក​ការ​រិះគន់​ដែល​ថា​លោក​ អូបាម៉ា​ មាន​ភាព​ជិត​ស្និទ្ធ​ខ្លាំង​ពេក​ទៅ​នឹង​ធនាគារ​និង​អ្នក​មាន​ឥទ្ធិពល​ដទៃ​ទៀត​នៅ​វ៉លស្ត្រីត ក្នុង​ពេល​ដែល​លោក​ព្យាយាម​ជំរុញ​ឲ្យ​មាន​ការ​ងើប​ឡើង​ខាង​សេដ្ឋកិច្ច​និង​ការ​បង្កើន​ការងារ​ជាដើម។

ការ​រិះ​គន់​ផ្សេង​ទៀត​បាន​លេច​ចេញ​មក​ពី​តួអង្គ​ដ៏​ល្បី​តាម​កញ្ចក់​ទូរទស្សន៍​ជាតិ​អាមេរិកាំង​ដើម​កំណើត​អាហ្វ្រិក​ គឺ​លោក​ ថាវីស​ ស្មាយលី​ (Tavis​ Smiley)​ ដែល​បាន​ធ្វើ​ដំណើរ​ទូទាំង​ប្រទេស​ជាមួយ​លោក​ វ៉េស​ ក្នុង​ដំណើរ​ដែល​លោក​ ស្មាយលី​ ហៅ​ថា «ទស្សនកិច្ច​ពិនិត្យ​មើល​ពី​ភាព​ក្រីក្រ»​ដើម្បី​ធ្វើ​ឲ្យ​លោក​ អូបាម៉ា​ «មាន​ការ​ទទួល​ខុស​ត្រូវ»។

នៅ​ពេល​ត្រូវ​បាន​សួរ​អំពី​ការ​រិះគន់​បែប​នេះ​ក្នុង​អំឡុង​ពេល​ធ្វើ​សន្និសិទ​សារព័ត៌មាន​កាល​ពី​ពេល​ថ្មីៗ​នេះ​ លោក​ ចេ​ ខារនី​ (Jay​ Carney)​ លេខាធិការ​ទទួល​បន្ទុក​សារព័ត៌​មាន​របស់​សេតវិមាន​ បាន​ថ្លែង​ថា​ លោក​ អូបាម៉ា​ មិន​គ្រាន់​តែ​ផ្តោត​ទៅ​លើ​ការ​ធ្វើ​ឲ្យ​ប្រសើរ​ឡើង​នូវ​សេដ្ឋកិច្ច​ជា​រួមប៉ុណ្ណោះ​ទេ​ ប៉ុន្តែ​ថែម​ទាំង​ផ្តោត​ទៅ​លើ​អ្នក​ដែល​កំពុង​ត្រដាប​ត្រដួស​បំផុត​ទៀត​ផង។

«ប្រធានាធិបតី​រូប​នេះ​បាន​ផ្តោត​យ៉ាង​ខ្លាំង​ទៅ​លើ​ជន​ជាតិ​អាមេរិកាំង​ទាំង​ឡាយ​ណា​ ដែល​កំពុង​រង​នូវ​ការ​ឈឺ​ចាប់​ក្នុង​អំឡុង​ពេល​សេដ្ឋកិច្ច​មាន​ភាព​ចលាចល​ និង​គោល​នយោបាយ​ដែល​លោក​បាន​ចូល​រួម​បង្កើត​និងជំរុញ​ទៅ​មុខ​ បាន​គិត​ពិចារណា​យ៉ាង​ហ្មត់ចត់​ណាស់​ ទៅ​លើ​អ្នក​ដែល​ទទួល​ផល​ប៉ះពាល់​ធ្ងន់ធ្ងរ​បំផុត»។

ទោះ​បី​ជា​មាន​ការ​រិះគន់​ពី​សំណាក់​ជន​ជាតិ​អាមេរិកាំង​ដើម​កំណើត​អាហ្វ្រិក​ដ៏​ល្បី​ល្បាញ​ទាំង​ពីរ​រូប​នេះ​ក៏​ដោយ​ ក៏​ការ​គាំទ្រចំពោះ​លោក​ អូបាម៉ា​ ក្នុង​ចំណោម​ជន​ជាតិ​អាមេរិកាំង​ដើម​កំណើត​អាហ្វ្រិក​នៅ​តែ​រឹងមាំ​ដដែល​ បើ​ទោះ​ជា​ការ​ស្ទង់​មតិ​ថ្មីៗ​នេះ​បង្ហាញ​ឲ្យ​ឃើញ​សញ្ញា​ថា​ ការ​គាំទ្រ​បែប​នោះ​អាច​កំពុង​ចុះ​ខ្សោយ។

ក្រុម​មន្ត្រី​សេតវិមាន​មាន​ប្រសាសន៍​ថា​ លោក​ប្រធានាធិបតី​នៅ​តែ​ផ្តោត​ទៅ​លើ​ផល​ប៉ះពាល់​ដែល​វិបត្តិ​ហិរញ្ញវត្ថុ​បាន​បង្ក​ទៅលើ​ស​ហគមន៍​ពលរដ្ឋ​អាមេរិកាំង​ដើម​កំណើត​អាហ្វ្រិក​និង​ជន​ជាតិ​ភាគ​តិច​ផ្សេងៗ​ទៀត​ ដែល​នេះ​ជា​ចំណុច​រំឭក​ឡើង​វិញ​កាល​ពី​ខែ​កក្កដា​ នៅ​ពេល​ដែល​លោក​បាន​ជួប​ជាមួយ​លោក ម៉ាស​ ម៉ូរ៉ល​ (Marc​ Moral)​ ប្រធាន​សម្ព័ន្ធ​ទី​ក្រុងរបស់ប្រទេស​ (National​ Urban​ League)។

«អត្រា​អត់​ការងារ​ធ្វើ​របស់​ជន​ជាតិ​ស្បែក​ខ្មៅ​នៅ​តែ​បន្ត​កើន​ឡើង​ បើ​ទោះ​ជា​អ្នក​បាន​បង្កើត​ការងារ​នៅ​ក្នុង​វិស័យ​ឯកជន​យ៉ាង​ណា​ក៏​ដោយ»។

ដោយ​មាន​ការ​ឈប់​សំចត​កាល​ពី​ពេល​ថ្មីៗ​នេះ​នៅ​ពាស​ពេញ​ប្រទេស​ នៅ​ក្នុង​យុទ្ធនាការ​រៃ​អង្គាស​ប្រាក់ ​និង​ដំណើរ​ទស្សន​កិច្ច​តាម​រថយន្ត​ក្រុង​នៅ​រដ្ឋ​ចំនួន​បី​នៅ​សប្តាហ៍​ក្រោយ​ ដែល​ស្ថិត​នៅ​ក្នុង​សហរដ្ឋ​អាមេរិក​ភាគ​កណ្តាល​និង​ខាង​លិច​ លោក​ អូបាម៉ា​ កំពុង​ពង្រឹង​ការ​ឆ្លើយ​តប​និង​ការ​ពន្យល់​របស់​លោក​ស្តី​ពី​គោល​នយោបាយ​របស់​លោក។

នៅ​ឯ​រោងចក្រ​ផលិត​អាគុយ​មួយ​ក្នុង​រដ្ឋ​ មីឈីហ្គិន​ (Michigan)​ កាល​ពី​សប្តាហ៍​កន្លង​ទៅ​ លោក​បាន​ទទួច​សុំ​ឲ្យ​ពលរដ្ឋ​អាមេរិកាំង​ដាក់​សម្ពាធ​ទៅ​លើ​សមាជិក​រដ្ឋសភា​ ដើម្បី​បញ្ឈប់​អ្វី​ដែល​លោកបាន​ពណ៌នា​ថា​ជា​ភាព​ប្រកាន់​គណបក្ស​និង​ភាព​គាំង​ស្ទះ​ ដែល​លោក​មាន​ប្រសាសន៍​ថា​បាន​ធ្វើ​ឲ្យ​បាត់​បង់​សេចក្តី​ទុក​ចិត្ត​របស់​សាធារណជន៕

ប្រែ​សម្រួល​ដោយ​ លី សុខឃាង

XS
SM
MD
LG